மின்மினி

செம்மொழிப் பூங்காவுக்கு ஒரு விசிட்!

2010-12-29T19:11:00.018-05:00

'எட்டு கோடி ரூபாயில்..சுமார் எட்டு ஏக்கரில் (7.94 ஏக்கர்) ஊருக்கு மத்தியில் சென்னையில் ஒரு பூங்கா'ன்னு விளம்பரம்.. சன் டிவியில் மக்கள் கூட்டத்தை வேறு காட்டினார்களா.. ஒரு நடை போயிட்டு வந்திடனும்னு தோணிச்சு. தவிரவும், ப்லாக் பக்கம் வந்து ரொம்ம்ம்ப்ப்ப நாளாச்சா..இதையும் ஒரு பதிவா போட்டு கணக்கையும் புதுப்பிச்சிரலாம்னு முடிவு பண்ணி போயாச்சு..

பரபரப்பான சாலையில்..வாகனப் புகைகளுக்கு மத்தியில்...சட்டென்று ஒரு பசுமைக்கான இடம்... நிஜமானத் தேவைதான். முன்னாள் உட்லண்ட்ஸ் 'ட்ரைவ்-இன்' போய் வந்தவர்கள், அந்தத் தனிமை இழப்பை உணரக் கூடும்.

கார் நிறுத்த 3 மணி நேரத்திற்கு பத்து ரூபாயும், இரண்டு சக்கர வாகனத்திற்கு 5 ரூபாயும் வசூலிக்கிறார்கள். மேலதிக ஒவ்வொரு மணி நேரத்திற்கும், கூடுதல் 5 ரூபாயாம்.

கட்டணம் கண்டிப்பாய்த் தேவைதான், 5 ரூபாய் என்பது குறைவுதான். குறைந்தபட்ச கட்டணம் 10 ரூபாய் என்று கூட வைத்திருக்கலாம். 10 வயதிற்குட்பட்ட குழந்தைகளுக்கு இலவசம், என்பது வரவேற்கத்தக்கது.

நிறையப் பூங்காக்களைப் பார்த்ததின் எண்ணச்சிதறலோடு, எட்டு கோடியும், எட்டு ஏக்கரும் ஏற்படுத்திய எதிர்பார்ப்போடு காரை நிறுத்திவிட்டு உள்ளே நுழைந்தேன். 'செம்மொழிப் பூங்காவின் வாயில் முகப்பு' அழகு. 'செம்மொழிப் பூங்கா' என்று எழுதிய எழுத்து சற்று வித்தியாசமாய் இருக்கவே, வரலாற்றுப் பாணியோ என்று எண்ணினேன், அப்புறம்தான் தெரிந்தது, அது கலைஞரின் கையெழுத்து வடிவாம். 'இந்த வயதிலும் கலைஞரின் தெளிவும்/உழைப்பும் வியக்கத்தக்கதுதான்' என்று எண்ணிக்கொண்டே உள்ளே நுழைந்தேன்.

முகப்பு நன்றாய்ப் பசுமையாய் வடிவமைக்கப்பட்டு இருக்கின்றது. நிறைய மக்கள் புகைப்படம் எடுத்துக் கொண்டிருந்தார்கள்.

உள்ளே நுழைந்ததும், சாரலாய்த் தூறல் விழுந்தது... உபயம்..பக்கத்திலிருந்த நீர்வீழ்ச்சி. எதிர்புறத்திலும் சிறுகுளம் கட்டி நீர் விட்டிருந்தார்கள். நவம்பர் 23, 2010 அன்றுதான் திறந்திருக்கிறார்கள், இன்னமும் சில வேலைகள் நடந்து கொண்டிருக்கின்றன. Musical fountain-க்கான வேலைப்பாடுகள் நடந்து கொண்டிருந்தன. இன்னும் ஓரிரு நாளில் ரெடியாகிவிடுமாம். பூங்கா திறந்து ஒரு மாதம்தான் ஆகியிருக்கின்றது, அதற்குள் குளத்தின் உட்புறம் பாசி படியத்துவங்கிவிட்டது. வருகின்ற குழந்தைகள், அதில் கை வைத்து விளையாடும்போது.. 'அது நல்ல தண்ணியா..கை வைக்காதே' போன்ற குரல்கள் பெற்றோரிடமிருந்து...

பூங்கா உள்நுழைந்த இடப்புறமே, குழந்தைகள் விளையாட்டு மைதானம் அமைக்கப்பட்டு இருக்கின்றது. இன்னும் கொஞ்சம் தள்ளி, பூங்காவின் மையத்தில் வைத்திருக்கலாம். உள்ளே நுழைகின்ற கூட்டம், இங்கேயே தங்கிவிடுவதால், புதிய பார்வையாளர்கள் உள்ளே நுழையத் தாமதாமாகிறது. புதிய பூங்காவாக இருப்பதாலும், பள்ளி விடுமுறையாக இருப்பதாலும் இந்தச் சிரமம் இருக்கலாம். மேலும், எட்டு ஏக்கர் பூங்காவில், இது ஒரே ஒரு ஆடுகளம் மட்டுமே.

குழந்தைகளுக்கான விளையாடுகளமாயிருந்தாலும், சில 'பெருங்' குழந்தைகளும் அதைப் பயன்படுத்திக் கொண்டிருந்தார்கள். மேற்பார்வைக்கு யாரும் இல்லை. குழந்தைகள் அவர்களாகவே வரிசையில் வந்தது அழகு.

பூங்காவைச் சுற்றி வருவதற்கென கற்களால் அமைக்கப் பெற்ற பாதை, மேடு பள்ளங்களுடன் சமமில்லாமல் அகன்ற இடைவெளி விட்டு இருந்தது. அகன்ற இடைவெளி ஊடே புற்கள் வைக்கத் திட்டமாய் இருக்கலாமோ? ஊரினுள் ஆங்காங்கே இருக்கும் 'லோக்கல்' பூங்காக்களின் நடைபாதைகள் கூட அழகாய் இருக்க, 'உலகத்தரம் வாய்ந்தாய் விளம்பரப்படுத்தப் படுகின்ற 'செம்மொழிப்பூங்கா' மேடுபள்ளத்தோடு இருப்பது அழகல்ல. சம்பந்தப்பட்ட அதிகாரிகள் கவனித்தால் நலம். நடைப்பயிற்சிக்கென வருபவர்களிடம் மாதம் ரூபாய் 150 வசூலிக்கப்படுவதைக் கொண்டு கூட சிறப்பாக வைத்திருக்கலாம்.

கூடுமானவரையில் எல்லாச் செடிகளுக்கும் பெயர் எழுதி வைத்திருக்கிறார்கள். சிறு செடிகளுக்கான பெயர்ப்பலகைகள், மண்ணில் ஊன்றப் பட்டு இருந்தன. இந்தப் பலகைகள் எத்தனை நாள் நீடிக்குமோ? முகப்பில் பூத்திருந்த சிறுசிறு மலர்கள் நன்றாயிருந்தன.

ஆங்காங்கே நீர்வீழ்ச்சிக்கென நீர்நிலைகளும், தொட்டிகளும் கட்டப்பட்டு இருந்தாலும், முழுமையாய் இன்னமும் செயல்படவில்லை. இருந்த நீர்நிலைகளில், நீரும் குறைவு, தூர்வாரப்படாமல் சேறும் சகதியும்தான் கண்ணில் தெரிந்தது. வாத்துக்களும் கூட, ஒற்றைக் காலில் தவம் புரிந்து கொண்டிருந்தன. பார்த்துக் கொண்டிருந்த பார்வையாளர்களிடம், 'என்ன இப்படி வச்சிருக்காங்க'ன்கிற 'கமெண்டுக'ளைக் கேட்க முடிந்தது.

மூங்கில் பூங்காவும், போன்சாய் மரங்களும் வைத்திருக்கிறார்கள். நல்ல விஷுவல். ஆங்காங்கே, சிறு படர்கொடி மண்டபங்கள் கட்டியிருக்கிறார்கள், இனிதான் கொடிகள் வளரவேண்டும். வருகின்ற மக்கள் கூட்டம், செடிகளைச் சேதப்படுத்தாமல் இருக்க வேண்டும்.

திறந்தவெளி அரங்கும் உள்ளே அமைத்திருக்கிறார்கள். இதற்கான பிரத்யேக வாடகை ரூபாய். 15 ஆயிரமாம். இப்போதைக்கு பார்வையாளர்கள் கூடுமிடம் இதுதான். மிகச் சிற்சில இடங்களிலேயே பார்வையாளர் இருக்கைகள் அமைக்கப் பட்டிருக்கின்றன. இன்னமும் நிறைய அமைக்கப் பெறலாம். நறுமண மலர்கள், வண்ணத்துப் பூச்சிகள் இருப்பதாய்ப்/பறப்பதாய் வர்ணனைகள்/விளம்பரங்கள் கொடுக்கப்பட்டாலும், அதை உணர முடியவில்லை. SLR-காமிராவுடன் வந்திருந்த பார்வையாளர் ஒருவர், 'ச்சே..சூப்பரா இருக்கும்னு நினைச்சு வந்தேண்டா'ன்னு புலம்பியதைக் கேட்க முடிந்தது. செடிகள் எல்லாம் இப்போதுதான் வைக்கப்பட்டு இருப்பதால், இன்னும் சில மாதங்கள் ஆகலாம், அப்பார்வையாளரின் எதிர்பார்ப்பு நிறைவேற..

பூங்காவின் முகப்பில் காணப்பெற்ற பசுமையும், ஈரப்பசையும் பூங்காவின் உட்புறம் உணரமுடியவில்லை. நிறையப் பராமரிப்புத் தேவைப்படும்/படுகின்றது. போகப்போகத்தான் தெரியும், எப்படிச் செய்யப் போகிறார்கள் என்பது.

'எட்டு ஏக்கர்...எட்டு கோடிக்கு இவ்வளவுதான் செய்யமுடியுமா என்ற பொதுஜன ஏக்கத்தோடு பூங்காவைச் சுற்றிப்பார்த்து, வெளியேற , பூங்காவின் முகப்பிற்கு வருகையில், மேலே பார்த்தால் 'நன்றி...மீண்டும் வருக' என்றிருக்கும் என்று நினைத்தால், 'டாக்டர் கலைஞர் வாழ்க' என்றிருக்கிறது. 'ம்ம்ம்.... '...என்று அசைபோட்டுக் கொண்டே வெளியே வந்தேன்..

என்ன இருந்தாலும், நகருக்கு மத்தியில் இப்படியொரு பூங்கா...உண்மையிலேயே வரவேற்கத்தக்க முயற்சிதான்!

சென்னை மக்களே உஷார்..

2009-10-30T06:22:00.002-04:00

சென்னையிலுமா இப்படி?

இசையால் வசமான 'ஆஸ்கார்'

2009-02-23T23:42:00.003-05:00

எத்தனைத் திரையுலக நட்சத்திரங்களின் கனவு….ஆஸ்காரிற்கான கதவினை 'கமல் திறந்து வைப்பாரா..அமீர்கான் திறந்து வைப்பாரா..என்று ஏக்கப்பட்டு, 'ஆஸ்கார்' ! பரிந்துரை செய்யப்பட்டாலேயே கொண்டாடிய காலங்கள் நினைவிலேயே இருக்கின்ற பொழுதினிலேயே....இன்று நனவாய்…! Great AR Rahman!!!

பதட்டமாய் இருந்தது பரிசுபெற்ற படைப்பாளி மட்டுமல்ல.. இந்தியத் திரையுலகின் அபிமானிகளும்தான்..

உழைப்பிற்கும், தொழிலின் நேசிப்பிற்கும், திறமைக்கும் கிடைக்க வேண்டிய பரிசு… சரியான தருணத்தில் கிடைப்பதற்கும் கடவுளின் ஆசி வேண்டும். ரஹ்மானுக்கு அது எட்டியிருக்கின்றது!

மெல்லிசையால் தமிழனைத் தன்பால் ஈர்த்தவர் எம்எஸ்வி

இன்னிசையால் இந்தியனையும் தன்பால் ஈர்த்தவர் இளையராஜா

தன்னிசையால் அகில உலகினையும் இந்தியத்தமிழன்பால் ஈர்த்தவர் ரஹ்மான்!

இதில் இவருக்கில்லாமல் அவருக்கா..அவருக்கில்லாமல் இவருக்கா என்று மாற்றாந்தாய் மனப்பான்மையோடு வேறுபடுத்திப் பார்க்கமல், எல்லோரும் ஒரே தமிழ்க்குடும்பம்தான் என்ற நோக்கில் ஒன்றுபட்டு ரஹ்மானைப் பாராட்டுவோம்…!

இசைப்புயலே..இந்தக் கிரீடம் முள்கிரிடமாய் மேலும் பல பொறுப்பினைக் கொடுத்து முடக்கிவிடாமல், மலர்க்கீரீடமாய் மேலும் பல மெல்லிசை பரப்ப வாழ்த்துக்கள்!

லண்டனிலே குண்டனுக்கு - பாகம் 2

2008-07-07T13:04:00.012-04:00

புதுசா படிக்கிறவங்க முழிக்காதீங்க.. முதல் பாகத்தைப் படிச்சுட்டு வாங்க. Kளிக்குக

தேம்ஸ் நதிக்கரைங்கிறது ஒரு விசேஷம்தாங்க. சென்னைல 'சும்மா..சும்மா' இங்கிலிபிசுல பேசுறவங்கள, என்னடா ரொம்ப 'பீட்டர் உடுறே' ம்பாங்க.. அதுமாதிரி திருநெவேலில நாங்க படிக்கிற காலத்துல, 'தேம்ஸு' வர்ராண்டாம்போம். தேம்ஸுன்னா தொரைன்னு அர்த்தம். அந்தத் தேம்ஸுல போகப்போறோம்டான்னு பேசிக்கிட்டே, 'Ferry'-க்காக காத்திருந்தோம். அப்ப வலது பக்கம் திரும்பிப் பார்த்தா, இந்த 'டால்ஃபின் பொண்ணு, டால்ஃபின்னோட சேர்த்துத் துள்ளிக்கிட்டு இருந்தா. UK -ல அங்கங்க இதுமாதிரி ஏதாவது ஒரு சிலையை வச்சு, அந்த இடத்துக்கு ஒரு க்ரியேட்டிவிட்டி கொடுத்துராங்க.

வார போற மக்கள், அங்க நின்னு ஒரு 'க்ளிக்'கிட்டு போக வசதியாக. நம்மள ஆண்ட இந்த மக்கா கிட்டதான், நாமளும் இந்த சிலைக் கலாச்சாரத்தக் கத்துக்கிட்டோம். ஆனா, என்ன நம்ம குறைன்னா, இது மாதிரி வித்தியாசமா அந்தச் சிலை இல்லாம, ஏதாவது ஒரு கட்சித்தலைவர்கள் சிலையா நிறுவி வைக்கிறதுனாலயோ என்னவோ, மக்களுக்கு அதுக்குக் கீழ நின்னு போட்டோ எடுக்கத் தோணாம, காக்காதான் நின்னுகிட்டு இருக்குது.
அவ்வளவு பெரிய விசாலமான நதியில, Ferry - சவாரி சுகமாத்தான் இருந்தது. (நம்ம ஊரு கல்கத்தாவில கூட ஹீப்ளில போக நல்லாயிருக்கும்ங்க). தண்ணிதான் ரொம்பப் பழுப்புக் கலர்ல இருக்கும், நயாகரா மாதிரி இல்லாம. தேம்ஸீக்குள்ள இருந்துகிட்டு ஊரப் பார்க்குறது நல்லாவே இருந்தது. பக்கத்துல பார்க்குறதுதான், லண்டன் மேயரோட அலுவலகமாம். முட்டை வடிவிலே இருக்குது. பெர்ரில கமெண்டு கொடுத்துட்டே வர ஒரு வழிநடத்துனரும் இருப்பாரு. நல்லா ஜாலியா, எதையாவது சொல்லிக்கிட்டே வருவாரு. (நமக்குப் புரிஞ்சா!!!?). கொஞ்சம் பேரு காது கொடுத்துக் கேட்பாங்க, நிறையப் பேரு ஊரப் பார்த்துகிட்டு போட்டோ எடுத்துட்டு இருப்பாங்க. கொஞ்சம் பேரு, அலைஞ்ச அலைச்சலுக்கு காலுக்கு ஓய்வு கொடுத்து பராக்குப் பார்த்துட்டு இருப்பாங்க. எப்படியானாலும், ferry ride - மிஸ் பண்ணக்கூடாத ஒன்னு.

வரிசையா நிறைய பாலங்களைக் கடந்து போயிக்கிட்டே இருந்தது, ஒவ்வொரு பாலத்துக்கும் ஒருஒரு கதை சொல்லிக் கிட்டே வந்தார் நம்ம பாலையா, அதாங்க கைடு. கட்டிடக்கலை அசரவைக்கிற ரகம்தான். இன்னொரு படம் பக்கத்தில பாருங்க, வளைவுகளோடு அழகாய். 'London Eye'ன்னு சொல்லக்கூடிய, லண்டனை முழுசும் பார்க்கக் கூடிய ஒரு பெரிய ராட்டினம்தான் கீழே பார்க்கக் கூடியது. இது மேல போய்ப் பார்க்கணும்னாலும் காசுதான், british airways-laஇருந்து ஓட்டிட்டு இருக்கிறாங்க இந்த வீலை. நல்ல லாபத்தைதான் கொடுத்துக்கிட்டு இருக்கு.

தேம்ஸில ஒரு ரவுண்டு போய்வர கிட்டத்தட்ட முப்பது நிமிடங்களாச்சு, மணியப் பார்த்தா, ஒரு மணியாகிட்டு இருந்தது. அடுத்து எங்கடா போகலாம்னு பசங்ககிட்ட கேட்டா, 'அண்ணா..வவுத்துல மணியடிச்சுடுச்சுன்னா, சாப்பிடப் போலாம்ணா'ன்னான் குண்டன்.. பசியாளிங்க இந்திய உணவு வகைதான்னு வேணும்னு கேட்க.. சரின்னுட்டு எல்லாரும் நடக்க ஆரம்பிச்சோம்.

- இன்னும் வரும். மிச்சத்தை சாப்பிட்டுச் சொல்லவா?

(PIT - July'08-க்கான படம் பார்த்தீங்களா?)

Expiring XP...Waving Vista

2008-06-30T13:03:00.003-04:00

நண்பர் சர்வேசன் போனவாரம் பில்கேட்சின் 'Last day at work' பற்றி எழுதியிருந்தார். ஆனா மக்கள்கிட்ட ஒரு பெரிய ரியாக்சன் இருந்ததா தெரியவில்லை. மிகச் சொற்பமான பின்னூட்டங்களே. No Big impact!!!???
கணிணியை எளிமைப் படுத்தியது, media oriented stuff-ஐப் புகுத்தி எல்லோரிடையேயும் கணிணி உபயோகிக்க ஆர்வப்படுத்தியது என பல்வேறுவிதங்களில் , கணிணியை எல்லா வீடுகளுக்கும் கொண்டு சேர்த்த பெருமை அவருக்குத்தான் சேரும். I subscribe to the words of Surveysan 'IT would have taken a different route without the inspiring works of billG.'.

அது ஒரு பக்கம் இருக்கட்டும், இப்ப புதுசா வந்திருக்கின்ற தகவல்.. XP-ய நிறுத்திட்டு, Vista -வுக்கு வழிகொடுக்கிறதா மைக்ரோசாஃப்ட் நிறுவனம் அறிவித்திருக்கின்ற அறிவிப்பு. என்னைப் பொறுத்தவரையில், XP is more stable than Vista. 'ஆளப் பாத்தா அழகுபோல..வேலையப் பாத்தா சரியில்லையே'ங்கிற மாதிரிதான் Vista இருக்கு. Vista-வில இன்னும் தீர்க்கப்பட வேண்டிய பிரச்னைகள் நிறைய இருக்குதுன்னு தெரிஞ்சுமே கூட, இது மாதிரியான அறிவிப்பு வெளியிடுவது மிரட்டிற மாதிரி இருக்கு. இந்த முடிவுகள் BG இருக்கிறப்பவே எடுத்து, வெளியேறின பிறகு வெளிவந்திருக்கலாம்..ஆனாலும் இது சரியில்லை...

நன்றி சொல்ல உனக்கு..வார்த்தை இல்லை எனக்கு

2008-06-29T12:33:00.004-04:00

'நட்சத்திர ஜன்னலில் வானம் எட்டிப் பார்த்தது'ன்னு தொடங்கின நம்ம நட்சத்திர வாரம் முடிவடைகிற தருணம். 'நன்றி சொல்ல உனக்கு..வார்த்தை இல்லை எனக்கு' ன்னு தமிழ்மணத்திற்கும், தமிழ் வாசகர்களுக்கும் நன்றியினைச் சொல்லிக்கொள்ள ஆசை. சில புதிய நட்புகள் இதன் மூலம் பரிச்சயமாகியிருக்கின்றன. அது தொடரவும் ஆசை.

இருந்தது ஒரு வாரம்.. கழிந்தது சீக்கிரம். தனியாய் எழுதிக் கொண்டிருப்பதற்கும், நட்சத்திரமாய் எழுதியதற்கும் நிறையவே வித்தியாசம். தனியாய் எழுதிய போது, தமிழ்மணத்திலேயே லிஸ்ட் ஆன போதும் கூட, படிக்கின்ற வாசகர்களைச் சென்றடைகின்ற வட்டம், நட்சத்திர வாரத்தில் விசாலமாகிறது. நிரந்தரமாய் நட்சத்திர நாற்காலியில் வாரம் முழுக்க நிரந்தரமாய் உங்கள் இடுகைகள் அலங்கரிக்கின்ற போது, படிக்கின்ற வாசகர்கள் ஒரு முறையேனும் 'க்ளிக்கின்ற' வாய்ப்புகள் அதிகம்தானே! இந்த ஒரு வாரத்தில் மட்டும் 2000+ ஹிட்கள். நன்றி தமிழ்மணத்திற்கு.

பண்டைய காலத்தில் காலத்துக்கும் பறைசாற்றவல்ல தகவல்களை எல்லாம் எழுத்துக்கள் கல்வெட்டில் பொறிக்கப்பட்டு, பார்வையில் வைத்திருப்பதைக் கண்டிருக்கின்றோம். இந்தக் காலத்தில், அறிவியல் வசப்பட்டுக் கொண்டிருக்கின்ற உலகில், இணையத்தில் எழுதப் படுகின்ற எழுத்துக்களும், ஒரு வகையில் நமது கால பரிமாற்றத்தினைக் குறிக்க வல்லதுதான். சுலபமாய் தகவல் தளமாகிக் கொண்டிருக்கின்றது.

நல்லவனுக்கும் பேனா கிடைக்கிறது.. கெட்டவனுக்கும் பேனா கிடைக்கிறது. எழுதுகின்ற மையும் ஒன்றுதான். ஆனால், அவரவர் சிந்தனையால் எழுதுகின்ற எழுத்தின் நிறம் மாறுகிறது. நல்லன அல்லாதவைகளை எழுதாதே என்று யாரையும் கட்டிப் போட்டுவிட முடியாது. 'திருடனாய்ப் பார்த்து திருந்தாதவிட்டால்..' கதைதான் அது. ஆகையால், அதனை நிறம் பிரிக்கும் தன்மையை வாசகர்கள் வளர்த்துக் கொள்ள வேண்டும் என்று சொல்வதைத் தவிர அதற்குத் தீர்வு கிடையாது. வேண்டிய நேரத்தில் தவறான எழுத்துக்களுக்கு கண்டிப்புக் காட்டவும் தயங்கக் கூடாது.

நம்முடைய எழுத்துக்கள் கல்வெட்டுக்குப் போகிறதோ இல்லையோ, ஆனால் தீய சிந்தனைகளை விதைக்காமல், தீர்வுதரும் சிந்தனைகளையும் நற்பண்புகளையும் விதைப்பதாய் இருக்கவேண்டும். நிறைய புதிய முகங்கள் எழுத வருகிறார்கள்.. அவங்க உட்பட எல்லோருக்கும் எனது வேண்டுகோளிது. உங்கள் எழுத்துக்கள், உங்களின் அறிவு முதிர்வைக் காட்ட வேண்டும், அப்படி இல்லாமல் எழுதப்படுகின்ற எழுத்துக்களை மெத்தப் படித்த மேதாவி எழுதினாலும், அது சின்ன எழுத்துதான். 'வெள்ளத்தனையது நீர்மட்டம்'னு வள்ளுவப் பெருந்தகை சொல்லியிருக்கிறார். நம் உயர்வைக் காட்டுவதாய் இருக்கட்டும் நம் எழுத்துக்கள்!

நட்சத்திர வாரத்தில் என்னோட பதிவுகளை படித்த அன்பு நெஞ்சங்களுக்கும், ஆர்ப்பரிக்கும் பின்னூட்டமிட்டு அன்பினைக் காட்டிய அருமை வாசகர்களுக்கும், வாய்ப்பளித்த தமிழ்மணத்துக்கும் மிகப்பெரிய நன்றி சொல்லி..

நட்சத்திர வாரத்துக்கு டாட்டா சொல்கிறேன்....இந்த வாரத்தில எழுதணும்னு நினைச்சு, நேரமில்லாமையால் எழுதாமப் போன பதிவுகள் இன்னும் கொஞ்சம் இருக்கு.. இந்த உந்துதல்லேயே.. அதனையும் தொடர விழைகிறேன்... எதிர்பார்த்து இருங்க!

லண்டனிலே குண்டனுக்கு...பாகம் - 1

2008-06-28T13:18:00.016-04:00

'London Bridge is falling down..falling down..' ன்னு சின்ன வயசுல ஸ்கூல்ல பாடுற பாட்டு, இப்ப வரைக்கும் பிரபல்யமான ஒன்னு. பாரீஸ், நியூயார்க் கூட முதன்முதல்ல அறியப்படுமுன்னாலேயே, குழந்தை வயசுலேயே அறிமுகமான நகரம் லண்டன்.

பெயரிலேயே ஒரு பணக்காரத்தனம் ஒட்டிக் கொண்ட மாதிரி இருக்கும். சின்ன வயசுல 'Trade' (Monopoly) விளையாட்டு விளையாடிருக்கீங்களா? அதுல லண்டன்ல போயி மாட்டுனா, காசு அதிகமா கறந்துடுவாங்க. நிஜத்துலயும் அப்படித்தாங்க.

சமீபத்துல ஒரு 'வங்கி விடுமுறை' வந்த போது, ஒரு ரவுண்டு அடிச்சிரலாம்னு முடிவு பண்ணி, 'National Express'- ங்கிற பஸ்ல முன்பதிவு செய்தோம். நாங்க இருக்கிற இடத்தில இருந்து போய்வர கிட்டத்தட்ட நான்குமணி நேர பஸ்பயணம். மிக முன்னாடியே பதிவு செய்தால் குறைஞ்ச கட்டணத்துக்கு கிடைக்க வாய்ப்புண்டு. அப்படி ஒரு மாசத்துக்கு முன்னாடி பண்ணி கிடைச்ச டிக்கட்டோட விலை என்ன தெரியுமா? 1 பவுண்டு. நம்மவூர்ல 500 ரூபாய்க்கு 'ஏரொப்ளனு' டிக்கட்டு கொடுப்பாக இல்ல, அதுமாதிரி எல்லாம் இல்லைங்க..நிஜமா 1 பவுண்டுன்னா 1 பவுண்டுதான். போக ஒரு பவுண்டு, வர ஒரு பவுண்டுன்னு ரெண்டு பவுண்டுல சுத்துன கதையப் பேசலாமா?

குடும்பஸ்தாரானாலும் சரி, தனியாளானாலும் சரி, தங்குவதற்கு வசதியான இடம், YMCA. காலை சாப்பாடும், இரவுச் சாப்பாடும் சேர்த்தே ரூம் வாடகை. நிறைய இந்திய மக்களைப் பார்க்கலாம், 'எப்படிப் போக..வரங்கிற குறிப்பெல்லாம் எடுக்க, எளிதா ஆள் கிடைப்பாங்க. லண்டன்ல Tube Train பிரபலம். 'Warren Street' ட்யூப் ரயில் நிலையத்துக்கு மிக அருகில் உள்ளது. லண்டன்னாலேயே, முதல்ல பாக்கணும்னு தோணுறது London Bridge -தான, நாங்க முதல்ல போனதும் அத நோக்கித்தான். பக்கத்துல பாக்குறதுதான் லண்டன் பாலம். என்ன முழிக்கிறீங்களா? நாங்களும் அப்படித்தான் முழிச்சோம். அப்புறம்தான், அங்க இருந்தவரு சொன்னாரு, எல்லாரும் அப்படித்தான் நினைப்பாங்க, இங்க வர்ரவங்களுக்குத்தான் விபரம் புரியும்னாரு. இப்ப வரைக்கும் London bridge is falling down..ன்னு பாடிட்டு இருந்தாக் கூட, இதுவரைக்கும் அது உழுந்ததே இல்லையாம். 12ம் நூற்றாண்டிலேயே கட்டப்பட்டதா சொல்லப் படுகிற இந்தப் பாலம், அவ்வப்போது பழுது பார்க்கப் பட்டிருக்கின்றதே தவிர, வேறு எவ்விதக் குறைபாடும் கண்டதில்லையாம். ஆனால், அந்தப் புகழ்கொண்ட லண்டன் பாலம், இப்போது லண்டனிலேயே இல்லையாம். அது அமெரிக்காவின் அரிசோனா மாகாணத்தில் 'Lake Havasu' என்ற இடத்தில் உள்ளதாம், 1968-ல லண்டன் பாலம் மாற்றியமைக்கப் பட்ட போது விடப்பட்ட ஏலத்தில் அமெரிக்கர் ஒருவர் எடுத்து அங்கே கொண்டு போய்விட்டாராம். மலைகளின் பின்னனியில், பக்கத்தில் உள்ள இந்தப் படம், அமெரிக்காவின் 'Lake Havasu' வில் உள்ள 'பெயர்த்தெடுக்கப்பட்ட லண்டன் பாலம்'. லண்டனில் இப்போதுள்ள புதிய லண்டன் பாலம், october 10,1971 திறக்கப் பட்ட ஒன்றாம்.

இந்தப் பாலத்தில் இருந்து கொண்டே, லண்டனின் 'Landmark'-ஆன, 'Tower Bridge'-ஐக் காணலாம். அதனுடைய கம்பீரமும், கலரும் அங்கேயே இருக்கின்ற துரைங்களுக்கும் கூட பார்க்கப் பார்க்க சலிக்காத ஒன்று. அருகேயுள்ள படம், டவர் பிரிட்ஜின் உட்புற வாயிலின் வடிவம். இது போர்ட்லேண்டிலிருந்து கொண்டுவரப்பட்ட கற்களாலேயும், ஸ்காட்லண்ட் ஸ்டீல்கள்னாலேயும், தேம்ஸிலிருந்து 140 அடிக்கு மேலே எழுப்பட்ட பாலமாம்.

கீழே நீங்க பார்க்கிறதுதான் டவர் பிரிட்ஜ். டவரின் உச்சியில் தங்க முலாம் பூசப்பட்ட கலசங்கள். இதுவும் நம்ம ஊரு பாம்பன் பாலம் மாதிரி, கப்பல் வருகையில திறந்து மூடுமாம். அதைப் பார்க்கணும்னா, குறிப்பிட்ட நாள், டைம்ல போயி பார்க்கணும். இந்த டவரின் உள்ளேயும் சென்று பார்க்கும் விதமாய்த்தான் வடிவமைக்கப் பட்டிருக்கின்றது. அங்கே டவரின் வரலாறு உட்பட கண்காட்சி வைத்திருக்கின்றார்கள். நீண்ட வரிசையாதலால், நேரம் கருதி உள்ளே செல்லவில்லை. டவர் பிரிட்ஜுக்கு கீழேயே, 'Ferry ride' இருந்ததால, தேம்ஸ் நதியில ஒரு ரவுண்டு போலாம்னு அங்கு போக எத்தனித்தோம்..

படங்களைப் பெரிசாப் பார்க்க, அதனதன் தலையில ஒரு தட்டு தட்டுங்க உங்க மவுசால.

(இந்த ஒரு கட்டுரையிலேயே லண்டனை முடிச்சுட முடியாது, இன்னும் ரெண்டாவது வரும் போல இருக்கு, அதுனால மீதிய பாகம் - 2ல் பார்க்கலாம்னு நினைக்கிறேன்..அது சரி..அது என்ன தலைப்பு 'லண்டனிலே..குண்டனுக்குன்னு தலைப்பு...யோசிக்கீறீங்களா? யோசிங்க..)

இரண்டாம் பாகம் படிக்க

பெர்ரீரீரீய திருப்புமுனை - 'கிறிஸ்டோபர் ஜார்ஜ்'

2008-06-26T13:39:00.013-04:00

நண்பர் சர்வேசனுக்கு நன்றி சொல்ல வேண்டும், ரொம்ப நாளா இது பத்தி எழுதணும்னு நினைச்சிருந்தேன். அப்புறம் 'தமிழ்மண ஸ்டார்' பதிவுக்கு என்ன எல்லாம் எழுதலாம்னு யோசிச்சப்பவும், இதைப் பத்தி எழுதணும்னு வரிசைப் படுத்து வைத்திருந்தேன். நிஜமா சொல்லணும்னா, இந்தச் சமயத்துல மறந்துதான் போனேன். ஆனா, சமயத்துல அதை ஞாபகப்படுத்தி எழுதத் தூண்டின சர்வேசருக்கு நன்றி. இந்தப் பதிவுக்கு நான் முதல்ல நினைத்திருந்த தலைப்பு 'கிறிஸ்டோபர் ஜார்ஜ்', சர்வேசனுடைய வேண்டுகோளையும் இணைச்சுட்டேன்...

********

சின்ன வயசுலயிருந்தே தமிழன்னை கற்றுக் கொடுத்தது 'மாதா- பிதா - குரு -தெய்வம்னு. சந்தேகத்துக்கே இடமில்லாமல், வேண்டியபோதெல்லாம் அணைத்தும், ஆதரித்தும், அடித்தும், திருத்தியும் வழிநடத்துகின்ற பெற்றோர்கள் பல சமயங்களில் திருப்புமுனைக்கு காரணமாயிருந்திருக்கிறார்கள். அது எல்லோருடைய வாழ்க்கைக்கும் பொருந்தும்..பொருந்த வேண்டிய ஒன்றும் கூட. அதனை அடுத்து ....குரு...

திருநெல்வேலி ஊர்ல வசித்திருந்தவர்களுக்கு, சாஃப்டர் மேல்நிலைப் பள்ளி தெரியாமலிருந்திருக்காது. ஊர்ல பிரசித்திப் பெற்ற 'Boys School'. நான் படிச்சதும் அங்கதான். எட்டாம் வகுப்பு முடிச்சு, ஒன்பதாம் வகுப்பு போகும்போது துவக்க நாள். ப்ரேயர் நடந்துட்டு இருக்கு. அப்ப நான் கொஞ்சம் உயரமா இருந்ததால, வரிசையில கடைசியா, நின்னுகிட்டு இருந்தேன்.

புதிய ஆண்டின் முதல் நாளாகையால், தலைமையாசிரியர் மிகப் பல அறிவுரைகளைக் கூறிக் கொண்டிருக்க, நேரம் போய்க் கொண்டேயிருந்தது. திடிரென கண்ணக் கட்டுற மாதிரி இருக்கவே சற்றே தள்ளாடினதுதான் தெரியும்.. யாரோ கைத்தாங்கலா பிடிச்சு ஓரமா உட்கார வைக்கிறாங்க. தண்ணீர் கொடுக்கிறாங்க.. ரெண்டொரு நிமிடம் பரபரப்பாய்க் கழிகிறது. அப்புறம் சுதாரிக்கிறேன். என்னுடைய வகுப்பின் ஆசிரியர். சட்டென எழுந்து வரிசையில் நின்று கொள்ள முற்படுகிறேன். ப்ரேயர் இன்னமும் நடந்துகொண்டிருந்தது.

'நீ..இங்க நிற்க வேண்டாம். போயி க்ளாஸ்-ல உட்காருன்னு சொல்லி, அடுத்து நின்று கொண்டிருந்த பையனையும் உடன் அனுப்பி வைக்கிறார்'. அந்த நிமிடம் என்மேல் தோன்றிய அக்கறை தொடரும் என்று நான் உணர்ந்திராத ஒன்று.சத்தியமாய் எனக்கும் தெரியாது, இந்த ஆசிரியர்தான் என்னுடைய வாழ்க்கைக்குத் திருப்புமுனையாய் நிற்கப் போகிறார் என்று. இன்னமும் அந்த நிமிடமும், காலை 9.30 மணி வெயிலும், நடந்து சென்ற மணல் தரையும் கண்ணுக்குள்ளேயே நிற்கிறது.

எனக்குக் கிடைத்த பெரும்பாலான ஆசிரியர்கள் திறனுள்ளவர்கள்தான். ஆனால், அதையும் மீறி, தனிக் கவனம் எடுத்து, யாருக்கு எப்படிச் சொன்னால் புரியும், எப்படி படிக்கவேண்டும் என்பதை உணரச்செய்து, படிக்கத் தூண்டியவர்.

அவ்வப்போது, இவரிடம் படித்த மாணவர்கள், வேலைக்குப் போனவுடன் வந்து பார்த்துச் சொல்லிச் செல்வதுண்டு. ஒவ்வொருவரின் பலம் சொல்லி, இவன் இங்க உக்காந்திருந்தான், இப்ப பெரிய ஆளாயிட்டான், அப்படின்னு அறிமுகப் படுத்துவார். அந்த இடத்தில உக்காந்திருக்கிற பையன், 'ராசியான இடம்டா..நானும் பெரியாளாயிடுவேன்'னு விளையாட்டாய்ச் சொல்வான். நான் ஒருவன் மட்டுமே உணர்ந்ததில்லை, ஒட்டு மொத்த க்ளாஸுமே உணர்ந்த உண்மை. மற்ற வாத்தியாரிடம் வீரியம் காட்டுகின்ற மாணவன் கூட, இவரிடம் உணர்ந்து நடந்து கொள்வான்.

அத்தனைச் சுலபமில்லை, எல்லா மாணவனும் மெச்சும் விதமாய் ஆசானாக இருப்பது பிரம்பை வச்சு மிரட்டாமல், personal care எடுத்து எந்த critical-ஆன வயசுல இருக்கிறீர்கள், உன்னுடைய கவனம் இப்ப சிதறிச்சுன்னா, பின்னாடி வாழ்க்கை எப்படிச் சிதறிப் போகும் என்பதையெல்லாம், பாடமாய்ச் சொல்லாமல் நட்பாய் உணர்த்தின ஆசிரியர்.

கார்ட்டூன் சித்திரங்களையும், டிஸ்னி லேண்டினையும், அமெரிக்காவையும், ஷேக்ஸ்பியரையும் ஆர்வம் தோன்றும் வண்ணம் கற்றுக் கொடுத்தவர். சென்னையையேப் பார்த்திராத எனக்கு அதெல்லாம் கேட்கும் போது பெரியவிசயமாயிருக்கும். நிறையப் புத்தகம் படிக்க ஆவலைத் தூண்டியவர்.

பள்ளி நூலகம் என்பது, மழைக்குக் கூட ஒதுங்காத இடமாயிருந்த பொழுதில், எளிதாய்ப் புரியக் கூடிய வகையில் உள்ள ஆங்கில நாவல்களை படிக்க அறிமுகப் படுத்தியவர். பொதுவாகவே தமிழ் மீடியத்தில் படிக்கிறவங்களுக்கு ஆங்கிலம் அலர்ஜிதானே.. ஆங்கிலத்தின் மீதிருந்த பயத்தை விரட்டியவர். பிரம்பால் மிரட்டாமல், அன்பால் மிரட்டியவர். ஆசிரியருக்கு இலக்கணம். படிக்கிறதுல ஆர்வத்தைத் தூண்டிய ஆசான்.

ஒன்பதாம் வகுப்போடு அவருடைய கண்ட்ரோல் முடிந்தாலும், அவருடைய 'care' தொடர்ந்து கொண்டுதானிருந்தது. அவர் எதிர்பார்த்த படியே நிறைய பேர், அதிக மதிப்பெண் எடுத்து அவருடைய பெயரைக் காப்பாற்றினோம். 10-ஆம் வகுப்பு முடிந்து 11-ஆம் வகுப்புக்கு போகவேண்டும். தமிழ் மீடியத்திலேயே தொடர எண்ணி, வேறு பள்ளிக்குச் செல்ல எண்ணம். தவிரவும், ஆரம்பக் கட்டணம் போக, மாதாமாதம் கூடுதாலாய் 20ரூபாய் அதிகம் செலுத்த வேண்டும். படிக்க வைக்கவே கஷ்டப்பட்டுக் கொண்டிருந்த அந்த நேரத்தில், கூடுதலாய் எதற்கு அந்தச் செலவையும் வைக்க வேண்டும், என்ற எண்ணம் வேறு.

அதை அவரிடம் பகிர்ந்து கொண்ட போது, 'ஆங்கிலத்தின் மேல் உள்ள பயத்துல அப்படிச் சொல்லாதே, பைசாவ பத்தி கவலைப்படாதே.. தைரியமா படி. பின்னால், கல்லூரிப் படிப்பு எளிதாக இருக்கும். அதுனால ஆங்கில மீடியத்துலதான் சேரணும்' கண்டிப்பாய்ச் சொல்ல, வீட்டில் அண்ணாவும் தைரியப் படுத்த பீஸைக் கட்டியாச்சு.

கிட்டத்தட்ட எட்டு பேர், இவர் கொட்டுத்த நம்பிக்கையில் ஆங்கில மீடியத்தில் முதல் பிரிவில் சேர்ந்தாச்சு. காய்ச்சல் காரணமா, 11-ம் வகுப்பின் முதல் வாரம் என்னால் பள்ளிக்குச் செல்லவில்லை. அடுத்த வாரம் போனா, என் கூட சேர்ந்த தமிழ் மீடியப் பசங்க எல்லாம் டிசி வாங்கிட்டு போயிட்டாங்க. என்னோட பெஸ்ட் பிரண்டும் அன்னைக்குத்தான் வாங்கிட்டுப் போனான். எனக்கும் கிலி எடுக்க ஆரம்பிச்சுது. காணாக் குறைக்கு அந்தச் சம்பவம் வேறு

வளந்து கெட்டதால கடைசி பெஞ்சுல உக்காந்திருந்தேன்.

வந்தாரு 'botony' வாத்தியாரு, 'xylem,pholem..verticalsection..' ன்னு என்னவெல்லாமே புரியாத பாஷையில பேசிக்கிட்டிருந்தாரு. ஏதோ இங்கிலிசு படம் பார்க்கிற மாதிரி அவரு வாயவே பாத்திட்டுருக்க, திடீர்னு 'Last row, last boy from my left, stand up and answer this' அப்படின்னிருக்கார்.

நானும் அவரையே பாத்திட்டுருக்கேன், நல்லா புரிஞ்சு கவனிக்கிற மாதிரி. ஓரிரு நிமிஷத்துல 'க்ளாஸே' சிரிக்குது. எனக்கு ஒன்னும் புரியல. எம் பக்கத்துல இருந்த பையன், என் இடுப்பைக் கிள்ளி, காது பக்கமா வந்து, 'எலே உன்னத்தான்ல சொல்றாரு, எழுந்திரு' அப்படிங்கிறான். வெட்கமும், அவமானமுமாய் எழுந்திருச்சு நிக்கிறேன்.

கிட்ட வந்து நின்னார், 'என்ன கேட்டேன்னு தெரியுமா? தெரியாதா? இல்ல மாப்பிள்ள பெஞ்சு திமிராடா?' ன்னு கேட்கிறார். அதுக்குள்ள யாரோ ஒரு பையன், 'சார் அவன் தமிழ் மீடியம்' - அப்படிங்கிறான். 'அப்படியாடா..'ங்கிறார். 'ஆமா சார்'ங்கிறேன் பயந்து கொண்டே. 'டிசிய வாங்கிட்டு எங்கயாவது தமிழ்மீடியத்துல போய் சேர்ந்துக்கோ இதுக்கே இப்படி முழிச்சேன்னா என்னத்தடா படிக்கப்போறே..புரியுதா?'ன்னு ஆங்கிலத்திலேயே கேட்கிறார். 'சரி'ங்கிற மாதிரி தலையாட்டினேன். 'Idiot'-nu அரைகுறையாய் முணுமுணுத்துகிட்டே நகர்கிறார்.

போன வருசம் வரைக்கும் ஆசிரியர் மெச்சுற பையனா இருந்துட்டு, இப்ப முத நாளே இப்படியாகிப் போச்சே'ன்னு நினைச்சுகிட்டு இருக்கையிலே பாதி தைரியம் போயிடுச்சு. அவரு பீரியட் முடிஞ்சதும் மதிய உணவு இடைவேளை.

'கடகட'ன்னு PT ரூமுக்குப் போனேன். அங்கதான் இருப்பார் என்னோட ஆசான். போனா, ஆளக் காணோம். 'யாருடா வேணும்'ங்கிறார் பி.டி. மாஸ்டர், 'கிறிஸ்டோபர் சார்'ன்னு சொல்றேன்.. 'கீழே சைடுல வந்துட்டு இருக்கார் பார்'ங்கிறார்.

கீழே இறங்கி அவர்கிட்ட போனேன். நான் ஆரம்பிக்கிறதுக்கு முன்னாடி அவர் ஆரம்பிக்கிறார். 'என்னடா..உடம்பு சரியாயிடுச்சா..போனவாரமே உன்னப் பத்திக் கேட்டேன்.. நீயும் டிசி வாங்கிட்டு ஓடிட்டியோன்னு...உம் பிரண்ட்ஸ் எல்லாம் டிசி வாங்கிட்டு போயிட்டாங்க்ன்னு, நீயும் ஓடிடாதே..'ன்னு ஆரம்பிக்கிறார்.

எனக்கு என்ன சொல்லன்னே தெரியலை..'இல்ல சார்... என்னைவிட கூட மார்க் எடுத்த தமிழ் மீடிய பசங்க எல்லாம், டிசி வாங்கிட்டுப் போயிட்டாங்க. அப்புறம் +2ல மார்க் குறைஞ்சுடுத்துன்னா..ன்னு இழுக்கிறேன்'

'நீ ஒன்னும் அதுக்கு கவலைப்படாத.. ஒழுங்கா கவனிச்சுப் படி. தினமும் சாயந்திரம் ட்யூசன் டைம்ல நீயும் வந்துக்க. நான் உனக்கு கத்துத் தர்ரண்டா'ங்கிறார்.ஆனாலும் அந்த 'idiot'ங்கிற வார்த்தை வந்து பயமுறுத்தவே, 'இல்ல சார்..நான் போயிடுறேன்..'ங்கிறேன்.

'ஏண்டா..நாந்தான் உனக்கு கத்துத்தர்ரேங்கிறேன்..போணும்ங்கிறீயே' சற்று கடுகடுக்க, நடந்த சம்பவத்த விவரிக்கிறேன். 'பிரண்ட்ஸும் போயிட்டாங்க, இப்படி திட்டு வாங்குறதும் அசிங்கமாயிருக்குங்கிறேன்'.

ஒரு கணம் நிதானிக்கிறார். என் தோள் மேல் கை போட்டபடி, 'சிவா.. கத்துக் கொடுக்கிற எல்லாரும் உன்னப் புரிஞ்சுகிட்டு கத்துக் கொடுக்கணும் நெனைக்காதே. முத டெஸ்ட்-டுல நீ prove பண்ணினா, அவரு தெரிஞ்சுக்கப் போறார். உன்னுடைய வாழ்க்கையத்தான் நீ பார்க்கணும். இதுக்காக நீ இத விட்ட்டுப் போயிட்டா, இதே சம்பவம் உன்னோட கல்லூரி வாழ்க்கையில நடக்காதா?. இந்தச் சம்பவம் உனக்கு உந்துசக்தியா இருக்கணும், அத விட்டுட்டு ஓடிப்போறேன்னு சொல்றது சரியில்லை. என் வார்த்தை மேலே நம்பிக்கை வை' அப்படிங்கிறார் என் தோளை அழுத்தியபடி.

'சரி'ன்னு சொல்லி அவருடைய மெஸ்மரிசப் பார்வைக்குக் கட்டுப்பட்டு நகர்கிறேன். அவர் சொல்லியபடியே, அடுத்த இரண்டு வருடமும் இலவசமாய் ட்யூசனுடன் கழிகிறது. நான் மட்டுமல்ல, என்னுடன் மேலும் மூணு மாணவர்கள் என்னை மாதிரியே. ரிசல்ட்-டும் வந்தது. வேண்டிய மார்க்குகள் இருந்தும், தனியார் பொறியியல் கல்லூரிகள்தான் 'வா'ன்னு அழைத்தது. பணம் ஒரு பெருங்குறையாயிருக்க, வேண்டாம்டான்னுட்டு பி.எஸ்.ஸி நோக்கி நகர்கிறேன். டிசி வாங்கப் போகையில், அவரைப் போயி பார்க்கிறேன். 'வருத்தப் படுறியாடா'ங்கிறார்.. என் அண்ணனும் கேட்ட கேள்வி. 'இல்ல..சார்..' 'கல்லூரியில நல்ல பண்ணுவேன்னு நம்பிக்கை இருக்கு'ன்னு சொன்னேன்.

'குட்.. கடவுள் உனக்கு இதக் கொடுக்கலேன்னா, இதவிட பெட்டரா உனக்குக் கொடுக்கணும்னு நினைச்சிருக்கார். நம்பிக்கையைத் தளரவிடாதே. அப்பப்ப, தொடர்பிலேயே இருந்துக்கோ'ங்கிறார். I trusted those words...Still it rings in my ears..'

காலச் சக்கரம் ஓடி, கணிணித்துறையில் சேர்ந்து, பின் அந்தச் செய்தியைச் சொல்ல அவரைப் பார்க்கச் செல்கிறேன். அதே மரத்தடி வகுப்பு. அவரைச் சுற்றி மூன்று நான்கு மாணவர்கள். சலசலக்கிற வகுப்புக்கு நடுவில் போய், 'சார்..'ங்கிறேன்.. 'டக்'கென்று நிமிர்ந்து பார்த்தவர்...'டேய்...எப்படிடா இருக்கே..'ன்னு ஆரம்பிக்க.. பணியையும் சொல்லி விளக்குகிறேன். எனது நம்பிக்கைக்கும், இந்தத் துவக்கத்துக்கும் உங்கள் guidance-க்கு பெரும் பங்கு இருக்கின்றது சார்' ன்னு சொல்ல, அதே தோழமையுடன் ரொம்பச் சந்தோஷம்டா'ன்னு சொல்லிக் கொண்டே மற்ற மாணவர்களிடம் என்னை அறிமுகப் படுத்துகிறார். 'இந்த பெஞ்சிலதாண்டா உக்காந்திருந்தே..'ன்னு இடத்தைச் சுட்டிக் காட்டுகிறார். அந்த இடத்துப் பையனுக்கும், உந்துதலாயிருந்திருக்கும். மெய்சிலிர்த்த நேரம்.

ஆசிரியப் பணிங்கிறது ஒரு அருந்தவப் பணி. அதை உணர்ந்து செயல்படக் கூடிய ஆசிரியர்கள் பலர் இருக்கிறார்கள், என்றாலும் அது விரல்விட்டு எண்ணக்கூடிய ஒன்றுதான். எனது செட் மக்கள் மட்டுமல்ல, முன்னாடியும் சரி, பின்னாடியும் சரி..நிறையப் பேர் இதை உணர்ந்திருப்பாங்கன்னு நம்புறேன். I am very much thankful to my Great Teacher Christopher George!

திருப்புமுனைங்கிறது வாழ்க்கையில ஒரு இடத்துல மட்டும்தான் வரும்னு சொல்ல முடியாது, இது மட்டுமில்லாம இன்னும் நிறைய நண்பர்கள், என் மேல் நம்பிக்கை வச்சு எனக்கு முதல்ல வேலை கொடுத்த பாஸ், channelize பண்ணி, ஷார்ப்பாக்கினவங்கன்னு இந்த திருப்புமுனை வளர்ந்துகிட்டுதான் போகும். இதுவே ரொம்பப் பெரிய பதிவா போயிடுச்சுன்னு நினைக்கிறேன், அப்புறம் 'சிவாவின் ஆட்டோகிராப்'-ன்னு சொல்லிடப் போறாங்க. அப்படி ஒன்னு செய்யுற எண்ணமும் இருக்கு. அப்ப அவங்களப் பத்தி எல்லாம் டிடெய்லா சொல்லுவேன்.

ஆசிரியப் பணி என்பது ஒரு ஏணிதான். சொல்லிக் கொடுத்த வாத்தியாரைவிட, படிச்ச மாணவன் அதிக வசதியோடு இருப்பான். ஆனாலும் சின்சியராய் அந்தப் பணியை, அதற்குரிய நேர்மையோடு செய்கின்ற ஆசிரியப் பெருந்தகைகள் அனைவருக்கும் இந்தப் பதிவினைச் சமர்ப்பிக்கிறேன். இதச் சமர்பிக்கிறதுக்கு இன்னொரு Special -காரணமும் இருக்கு...யாராவது கரெக்டா கண்டுபிடிச்சுட்டா...அவங்களுக்கு 100/100 கொடுக்கிறேன்...

கண்டுபிடிச்சிருப்பீங்க...ஆமா..இது என்னுடைய நூறாவது பதிவு! Hats off to my Sir, Christopher George!

அட..Butterfly எபெஃக்ட்டுங்க

2008-06-25T01:10:00.001-04:00

தசாவதாரம் வந்தாலும் வந்துச்சு. தெரியாமலிருந்த பல அறிவியல் தகவல்களை தமிழுலகம் அறியச் செய்திருக்கு நம்ம வலையுலகம். 'Doppler Effect' கேள்விப் பட்டிருக்கேன்.. இப்பதான் பட்டர்ஃபிளை எபெக்டு பத்தி கேள்விப் படுறேன். தெரிய வச்ச பதிவுலக மக்களுக்கு நன்றி மக்கா.

இந்த பட்டர்ஃபிளை எபெக்டு நமக்குள்ளே, நிறைய பட்டாம்பூச்சிகளை கிளறிவிட்டுச்சு. இன்னைக்கும் 'ஓ..பட்டர்ஃப்ளை' பாடல் ரொம்பப் பிடிச்ச பாட்டுதான். சின்ன வயசுல பசங்களுக்கு தெருவுல போகும்போது, நாம ஒரு பொண்ணப் பார்க்க..அது நம்மளப் பார்க்க.. அண்ணலும் நோக்க..அவளும் நோக்க.. டக்குன்னு நெஞ்சுக்குள்ள ஒரு சிறகடிக்கும் பாருங்க.. அதுதாங்க நாமெல்லாம் உணர்ந்த பட்டர்ஃபிளை எபெஃக்டு. 'அடி..ஆத்தி நெஞ்சுக்குள்ள பட்டாம் பூச்சி பறக்குதா' ன்னு பாடச் சொல்லுது பாருங்க.. 'ஒரு பட்டாம் பூச்சி நெஞ்சுக்குள்ளே சுத்துகின்றதே..அது சுத்திச் சுத்திச் ஆசை நெஞ்சைத் தட்டுகின்றதே' ன்னு கவிஞர்கள் கூட காதலுக்கு மரியாதை பண்ண பட்டாம்பூச்சியைத்தான கூப்பிடுறாங்க.

யார் கண்டுபிடிச்சாங்களோ இந்தப் பட்டாம்பூச்சி எபெஃக்ட.. அவங்க வாயில சக்கரைதான் போடணும். சின்ன வயசுல இருந்தே எல்லா மக்களுக்கும் பட்டாம்பூச்சி பிடிக்கும்.. அதன் விதவிதமான வண்ணக் கலவைனால. ஒரு வேளை பசங்க பொண்ணுங்களைச் சைட் அடிக்கிறதுக்கு 'கலர் பார்க்கப்' போறேன்னு சொல்றதும் இதுனாலதானோ...ஏன்னா, கலர் பாத்த பின்னாடி தான, 'பட்டாம் பூச்சி நெஞ்சுக்குள்ள சுத்துற butterfly effect வருது.

எனக்கும் butterfly ரொம்பப் பிடிக்கும், (நான் சொல்றது நிசமான butterfly பூச்சிதாங்க). நிறைய வெளிநாடுகள்ல buttefly garden இருக்கிறத பத்தி கேள்விப் பட்டிருக்கேன், அதப் பார்க்கணும்ங்கிற ஆவலும் நிறையதடவ இருந்திருக்கு. ஆனா, அது சமீபத்துலதாங்க நிறைவேறிச்சு. Northwales,uk போயிருந்தப்ப, அங்க பார்க்க வேண்டிய இடத்துல, buttefly garden-ம் ஒன்னுன்னு சொன்னாங்க. ஆஹா, சந்தர்ப்பத்த விட்டுடக் கூடாதுன்னு இடத்தத் தேடி கண்டுபிடிச்சுப் போயி பார்த்தோம்.

பார்க்க ஆசைப்பட்ட அளவுக்கு, பார்க்கிறது ரொம்பச் சுலபமில்லை. அவ்வளவு குளிரான இடத்துலயும், பட்டாம்பூச்சிக்கான வெப்பநிலை மெயிண்டெய்ன் பண்ணுகிறார்கள். ஆகையால், பட்டாம்பூச்சி பார்க்கபோயி, நமக்கு வேர்த்து ஊத்திடும். ஆனா, உள்ள போனா, அது பாட்டுக்கு அங்கேயும் இங்கேயும் ஒடியாடிக் கொண்டிருக்கும். சிலது நம்ம தலையில கையில கூட வந்து உக்காரும். ஒன்னு என்னோட காமிரா மேலேயே உக்காந்துது, அத மொபைல் காமிரால படம் எடுக்கலாம்னு நினைக்கிறதுக்குள்ள, உடல் அசைவுல பறந்து போயிடுச்சு.

நிறைய குட்டிக் குழந்தைகளும் வந்திருந்தாங்க. பொண் குழந்தைங்கதான், எட்ட இருந்து ரசித்தாங்க. ஆண் குழந்தைங்க எல்லாம் பட்டாம் பூச்சியப் புடிக்க முற்பட, அங்கேயிருந்த மேற்பார்வையாளர் திட்ட ஆரம்பித்து விட்டார். வேர்வை சிந்தினாலும், பட்டாம்பூச்சி ரம்மியமாய்த்தான் இருந்தது. மேலே பார்க்கிறது எல்லாம் நான் புடிச்ச சில படங்கள உங்க. எப்படி இருக்கு நம்ம butterfly effect ?

** ஸ்டார் *

2008-06-24T11:11:00.008-04:00

நள்ளிரவு 12.00 மணி. மழை 'சோர்'னு கொட்டிக் கொண்டிருந்தது. வலுவான மழையில் சிக்னல் விளக்குகள் ஒளிச்சிதறலுடன் மின்னிக் கொண்டிருந்தது. இடியும், மின்னலும் விட்டுவிட்டு தாக்கிக் கொண்டிருந்தது. இரவு பன்னிரண்டு மணியானதால், அண்ணா சாலையிலும் போக்குவரத்து குறைந்து இரண்டும் ஒன்றுமாய் அவ்வப்போது கார்கள் பறந்து கொண்டிருந்தன. நிசப்தமான நேரமாகையால், வண்டிகளின் சக்கரங்கள் தண்ணீருடன் உராய்ந்து 'சலக்சலக்' என்று சத்தம் எழுப்பிக் கொண்டிருந்தது. தூரத்தே மழையைக் கிழித்துக் கொண்டு வருவதுபோல், வேகமாய் அந்த டோயோட்டோ கார் ஓளிப்பாய்ச்சலுடன், தரையின் தண்ணீரைக் கிழித்து நீரலைகளை எழுப்பிக் கொண்டு வந்தது. ஆளரவம் இல்லாததால், அந்த வண்டியின் ஓட்டுநரும் அழுத்திக் கொண்டு வந்தார் போலும்.
ஸ்பென்சர் ப்ளாசாவைத் தாண்டிய வேகத்தில், சடுதியில் அண்ணா மேம்பாலம் நோக்கி நகர்ந்து கொண்டு இருந்தது. 'ட்ரைவர், பாலத்து வழியா போக வேண்டாம், கீழ்பக்கமா போங்க'ன்னு ஒரு கிளிப்பேச்சு பாவை பேசியது. எதிரே வந்த வாகனத்தின் ஒளி பட்டு, அவளது கழுத்தின் நகை மின்னியது. மேனியும்தான். மெல்லிய உதட்டுச் சாயமும், எலுமிச்சை நிறமும் அந்த மெல்லிய் ஒளியிலும், அவளை மேலும் அழகாய்க் காட்டியது. சன்னமாய் ஓடிக் கொண்டிருந்த ஏஸியும், அவள் உபயோகப் படுத்திய ஃபெர்ப்யூம் மணத்தோடு ரம்மியமாய் மணந்து கொண்டிருந்தது.

இத்தனையையும் ரசித்துக் கொண்டு ஓட்டிக் கொண்டிருந்ததாலோ என்னவோ, ட்ரைவருக்கு அவள் பேசியது காதில் சரியாய் விழவில்லை போலும். அரைகுறையாய் ஏதோ கேட்டது போல் தோன்றியதே என்ற எண்ணத்தோடு, 'மேடம்.. எதுனாச்சும் சொன்னீங்களாம்மா?' என்றான். 'அட..ஆமாய்யா.. ரூட்ட விட்டுடப் போற..பாலத்துக்கு கீழே வழியா போன்னேன்' என்றது பாவை. அதற்குள் பாலம் அருகில் கார் வந்துவிடவே, சர்ரக் என்று ஒடித்து பாலத்தின் கீழே வண்டியைத் திருப்பினான். லேசாய் ப்ரேக்கை அழுத்தியதாலே, மழையின் வழுக்கலோடு, சின்னதாய்ச் சத்தம் எழுப்பி அமெரிக்கத் தூதரக அலுவலகம் வழியே திரும்ப எத்தனித்தது. திரும்பியவன், பக்கவாட்டில் வண்டிவரவே வேகத்தை மிதப்படுத்தினான்.

திடிரென 'தடதட' என யாரோ வண்டியைத் தட்டும் சத்தம் கேட்கவே, பக்கவாட்டு வண்டி கடந்து செல்வதற்காக காத்திருந்தவன் பதறித்தான் போனான். பார்த்தால், வண்டிக்கு இடதுபுறம் மெல்லிய வெளிச்சத்தில் அழுக்கு லுங்கியுடன், மழையில் நடுங்கியவாரே கடாபுடா மீசையுடன் ரவுடிக்கு நெருங்கிய தோற்றத்தில் ஒருவன் நிற்பது தெரிந்தது. ஏதோ அசம்பாவிதம் நடக்கப் போவதை உணர்ந்தவன் மாதிரி, ட்ரைவர் வண்டியை எடுக்க எத்தனிக்க... 'ங்கோ..' என்று வார்த்தையுடன் உறுமியபடியே மிகச் சத்தமாய் மீண்டும் ஓங்கி அடித்தான். இரண்டு அடி கூட நகர்ந்து இருக்காது, அதற்குள் இன்னொருவன் அந்த மழையிலும் பீடியை அணைப்பாய்ப் பத்திரப்படுத்தி, ரசித்துப் புகைத்தவாரே 'டபக்' கென்று காரின் முன்னால் குதித்து நின்றான். வேறு வழியில்லை, நிறுத்துவதைத் தவிர. 'அம்மா ஜாக்கிரதைம்மா'ன்னு பின்பக்கம் சொல்லியவாரே நிறுத்தி நின்றான்.

அந்த பீடிக்காரன் ஜன்னலை இறக்குமாறு சைகை பண்ணிக் கொண்டே, ட்ரைவர் இருப்பிடம் நோக்கி வந்தான். பயத்தில் ஜன்னலை இறக்கியவாரே, 'என்னப்பா?' என்று வினவ.. 'ஏண்டா..பொறம்போக்கு... வண்டிய நிறுத்தச் சொன்னா நிக்கமாட்ட'ன்னு சொல்லிக் கொண்டே அவன் தலையைப் பிடித்து கதவில் மோதினான். 'சாரிங்க...'ன்னு ட்ரைவர் முனகியபடியே தலையை உள்ளே இழுக்க முயல, ஜன்னலின் வழியே குனிந்து அவன் தலையை இழுக்க முற்பட்ட போதுதான், அந்த பீடிக்காரன் பின்சீட்டு பாவையைப் பார்த்தான். 'அட...ஷோக்கா கீராடா பிகரு'ன்னு முனகியபடியே பின்சீட்டு நோக்கி நகரலானான். பாவைக்கு உதறலெடுத்தது..ட்ரைவருக்கும்தான்.

'டேய் லோலு..பின்னாடி பிகருடா..'ன்னு அந்தப்புறம் இருந்த அழுக்கு லுங்கிக் காரணுக்கு தகவல் கொடுத்து, பின் பக்க கதவைத் திறந்தான்.., அந்தப் பக்கக் கதவை அழுக்கு லுங்கி திறந்தது. பார்த்த மாத்திரத்தில், 'மாப்பு...பார்ட்டி குத்தாட்ட குமுதஸ்ரீடா'ன்னான். 'என்னா மாமு சொல்றேன்னு' கேட்டுகிட்டே பீடிக்காரன் பாவையைப் பார்க்க, 'அட ஆமாடா.. திம்மு..திம்மு..திம்மு..திம்மு..திம்முன்னு திம்மு...கும்மு..கும்மு..கும்மு..கும்மு..கும்முன்னுதான் கும்மு'ங்கிற பாட்டுக்கு ஆடுவாளே..அந்தப் பிகருதானா இது, வசமா மாட்டிக் கிருச்சுடோய்'ன்னு.. சொல்லிக் கொண்டே அவளருகில் போனான்.
மழையையும், இசையையும் ரசித்துக் கொண்டு வந்த குமுதஸ்ரீக்கு அதிர்ச்சியாய்த்தான் இருந்தது. பீடி நாத்தமும், சாரய நெடியும்...குமட்டிக் கொண்டுதான் வந்தது அவளுக்கு. பயத்தில் சற்றே கையைக் குறுக்கிக் கொள்ள முயல, குளிருக்கு இதமா போர்த்தியிருந்த டவல் நழுவியது.

'இன்னா மாமே... ஏதாவது பொன்னு, காசு மாட்டும்னு பாத்தா, பொண்ணே மாட்டிக்கிச்சு.. மச்சம்டா உனக்கு..ன்னா குமுதா ஓகே தானே'ன்னு பீடிக்காரன் சொல்லிக் கொண்டே காரில் ஏற முற்பட..

'ஏய்ய்..ஏய்..நில்லு..நில்லு...'னு கத்தினாள் குமுதஸ்ரீ. 'இரு மாமு.. குட்டி கதறுதுல்ல'ன்னு லுங்கிக்காரன் கத்த, 'டேய்..அந்தப் பக்கம் போயி ட்ரைவர புடிடா..நீ..குட்டிய நா கவனிச்சுக்கிறேன்' ன்னு சொல்லிக்கிட்டே உள்ளே ஏறினான் பீடிக்காரன். லுங்கி ட்ரைவரை நோக்கி நகர்ந்தது.

'ஏய்..ஏய்..நில்லு.. நில்லு.'னு மீண்டும் குமுதஸ்ரீ கதற, 'கத்துனா..சும்மா சீவிடுவேன்..னு கத்தியைக் காட்ட, 'கொஞ்சம் இருப்பா..நீ கேக்குறத தர்ரேன்..' குமுதா கத்த..சற்றே அடங்கினான் பீடிக்காரன்..

'இந்தா..முதல்ல நனைஞ்சிருக்கிற துணிய கழைஞ்சுட்டு, இந்த துண்டக் கட்டிட்டு வா.. அதுக்கப்புறம் பாக்கலாம்..கார் சீட்ட கெடுத்துராத..'ன்னு மேலே போட்டு நழுவிய துண்டை எடுத்துக் கொடுத்தாள். 'அட..குட்டி புத்திசாலியாதான் இருக்குன்னு' சொன்னபடியே துண்டை வாங்கிய பீடிக்காரன், 'கத்தியை அந்தப் லுங்கிகிட்ட கொடுத்து, 'மாமு.. நா அந்தப் பக்கம் போயி ட்ரஸைக் கழட்டிட்டு துண்டைக் கட்டிட்டு வாரேன்..இந்தப் பக்கம் கத்தியப் புடிச்சுகிட்டு பிகருகிட்ட நில்லுன்னு, உள்ள போயி சீட்ட நனைச்சுராத..வெளியேவே காவலுக்கு நில்லுடின்னு' மிரட்டிட்டு அந்தப் பக்கம் ஒதுங்கினான்.

சற்று ஒதுங்கியது தெரிந்ததும், மிரண்டுபோயிருந்த ட்ரைவரைப் பார்த்து, 'ட்ரைவர், வண்டியை அழுத்துடா'ன்னு ஓங்கி கத்த... சுதாரித்த ட்ரைவர் 'டக்' கென்று வண்டியை அழுத்த, அருகே நின்று கொண்டிருந்த லுங்கிக்காரனைத் தள்ளிவிட்டு, வேகமாய்ப் பறந்தது கார். பறந்த வேகத்தில், அலையாய்ச் சிதறிய தண்ணீர் மீண்டும் சேர்ந்தது. மழை இன்னும் தூறிக் கொண்டிருந்தது. தூரத்தில் புள்ளியாய் செவ்விளக்குத் கண்சிமிட்டி மறைந்து கொண்டிருந்தது.

*****************

படம் உதவி: இணையம்.

கமலுக்கென்று ஒரு மனம் - தசாவதாரம் விமர்சனம்

2008-06-24T01:35:00.000-04:00

தமிழ் சினிமாவைப் பொறுத்தவரையில்...ஏன் இந்தியத் திரையுலகைப் பொறுத்தவரையில் கமல் படம் என்றால் 'அறிவுஜீவி'த்தனமான எதிர்பார்ப்புகள் ஏகத்துக்கும் சேர்ந்துவிடும். அது ரசிகர்களின் தவறுன்னு சொல்ல முடியாது, கமல் அப்படி வளர்த்து வைத்திருக்கிறார்னுதான் சொல்வேன்.

ரஜினி படத்துக்கு என்றால் 'லாஜிக்' பார்க்கிற வேலையைச் செய்யாத ரசிகனுக்கு, கமல் படம் என்றால் அத்தனை செல்களும் விழித்துக் கொள்ளும்..கமலுக்கென்று ஒரு மனம்..ரசிகனிடத்தில்..அந்த வகையில்தான் இப்ப வந்திருக்கின்ற தசாவதாரமும் 'இருவேறு' கருத்துக்களுடன் மோதிக் கொண்டிருக்கின்றது. இனி..என்னோட கருத்து என்னன்னு பார்க்கலாமா?

*******

ஆர்ப்பாட்டமான விளம்பரங்களோடும், ஏகப்பட்ட கருத்து மோதல்களோடும் சமாளித்து ஒரு வழியா வந்தப் படமாச்சேங்கிற ஆவலோட படம் பார்க்க சீட்டில் உட்கார்ந்தாச்சு.

பரபரப்பாய் டைட்டில் ம்யூசிக் இருக்கும், 'உலக நாயகனே' என்று கும்மாளமிடும் என்ற எதிர்பார்ப்புகளோடு, திரையை நோக்கி இருந்தால், 'சப்' என்ற இசையுடன் டைட்டில் துவக்கம். தொடரும் நம்பி கதாபாத்திர நகர்வுகள், 'டக்'கென்று நமது ஆர்ப்பரிக்கும் மனசை அடக்கி, தொடருகின்ற 15 நிமிடங்களை தனதாக்கிக் கொள்கிறது. மிகச் சிறப்பாய் நகர்கிறது, காமிரா உட்பட அனைத்து கலைஞர்களின் பங்களிப்பும், including 'அப்பா.. வேணாம்ப்பா..ங்கிற சிறுவனின் பங்களிப்பு உட்பட. செம டச்சிங்க். (ஆமா..இந்தக் காட்சிக்கா கும்மினாங்க.. ந்ம்ம ஊரு அரசியல்வாதிங்கள நினைச்சா சிரிப்புதான் வருது.)

அடுத்து ஆரம்பிக்கிறார் 'அறிவு ஜீவி' கமல்.. சக்தி.. கடவுள்' ங்கிற பேதங்களோடு, அவருக்கே உரித்தான தமிழ்ப்பேச்சு நடையோடு. சற்றே சலிப்பு தட்டுகிறது. அடுத்து நகர்கிற அறிவியல் கண்டுபிடிப்பும், குரங்கின் சாவும் என்னாடா இதுங்கிற மாதிரி இருக்கு. அமெரிக்க விஞ்ஞானிங் கிறதுக்காக காட்டியிருக்கின்ற சூழலும் படு செயற்கையாய் இருக்கிறது. லைட்டிங்கும் சரியில்லை. வட்டு வண்டியில ஓடுவது, 'U' சர்டிபிகேட் குழந்தைகளுக்காயிருக்கலாம்.

உடனே விறுவிறு என நகர ஆரம்பிக்கிறது கதை. காட்சியில் இருக்கின்ற விறுவிறுப்பும், பரபரப்பும் விஞ்ஞானி கமலிடம் மிஸ்ஸிங். அதனாலேயே சில 'சேஸிங்'-கில் மனசும் ஒட்ட மறுக்கிறது. வில்லனாய் வரும் ப்ளட்சர் பாத்திரம் அருமை. சிடுசிடுப்பும், பாடிலாங்கேஜும் அபாரம். கடைசி வரை கலக்கியிருக்கிறார்.

பத்து கமலுக்கிடையில், படத்தில் நடித்து இருக்கிற சின்னச்சின்ன கேரக்டர்களும் பரவலாய்த் தெரிய வேண்டுமென்பதற்காக, வையாபுரி, சிட்டிபாபு என பரிச்சயமான நட்சத்திரங்களை உபயோகப் படுத்தியிருப்பது சிறப்பான உத்தி. ஆனால், கே.ஆர்.விஜயா,நாகேஷ் கொஞ்சம் அதிகம்தான். தன்னுடைய 'மைல்கல்' படத்தில், தனக்குப் பிடித்த மக்களும் இருக்கணும்னு நினைத்தாரோ என்னவோ?

'பல்ராம் நாயுடு' கேரக்டர் சுவாரஸ்யமில்லாமல் மிகவேகமாக ஓடிக்கொண்டிருக்கும் படத்தை சற்றே நிதானமாக்கி, ஆசுவாசப் படுத்துகிறது. அடுத்து அசின் வருகை, உடன் கமல் பாட்டியோடு. பாட்டி கமல் மிகப் பிரதானம். அந்தக் கூனும், 'ஆ'ன்னு வாயைப் பிளந்து கொண்டு பேசுவதும்...'வாவ்' ...நிறையவே உழைத்திருக்கிறார் கமல். அதே மாதிரிதான் 'பூவராகவன்' கமலும். நிஜமாலுமே நடிப்புச் சக்கரவர்த்திதான். அவரது எண்ட்ரியும், சற்றே எதிர்பாராத ஒன்று. 'சிம்ப்ளி சூப்பர்ப்'. அதே மாதிரி இன்னொரு பிடித்த கமல்-னா, 'ஜப்பானிய' பாத்திரம். நல்ல கெட்டப், அதுமாதிரி கடைசி காட்சி சண்டையும் பிரமாதம். சிரத்தை எடுத்து பண்ணியிருக்கிறார். அதனைப் பார்க்கும் போது, தமிழ்சினிமாவின் அடுத்தகட்ட நகர்வுங்கிறதுக்காக, கமல் எடுத்துக் கொண்ட சிரத்தைகளைக் கண்டிப்பாய்ப் பாரட்டத்தான் வேண்டும்.

'சலசல'ன்னு சலம்பினாலும், அசினுக்கு நல்ல வேடமே. 'கஜினி'க்குப் பிறகு அவர் தெரிவது இந்தப் படத்தில்தான்.பத்து கமலுக்கு இடையிலும், பரிமளிக்கிறார்.

இவ்வளவு +இருந்தாலும், அப்பப்ப விஞ்ஞானி கமல் எரிச்சலூட்டுகிறார், காமெடி என்று அரதப் பழசான டயலாக் வேறு. ('ok..ரெங்கசாமி நாயக்கர்ன்னு கமல் சொல்ல, அதுக்கு அசின் ஒகே ரெங்கசாமி நாயக்காரன்னு கேட்பது..கமலே மங்கம்மா சபதத்துல மாதவிகிட்ட பேசுற வசனம்..) கற்பனை வரட்சியா...? சில கிரேசி ஸ்டைல் டைப் வேறு. அடுத்த படத்துக்காவது வேறு யார்கிட்டயாவது வசனம் எழுதக் கொடுங்க கமல் சார்..

இன்னொரு சலிப்புத்தட்டுவது கடவுள் இருக்காரு..இல்லைங்கிற விவாதம். இத்த ஏன் கமல் கையிலெடுக்கிறார்னு புரியவே மாட்டேங்குது. ரஜினி கடவுள் கடவுள்னு சொல்றதுனால, இவரு எதிர்க்கிறாரோ? தவிரவும், ஆங்காங்கே பகுத்தறிவு வாதம்னு ஏதாவது விதண்டாவாதம் பண்ணுறது.. இதெல்லாம், இந்தப் படத்துக்கு தேவையா? நீங்கதான் அரசியலும் வேண்டான்னுட்டீங்க, அப்புறம் எதுக்கு கடவுள்,மணல் கொள்ளை மாதிரி சமாசாரங்கள் எல்லாம்.. யாரைச் சமாதனப்படுத்த இந்த முயற்சி? கமலுக்கே வெளிச்சம்.

பாடல்களும் பார்க்க அவ்வளவு சுவாரஸ்யமில்லை, பின்னனி இசையும் 'ஓகே' ரகம்தான். கமல், அசினுடன் சேர்ந்து மிகப் பெரிதாய்ப் பாரட்டப் படவேண்டியவர் கே.எஸ். ரவிக்குமார். பத்து கமலையும் மேய்த்து, சிதைக்காமல் படத்தைக் கொடுத்ததற்காக.

10-ல் நாலு பழுதில்லை. (பாட்டி,பூவராகவன்,ப்ளட்சர்,ஜப்பானிய கமல்)

சொதப்பல் கமல்-னா, விஞ்ஞானி கமல்தான்.

இனி நானறிந்த நண்பர்கள் மூலமாய் அவர்கள் வசிக்கும் இடத்தில் இருந்து வந்த/கேட்ட கமெண்டு:

திருநெவேலி - நல்லாருக்கு, குழந்தை,குடும்பமாய் பார்க்கலாம்

சென்னை - கமல் ஏமாத்திட்டார், இவ்வளவு எதிர்பார்ப்புக்கு ஒரே வரியில 'சூப்பர்'ங்கிற கமெண்டுதான் வரணும். 'ஒகே..' 'பார்க்கலாம்'ங்கிறதெல்லாம் கமல் standard-க்கு non-acceptable.

அமெரிக்கா - ஆம்...கமல் நல்லா பண்ணியிருக்கார்

பர்மிங்காம்,UK - 'என்னடா....தலைவர் சொதப்பிட்டாரு'

சென்னை, பெட்ரோல் பங்கில் : 'சும்மா சுத்துறாரு..குழப்பந்தேன்..'

என்னோட கமெண்டு:

எவ்வளவு சொன்னாலும், படம் கண்டிப்பாய் ஒரு முறை தியேட்டரில் பார்க்க வேண்டிய படம்தான்...

நட்சத்திர ஜன்னலில் 'மின்மினி' எட்டிப் பாக்குது!!!!

2008-06-23T05:37:00.000-04:00

' நட்சத்திர ஜன்னலில் மின்மினி எட்டிப் பாக்குது

தினமும் வந்து படிங்க..

படிச்சுட்டு கருத்துச் சொல்லிப் போங்க' ன்னு

பாட்டுப் பாடத்தோணுது... என்னாங்கிறீங்களா? அட ஆமாங்க, போன மாசம் திடீர்னு தமிழ்மணத்தின் Admin மக்கள்கிட்ட இருந்து, தமிழ்மண 'ஸ்டார் பதிவர்' வாரத்துக்கான அழைப்பு. கண்ணத் துடைச்சுகிட்டு, திரும்ப ஒரு தரம் யார்கிட்ட இருந்து வந்திருக்குன்னு படிச்சு உறுதி பண்ணிகிட்டேன், நிசந்தான்னு.

'ரெக்கை கட்டி பறக்குதடி அய்யாவோட மனசு, ஆசைப்பட்ட ஸ்டாரிலதான் ஏறிக்கோடா சிவா'ன்னு அடுத்த வரி மனசுல பட, உடனே 'சரி'-ன்னு சொல்லியாச்சு. தமிழ்மணத்தினர் முன்னரே அவகாசம் கொடுத்து எழுதச் சொன்னாலும், நம்ம அலுவலக மக்கள் கரீக்டா அப்பதான் நம்மள வேலைல தூக்கி போட்டு, ஸ்டிராங்கா ஆணி புடுங்கச் சொல்வாங்க. இப்படி நடக்கும்னு தெரிஞ்சுதான், முதல்லேயே அவகாசம் இருந்த போதே எழுத வேண்டிய விசயம் எல்லாத்தையும் எழுதி வச்சுகிட்டு, 'டாண்..டாண்'னு தினத்துக்கு ஒன்னா எடுத்து வுட்டுரணும் 'ப்ளான்' பண்ணினேன். ஆனா, வழக்கம் போல, அதுவும் ப்ளானோடேயே நின்னு போச்சு. நினைச்சா மாதிரி 'ஆணி பிடுங்கிற' வேலையும் கூடவே வந்துருக்கு.

ம்ம்ம்...ஆனா மக்கா, திருநெவேலி ஆளு இதுக்கெல்லாம அசந்து போவானா என்ன?, காலையில ஆணி புடுங்குவோம். அப்புறம் வந்து பதிவெழுதுவோம்.. 'ஆணி வரும் போகும், ஸ்டார் வருமா.. அபிராமி..அபிராமி' ....இன்னாங்கிறீங்க.

ரொம்ப காலமாவே எனக்கு தமிழ்ல இணையத்தில எழுதணும்னு ஆசை, ஆனா எப்படி எழுதுறதுன்னுதான் புரியாத புதிராவே இருந்தது. அந்த ஆசையிலதான், ரெண்டு வருசத்துக்கு முன்னாடி, கூகுளின் துணையோடு 'Thamiz'ன்னு போட்டு தேடுறப்ப, தமிழ்மணம் கண்ணுல பட்டுச்சு, 'Wow...' ன்னு ஒரே ஆச்சரியம். எப்படி எழுதுறது, ப்ளாக் எப்படி துவக்குறதுன்னு எல்லாம் கை வந்த கலையாய் எளிதே சொல்லியிருந்தார்கள். மெய்மறந்தது நிசம். ஆர்வக்கோளாறில ஜாலியாய்த் துவங்கின பதிவு. 'மின்மினி' - சின்ன வயசுல லைட்டு பூச்சின்னு சொல்லுவோம், அது பத்தி அக்கா சொல்லுறப்ப, 'கரண்டு போச்சுன்னா, அதப் புடிச்சி வச்சி படிக்கலாமா'ன்னு வேடிக்கையாய் கேட்டிருக்கேன். படிச்ச பதிவுகள்ள, ஆளாளுக்கு ஒரு பேரவச்சுகிட்டு ஆரம்பிச்சு ஓடிட்டுருப்பதை பார்த்த எனக்கு, 'மின்மினி' பிடிச்ச பெயரா போயி, அதையே தலைப்பாவும் வச்சுகிட்டேன். அப்போ தமிழ்மணத்த இன்னும் கொஞ்சம் விரிவாப் படிக்கிறப்பதான், ஸ்டார் பதிவராக 'உங்களைப் பற்றிய அறிமுகமும் பக்காவாய் இருக்கணும்னு' போட்டிருந்ததால, அதைப் பத்தியும் முகப்புல போட்டுருந்தேன். அந்த எல்லா ஆரம்ப்பத்துக்கும், இப்ப ஒரு வாய்ப்பு கிடைச்சுருக்கு.

ஸோ, நான் ரெடியாகிட்டேன்... நீங்க ரெடியா? ரொம்பப் பெரிய விசயமெல்லாம் எனக்குத் தெரியாது, சும்மா மொக்கையாய், ஜாலியாய் ஒரு ஒருவாரம் ரவுசு விடலாமா?

'Are you ready..ready..ready... I am ready..ready..ready..?' - இப்படியும் ஒரு தமிழ்ப் பாட்டு ரஜினி படத்துல வந்துருக்கு.. என்ன படம்னு தெரியுமா உங்களுக்கு..? (யாரோ அங்க மொக்கை ஆரம்பிச்சாச்சுன்னு கத்துறது காதுல விழுது, நெருங்கி வந்து அடிக்கிறதுக்குள்ள உடுறேன் ஜீட்டு, சீக்கிரமே அடுத்த பதிவில சந்திக்கிறேன்)

அறிவுக் கணிணியும், அழகு சினிமாவும்..ம்...ம்...

2008-06-05T18:43:00.000-04:00

இன்றைய திரைப்படத்துறை மக்களுக்கு, IT -த்துறையினர் மீது என்ன காழ்ப்புணர்ச்சியோ தெரியவில்லை, சமுதாயப் பாகுபாடுகளுக்கு IT-யே காரணம்ங்கிற மாதிரி சித்தரிக்கத் தொடங்கியிருக்கிறார்கள்.

இதற்கு IT-த்துறையினருக்கு வழங்கப்படுகின்ற சம்பளமே காரணமாய் முன்னிலைப் படுத்தப் படுகிறது. தமிழ் எம்.ஏ -யில் ஆரம்பித்ததுன்னு நினைக்கிறேன். இப்ப அறை எண் ...கடவுளில் வந்து நிற்கிறது. 'ஜாவா'-சுந்தரேசனின் வளர்ச்சி, IT - மக்களிடையே பிரசித்தம். படம் என்னவோ, முயற்சியும், உண்மை உழைப்பையும் முக்கியப்படுத்தியிருந்தாலும், ஜாவா சுந்தரேசன் குறித்த காட்சிகள், காமடிக்குச் சொன்னாலும், மிகைப்படுத்தப் பட்ட காமடி அது.

IT - துறையின் வளர்ச்சியோடு, பிற துறையின் வளர்ச்சிகளும் வளரத் துவங்கியிருக்கின்றது என்பது கண்கூடான உண்மை, அரசு உத்தியோகத்தின் மோகம் குறைந்து சுய தொழில்களின் மீதான கவனமும் வளர்ந்திருப்பதாகவே தோணுகிறது. இன்றைக்கும் சென்னை உள்ளிட்ட பிரபல நகரங்களில் வீடுவாங்குவது என்பது, IT -துறையினருக்கும் சவாலான ஒன்றுதான்..

பாஸிடிவான விசயங்கள் இருக்கின்றபோதிலும், நெகடிவான விசயங்களே முன்னிலைப்படுத்தப் படுவது ஏனோ? ஆனால், இந்தியா வல்லரசாகனுங்கிற படம்னா மட்டும், IT -த்துறை புகழ் பாடுவார்கள். ம்...இதையெல்லாம் என்னன்னு சொல்ல...வியாபார யுக்தின்னு சொல்றதவிட!!!?

ஏன் கண்டிக்கவில்லை?

2008-05-16T18:42:00.000-04:00

நல்ல இசைக்கு எப்பவுமே ஒரு மரியாதை உண்டு. அதுனாலதான் நல்ல பாட்டை யாராவது கர்ண கொடூரமா பாடுறப்ப, 'யப்பா..பாடுறதை நிறுத்திறியா.. இல்லா இடத்தக் காலிபண்ணவா'ங்கிறோம். இல்லைன்னா, 'கழுதை வந்துடப் போவுது'ன்னு சொல்றோம். ஆனா, இதெல்லாம் இப்ப இசையை வச்சு பொழப்பு நடத்துற இசையமைப்பாளர்களே மதிக்கிறதில்லையோன்னு தோணுது. ரீ-மிக்ஸ்-னு போட்டு, ஏற்கனவே வந்த பாட்டைப் போட்டு சிதைக்கிறது எனக்குச் சுத்தமா பிடிக்காத ஒன்னு. இதைப் பத்தி ஏற்கனவே ஒரு பதிவு எழுதியிருக்கேன். ஒரு பக்கம் ரீமிக்ஸ் பாட்டு, இன்னொரு பக்கம் ட்யூன் கிடைக்கலேன்னுட்டு, பிரபலமாய் இருக்கிற சாமி பாட்டு ட்யூன்களத் திருடி, சினிமாப் பாடல்களுக்குப் போடுறது.. கேவலமாய் இல்லையா இவங்களுக்கு. இதுக்கு நடிகர்கள், தயாரிப்பாளர்கள், டைரக்டர்கள் என எல்லாத் தலைகளும் ஒத்து ஊதுறாங்க.

ஒருத்தர் பக்தியா கும்புடுற இடத்தில, சத்தம் போடுறது கூட அநாகரீகம்னு ஒதுங்கிப் போகுற இடத்தில, வியாபாரத்திற்காக இந்தக் கூத்தாடி வேசம் கட்டுறது கண்டிக்கத் தக்கது.

சமீபத்துல வந்த சண்டை படத்துல 'செல்லாத்தா..செல்ல மாரியாத்தா'ங்கிற பாட்டு ட்யூனைப் போட்டு காமாசோமான்னு ஒரு பாட்டு. கொடுமைடா சாமி. இன்னொரு பாட்டும், பக்தியிசையின் காப்பி. இடையிடையிலே அசிங்கமாய்ச் சில முனகல்கள் வேறு..

இந்தமாதிரிப் பாடல்களுக்கு முன்மாதிரியிட்டதே தேவாதான்.. முதன் முதல்ல கந்த சஷ்டி ட்யூனைப் போட்டு, 'பதினெட்டு வயதுன்னு' 'சூரியன்'ல போட்டாரு. அடுத்து வழிவழியா ட்யூன் போடத்தெரியாத இசையமைப்பாளர்கள், தொடர ஆரம்பிச்சாங்க.. 'கற்பூர நாயகியே கனகவல்லி' ட்யூன்ல 'கருப்பான கையால'ன்னு ஒரு பாட்டு.

எனக்கு ஒன்னு புரியல...இதுமாதிரியான விசயங்கள் தொடர்ந்துகிட்டு இருக்கிறபோதும், எந்த ஹிந்துயிசக் காவலர்களும் இதுக்கெல்லாம் கண்டனம் தெரிவிச்சதா ஒரு செய்தியும் வரக்காணோம். ஒருவேளை இதெல்லாம் கண்டிக்கிறதுனால அவங்களுக்கு பப்ளிசிட்டி கிடைக்காதுன்னு வுடுறாங்களவோ என்னவோ?

கண்ணியமா இருக்கின்ற பக்திப் பாடல்களை, கெடுக்கிறது எனக்குச் சுத்தமாப் பிடிக்கலை. இதேமாதிரி, சபரிமலை சீசன்ல பார்த்தீங்கன்னா, சில பக்தியிசைக் குழுக்களும் பிரபலமான சினிமாப் ட்யூனாப் போட்டு, பக்தி கேசட்டப் போடுவாங்க. அதுவும் அசிங்கம்தான்.

பக்தியிசைங்கிறது நல்சிந்தனையையும், தூய்மைநிறை உணர்வுகளையும் கொடுக்கணுங்கிற நோக்கத்துல உருவாக்கப் படுற ஒன்னு. தயவுசெய்து அதைச் சிதைக்காதீங்க..ப்ளீஸ்..

Friday Corner: இலவச இதய அறுவை சிகிச்சை

2008-05-10T04:20:00.000-04:00

வெள்ளிக்கிழமைன்னாலே ஏதாவது ஜாலி மெயில் சுத்திக் கொண்டிருக்கும்.. இந்த வாரம் உபயோகமான குறிப்போடு வந்தது.. 'தேவைப்படுகின்ற குழந்தைகளுக்கு இலவசமாய், இதய அறுவை சிகிச்சை பண்ணுவது குறித்து...

உங்கள் பார்வைக்கு:

மேலும் அதிக தகவலுக்கு : http://sssihms.org.in/

அட.. என் கவிதை இல்லைங்க இது!

2008-05-09T18:37:00.001-04:00

"விழுந்தது கல்"

வருண பகவான்

கருணை மழையால்

அணை தாண்டிக்

காவேரி கரை

தொட்டோட

-தண்ணீர் பங்கீட்டுப்

பிரச்சனை-

தற்காலிகமாகவேனும்

தலை தூக்காதெனச்

சற்றே நிம்மதிப்

பெருமூச்செறிந்த

தமிழன்

தலையில்

****************************

"புகையும் கல்"

ஹோகேனக்கல்

என்றால்'

புகையும் கல்' எனப்

பொருளாமே

கன்னடத்தில்.

தம் எல்லை

தாண்டிப் போனாலும்-

தம்க்குப் பயன்படாத

தண்ணீரே ஆனாலும்-

தமிழன் தாகம்

தீர்க்கப் போகிறது

என்றதுமே-

ஒரு சிலரின்

காது வழியே'

புகையும் கல்'தானோ

ஹோகேனக்கல்?***

****************************

ஆமாங்க.. மேலேயுள்ளது நான் எழுதிய கவிதைன்னு நினைச்சீங்கன்னா...மன்னிச்சுடுங்க.. அதுக்கு சொந்தக்காரன் நானில்லைங்க..

ராமலஷ்மி-ங்கிற புதிய பதிவர் எழுதியது. PIT போட்டிக்காக நான் பதிந்த போட்டோவுக்கு, கவிதை எழுதினவங்க....யாரிது புச்சா இருக்கேன்னுட்டு போய்ப் பார்த்தா, நம்ம ஊர்க்காரவுக..

'ஹோகேனேக்கல்''ங்கிற காரணப்பெயர(கன்னடத்தில்) வச்சு, சூப்பரா ஒரு கவித படிச்சிருந்தாங்க.. நல்லாயிருந்தது..

விழுற தண்ணி, அதன் வேகத்தில புகை மண்டலமா சாரல் அடிக்கிறதுனால, 'ஹோகனேக்கல்'ங்கிற காரணப்பெயர் வந்ததுவாம். (அப்ப அது தமிழ்ப் பெயர் இல்லையான்னு கேக்காதீங்க...) புகைய வச்சு, பத்த வச்சுட்டாங்க... ம்..ம்ம்...

http://tamilamudam.blogspot.com/2008/05/blog-post_02.html

மொபைல் ப்ளாக்கிங்க் பண்ணுவது எப்படி?

2008-05-01T16:01:00.001-04:00

மொபைல் போன் குறித்த முந்தைய பதிவில் சொல்லும்போது, மொபைல் ப்ளாக்கிங்க் பற்றியும் தொட்டுப் போயிருந்தேன். அதை கொஞ்சம் விரிவாய்ச் சொல்லாம்னு நினைக்கிறேன். டெக்னாலஜியோட வளர்ச்சி, மக்கள் அதைப் பயன்படுத்துறவிதம் எல்லாம் காலத்துக்கு காலம் வளர்ந்துகிட்டே போகுது. முன்பு ஒரு விளம்பரத்துல, ஒரு பெண், எதிர் வருகிற ஆணை காமிரா போனில் படம் எடுத்து, SMS அனுப்புறமாதிரி வந்தது, இப்ப எல்லோரும் பார்க்கிறவிதமா இணையத்துலேயே பதிப்பிக்கிற அளவுக்கு மொபைல் உலகம் வளர்ந்துடுச்சு. UK-ல இருக்கிற மொபைல் சேவைபுரிகிற நிறுவனங்கள், அவர்களின் வாடிக்கையாளர்க்களுக்கென புகைப்படம், மற்றும் SMS, MMS தகவல்களை சேகரிக்க உதவும் சேவைகளையும் வழங்குகின்றன. US -ல இது மாதிரி இருக்கிறதா, என்பதை அங்குள்ள நண்பர்கள் சொன்னால் தெரிந்து கொள்ளலாம்.

சரி, விசயத்துக்கு வருவோம். மேலே உள்ள படம், Sony Ericsson K660i செல்பேசியில் எடுத்து, அதனுடைய மொபைல் ப்ளாக்கிங்க் மூலமாய் அனுப்பி பதிப்பித்தது.. ரொம்ப வசதியில்ல.. உடனடியாய் தகவல்களைத் தர, உபயோகமாய் இருக்கும். பயனிக்கிற வழியில், ப்ளாக்-கிக்க வசதியாய் இருக்கும். ஆனால், மொபைல் Browserகள், இன்னமும் யுனிகோடு பயன்பாடு வரவில்லை. ஆகையால், ஆங்கிலத்தில் புலம்புவது எளிது, தமிழில் கதைப்பது இயலாத காரியம், நண்பர்கள் எவரேனும் அறிந்தால் தகவல் தரவும். குறைந்த பட்சம், படங்காட்டலாமே... நம்ம PIT மக்கள், புகைப்பட போட்டி ஒரு முறை மொபைல் புகைப்பட போட்டி கூட வைக்கலாம்.. :)..

சரி...எப்படி இந்த படத்தை ப்ளாக்கினேன்..என்பதைப் பார்க்கலாமா?

எந்தப் படத்தை ப்ளாக்கணுமோ, அதனை அனுப்ப , option-ல், 'send' பட்டனைத் தட்டினால் அதில் 'To Blog' என்றொரு தெரிவினை அழுத்தினால், அது தேர்ந்தெடுத்த படத்தை ப்ளாக்கருக்கு கொண்டு போய், தலைப்பு, மற்றும் படம் குறித்த விளக்கத்தினை தட்டச்சு செய்ய ஏதுவான பகுதியைக் காட்டும். (தற்சமயம் ஆங்கிலம் மட்டும்தான். ) அதனை முடித்தவுடன், 'Publish' பட்டனைத்தட்டினால், உடன் வெற்றிகரமாய் வெளிஉலகிற்கு தெரிவித்துவிடும்.

முதல் முறை மொபைலில் இருந்து ப்ளாக்கும் போது, பதிப்பிக்கப் பட்டவுடன் உங்களுக்கு SMS வரும். அதில் உங்கள் மொபைலுக்கான டோக்கன் அனுப்பப் பட்டு இருக்கும். அதனை எடுத்து எடுத்து http://www.blogger.com/mobile-start.g தளத்திற்குச் சென்று, உங்களுக்கான டோக்கனைத் தட்டச்சு செய்து submit பண்ணவும். அதனை அடுத்து வரும் பக்கத்தில், அந்தப் பதிப்பினை, ஏற்கனவே உள்ள உங்கள் ப்ளாக்கோடு இணைக்கவா அல்லது புதியதாய் ஒன்றை ஆரம்பிக்கவா என்று கேட்கவும். ஏற்கனவே வைத்து இருக்கும் ப்ளாக்-உடன் இணைக்க, அந்த ப்ளாக் பய்னர் கணக்கினையும், கடவுச்சொல்லையும் கொடுத்தால் போதும். தொடர்ந்து உங்கள் மொபைலில் இருந்து பதிப்பிக்கும் தகவல்கள், நேராக நீங்கள் கொடுத்த ப்ளாக்கில் பதிப்பிக்கப் படும். இலகுவான வேலைதானே!

ஆனால், உங்கள் மொபைலிலும் இணையத் தொடர்பு இருக்கவேண்டும். மொபைலில் இணையத்திற்கான கட்டணம் எவ்வளவு என்பதைத் தெரிந்து கொண்டு, முயன்று பாருங்களேன், இதனை! Gadget Game!!

தசாவதாரம் பாடல் எப்படியிருக்கு?

2008-04-29T12:48:00.000-04:00

'சிவாஜி' என்றொரு பிரம்மாண்ட அலை இப்போதுதான் கடந்து போன மாதிரி இருந்தது..அடுத்த பிரம்மாண்ட அலை அணிவகுத்து வருகுது.. 'தசாவதாரம்' மூலமாய்... தமிழ் சினிமா, பாலிவுட் சினிமாவை மிஞ்சுகிற விதத்தில் பறந்து கொண்டிருக்கின்றது. பாடல் வெளியீட்டு விழாவுக்கு 'ஜாக்கிசான்' வந்து போகிற அளவுக்கு..

விழாவின் பிரம்மாண்டம், பாடல் மீதான ஆர்வத்தை தூண்டாமலில்லை. வைரமுத்துவும் வரிகளில் பிரம்மாண்டத்தைப் பஞ்சம் வைக்காமல், 'ஐ.நாவும்' உன்னை அழைக்கும் என்று கமல் ரசிகர்களை குளிர்ச்சி படுத்தும் விதமாய் 'உலக நாயகனே' என்ற போற்றிப் பாடல் எழுதியிருக்கிறார். ஹீரோயிசப் பாடல் என்பது தவிர்க்க முடியாததாய் விடுகிறது. ரசிகர்களுக்குப் பிடிக்கலாம்.

'க..கருப்பனுக்கும் வே வெள்ளையனுக்கும் பே பேதமில்லை'-ன்னு மல்லிகா ஷெராவத்தோடு ஆடுகிற பாடல்(?) beat நல்லா வந்து இருக்கு. கமலின் நடனம் இன்னமும் துள்ளலாய் இருக்குமா, என்ற ஆவலைத் தூண்டும் விதமாய் இருக்கிறது. ஆரம்பத்தில் வருகின்ற ஆங்கில வரிகள்தான் பாடலை அன்னியப் படுத்துகிறது, பெண் குரலிசை மட்டுமே என்பதால், ஹிட் வரிசையிலிருந்து விலகியும் போகலாம்.

'பாட்டு உன் காதிலே தேனை வார்க்கும்' - கமல் குரலின் இனிமையோடு துவங்குகிற ஓஹ்..ஹோ..சனம் பாடல் ஹிட் வரிசையில் சேருகின்ற ரகம்தான். பாடலின் அமைப்பு, சில இடங்களில் 'போட்டு வைத்த காதல் திட்டம்' style ஐ நினைவுபடுத்துவது தவிர்க்கமுடியாதது.

"யார் நெஞ்சிலும் மிருகத்தின் தோல் உள்ளது,

அதை மாற்றி யாழ் செய்வது பாடல்தான்..

கடவுளும், கந்தசாமியும் பேசுக்கொள்ளும்

மொழிபாடல்தான்" என்று

இசையின் மேன்மையை சொல்லும் விதமாய் பாடல் செல்வது அழகு. வைரமுத்துவுக்கு ஜே! 'வீழ்வது யாராயினும் வாழ்வது நாடாகட்டும்' என்ற தேசீயம் வேறு. பஞ்சாபி வேடத்தில் பாடுகின்ற பாடலாயிருக்குமோ?

மெலடியாய் ஒரு பாடல் வேண்டாமா? 'முகுந்தா...முகுந்தா...' பாடல் பூஜை அறையில் அசின் பாடுகின்ற பாடலாய் இருக்கலாம். சாதனா சர்கமின் குரலினிமையோடு, பாடலின் இறுதியில் கிழவி வேடக் கமல் (?) பாடுவது போல், வயதான கிழவி போல பாடியிருக்கிறார் கமல், வித்தியாசம் காட்டியிருக்கிறார், கேரக்டரோடு பார்க்கும் போது இன்னும் நன்றாயிருக்கலாம். தசாவதாரம் என்பதால், கிருஷ்ணாவதராங்கள் வரிசைப் படுத்தலும் உண்டு.

'ஓம் நமோ நாரயணாய' வைத் தொடர்ந்து வாலியின் வரிகளில் 'கல்லை மட்டும் கண்டால் கடவுள் தெரியாது, கடவுள் மட்டும் கண்டால் கல்லடி தெரியாது' பாடல்.... டச்சிங். இசையும் சரி, ஹரிஹரனின் குரலிசையிம் குழைந்திருக்கின்றது. 'ஓம்..ஓம்' என்ற மெல்லிய பின்னொலியும் இனிமை சேர்த்திருக்கிறது. கேட்க மிகச் சிறப்பாய்த் தெரிவது இப்பாடல்தான். பாடலின் காட்சியமைப்பு கைகோர்க்குமானால், பாடலுக்கு கூடுதல் வெற்றி.

வாலி,வைரமுத்துவின் வரிகளைச் சிதைக்காமல், இரைச்சலாய் இல்லாமல் இசைத்திருக்கும் ஹிமேஷ் எதிர்பார்ப்புகளைச் சிதைக்காமல் காப்பாற்றியிருக்கிறார் என்றே சொல்ல வேண்டும்.

ஆனாலும், விளம்பரங்களும், கமலின் வித்தியாசங்களும் காட்டுகின்ற பிரமிப்பை, ஆர்ப்பரிப்பாய் காட்டாமல், அமைதியாய் இசைத்திருப்பதாய்ப் படுகிறது, இசையமைப்பு...

சிவாஜி தப்பித்து விட்டார்... கமலுக்கும், பிரம்மாண்டத்திற்கும் உள்ள ராசி எப்படிங்கிறதை பொறுத்திருந்துதான் பார்க்க வேண்டும்.

கல்லை மட்டும் கண்ட...

ஆனா, இந்தப் பாட்டு காப்பியாமே.. பாருங்க இங்க

மொபைலு...மொபைலு...

2008-04-25T13:06:00.000-04:00

sony-யுடைய Gadgets எல்லாமே, ஒரு தனிமுத்திரையைப் பதிக்கிற ஒன்னா இருக்கும், ஆடியோவாகட்டும், வீடியோவாகட்டும் அதன் முத்திரை தனிதான்..

மொபைல் போன்களிலும், அந்த முத்திரைக்கு குறைவில்லை. சோனி மொபைல்களில், காமிரா மிக நேர்த்தியாய் இருக்கும். அந்தந்த விலைக்கு ஏற்ற மொபைல்களின் காமிராக போன்களோடு ஒப்பிடுகையில், சோனியின் காமிரா முத்திரை தனியாய் இருக்கும். சென்ற வருடத்திய போன்களில், K800i தனி இடத்தைப் பிடித்து, UK-வின் Favorite-லும் இடம் பிடித்தது.

நிஜமாலுமே அருமையான போன்தான். 3.2 MP கேமிரா உடன் xenon Flash வேறு. குறைந்த வெளிச்சத்திலும், நல்ல படம் பிடிக்கிறது. Auto focus feature இருந்தாலும், force flash feature இல்லாதது ஒரு குறைதான். Point & Shoot கேமிராக்களுக்கு இணையாக போட்டோக்களின் தரம் வருவது சிறப்பு. இதற்கு அடுத்த மாடல் K810i/K850i வந்தபோதிலும், K800i அதன் இடத்தை விட்டுக் கொடுக்கவில்லை.

இதில் எடுக்கப்பட்ட படங்களைப் பார்க்க... Kளிக்குக.. web camera features, மொபைல் ப்ளாக் என எல்லா நவீனத்துவமும் உண்டு. வீடியோ features முந்தைய மாடல்களைவிட தேவலாம், ஆனால் நோக்கியாவுடன் N-70/N-95 மாடல்களுடன் ஒப்பிடுகையில் நோக்கியா சிறப்பாய்த் தெரிகிறது.

Nokia N-70/N-95 மாடல் போன்களும் சிறப்பு. Email, Yahoo Chat, MSN Chat & Skype என எல்லா இணைய சாட் தொகுப்புகளையும் உள்ளடக்கி, கணிணியை நாட வேண்டிய தேவைகளை புறந்தள்ளுகிறது. வருகின்ற புதிய மாடல்களின் விலை, கணிணிக்கு இணையாக ஏறிக்கொண்டிருந்த போதும், மக்களிடம் மவுசு குறையாமல் செல்பேசி சந்தை சந்தோசமாகத்தான் போய்க் கொண்டிருக்கின்றது.

மொபைல்-ஆ...மொபைலா...?

2008-04-05T18:00:00.000-04:00

'மொபைல்-ஆ..மொபைல்-ஆ..' ன்னு பாட்டு பாடத்தோணுது... இப்ப வர்ர விதவிதமான மொபைல் போன்களைப் பார்க்கும்போது.. Features-ஆகட்டும்..இல்ல கண்கவர் வண்ணங்களாகட்டும்.. எல்லா நிறுவனங்களும் போட்டி போட்டுக் கொண்டு, விதவிதமாய் உற்பத்தி பண்ணிக் கொண்டு இருக்கிறார்கள்..
எதை எடுப்பது..எதை விடுப்பதுன்னு தெரியாம முழிக்கிற அளவுக்கு மொபைல் மார்கெட் அள்ளிகிட்டுப் போகுது.. Laptop கணிணியை விட, அதிக விலை போகும் மொபைல்களும், ஜெகஜ்ஜோதியாய் விற்பனையாகிக் கொண்டுதானிருக்கின்றன.

மக்களுக்கு பேசுறதுல மட்டுமல்ல ஆர்வம், மாசத்துக்கொரு மொபைல வச்சு அழகு பார்க்குறதுலயும் ஆர்வம் அதிகமாயிட்டு இருக்கு. சின்னப் பிள்ளைங்களுக்கு விளையாட்டுப் பொருள் மேல இருக்கிறமாதிரி, மொபைல் போன் பெரியவங்களுக்கான விளையாட்டுப் பொருளாயிடுச்சு.. குட்டிப் பையங்களுக்கும், அது பிடித்திருக்கு என்பது எல்லோருக்கும் தெரிஞ்ச விசயம். ஆபிசுல என்னோட மேலதிகாரி i-phone வாங்கிட்டு, அதுல விளையாடிட்டு இருக்கிறப்ப குழந்தையா மாறிடுறார்.. இது அப்படி பண்ணும்..இப்படி பண்ணும்னு ஏகப்பட்ட டெமான்ஸ்டிரேஷன் வேறு.. நிஜமாலுமே impressive-வாகத்தான் இருக்கு. காசப் பார்த்தா மயக்கமே வந்துரும்..இந்தியாவுல Vodofone, செப்டம்பர் 2008 -ல இருந்து i-phone சப்போர்ட் தரப்போறதா சொல்றாங்க. போன் மட்டும் 28000 ரூபாய் விலை நிர்ணயமாகலாம்ங்கிறாங்க.. Wi-Fi இண்டர்நெட், தொட்டுத் துழாவுகிற டெக்னாலஜி..என பல்வேறு விதமான அம்சங்கள் இருந்தாலும், கேமிரா போனுக்கான விசயங்கள், பெரிதாகக் கவனிக்கப் படவில்லை என்பது, அந்த விலை கொடுத்து வாங்கக் கூடிய போனுக்கு மைனஸாகிவிட்டது என்பது என் கண்ணோட்டம். ஆனாலும் ஐ-போன் படங்களுக்காக ஒரு Flickr-குழுமமே இருக்கு. பார்க்க:http://www.flickr.com/groups/iphone_users/. ஆனாலும் கேமிரா மொபைல்-னா என்னோட வோட்டு sony மொபைலுக்குத்தான்.. காமிராவுல எடுத்தாலும், நல்ல sharp-ஆ வரும். அது குறித்து அடுத்த பதிவுல பார்க்கலாம்.

2007 -ஆம் வருடத்தைப் பொறுத்தவரையில், Mobile Market நல்ல பிரகாசமா இருந்துருக்கு. Nokia-தான் மிக அதிக Market Share-ஐ வச்சுருக்கு, அடுத்து மிரட்டுறது Sony-யாகத்தான் இருக்கும்.. இன்னும் கொஞ்சம் mobile ஐப் பத்தி பேசலாம்னு இருக்கேன்..நாளை தொடர்கிறேன்..

சுஜாதா...கமலின் பார்வையிலிருந்து....

2008-03-26T19:13:00.000-04:00

கமல் மூலமாய்....சுஜாதா ஒரு பார்வை: (மூலம்: சினிசவுத்)

(சினிசவுத் வெளியிட்டிருந்த தகவல்)

"சுஜாதா அவர்களுடைய மரணம் நெருங்குவதை நான் உணர்ந்தேன். அவரும்தான்.
வழக்கமாக எழுத்தாளர்கள் சமரசம் செய்வதை இழுக்காகவும், தோல்வியாகவும் நினைப்பார்கள். ஆனால் சுஜாதா அவர்கள், சமரசம் செய்து கொள்வது அவசியம், சமுதாயக் கடமை என்றே நினைத்தார். அதனால்தான் சிலசமயம் நாம் எதிர்பார்க்கிற வீரியம் குறைந்ததுபோல ஒரு பிரமை தோன்றும். அவருடைய வாழ்க்கைமுறை, நெறி அது.
விஞ்ஞானம் கற்றறிந்தவர் என்பதால் எழுத்தை அவர் தொழிலாக நினைக்கவில்லை. தொடரும் ஒரு காதலைகவே நினைத்தார். அதனால் அவருக்கு தன் எழுத்தை பற்றி செறுக்கு இல்லை. அவருடைய சினிமா எழுத்தை வைத்து தயவுசெய்து யாரும் சுஜாதாவை கணித்துவிடாதீர்கள். அதுவும் பெரும் சமரசம்தான். சினிமாவுக்காகவும், நட்புக்காகவும், அன்புக்காகவும் அவர் செய்துகொண்ட சமரசம். இருந்தாலும் சுஜாதா என்னும் அந்தப் பெயரை பெரியதாக வட்டம் போட்டுக்காட்டிய சினிமாவுக்கு ஓரளவுக்கு வேண்டுமென்றால் நன்றி சொல்லாம். மற்றதெல்லாம் இலக்கியத்திற்கே உரித்தானது.

தர்மம் கிடைக்கும் இடத்தில்தான் பிச்சைக்காரர்கள் கூடுவதுபோல், கொடுக்கும் இடத்தில்தான் இன்னும் எதிர்பார்பார்கள். அப்படிப் பார்க்கும்பொழுது சுஜாதா இன்னும் கொடுத்திருக்கலாம் என்று சொல்வதைவிட கொடுத்ததற்கு நன்றி சொல்லவேண்டிய நேரமாகவே இதை நான் கருதுகிறேன்.

பல விஷயங்களில் அவருக்கு நான் நன்றி சொல்ல கடமைப்பட்டிருக்கிறேன். என்னுடைய எழுத்து ரசனையை, என்னுடைய தமிழ் வாசிப்பு ரசனையை உயர்த்திய முக்கியமான எழுத்தாளர்களில் அவரும் ஒருவர். என்னுடைய வாசிப்பு என்று சொல்லும்போது ஏதோ குறுகிய வட்டம்போல் ஆகியது. தமிழகத்தில் சுஜாதாவைப் படித்தவர்கள் எல்லோருமே வாசக தரத்தில் உயர்ந்தவர்களாகவே நான் கருதுகிறேன். நன்றி தமிழ் உலகம் அவருக்கு சொல்லும்." - கமல்

நன்றி: சினிசவுத்

http://tamil.cinesouth.com/masala/hotnews/new/28022008-7.shtml

இந்தவார ஸ்டார் பதிவர் சுப்பையா வாத்தியாரின் சுஜாதா பதிவு காண

என் இனிய சுஜாதா...

2008-03-25T17:56:00.000-04:00

சுஜாதா... எண்ணற்ற தமிழ் இதயங்களில், தனியொரு இடத்தைப் பிடித்தவர்.... அறிவும், அறிவியலும் உணரப்படும் விதமாய், எளிதான தமிழில் எழுதியவர்.

'காயத்ரி'-தான் அவர் எழுதி, நான் படித்த முதல் கதை. அரசு பொது நூலகத்தில்தான் கதை படிக்க ஆரம்பித்த சமயம்.. சாண்டில்யன்,ஜெயகாந்தன், லட்சுமி, இந்துமதி, புதுமைப்பித்தன், தமிழ்வாணன் என பிடித்த எழுத்தாளர்களின் எழுத்துக்களை, நாள் முழுக்க படித்த காலம்.. அப்படியொரு சமயத்தில்தான், நூலின் முதல் பக்கத்தில், 'பெஸ்ட்' என ஏற்கனவே படித்த வாசகரால் அடிக்கோடு இடப்பட்டு எழுதப்பட்டு இருக்க, 'படிச்சுப் பார்க்கலாம்' என்று அசுவாரஸ்யமாய்ப் படிக்க ஆரம்பித்தேன். எப்படி அதில் மூழ்கினேன், என்று தெரியாமல், முழுசாய் ஒரே மூச்சில் வாசித்து முடித்தது. அவ்வளவு விறுவிறுப்பு. விறுவிறுப்பு மட்டுமல்ல.. புத்திசாலித்தனமான ட்விஸ்ட்களும் கூட..

சாண்டில்யனின் வர்ணனைகளிலும், ஜெயகாந்தனின் அழுத்தத்தையும், புதுமைப்பித்தனின் இயல்பு நிலை தாக்கத்தையும், பெண் எழுத்தாளர்களின் செண்டிமெண்ட் எழுத்துக்களிலும், தமிழ்வாணனின் வெளிநாட்டு கார்கள் பற்றிய தகவலுடன் கூடிய துப்பறியும் கதைகளிலும் லயித்துப் போய்க்கிடந்த என் மனது, இப்படி எந்தச் சாயலும் இல்லாமல், இயல்பான ஓட்டத்தில் ஒரு பரப்பான கதையைப் படித்தபோது, 'அட, இந்த எழுத்தாளினி வித்தியாசமானவரா இருக்காரே' என்று எண்ணத் தோன்றியது. அதற்குப் பிறகு, அவர் எழுத்துக்களை தேடி ஓடத்துவங்கி, படித்தது எல்லாம் ஒரு சுவாரஸ்யமான ஓட்டம்.

கதை படிக்கையில், உங்களை கதைக்குள் இழுத்து, உங்கள் சிந்தனையை மறக்கடித்து, தன் வசம் கொண்டு செல்வது ஒரு வகை எழுத்து. இன்னொரு வகை, உங்களை உங்கள் வசத்தில் விட்டு, கதையை தன் போக்கில் கையாண்டு, கதையின் போக்கை உங்களை யூகிக்க வைத்து, யூகிக்க முடியாத முடிவைக் கொடுப்பது. சுஜாதா, அதில் கில்லாடி. அவரது கதையைப் படிப்பது, ஒரு செஸ் கேம் ஆடுவது போல. நிறைய சமயம் அவர் ஜெயிப்பார், சில சமயம் நாமும் ஜெயிப்போம். But, intresting!

அறிவியல் கதைகளாகட்டும், நாடகமாகட்டும், அல்லது கட்டுரைகளாகட்டும், சட்டெனெ படித்து விட முடிவதோடு, பட்டென மனதிலும் நிற்கும். சின்ன வயதில், கையெழுத்துப் பத்திரிக்கை நடத்திய போது, அவரது கணேஷ்-வசந்த் காம்பினேஷனில் கதையெழுதி, வசந்த் சார்பாக எழுதிய எழுத்துக்களுக்காக வித்தியாசமாய்ப் பார்க்கப் பட்டதுமுண்டு. பிரிவோம்..சந்திப்போம் கதையில், 'பிரிவோம்...' எழுத்துக்கள் எனக்கு மிகப் பிடித்த ஒன்று. மதுமிதா.. ஒரு கனவுப் பெயர்.

சுஜாதாவின் மறைவுகுறித்து 'அய்யோ' என்று அதிர்ந்தபோதே, அவரின் படைப்புகள் குறித்த எண்ண ஓட்டம், மனதில் ஓடியபோதே எழுத்தாய்ப் பதியவேண்டும் என்று தோன்றியது. இத்தனை நாள் கழித்துதான், அதற்குச் சமயமே வாய்த்தது. இத்தனை வயதிலும், எழுத்து, இலக்கியம், தமிழ், அறிவியல், தொழில், சினிமா, ஹைகூ, கவிதை, குடும்பம் இது தவிர, உடம்பின் அவஸ்தை..இப்படி எல்லாமும் தாண்டி, எல்லாத் துறையிலும் வெற்றிகரமாய்ப் பணியாற்றிக் கொண்டேயிருந்த அந்தக் கைகள், தமிழ் கூறும் நல்லுலகிற்கு திலகமிட்ட நற்கைகள். படிக்கின்ற ஆர்வத்தையும், எழுதுகின்ற ஆர்வத்தையும் அவருடைய எழுத்துக்கள் தந்தன என்றால் அது மிகையில்லை.

பரவலாய்ச் சிகரம் தொட்டவர் அவர்... அவரின் நினைவுகள்/பாதிப்புகள் என்றும் தமிழுலகில் இருக்கும். அவருடைய மறைவிலும், விரோதம் கருதும் சில உணர்வுகளைப் படிக்கையில், இந்தியன் திரைப்படத்தில், 'இந்தியன்' கமல் மனிஷாவிடம் கேட்கிற மாதிரி க்ளைமாக்ஸ்-ல் ஒரு வசனம் எழுதியிருப்பார் சுஜாதா... அதுதான் நினைவுக்கு வருகிறது 'பச்சைக் குழந்தைங்கம்மா.. அதக் கொன்னுருக்கானே, தப்புன்னு தோணலையா?' - அப்படிம்பார். அதுக்கு மனீஷா, 'புத்திக்குத் தெரியுது, மனசுக்குத் தெரியலையே...'ம்பார். எது எப்படியோ, என்னைப் பொறுத்தவரையில், ('என் இனிய இயந்திரா' மாதிரி) என் இனிய சுஜாதா, தமிழ் எழுத்துலகின் சாகாவரம்!

இந்தவார ஸ்டார் பதிவர் சுப்பையா வாத்தியாரின் சுஜாதா பதிவு காண

இதையும் படிங்க

கணவர்கள் காப்பகம்??

2008-03-24T15:24:00.000-04:00

செஸ்டர் கடைத்தெரு அருகே

ஒரு

சுவாரஸ்யமான விளம்பரம்!!!

இது எப்படி இருக்கு?

வருகின்ற நாளை வாழ்த்தியே வரவேற்பு பாடுவோம்!

2007-12-31T18:27:00.000-05:00

01-01-2008 ....பிறந்திருக்கின்ற புதிய வருடத்தின் முதல் தேதி.. எல்லா 'முதல்'களுமே ஸ்பெஷல்தான், அதுவும் 'புது'சு என்கிறபோது கூடுதல் உற்சாகம்தான்..

பகைமையுணர்வும், தீவிரவாதங்களும் மறைந்து, குழந்தை மனமும், இறைத்தன்மையும், சகோதரத்துவமும், மனிதமும் எல்லோரிடமும் பூத்திருக்க, ஒரு நல்லாண்டாய் இவ்வாண்டு அமையட்டும்.

அனைத்துலக நண்பர்களுக்கும், இவ்வருடத்தின் ஒவ்வொரு நாட்களும், கிழிக்கப்படுகின்ற காலண்டரின் ஒரு தேதியாய் இல்லாமல், சாதனை புரிகின்ற நாட்களாய், நித்தமும் மலர்ச்சியும், மகிழ்வும் தரும் நாட்களாய் அமைய வாழ்த்துக்கள்!

Wishing you all a Happy & Prosperous New Year 2008!

அன்புடன்...
நெல்லை சிவா

ஆக்க்ஷன் கிங்...சூப்பர் ஸ்டார்...யார் முதல்?

2007-10-24T12:56:00.000-04:00

அட..அட.. என்ன ஒரு முக்கியமான நாட்டுக்குத்தேவையான விசயம்னு யாரோ முணுமுணுக்கிறது எங்காதுல கேக்குது...அட..இது பொழுது போகாத பொம்முக்களுக்காக.. அவங்க மேலே படிக்கலாம், மத்தவங்க.. மேம்போக்கா மேயலாம்.. ஹி...ஹி..ஹி..

போனவாரம் மூணுநாள் 'லாங் வீக் எண்ட்'லா. அமெரிக்கால இருந்தா, எங்கியாவது கார எடுத்துட்டுச் சுத்தலாம், ஆனா இங்க எங்க போக? அதுவும் ஆயுதபூஜை அன்னைக்கு, எங்க பார்த்தாலும் பூசணிக்கா வேற ஒடைச்சு ரோட்டில போட்டிருப்பாக..ஒருவேளை பெரியார் இப்ப இருந்திருந்தா, 'வெங்காயம்'னு அடிக்கடி சொல்லுவாராமே..அதுக்குப் பதிலா பூசணிக்கான்னு சொல்லியிருப்பாரோ?

அட என்னப்பா, சொல்லவந்ததை சீக்கிரம் சொல்லிட்டுப்போப்பான்னு இன்னொருத்தர் முணுமுணுக்கிறாரு..இதோ வந்துட்டம்பா..

ஸோ..'லாங் வீக் எண்ட்'ல, ஊரச் சுத்தாம, வீட்ல இருந்து ஒரு ஒரு சேனல்லயும், சாமியக் கூட கும்பிடவுடாம, விதவிதமா புரோகிராம போடுறத பாக்கலாம்னு முடிவு பண்ணி பார்க்க ஆரம்பிச்சேன்..

அதுல ஒன்னுதான், நம்ம அர்ஜுனோட படம் 'கிரி'. பாத்துகிட்டேயிருக்கையில, ஒரு சீன்ல அர்ஜுன் வில்லனைப் பாத்து ஒரு டயலாக் உடுறாரு. 'பன்னிங்கதான் கூட்டம் கூட்டமா வரும், சிங்கம் சிங்கிளாதாண்டா வரும் நா சிங்கண்டா' அப்படிங்கிறாரு..

அட..இது நம்ம சூப்பர் ஸ்டாரு, லேட்டஸ்டா 'சிவாஜி'ல சொன்னதுல்லா.. ஆனா 'கிரி' அதுக்கு முன்னாடியே வந்துடுச்சே.. அப்படின்னா அர்ஜுன் முதல்ல சொன்ன டயலாக்க, ரஜினிக்கு உபயோகப் படுத்தியிருக்காங்களா? தலைவருக்குன்னு புச்சா சொல்லியிருக்காங்கன்னு நினைச்சா, இப்படி கவுத்துட்டாரே சுஜாதா. (ஸோ..இப்ப தலைப்புக்கு அர்த்தம் புரிஞ்சிடுச்சா...முதல்வன்னாலே அது அர்ஜுன்தான்..இல்ல?)

ஆனா, எது எப்படியிருக்கட்டும், 'ரஜினி' சொன்னதுக்கப்புறம்தான் அந்த டயலாக்குக்கே ஒரு வெயிட்.. நல்ல ரீச் கிடைச்சுருக்கு.

இந்த டயாலாக் 'சிவாஜி'ல கேட்டப்புறம், நம்ம பாஸோட அஞ்சு வயசு பையன் டைனிங்க் டேபிள்ல உக்காந்துட்ட வுட்ட கமெண்ட்டுதான் ஞாபகத்துக்கு வர்ரது... திடிர்னுட்டு சொன்னாம்பாருங்க, 'அம்மா, இனிமே எனக்கு இட்லி வேணாம், எப்பவும் தோசைதான் வேணும்'னான்.

'என்னடா..எப்பவும் இட்லிதாம் பிரியம்னு சொல்லுவ..இப்ப என்ன வந்துச்சாம்?'ன்னு அம்மா கேக்க,

'போம்மா..பன்னிங்கதான் கூட்டம் கூட்டமா வரும், அது மாதிரி இட்லிதான் கூட்டம் கூட்டமா வரும்', தோசைதான் 'சிங்கம்' மாதிரி சிங்கிளா வரும்..அதுனால மாறிட்டேன்னான்' பாருங்க..சும்மா டைனிங்க் டேபிளே அதிருடிச்சில்லே...

இரைச்சலாய் இசைத்திருந்தால் கேட்டிருக்குமோ?

2007-09-08T21:02:00.000-04:00

"இரைச்சலாய்
இசைத்திருந்தால்
கேளாத
செவிகளுக்கும்
கேட்டிருக்குமோ?
மெல்லிசையாய்
இசைத்ததாலேயே
நல்லிசை ஒரமாய்ப்
போனதோ?"

- என்று கேட்கத் தோணுகிறது, நம் மெல்லிசைமன்னரின் இசைக்கு அங்கீகாரம் வழங்கக் கோரும் 'பத்மபூஷனும் விபூஷனனும் ஈயம் பித்தளைக்கு வாங்கரோமுங்கோ... ' என்ற சர்வேசனின் பதிவைப் படித்த போது.

சரி, அங்கீகாரம் வழங்கக் கோரி அவர் எழுப்பியிருக்கிற ஆன்லைன் பெட்டிசன்-ல எத்தனைபேரு கையெழுத்திட்டிருக்காங்கன்னு பாத்தா, மின்மினி மூலமாய் நானிட்ட கையெழுத்தும் சேர்த்து, 60 - தான் வருகிறது.

இப்ப வந்த பசங்க கூட டாக்டர், கம்பவுண்டர் பட்டங்கள எளிதா வாங்கிடறாங்க, ஆனா நம்ம எம்.எஸ்.விக்கு....? என்ன கொடுமை சரவணன் இது?-ன்னுதான் கேட்கத் தோணுது.

இசையில் எவ்வளவோ சாதித்திருந்த போதும், அடக்கமாய் இருப்பவர் அவர், அதனால்தானோ என்னவோ 'விருதார்'கள் கவனிக்காமல் விட்டார்களோ?

நம்ம ஊருல விருது கொடுக்குறதுக்குன்னே சில சட்டதிட்டங்கள் வைத்திருக்காங்க.

1. விருது கொடுக்குறதுனால, தங்களுக்கு பப்ளிசிட்டி கிடைக்கும்னா, வலியக் கூப்பிட்டு வகைக்கொரு பட்டம் கொடுப்பாங்க

2. காசு கொடுத்தா பட்டம் கொடுப்பாங்க

3. பெரிய இடத்து சிபாரிசு இருந்தா பட்டம் கொடுப்பாங்க

4. அனுசரித்துப் போனா, பட்டம் வாங்குறவங்கள விளம்பரப்படுத்த பட்டம் கொடுப்பாங்க

5. நாங்கதான் முதல்ல பட்டம் கொடுத்தோம்-னு சொல்லிக்க, பாப்புலரா இருக்கறவங்களுக்கு முந்தியடிச்சு பட்டம் கொடுப்பாங்க..

இப்படி அடுக்கிக் கொண்டே போகலாம். ம்ம்ம்...MSV இந்த வகை எதிலும் சேர்த்தி இல்லாமல் இருப்பதினாலா என்னவோ, இன்னமும் பட்டம் வாங்காமல் இருக்கிறார். கலையுலகை ஆதரிக்கின்ற எம்ஜியாரும், கருணாநிதியும் கூட கண்டுக்காமல் விட்டது/விட்டுக் கொண்டிருப்பது கூட மன்னிக்கமுடியாதது.

மெட்டுக்கு பாட்டெழுதக் கேட்கிற இசையமைப்பாளர்கள் நடுவே, எழுதுகின்ற கவிஞரின் சிந்தனையைக் கட்டுப்படுத்தாமல் வந்து விழுகின்ற வரிகளுக்கு வாத்தியம் கட்டியவர் அவர்.

'வறுமையின் நிறம் சிகப்பு' படத்தில் வருகின்ற 'சிப்பியிருக்குது ..முத்துமிருக்குது' பாடலைக் கேட்டிருக்கிறீர்களா? இரைச்சலோ, இடியோசையோ இல்லாமல், இனிதாயில்லை?

'பூக்காரி' படத்தில் வருகின்ற, 'காதலின் பொன்வீதியில்....' பாடல் மென்மை கூறுவதாயில்லை?

'நினைத்தாலே இனிக்கும்' படத்தில் வருகின்ற 'எங்கேயும்..எப்போதும்..', 'யாதும் ஊரே..', 'சிவ சம்போ' பாடல்களெல்லாம், இன்னைக்கும் உங்கள் காதில் ரீங்காரம் இடவில்லையா?

ஹெட்போனிலோ, ஐ-பாடிலோ அல்லது உங்க கார் ஆடியோவிலோ, 'சம்போ..சிவ சம்போ...' பாடலைக் கேட்டுப் பாருங்கள். அதில் இசைத்திருக்கின்ற கருவிகளும், மெட்டும், குரலும் பின்னிப்பிணைந்திருப்பதை உணர முடியும். பாடல் முடிந்த பிறகும் கூட, உங்கள் காதுகளில் அந்த இசை உங்களை ரீங்காரமிட்டுக் கொண்டிருக்கும்.

எத்தனையோ பேரைக் கவர்ந்த, 'சிம்லா ஸ்பெசல்' படத்தில் வருகின்ற 'உனக்கென்ன மேலே நின்றாய்' பாடல், இப்போதைய இளைஞர்களையும் வசீகரிக்கக் கூடிய ஒன்று.

KanaKaanumKangazl....

பாலசந்தரின் 'அக்னிசாட்சி' படத்தில் வரும், எஸ்பிபி பாடிய 'கனாக் காணும் கண்கள் மெல்ல' பாடல் கேட்டிருக்கிறீர்களா? காட்சியையும், கதையின் கருவையும், அர்த்தமிக்க வரிகளையும் தாலாட்டும் விதமாய் 'அருமை' என்ற வார்த்தைக்கு இலக்கணமாய் மனதை உலுக்கும். கேட்காதவர்கள், கேட்டுப் பாருங்கள்.

எத்தனை பேருக்குத் தெரியும், 'ஆயர் பாடி மாளிகையில்' பாடலும், 'புல்லாங்குழல் கொடுத்த' - கண்ணன் பக்திப் பாடலும் MSV-யின் இசை வடிவம் என்று?

அவரது பாடல்களில் மனம் கவர்ந்தது என்றால், பட்டியலிட்டுக் கொண்டே போகலாம். MSV ஒரு நிஜக் கலைஞன், சக கலைஞர்களை மதிக்கத் தெரிந்த, 'ஈகோ' இல்லாத, இசையை இசையால் ரசிக்கத் தெரிந்த மனிதன்.

நல்ல கலைஞனுக்கு விருதுகளெல்லாம் இரண்டாம் பட்சம்தான், அது கலைஞனின் பார்வையில். கலைஞனின் ரசிகனின் பார்வையில், விருதும் தேவையான ஒன்று.

அவருடைய பாடல்கள் எத்தனையோ நம்முடைய மனதைத் தொட்டிருக்கின்றது, பிசைந்திருக்கின்றது. அவருடைய ஏதாவது ஒரு பாடல், உங்க மனதை தொட்டிருந்தால் கூட, நீங்கள் உங்களுடைய கையொப்பத்தை, இந்த ஆன்லைன் மனுவில் பதிப்பிக்க கடமைப்பட்டவராகின்றீர்கள்.

'விருதார்கள்' போல, மெத்தனமாய் இல்லாமல், சுறுசுறுப்பாய் இரண்டு நிமிடம் செலவழியுங்கள், அந்த முதுபெரும் இசைக் கலைஞனுக்கு.

http://www.petitiononline.com/msv2008/petition.html

அம்மா இங்கே வா..வா..

2007-08-28T13:41:00.000-04:00

வழக்கமாய், வேடிக்கையான ஈ-மெயில்கள் நிறைய பரிமாறப்படும். இந்த முறை, சற்று சீரியசான ஒன்று. உங்களுக்கும் கூட வந்திருக்கலாம். கருணை உள்ளங்களின் எல்லையை விரிவுபடுத்தலாம் என்ற எண்ணத்தில், இங்கு பதிவர்களிடையே, எனக்கு வந்த மின்னஞ்சலை, அப்படியே உங்களின் பார்வைக்கும் சமர்ப்பிக்கிறேன்.

///****///

Hi All, The child in the below photo is Pooja. She was recovered from a beggar who had kidnapped her. The police has arrested the beggar and the child has been put up in the Orphanage called "Nirmala SisuBhavan", Trivandram, Kerala.(contact number -- 0471-2307434) Police could not get any details from the beggar as he is dumb and deaf. These are the details retrieved from the child.

Mother tongue : Hindi

Father's Name : Raju

Mother's Name: Munni Devi

She says that her Hometown is "Nagaluppe" but no such town exists in India. She might not know or she is not pronouncing it correctly. Please circulate this mail to find her parents.

///****///

பூஜா என்ற இக் குழந்தை, காதும் கேளாத, வாய் பேச முடியாத பிச்சைக்காரன் ஒருவனால், கடத்தப்பட்டு, பிச்சைக்கு உபயோகப் படுத்தப் பட்டிருக்கின்றாள். கேரளப் போலிசாரால் கண்டுபிடிக்கப்பட்டு, தற்சமயம் திருவனந்தபுரத்த்ஹில் உள்ள நிர்மலா சிசு பவனத்தில் ஒப்படைக்கப் பட்டிருக்கின்றார். குழந்தையின் தாய்மொழி இந்தி, தந்தைப் பெயர்: ராஜு, தாய் பெயர்: முன்னி தேவி. பிறந்த இடம் நாகலுப்பி என்று மழலை மொழியில் கூறியிருக்கிறாள்.

செவி வழிச் செய்தியாய், இது பேசப்பட்டு இந்தக் குழந்தை அதன் பெற்றோரிடம் சேருமானால், நல்லதொரு விசயமாய் இருக்கும். இது குறித்து இணையத்தில் உலாவி, தகவல்களை துழாவிய போது, கீழ்க்கண்ட தளத்தில் இது குறித்த தகவல்கள் ஏற்கனவே வெளியாகி இருப்பது தெரிய வந்தது. இன்னமும், தேடல் தொடர்ந்து கொண்டேதான் இருக்கின்றது போலும். மேலும் அதிக தகவல்களுக்கு, கீழ்க்கண்ட தளம் பாருங்கள்.

http://www.satyamargam.com/index.php?option=com_content&task=view&id=297&Itemid=51

சென்னை டிராபிக் - லைவ் வீடியோ பாக்கறீங்களா?

2007-08-26T14:17:00.000-04:00

பொதுவா டிராபிக் பற்றிய செய்திகளை, FM ரேடியோ மூலமா அப்பப்ப சொல்வாங்க, உபயோகமா இருக்கும். இணைய வசதிகளும், hi-speed cable, DSL வசதிகளும் தருகின்ற உற்சாகத்தில், ஒரு படி மேலே போய், அப்படியே டிராபிக்-ஐ நேரிடை ஒளிபரப்புச் செய்கிறார்கள்.

சென்னையின் கத்திப் பாரா சந்திப்பு, கோடம்பாக்கம் சந்திப்பு, திருவான்மியூர், மற்றும் கீழ்பாக்கம் சிக்னல்களை நேரிடை ஒளிபரப்புச் செய்கிறார்கள். வெளிநாடு
வாழ் தமிழர்கள் கத்திப் பாரா மேம்பால வேலைப்பாடுகளைக் பார்க்கவாவது, இந்தக் லைவ் ஒளிபரப்பைப் பாருங்க. (கத்திப்பாரா தொடர்பு கிடைக்க தாமதமாகிறது. மற்ற சிக்னல் தொடர்புகள் உடன் கிடைக்கின்றது. )

http://chennailive.in/chennailive_morevideos.php?cat_id=14491011&Category=Traffic

நல்ல முயற்சிக்கு வாழ்த்துவோம்!

யாஹூ புகைப்படச் சேவைக்கு மூடுவிழா

2007-08-25T14:09:00.000-04:00

யாஹு(yahoo) வழங்கும் சேவைகளைப் பற்றி அவ்வப்போது சில வதந்திகள் கிளம்புவதுண்டு. 'சாட்' சேவைக்கு கட்டணம் வசூலிக்கப் போவது, மெயில் சேவைக்கு கட்டணம் வசூலிக்கப் போவதாக..எனப் பல வதந்திகள். அதுமாதிரிதான் இதுவும் இருக்கும்னு நினைச்சுராதீங்க.

நிஜமாலுமே யாஹு இலவசமாய் வழங்கிய புகைப்படச் சேவையை, செப்டம்பர் 20,2007-உடன் நிறுத்திக் கொள்ளப் போகிறார்கள். இது விசயமாய், உங்கள் யாஹு மின்னஞ்சலுக்குத் தகவல் வந்திருக்கும்.

நீங்கள் சேகரித்து வைத்து இருக்கும் புகைப்படங்களை flickr போன்ற பிற தளங்களுக்கு மாற்ற அவர்களே வழி செய்து தருகிறார்கள்.

மேலதிக தகவல்களுக்கு, கீழேயுள்ள நிரலைச் சொடுக்கவும்.

http://help.yahoo.com/l/us/yahoo/photos/photos3/closing/closing-02.html

நான் மாறிட்டேன், அப்ப நீங்க? :)

கனவு இல்லம்...கனவேவா? - 2

2007-07-07T14:22:00.000-04:00

(முதல் பாகம் காண க்ளிக்-கவும்)

இப்படி 'ஹாட் கேக்'-காக இருக்கும் நிலங்களை பார்த்தால், ஏமாற்றுகிற கும்பலுக்கு ஆசை வராதா? ஏற்கனவே யார் பெயரிலோ இருக்கின்ற நிலத்தினை, ஏமாற்றி இன்னொருவருக்கு விற்றுவிடுகிற கதையும் மிகச் சாதாரணமாய் விட்டது.

இந்தத் திருட்டு கும்பலிடம் இருந்து தப்புவிக்க, இப்போதெல்லாம், மக்கள் நிலத்தை வாங்கி வேலி போட்டு விடுவதோடு நில்லாமல், 'நில உரிமையாளர் xxxx, தொடர்பு எண் xxxx' என்று நிலத்தில் போர்டு மாட்டி வைக்கின்றனர். இவ்வளவு முன்னெச்சரிக்கையோடு இருந்தும், நிலத் திருட்டு நடக்கத்தான் செய்கிறது.

சென்ற வருடத்தை விட, இந்த வ்ருடத்தில், இதுமாதிரியான திருட்டுக்கள் இரட்டிப்பாகி இருப்பதாகச் சொல்கிறது, சென்னைக் காவல்துறை புள்ளிவிபரம். இதில் அவர்களுக்கும் பங்கிருப்பதாகச் சொல்கிறது பொதுஜனம்.

நிலங்களின் விலை என்னவோ அவ்வளவு உயர்ந்து கொண்டு போனாலும், அதற்கேற்ப வசதிவாய்ப்புகள் இருக்கின்றனவா என்றால், இல்லை என்றுதான் சொல்ல வேண்டும். காரணம், அரசு இயந்திரங்கள் இதனை திட்டமிட்ட தொலைநோக்கோடு அனுகாததே. முதலில் ரோடைப் போடுவது, பிறகு வரிசையாக டெலிபோன்,குடிநீர் வாரியம், கழிவு நீரகற்று வாரியம் என ஒன்று மாற்றி ஒன்று, தேவைக்காக நன்கு போடப்பட்ட சாலையை உடைத்து பாழ்படுத்திக் கொண்டிருக்கிறார்கள்.

சென்னைக்குள் இருக்கின்ற பகுதிகளில் நிலங்கள் கிடைப்பதே அரிதாகி விட்டதால், இன்னொரு புதிய அனுகுமுறையுடன் வீடு விற்பனை முறையைக் கையாளுகிறார்கள் சில குட்டி பில்டர்கள்.

சென்னையின் பிரதான நகர்ப்புறங்களில் இருக்கின்ற 15/20 வருடங்களுக்குள்ளாக இருக்கின்ற அபார்ட்மெண்ட்களை மார்பிள்,டைல்ஸ்,ஏசி என நவீன அமைப்புடன் ரீமாடல் செய்து, புதிய அபார்ட்மெண்ட் போலாக்கி, புதிய அபார்ட்மெண்டின் விலையை விட 20-25% சதவிகிதம் குறைத்து விற்கின்றனர்.

இந்த மாதிரியான வீடுகளுக்கும் வரவேற்பு இருக்கத்தான் செய்கிறது. ஆனால், உள்ளூர்வாசிகளிடையே வரவேற்பு கம்மியாக இருப்பதால், இந்த பில்டர்கள் இது மாதிரியான வீடுகளைப் படம் எடுத்து, சிங்கப்பூர், மலேசியா, அரபு நாடுகளில் உள்ள மக்களுக்கு தங்கள் மார்கெட்டிங்க் ஏஜென்சி மூலமாக அனுப்பி, அங்குள்ளவர்களிடம் விற்பனை செய்கிறார்கள்.

பின்னர் வாங்கிய பார்ட்டிகளிடம் ஒரு டீல் போட்டுக்கொண்டு, உள்ளூர் பார்ட்டிகளுக்கு 12,000 -15,000 ரூபாய்களுக்கு வாடகைக்கு விட்டு, அதிலும் கமிஷன் பார்த்து விடுகின்றனர். வெளிநாட்டு பார்ட்டிகளுக்கு ப்ரைம் ஏரியாவில், வீடு வாங்கிய சந்தோஷமும், வாடகையும் வருவது ரெட்டிப்புச் சந்தோஷமாகிவிடுகிறது. வாடகை தராமல் ஏமாற்றுகின்றவர்களை, வீடு காலி செய்ய மறுக்கிறவர்களை எல்லாம் இந்த ஏஜென்சியே 'கவனிப்பதால்' வெளிநாடு வாழ் உரிமையாளருக்கு எல்லாம் சுளுவாக, 'ஏஜென்சி சர்வீஸ் சார்ஜ்'ஜிலேயே அடங்கி விடுகிறது. இப்படி ஒரு கிளை வியாபாரமும் நடந்து கொண்டுதானிருக்கின்றது.

இப்போது சென்னன 'ரியல் எஸ்டேட்' மார்கெட் விற்போருக்குச் சாதகமாக இருக்கின்றது. இந்த நிலை இப்போது சற்று மந்தமாகத் தொடங்கி யிருக்கின்றது. முன்புபோல், அடிபிடியாக போட்ட உடனேயே விற்றுத் தீர்வது என்பது, சற்று இழுக்க ஆரம்பித்திருக்கிறது. இதனை, பில்டர்கள் வட்டம், சரியாக உணரத் தொடங்கி, அடுத்த கட்ட 'கவர்ச்சியாய்' நீச்சல் குளம், உடற்பயிற்சி நிலையம், பார்ட்டி ஹால் என எல்லாம் இருக்கும் விதமாய் அபார்ட்மெண்ட்கள் கட்டத் துவங்கியுள்ளனர். இதற்கான விலையை அபார்ட்மெண்ட் விலையில் ஏற்றி கவர்ச்சிகரமாக விற்கத் துவங்கியுள்ளனர். அப்படியும், இன்னமும் எல்லா ப்ளாட்களும் புக்காகாத நிலைமைதான். வளர்கின்ற வட்டிவிகிதமும், வீடுகளின் விலைக்கேற்ப வளராத 'வீட்டு வாடகை'யும், உள்ளூர் பார்ட்டிகளை யோசிக்கச் செய்து, இந்தக் கவர்ச்சிகளை வலுவிழக்கச் செய்கிறது.

இதனால், இப்போது வெளிநாடுவாழ் இந்தியர்களை குறிவைத்து 'Road Show' நடத்த ஆரம்பித்திருக்கின்றனர் பிரபல பில்டர்கள். இப்போதுள்ள நிலைமையில் சென்னை மற்றும் மும்பை ரியல் எஸ்டேட் மார்கெட் அபரிமித வளர்ச்சியால் பாதிக்கப் பட்டுள்ளது. இனியும் அது முன்பிருந்த வேகத்தில் பயணிக்கும் என்பது அடுத்த இரண்டு ஆண்டுகளில் இருக்காது. 2008/2009 வருடங்களில், இந்தப் பாதிப்பு வெளிப்படையாய்த் தெரியவரும்.

இப்போதே, அதற்கான சரிவின் துவக்கம் தெரிய ஆரம்பிப்பதாய் ஆய்வாளர்கள் சொல்கிறார்கள். Plot-களின் விற்பனையும், விலையும் குறையத் துவங்கியிருக்கின்றது. ஆனாலும், தினமும் ஒரு புதிய புராஜெக்டுகளுக்கான விளம்பரங்கள் வந்து கொண்டுதான் இருக்கின்றது. நிஜங்கள் புரிய, இன்னும் சில மாதங்கள் ஆகலாம், அதுவரை சற்றுப் பொறுத்து இவ்விசயத்தில் இறங்குவதே பயனளிப்பதாக இருக்கும். Buyer Market வரும்வரை பொறுத்திருப்போம்.

'சற்றுமுன்' போட்டிக்கு எழுதவேண்டும் என நினைத்தது, இப்பதான் நேரம் கிடைத்தது.

----00000-----

கனவு இல்லம்...கனவேவா?

2007-07-06T13:21:00.000-04:00

'காணி நிலம் வேண்டும்..பராசக்தி காணி நிலம் வேண்டும்'னு கவி பாடிய கனவு போலாகிவிட்டது இன்றைக்குச் சென்னையில் வீடு வாங்குவது. லட்சங்களில் புரண்டு கொண்டிருந்த 'ரியல் எஸ்டேட்' வியாபாரம், இன்றைக்கு கோடிகளில் புரளுகிறது.

நடுத்தர வர்க்கங்கள், கனவுலகில்தான் சென்னையில் வீடு வாங்க வேண்டும், அதுவும் கூட சென்னையின் எல்லைக்கோட்டைத்தாண்டித்தான் வாங்க வேண்டும் போலிருக்கிறது. கடந்த இரண்டு வருடங்களில், நிலங்களில் விலை 100 சதவிகிதத்திற்கும் அதிகமாகியிருக்கிறது.

சென்னையின் திடக்கழிவுகள் எரிக்கப்படுகின்ற பகுதியாயிருந்த கிராமமாகக் கருதப்பட்ட பெருங்குடியில், 2003-2004 வருடங்களில் ஒரு கிரவுண்ட் (2400 சதுர அடி) நிலம் 3 - 5 லட்சங்களுக்கு விற்பனையாகிக் கொண்டிருந்தது. இப்போது பழைய மகாபலிபுரம் சாலையில் பெருகுகின்ற பல்நாட்டு கணிணி நிறுவனஙகளின் அலுவலங்களின் காரணமாய், ஒரு கிரவுண்ட் நிலம் 50-60 லட்சங்களுக்கு விற்பனையாகிக் கொண்டிருக்கின்றது, என்றால் வளர்ச்சி விகிதத்தை நீங்களே கணக்கிட்டுக் கொள்ளுங்கள்.

யுகம் யுகமாக 'code' எழுதி சம்பாதித்தால் கூட, அவ்வளவு சுலபமாய் கோடிகளில் புரள முடியாது. நாலு கிரவுண்ட் வாங்கி வைத்திருந்தீர் களென்றால், கோடு எழுதிச் சம்பாதித்ததை விட அதிகமாய்ச் சம்பாதித்து ரிடையர்மெண்ட் வாங்கி இருக்கலாம்.

இந்த அளவு நிலங்களின் விலை உயர்வதற்கு பெரிதும் துணை போனது, கணிணித்துறைதான் என்பது பெரும்பாலானவர்களின் கருத்தாய் இருக்கிறது. யோசித்துப் பார்த்தால், அது ஒரு தூண்டுகோலாக இருந்திருக்கலாமே தவிர, அதுவே முழுக்காரணமாய் இருக்கும் என்று தோன்றவில்லை.

அப்போது, வீடு வாங்குவதற்கான கடனின் வட்டி விகிதங்கள் குறைவாக இருந்தமையும் ஒரு காரணம். வாடகை கொடுப்பதைவிட சற்று அதிகமாக EMI கட்டினால் போதும், என்ற வங்கிக் கடன் வாரியங்களின் விளம்பரமும் துணைபோனது. 'ரியல் எஸ்டேட்'டின் ஆரம்ப நிலை வளர்ச்சிக்கு, நியாமான காரணங்கள்தாம்.

மக்களின் 'கனவு இல்லம்' ஆசை, ரியல் எஸ்டேட் முதலீட்டாளர்களின் மூளையை முடுக்கிவிட, ஊருக்குள் இருக்கின்ற இரண்டு/மூன்று கிரவுண்ட் நிலத்தோடு இருப்பவர்களை அணுகி, கணிசமான பணத்தையும், ஒரு ஃபிளாட்டையும் கொடுத்து, அதற்கான விலையை இதர ப்ளாட் விலையில் ஏற்ற ஆரம்பித்தனர்.

இது ஒரு பக்கமிருக்க, புரோக்கர்கள் இன்னொரு பக்கம்.. யாராவது நிலம் வாங்க/விற்க வந்தால், அவர்களுக்கு கமிஷன் அதிகம் கிடைக்க வேண்டும் என்பதற்காக, ஒன்றுக்கு ரெண்டாக விலை சொல்ல ஏற்றினர்.

தேவைக்கு வாங்குவோர்/விற்போர் போக, வங்கிகள் டெபாசிட்களுக்கு தரும் முதலீட்டை விட, நிலத்திலான முதலீடு அதிகப் பணம் ஈட்டித்தருவது புரிய ஆரம்பிக்க, பணம் வைத்திருப்போர் (NRI உட்பட) நிலத்தில் முதலீடு செய்வது அதிகரித்ததும், விலை ஏற ஒரு காரணம்.

இதிலும் புரோக்கர்களின் அட்டகாசம்... வீடு விற்க நினைக்கிற ஆசாமிக்கு அதிக விலை வாங்கித்தருவதாகக் கூறி, வாங்குவதற்கு ஆள் ஏற்பாடு பண்ணுவர்கள். அந்த ஆளிடம், அந்த வீடு வாங்குகிற அளவுக்கு மொத்தமாகப் பணம் இருக்காது. ஆனாலும், விற்கிற பார்ட்டியை சம்மதிக்க வைத்து சேல் அக்ரிமெண்ட் போட்டுவிடுவார்கள். வாங்கிய பார்ட்டி பணத்தை புரட்டுவதாகக் கூறி ஒரு ரெண்டு மூணு மாசம் தாமதிக்க வேண்டியது..அதற்குள் அடுத்த பார்ட்டி பிடித்து, விலையை ஏற்றி ரெண்டாவது நபருக்கும், மூணாவது நபருக்கும் அக்ரிமெண்ட் போட்டு, அதில் அடுத்த செட் கமிசன் வாங்கி, முதல் பார்ட்டியை செட்டில் பண்ணுவது....இந்தச் செயின் இப்படியே தொடர்ந்ததும் விலை உயரக்காரணம்.

----------------------------->தொடரும்

சிவாஜி - The BOSS

2007-06-16T11:17:00.000-04:00

ஷங்கரின் படம் என்றாலேயே அழுத்தமாய் ஏதாவது ஒரு சோஷியல் மெஸேஜ்-ஐ தொட்டுச் செல்லும் படமாக இருக்கும். ஆரவாரத்துடன் ரிலீஸாகி இருக்கும் 'சிவாஜி'யும் அதற்கு விதிவிலக்கில்லாமல், 'கறுப்புப் பணப் பிரச்னையைத் தொட்டுச் செல்கிறது. ஆனால், வழக்கமான 'ஷங்கர்' டச் மிஸ்ஸிங்.

அமெரிக்காவில் சம்பாதித்த பணத்தைக் கொண்டு, சமூகநல எண்ணத்தோடு இலவசக் கல்லூரி,மருத்துவமனை துவக்க எண்ணுகிற ரஜினிக்கு, கல்வி வியாபாரம் நடத்திக் கொண்டிருக்கும் 'சுமன்' மூலமாய் தடைகள் வர, ஒரு ரூபாயுடன் வீதிக்கு வந்துவிடுகிறார். தடைகளைத் தகர்த்து, எப்படி நினைத்ததை முடிக்கிறார் என்ற சுஜாதாவின் நூலிழைக் கதையில், ஷ்ரேயாவுடன் காதலையும், ஷங்கரின் பிரம்மாண்டத்தையும் இணைத்து 'ரஜினி ஃபார்முலாவில் படம் பண்ணியிருக்கிறார்கள்.

வழக்கமாய் ஷங்கரின் படத்தின் முக்கிய கரு, கதையின் போக்கில் மெல்ல மெல்ல புரிய வரும். ஆனால், இதில் கதையின் கரு ஆரம்பத்திலேயே ரஜினியின் பத்திரிக்கையாளர் சந்திப்பில் பிடிபட்டுப் போய்விடுவதால், படத்தின் சுவாரஸ்யம் குறைந்து போய்விடுகிறது. ஒத்த ரூபாயில், எப்படி முன்னேறப் போகிறார் என்ற எதிர்பார்ப்பும், ஒரு 'அனானி' மிரட்டல் போன்காலில் அனைத்து கறுப்புப் பண ஆவணங்களையும் கைப்பற்றுகிற அரதப் பழசான டெக்னிக் அந்த எதிர்பார்ப்பை பிசுபிசுக்க வைத்துவிடுகிறது.

சுமன் தான் பிரதான வில்லன். ஆனால், காட்சியமைப்புகள் அவரை மிகப் பெரிய வில்லனாக தோன்றச் செய்யாதது பெரிய மைனஸ். கறுப்பு பணம் வைத்திருந்தது தவிர வேறு ஏதும் கொடுரம் நிறைந்தவராக காட்டப்படாத வில்லனை, ஹீரோ கொலை செய்வது என்பதும் ஒட்டவில்லை.

பொதுவாக ரஜினி படங்களில், ரஜினி ஹீரோயின் பின்னாடி போக மாட்டார், அது இந்த படத்தில் மாறியிருக்கிறது. ரஜினியின் காதலை மறுக்கும் ஷ்ரேயாவுக்காக, விவேக்குடன் சேர்ந்து அவர் அடிக்கும் லூட்டிகள் சுவாரஸ்யம் என்றாலும், சற்று அலுப்பு தட்டுவது என்னவோ உண்மை. குடும்ப்பப் பாங்காய் தமிழ் பண்பாட்டுடன் கூடிய பெண்தான் வேண்டும் என்கிற ஹீரோவுக்கு, 'தமிழ்ச்செல்வி' என்ற பெயருடன் ஷ்ரேயா. பாடல் காட்சிகளில் என்னவோ 'ஆங்கிலச் செல்வி'யாய் காட்சி அளிக்கிறார்.

ரஜினி அனுபவித்து நடித்திருக்கிறார். இடைவேளைக்குப் பிறகுதான் ரஜினியின் துள்ளல். காசை சுண்டும் ஸ்டைலும், எம்.ஜி.யாராக வரும் ஸ்டைலும் ரசிக்கும்படி இருக்கிறது. பாடல் காட்சிகள் மிகப் பிரமாதம். கே.வி ஆனந்தின் துல்லியமான ஒலிப்பதிவும், ரஹ்மானின் இசையும் படத்தின் மிகப் பெரிய ப்ளஸ். சஹாரா பாடலும், காட்சியமைப்பும், ஷ்ரேயாவின் நடனமும் அருமை. 'பல்லேலக்கா' பாடலும் சூப்பர். திரைக்கதையின் ஏமாற்றத்தை, ஈடு செய்வது பாடலும், பாடலின் காட்சியமைப்பும்தான்.

ரஜினி-ஷங்கர்-சுஜாதா-ரஹ்மான் கூட்டணியும், படத்திற்கு கொடுக்கப்பட்ட விளம்பரமும் கொடுத்த எதிர்பார்ப்பினை, படம் பூர்த்தி செய்ததா என்றால் இல்லை என்றுதான் சொல்லவேண்டும்.

சட்டுன்னு சொல்லனும்னா, 'நத்திங் ஸ்பெஷல்'.

Super World Cup, Congrats Aussies!

2007-04-28T18:29:00.000-04:00

வல்லவன் தோற்கணும் என பெரும்பாலோனோர் எண்ணியபோதும், அதைப் பற்றியெல்லாம் கவலைப்படாமல், திடமாய் கலக்கி விட்டார்கள் ஆஸ்திரேலியர்கள். 'சேம்பியன்' என்ற பட்டத்துக்கு முழுத் தகுதியுடையவர்கள். சேம்பியன் என்ற வார்த்தையை மாற்றி, 'ஆஸ்திரெலியன்' ன்னு சொல்லலாம் போல.

இவ்வளவு வலுவான அணி இதுவரை பார்த்ததேயில்லை. ஆடிய அனைத்து ஆட்டங்களிலும், வலுவான ஸ்ஹோர். எதிரணியினரை கிட்ட நெருங்க விட்டதேயில்லை.

ஆடிய நிதானமும், வெற்றி நமக்குத்தான் என்ற நம்பிக்கையும், அபரிமிதமாய் பாவனைகளை வெளிக்காட்டாமல், அருமையாய் ஆடினார்கள்.

கடைசி 15 நிமிடத்திற்கு முன்பே வெற்றி என்று தீர்மான பிறகு, மீண்டும் அழைத்து ஆட வைத்து 'கேம்'மை முழுமையாக்கினார்கள்.

ஸ்ரீலங்காவும், நல்ல எதிரணியாய்ச் செயல்பட்டனர்.

வெற்றிக் கோப்பையைக் கைப்பற்றிய ஆஸ்திரேலியாவுக்கு வாழ்த்துக்கள், விடாமுயற்சியுடன் தளராது ஆடிய அருமை ஸ்ரீலங்காவுக்கும் வாழ்த்துக்கள்.

வலைப்பதிவர் சந்திப்பு - ஒரு புதிய தொடக்கம்

2007-04-25T02:19:00.000-04:00

ஒவ்வொரு முறையும் வலைப்பதிவர் சந்திப்பு குறித்த அறிவிப்பு வரும்போது ஆர்வமாயிருக்கும். புதியதாய் ஏதாவது ஒரு நற்பலன் அந்தக் கூட்டத்தின் பயனாய் விளையும் என்ற நம்பிக்கையும் இருக்கும். ஆனால், கூட்டம் முடிந்த பின், அதைத் தொடர்ந்து வரும் பதிவர் கூட்டம் சார்ந்த பதிவுகளை படிக்க நேரும் போது, ஒரு வித ஏமாற்றமே எதிரொலிக்கும்.

இது குறித்து நண்பர் ரவிசங்கர் ஏற்கனவே, 'வலைப்பதிவர் சந்திப்பால் என்ன பயன்?" என்ற கேள்விக்கணையோடு ஒரு பதிவு எழுதியிருந்தார். அதில் நானிட்ட பின்னூட்டத்தின் ஒரு பகுதி கீழே:

//நானும் கூட உங்கள் சிந்தனையோடு ஒத்துப் போகிறேன்,புதுசா கல்லூரி திறந்து ஓரிரு வாரங்கள் ஜாலியாகப் போவதில்லையா, அதுமாதிரிதான் இதுவும் என நினைக்கிறேன்.ஆரம்பகால சந்திப்புகள், இப்படித்தான் போகும், போகப்போக ஆக்கமாய் இருக்கும் என்ற நம்பிக்கை இருக்கிறது. //

இம்முறை வெளிவந்த/வந்துகொண்டிருக்கின்ற வலைப்பதிவர் சந்திப்பு குறித்த பதிவுகளைப் படிக்கும் போது, எனது நம்பிக்கைகள் காக்கப் பட்டிருக்கின்ற சந்தோஷம் கிட்டுகிறது.

'பொன்ஸ்' அவர்களின் பதிவும், லக்கிலுக்-கின் பதிவும் படிக்க, நேர்முக வர்ணணை போலிருக்கின்றது.

படித்த வரையில், எனக்குப் பிடித்த சில பகுதிகளை 'ஹைலைட்' பண்ணி, மீட்டிங்க் அட்டெண்ட் பண்ணாத குறையை தீர்த்துக்கிறேன்

"வலைபதிவுகளை எழுதுபவர்களே படிப்பவர்கள் என்ற நிலையை மாற்றி நம்மைத் தவிர்த்த சமுகமும் வலைபதிவுகளைப் படிக்கத் தொடங்கும் பொழுது தான் இவற்றிற்கு ஒரு பயன் இருக்கும். அதற்கான அடுத்த கட்ட நடவடிக்கையாக கோவையில் நடத்தப் போகும் ப்ளாக் கேம்ப் வழிவகுக்கும்" - செல்லா

மாணவர்களை வலைபதிவுக்கு அழைத்து வரவேண்டும், அழைத்து வரும் பணிகளில் ஏற்கனவே சிலர் ஈடுபட்டிருக்கிறார்கள் - பாலபாரதி

"சிறுவர்கள் படிக்கும் அளவுக்கு முதலில் வலைபதிவுகளை ஆரோக்கியமாக்குவோம், அதன்பின் அவர்களை அழைத்துவருவது நல்லது"
- ஓகை

ரசித்த நகைச்சுவை:

//"எனக்கு Writing-ஐவிட Visualதான் ஸார் அதிகம் பிடிச்சது.." என்றார் ஓசை செல்லா. இதற்கும் ஒரு ஏவுகணையை உடனே வீசினார் மா.சி. "அப்புறம் எதுக்கு ஸார் இங்க வந்தீங்க.. விஷ¥வல்தான் முக்கியம்னா நீங்க இங்க வந்திருக்கவே கூடாது. இங்க இருக்குறவங்க writers.." என்று ஆணித்தரமாக தன் வாதத்தை எடுத்து வைத்தார் மா.சி. "பெண் பதிவர்களும் நிறைய பேர் உங்க தளத்துக்குள்ள வர்றாங்க.. நீங்க இப்படி பண்ணா யார் பின்னூட்டம் போடுவாங்க..?" என்று மா.சி. 'உடன்பிறப்பாகவே' மாறி உணர்ச்சி பொங்க.. உள்ளன்போடு கண்டிப்பான குரலில் கேட்க.. இதை ஆமோதிப்பதைப் போல் சகோதரி பொன்ஸ், ஓசை செல்லாவை நிமிர்ந்து பார்க்காமலேயே 'ஆமாம்' என்று தலையாட்ட.. செல்லா அமைதியானார்//

'குங்குமம்' கவரேஜ், 'மக்கள் டிவி கவரேஜ்' என வலையுலகை வெளியுலகிற்கு பிரபலப் படுத்த எடுக்கப்பட்ட முயற்சிகளும் பாராட்டுக்குரியது.

அடுத்த கட்ட நம்பிக்கைக்கு 'வலைஞர் கூட்டத்தை' முன்னேற்றிய பாலபாரதிக்கும், தெளிவாய் நிகழ்வை படம் பிடித்துக்காட்டிய சகோதரி பொன்ஸுக்கும் Special Thanks!

சீறி வரும் சிவாஜி

2007-04-07T06:05:00.000-04:00

மே மாதம் அக்னி நட்சத்திர வெயிலில் சும்மாவே அனல் பறக்கும், இந்த அனலோடு, தணல் பறக்க மே 17-ல் வெளிவர இருக்கிறது சூப்பர் ஸ்டாரின் சிவாஜி. சும்மாவே ரஜினி படமென்றால், ஆளாளுக்கு ஒரு 'ஹைப்' கிரியேட் பண்ணுவாங்க, அத்தோடு இது 'பிரம்மாண்டம்' புகழ் ஷங்கரின் இயக்கம் வேறு, ரசிகர்களின் ஏகோபித்த எதிர்பார்ப்புக்குக் கேட்கவா வேணும்?

'பாய்ஸில்' கோட்டை விட்ட ஷங்கர், 'அன்னியனில்' எழுந்து நின்றார். அந்த வெற்றியில், உற்சாகமாய் உழைத்திருப்பது வெளிவந்திருக்கும் 'சிவாஜி' புகைப்படங்களைப் பார்க்கையில் தெரிகிறது.

ரஜினிக்கும் அதே போல்தான், 'பாபா'வின் அதிர்ச்சி தோல்விக்குப் பிறகு, சந்திரமுகியின் வெற்றி, தொடர்ந்து நடிக்க ஆசையைத் தூண்டியிருக்க வேண்டும். சிவாஜி பிலிம்சின் சந்திரமுகி வெற்றிக்கு நன்றியாய், இந்த படத்திற்கு 'சிவாஜி' என்றே பெயர் வைத்து விட்டாரோ?

ஹாரிஸை விட்டுவிட்டு மீண்டும் ரஹ்மானை நாடியிருக்கிறார் ஷங்கர், தயாரிப்பு 'ஏவிஎம்' என்பதாலும் இருக்கலாம். பொதுவாக ரஹ்மான் பாடல்கள், கேட்ட முதல் நாளே இனிப்பதில்லை, 'சிவாஜி'யின் இசை கொஞ்சம் விதிவிலக்கு. சஹாரா டூயட்டும், பல்லேலக்காவும் கேட்ட மாத்திரத்திலேயே பிடித்துப் போனது. பல்லேலக்கா பாடல் கொஞ்சம் சந்திரமுகி 'தேவுடா' பாடலை நினைவுபடுத்திகிறது. எஸ்பிபியும், அதே ஸ்டைலில் பாடியிருப்பதால் அப்படித் தோன்றலாமோ?

ஏவிஎம்-ஷங்கர்--ரஜினி-ரஹ்மான் எனப் பிரம்மாண்டங்கள் இணைந்திருப்பதில் எதிர்பார்ப்புகள் கூடியிருக்கும் அதே வேளையில், எதிர்ப்புகளும் சம அளவு விளம்பரம் பெறுகின்றன. அது சரி, காய்ச்ச மரத்தில்தானே கல்லடி படும்!

அதிக பொருட்செலவில் தயாராவதால், சீக்கிரமே போட்ட முதலை எடுக்க, டிக்கெட் விலையை, திரையிட்ட சில நாட்களுக்கு அதிகமாக விற்க முயற்சிக்கின்றனர் விநியோகஸ்தர்கள், அப்படி விற்றால் 'போராடுவேன்' என்று வீர முழக்கமிடுகிறார் விஜய.டி.ராஜேந்தர்.

இன்னொரு பக்கம், காவிரி பிரச்னையை வைத்து ரஜினியின் சார்புநிலையை விமர்சித்து 'தமிழினத் துரோகி' பட்டம் கட்டுகிறது ஒரு கூட்டம். கன்னடத்தில், ''சிவாஜியை'த் திரையிட அனுமதிக்க மாட்டோம் என்று கன்னட அமைப்பொன்று முழக்கமிட்டுக் கொண்டிருக்கின்றது.

சிவாஜியின் திரைப்பாடல்கள், காட்சிகள் முறையாக வெளிவரும் முன்பே, இணையம், சிடி என அங்கங்கே கசிந்து கொண்டிருக்கின்றது.

சந்திரமுகியின் வெற்றிக்குப் பிறகு வருவதால், 'சிவாஜி'யின் வெற்றி பெரிதாக எதிர்பார்க்கப் படுகிறது. வெளிவந்திருக்கின்ற ஸ்டில்ஸ்கள், ரஜினியின் பொலிவையும், ஸ்டைலையும் காட்டுகிறது. பாடல்களும் அவ்விதமே, கதைக்களமோ, கருவோ தென்படவில்லை. பொதுவாக, ஷங்கரின் படத்தின் கருவில், ஏதாவது ஒரு அழுத்தமான 'மெஸேஜ்' இருக்கும். இந்தப் படத்தில் அது என்னவாய் இருக்கும் என்பது சஸ்பென்சாகவே வைக்கப்பட்டிருக்கின்றது.

ரஜினியைப் பொறுத்த வரையில் வெற்றிப்படமாக இருக்கும் என்று எதிர்பார்க்கப் பட்டாலும், ஷங்கரைப் பொறுத்த வரையில் இன்னொரு ஜெண்டில்மேனாக, 'இந்தியனா'க, 'முதல்வனா'க, தமிழ்த் திரையுலகிற்கு ஒரு முன் மாதிரியாக இருக்குமா என்பது, ஸ்டில்ஸ்களைப் பார்க்கும் போது, நம்பிக்கையாய்த் தெரியவில்லை.

எதுவாயினும், தமிழ்த்திரை ரசிகர்கள், 'மே - மாதத்தில் ஒரு தீபாவளி' காணத்தயாராகிவிட்டார்கள். ஏப்ரல்-14 ரீலிஸிலிருந்து, மே-17 -க்குத் தள்ளிப் போட்டிருக்கின்றார்கள். ஒரு வெற்றி ஒத்திப் போடப்பட்டிருக்கின்றது என்று சொல்லலாமா? பொறுத்திருப்போம்.

'ஒரு மாதிரி' எல்லாம் ஒரு மாதிரியா???!!!!

2007-04-03T02:16:00.000-04:00

கடந்த சில வாரங்களா தமிழ்ப்பதிவுலகம் 'ஒரு மாதிரி' வியர்டு பதிவுகளா பதிப்பிக்க ஆரம்பிச்சு, இப்பதான் கொஞ்சம் குறையறா மாதிரி இருக்கு. நம்மளயும் வியர்டு பதிவுக்கு அழைத்திருந்தார், சர்வே புகழ் சர்வேசர். கொஞ்சம் வேலை அதிகமிருந்ததால், பதிவிட நேரமில்லாது போனது.

இரண்டு நாளைக்கு முன்னர்தான், 'Happy Feet' DVD ரீலிசாக, அதைப் பார்த்துக் கொண்டிருந்த போதுதான், இந்த வியர்டுக்கான அழைப்பு நினைவுக்கு வந்தது. 'Happy Feet'-ன் பெங்குயினுக்கு, கால் வியர்டாக இருக்க, அது பெங்குயின் கூட்டத்திடமிருந்து ஒரு வகையில் தனிமைப் படுத்தப் படுகிறது. அந்த வியர்டு காலை வைத்து, அது தன் இனம் காக்க எப்படி மெஸேஜ் சொல்லுதுன்னு அழகா படம் புடிச்சிருந்தாங்க.

இது மாதிரியே ஆபிரகாம் லிங்கனின் சிறுவயதுப் பருவம் பற்றி உலவும் கதைகளில் ஒன்றில் அவர், பலூன் வியாபாரியிடம் 'கருப்பு வண்ண' பலூனில் காற்றடைத்தால், பறக்குமா என்று கேட்பார், அதற்கு பலூன் வியாபாரி 'பலூனுக்கு வெளியே உள்ள நிறத்தில் ஒன்றுமில்லை, உள்ளே இருக்கும் காற்றுதான் மேலே பறக்க காரணம் என்பார். இந்தச் சம்பவம், அவர் மனதில் ஓரு ஆழ்ந்த சிந்தனையையும், நம்பிக்கையையும் தோற்றுவித்ததாகக் கூறுவார்கள்.

இதுமாதிரியான வித்தியாசமான சிந்தனைகள், வேறுபடுத்திக் காட்டுவதோடு, வாழ்வின் உயரேயும் கொண்டு செல்கின்றது. இப்படியான சிந்தனைகள் எல்லாம் நமக்கும் வந்தா நல்லாதான் இருக்கும். ஆனா நமக்கு வர்ரதெல்லாம், கிறுக்குச் சிந்தனையா இருக்கே, என்ன பண்ண? :)

எங்க வீட்டுல தங்கஅரளிப் பூமரம் உண்டு. கார்த்திகை, மார்கழி மாதங்களில், மரம் நிறைய பூ பூத்திருக்கும். பச்சை நிற இலைகளினூடே, மஞ்சள் நிறப் பூக்கள், பார்க்க ரம்மியமாய் இருக்கும். இதைப் பார்த்து ரசிப்பதற்காகவே, நண்பன் வீட்டு மொட்டை மாடிக்குச் சென்று, அங்கிருந்து பார்ப்போம். செவ்வாய், வெள்ளிக் கிழமைகளில் அக்கா கிட்டேயிருந்து ரெக்வெஸ்ட் வரும், 'டேய்..தம்பி.. சாமிக்குக் கொஞ்சம் பூப் பறிச்சுக் கொடுடா' ன்னு கேப்பாங்க. 'பூ மரத்திலே இருந்தாதான் கொத்துக் கொத்தா பார்க்க அழகாயிருக்கு, சாமிக்கு வச்சா இரண்டுமணி நேரத்திலேயே வாடிடும்'னு சொல்லி மாட்டேன்னிடுவேன். சின்னவயசுல பண்ணினது, இப்ப நினைச்சா பறிச்சுக் கொடுத்திருக்கலாமோன்னு இருக்கும். இப்பவும், பூக்களைப் பறிக்காம ரசிக்கிறதுதான் புடிக்குது. ஆனா, ரங்கமணி வந்து வூட்டுல வளர்க்கிற ரோஜாவ பறிச்சுட்டுப் போனா, செடியில இருக்கிறத விட உன் தலையில இருக்கிறதுதான் அழகுன்னு சொல்லோணும்...ம்ம்..

அப்புறம் டிரெஸ் விசயத்திலேயும் கொஞ்சம் கிறுக்கு உண்டு. கலர் கலரா போடப் பிடிக்கும். அதுல கிறுக்கு என்னன்னா, நானா பார்த்து செலக்ட் பண்ணின டிரெஸ்-ஆ இருந்தாதான் அடிக்கடி போடப்பிடிக்கும். இல்லைன்னா, கொடுத்த அந்தச் சமயத்துக்கு போடுவேன், அப்புறம் கொடுத்தவங்க ஞாபகப் படுத்தறப்போதான் அந்த டிரெஸ் ஞாபகத்திற்கு வரும்.

சர்வேசன் தயிர்சாதத்திற்கு, ரசம் ஊற்றி சாப்பிடறதப் பற்றிச் சொல்லியிருந்தாரு, எனக்கும் அந்த டேஸ்ட் உண்டு, ஆனா அதவிட, தயிர் சாதத்திற்கு Fish Fry வச்சு சாப்பிட ரொம்பப் பிடிக்கும். வேலை நிமித்தமா, கல்கத்தாவில் ஆறேழு மாதங்கள் தங்கினப்போ, என்னோட ஃபேவரிட் உணவு தயிர்சாதம்-பச்சை மிளகாய்-Fish Fry. தயிரோட, Fish Fry சேர்த்தா ஜீரணமாறது கஷ்டம்னு சொல்வானுங்க பிரண்ட்ஸுங்க, 'கல்லையும் செறிக்கிற வயசு, போடான்னிடுவேன்.'

படிக்கிறப்ப, பரீட்சை செண்டிமெண்ட் ரொம்பவே உண்டு. காலைல எழுந்திருக்கிறப்ப அம்மாதான் எழுப்பனும், சின்னக்காதான் காலை உணவு தட்டுல எடுத்து வைக்கணும், கடைசிப் பரீட்சை முடிஞ்ச அன்னிக்கு கண்டிப்பாய் ஏதாவது சினிமா பார்க்கணும்..இதெல்லாம் நடந்தாதான் ஸ்கோர் நல்லாருக்கும்னு ஒரு கிறுக்கு. இதே கிறுக்கு, பின்னாடி இந்தியா கிரிக்கெட் ஆடறப்போ இருந்துச்சு. இப்ப இல்லைங்க.

எங்காவது டூர் போயிட்டு வந்தா, அந்தந்த ஊர்களிலே, சில பொருட்கள் வீட்ல உள்ளவங்களுக்குப் பிடிச்ச மாதிரி இருக்கும், வாங்கணும்னு தோணும், ஆனா வாங்கிட்டு வந்து, விலை அதிகமா இருந்துச்சுன்னா, 'உன்ன ஏமாத்திட்டாண்டா'ன்னு சொல்லுவாங்களோன்னுட்டு இருக்கும். அதுனால, சிம்பிளா ஏதாவது வாங்கிக் கொடுத்துட்டு, 'அதப் பாத்தேன்..நல்லா இருந்துது..இதப் பாத்தேன் நல்லா இருந்துது..வாங்கிட்டு வந்தா திட்டுவியோன்னுட்டு வாங்கல'ன்னு சொல்லி, அதுக்கு திட்டு வாங்குவேன். கிப்ட் கொடுக்கிறதும் ஒரு வகையான ஆர்ட், அந்த ஆர்ட் நம்மகிட்ட தயக்கமான ஒன்னு.

அமெரிக்காவுல நிறைய 'வியர்டு'ங்க உண்டு. 'Sony Playstation 3' - வீடியோ விளையாட்டுச் சாதனம் விற்பனைக்கு வந்த புதிதில், நடுங்கும் குளிரில் முந்தைய நாள் நள்ளிரவே கூடாரம் அடித்து, காத்துக் கிடந்து முதல் ஆளாய்ப் போய், US$750 கொடுத்து ப்ளே ஸ்டேசனை வாங்கி, வெளியே வந்து, காத்துக் கிடக்கிற மற்ற எல்லோர்கிட்டேயும் அதக் காட்டி உபயோகிக்காமலேயே போட்டு உடைக்கிற பப்ளிசிட்டி கிறுக்குகளும் உண்டு. அந்தமாதிரி இல்லாம, நவீனமா வருகிற காட்ஜெட்டுகளை வாங்கி உபயோகிக்கிற மோகம் உண்டு.

இன்னும் நிறைய கிறுக்குகள் உண்டு, எல்லாத்தையும் சொல்லி மாட்டிக்க வேணாம்னு இத்தோடு நிறுத்திக்கலாம். இப்ப என் முறைக்கு, நானும் ஒரு ஐந்து பேரோட குணத்த காட்டச் சொல்ல வேணாமா?

1. வினையூக்கி
2.காட்டாறு
3.மாறன்
4.இட்லிவடை
5.நானானி

இவங்க எல்லாம் இதுவரை 'Weird'-ஆ எழுதலைன்னு நினைச்சு கூப்பிட்டிருக்கிறேன். உங்க கால நேரம் பார்த்து எழுதுங்க!

மற்ற வியர்டுங்க குறித்த குறிப்பு வேணுமா? அதுக்குன்னே ஒருத்தர் 'வியர்டு ஆஸ்பத்திரி' கட்டி வச்சு, கேஸ் ஹிஸ்டரி எல்லாம் பதிவுபண்ணியிருக்காரு, போய்ப் பாருங்க!

ஒரு ப்ளஸ்...இரு மைனஸ்..

2007-03-25T02:27:00.000-04:00

சென்ற வாரம் சிந்தாநதியோட வலைச்சரத்திற்கு ஒரு வார ஆசிரியரா போயி இருந்தது மிக்க மகிழ்ச்சியாய் இருந்தது. வலைஞர்களின், பல்வேறுபட்ட திறன்மிகு முகங்கள் தென்பட்டது. சும்மா எழுதுறது ரொம்ப ஈஸி, ஆனா, இன்னொருத்தர் சுட்டும் விதமா எழுதறது, அவ்வளவு சுலபமில்லை. வள்ளுவன் இன்றிருந்தால்,

"சுட்டுதல் யார்க்கும் எளிய அரியவாம்
சுட்டும் வண்ணம் எழுதுதல்"

- ன்னுட்டு பாடியிருப்பாரோ?

ம்..ம்.. எப்படியோ, சிந்தாநதியோட நன்முயற்சியில நானும் பங்கெடுத்தது குறித்து எனக்கும் சந்தோஷமே! வலைச்சரம் சுட்டும் நல்லெழுத்துக்கள் மூலமாய், திறன்மிகு எழுத்துக்கள் சிறப்படையட்டும். இதன் விளைவாய், மேலும் பல நல்லெழுத்துக்கள் தமிழ் வலையுலகில் உலா வரட்டும்.

ப்ளஸ்... குறித்துச் சொல்லியாயிற்று, மைனஸ் என்னவாயிருக்கும்னு யோசிக்கிறீங்களா? அதாங்க எல்லாரும் துவைச்சி காயப் போட்டிக்கொண்டிருக்கும் நம்ம கிரிக்கெட் அணியின் தோல்விதாங்க அது.

இந்திய அணி ரொம்பப் பிரமாதமா பார்மில் இல்லை என்றாலும், உலகக்கோப்பைக்கு சற்று முந்தைய பந்தயங்களில், நம்பிக்கையாய் விளையாடி இருந்தார்கள். ஆனால், வங்கதேசத்தோடு ஆடிய ஆட்டத்தில் தோல்வியைத் தழுவியபோது, மனசு வெறுத்துத்தான் போனது. அப்போதே, மனதில் தோன்றிவிட்டது, இந்தப்பசங்க சூப்பர் 8-க்குள் போகக்கூடாதென்று. எத்தனை நாளைக்குத்தான் இப்படி அழுதழுது பார்த்துக்கொண்டிருப்பது? அழுத்தமாய், ஆணித்தரமாய், solid-ஆய் வெற்றிதரும் இந்திய அணியை என்றுதான் பார்ப்பது? ம்..ம்..ஆனால், இந்தத் தோல்விக்கு நம்ம தேசத்து மக்கள் காட்டும் ரியாக்சன் கொஞ்சம் ஓவர்தான் என்று தோன்றுகிறது. விளையாட்டு விளையாட்டாய்ப் பார்க்கப்பட வேண்டும், நாம் நம் அணி மீது வைத்திருந்தது அதீத நம்பிக்கை, அவர்களின் பலம் அவ்வளவுதான்! இதில் கிடைத்த ஏமாற்றத்திற்கு, இவ்வளவு எதிர்ப்பு காட்டுகின்ற மக்கள், நம்மகிட்ட ஓட்டு வாங்கி, ஐந்து வருடம் சூப்பரா மக்கள ஏமாற்றி, தானும் தன் சகாக்களும் சுருட்டிக்கொள்ள வகை செய்கிற அரசியல்வாதி தருகின்ற ஏமாற்றத்திற்கு பாடம் புகட்டினால், ஏதாவது பயனுண்டு. 'செல்லிடத்துக் காப்பான் சினங்காப்பானாயிற்றே..நம் மக்கள். :)

இரண்டாவது மைனஸ்.. அட..அது ஒன்னுமில்லைங்க.. வியர்டு(weird) சமாசாரந்தாங்க... போட்டோ போட்டியில செயிச்சதுக்கு, இப்படி ஒரு வில்லங்கமான அழைப்பு வரும்னு முன்னமே தெரியாமப் போச்சே.. நம்ம சர்வேசரு 'Hall-of-Fame' - ஆளுங்களுக்கு விட்டிருக்கிற weird - அழைப்பிலே நம்மளயும் சேத்து விட்டு, நம்ம மைனஸ்-ஸ புலம்ப்பச் சொல்றாரு.. ம்...புலம்புவோம்...நாளைக்கு..

சமீபத்தில் நான் ரசித்த புதிய ப்ளாக்...

2007-03-06T03:08:00.000-05:00

அட..நிறைய பேரு நான் ரசித்த படம்..நான் ரசித்த பாடல் அப்படின்னு பதிவு போட்டுருக்காங்க.. அது மாதிரி, நான் ரசித்த ப்ளாக்-னு ஒன்னு போடலாமுன்னுதான் இந்தப் பதிவு.

'தேன்கூடு' வலைத்தளத்தில், கில்லி பரிந்துரைகள் அவ்வப்போது, பார்ப்பதுண்டு, அப்படி போன வாரம் பார்த்துக் கொண்டிருந்தப்பதான், 'தமிழ் சினிமாவும், அஸிஸ்டெண்ட் டைரக்டர்களும்'-னு சினிமா குறித்த பதிவு கண்ணில் பட்டது.

அத 'க்ளிக்' - பண்ணி, போய் பார்த்தா 'சினிமாவப் பத்தி' -ங்கிற மாறனோட ப்ளாக்.

தமிழ்மாறன் - என்ற பெயரில், எனது சில பதிவுகளுக்கு பின்னூட்டமிட்டு, ப்ளாக்கிற்கு அழைப்பும் விடுத்திருந்தார். அப்பவே போய் பாத்து, கமெண்ட்-டும் போட்டுட்டேன், ஆனா, அதே ப்ளாக் நம்ம கில்லியோட பரிந்துரையிலயும் இருந்தது பார்க்குறப்போ, சந்தோஷமா இருந்திச்சு.

ஏற்கனவே, நம்ம கண்மணி வேற, புதிய ப்ளாக்கர வரவேற்கிறதுல நம்மள சிறப்பாச் சொன்னதால, அந்தப் பேர காப்பாத்திக்க வேணாமா, அதான் 'கில்லியோட' கூடுதல் பரிந்துரையில் நானும் சேர்ந்து கொண்டு, நீங்க இந்த ப்ளாக் பக்கம் போயிப் பாருங்கன்னு ஒரு சுட்டிக்காட்டலாம்னுதான் இந்தப் பதிவு.

இந்த அறிமுகத்துக்கு முன்னாடியே, நம்ம வலையுலகப் பிரபலங்களாகிய, பாலா, துளசி கோபால், சர்வேசன், இலவசக்கொத்தனார், A n& , கார்த்திகேயன் எல்லாரும் படிச்சு, பின்னூட்டமிட்டுருக்காங்க, நீங்களும் படிச்சிருக்கலாம், இல்லேன்னா, ஒரு எட்டு போய்ப் பாருங்க.

புதிய எழுத்துக்களும், புதியவர்களும் வலைப்பூக்களுக்கு அவசியம் தேவை, சில சமயம் அவை, அரைத்த மாவையே அரைத்துக் கொண்டிருப்பது போன்ற தோற்றங்களிலிருந்து ஒரு மாறுதலைக் காண உதவலாம்.

கொஞ்ச நாள், ஜாலியா போகட்டும் வலைப்பதிவு, ஜாதிச் சண்டைகளையும், மதக் கேலிகளையும் தள்ளிவைத்து, கொஞ்சம் ஜாலியாவும், நட்பாகவும் கொண்டு போகலாம் வலையுலகை. இந்த வகையில், சக பதிவர் 'சர்வேசனுக்கு' விசேஷ நன்றி சொல்லனும், மனுசர் புகைப்பட போட்டி, பாட்டுப் பாட்டு, நேயர் விருப்பம்-னு கலக்கு கலக்கறார். அரட்டை அரங்கம் வேறு வடிவமைத்துக் கொடுத்திருக்கார், இன்னமும் சோதித்துப் பார்க்கவில்லை.

சமிபமா சகபதிவர் 'ரவிசங்கரும்' கருத்தைக் கவரும் விதமா, வலைப்பூக்களுக்கு நலம் சேர்க்கும் விதமா, கண்ணி பற்றி அறியத்தருகிற மாதிரி எழுதி வருகிறார். இவரது முயற்சிகளும் பாராட்டுக்குரியதே.

மாறனோட பதிவு குறித்து, அவர் பதிவில் இட்ட பின்னூட்டம், இங்கும் ஒரு அறிமுகப் பார்வையாக:

//சும்மா கலக்கலா அலசியிருக்கீங்க, தமிழ் சினிமா-வ இங்கிலீஷ் பார்முலால பாத்திருக்கீங்க,

ஆனா, 'சென்றிடுவீர் எட்டுத்திக்கும், கலைச் செல்வங்கள் யாவும் கொணர்ந்திங்குச் சேர்ப்பீர்' முழக்கமிட்டானே ஒரு கவிஞன், அவன் வாயிலா பார்த்தா, இங்கிலீஷ் படத்த தமிழ்-ல எல்லாரும் பாக்க வச்சிருக்காங்கன்னு ஆறுதல் பண்ணிக்கலாம்.

ஆனா, என்ன இவங்க எல்லாம் சொந்தச் சரக்குன்னு சொல்லுறது தப்பு. அந்த வகையில, உங்க/நம்ம பேவரிட் டைரக்டரு, 'derailed'-ஒட தாக்கத்த சொல்லிதான் படத்த வெளியிட்டு இருக்காரு.

சூப்பரான அலசல், நிறைய புது டைரக்டர்கள் ஏன் புது வலைப்பதிவர்கள் கூட அசத்தலான ஆரம்பத்தக் கொடுத்து, அப்புறம் ஏமாற்றிருவாங்க. நீங்க, அது மாதிரி செய்யாம தொடர்ந்து கலக்கோணும்-னு கேட்டூக்கறேன்//

மாறன், உங்களோட எழுத்தோட்டம், இயல்பா ஒரு நண்பனோட உரையாடுகிற ஸ்டைல்ல இருக்கிறது ஒரு சிறப்பம்சம். சினிமாவப் பத்தி -ன்னு ப்ளாக்-கோட தலைப்பு வச்சிருக்கிறதால, அது பத்தி மட்டும்தான், எழுதணும்னு ஒரு சட்டம் போட்டுக்காம, எழுதத் தோணுறத, எழுத ஆரம்பிங்க. வாழ்த்துக்கள், மாறன்! தொடர்ந்து எழுதுங்க.

சுடரின் வேகம் போதுமானதா?

2007-03-03T14:25:00.000-05:00

மறைந்த நண்பர் 'தேன்கூடு'- சாகரன் அவர்களால் ஏற்றி வைக்கப்பட்ட சுடர், ஒளிர்ந்து கொண்டிருக்கின்றது.

பாலாஜியால் பிப்ரவரி 4-ஆம் தேதி துவக்கிவைக்கப்பட்டு, இன்றுவரை 24 பதிவுகள் இணைக்கப்பட்டிருக்கின்றது. இதில் இரண்டு பதிவுகள் இடைச்செருகல். ஒரு நாளைக்கு இரண்டு பதிவுகளுக்கு மிகாமல், இருக்கலாம் என்ற எதிர்பார்ப்பு, இரண்டு நாளைக்கு ஒரு பதிவு என்ற வண்ணத்தில் இருப்பது போன்ற தோற்றம். இவ்வளவு 'ஆக்டிவ்'-ஆ இருக்கின்ற வலைப்பதிவில், மொத்தம் 40 பதிவுகளாவது, ஒரு மாதத்தில், வந்திருக்கவேண்டும் என்பது என் எதிர்பார்ப்பு.

ஆரம்பத்தில் வேகமாய் நகர்வது போலிருந்த சுடர், தற்போது மெல்லவே நகர்வது
போன்ற தோற்றம் அல்லது பிரமை?!! சுடர் நட்பு வட்டத்தில் சுழலுவதில் தவறில்லை, ஆனால் வேகம் குறையாதிருந்தால் நன்றாயிருக்கும். சுடரை ஒப்படைப்பவர்கள், அதன் துரிதவேகத்துக்கும் உதவ செய்யன செய்தால், 'சாகரனின்' விருப்பம் ஈடேற வகை செய்யும்.

உங்கள் எண்ணம் என்ன? சர்வேசன் வேலையை, நான் கொஞ்சம் எடுத்து அவர் வேலையைக் குறைக்கிறேன். (சர்வேசன்..ஏற்கனவே நீங்க உங்க பதிவுல மார்ச்-ல வேலை அதிகமாகும்-னு சொல்லியிருக்கீங்க..,அதான் :)) )

நீங்க 30 ப்ளஸ்-ஆ?

2007-02-28T03:37:00.000-05:00

தர்ட்டி ப்ளஸ்-னாலே ஒதுக்கப் படறோமோன்னு நினைக்க ஆரம்பிப்பாங்க, தர்ட்டி ப்ளஸ் தாண்டின இளம் வயோதிகர்கள்? :) அந்த 'தர்ட்டி ப்ளஸ்' அலர்ஜி, தமிழ்மண பின்னூட்ட இடுகைகளுக்கும் வந்தாச்சு.

என்னைப் பொறுத்த வரையில், இது ஒரு நல்ல முயற்சிதான். பரீட்சித்துப் பார்ப்பதில் தவறில்லை. இது ஏதோ, மின்மினியின் பதிவுகள் இளமையாகவே இருப்பதினால் - அதாங்க, 30 மைனஸ் :)) சொல்றேன்னு நினைச்சுக்காதீங்க. ஏற்கனவே, இந்தப் பின்னூட்டங்கள் குறித்து எனது இரு வேறு பதிவுகளில் கருத்துச் சொல்லியிருக்கிறேன். ஒன்று கதை நடையில், இன்னொன்று ஜாதீயம் குறித்த பதிவில்.

சகபதிவர் சேதுக்கரசி மிகச் சரியாய்ச் சொல்லியிருப்பது போல, தமிழ்மணத்தின் இந்தப் முகப்புப் பின்னூட்டப் பகுதி Prime Real Estate-தான். இந்த இடத்தை தக்க வைத்துக்கொள்ள, ஏகப்பட்ட போட்டிகளும், தனக்குத்தானே பின்னூட்டமிடுதலும், அரட்டை கச்சேரிகளும்.. என வகைவகையான யுக்திகளைக் கையாளப்பட்டு வந்தன. இது பறிபோவது, இவர்களுக்கு வருத்தத்துக்குரிய விசயமாக இருக்கலாம்.

ஆனால், தமிழ்மணத்தின் இந்த முயற்சி, ஒரு வகையில் ஜாதீயச் சண்டைகளும், தனிநபர் தாக்குதல்களும் குறைய வாய்ப்பளிக்கும் என்றே தோன்றுகிறது. தேவையில்லாமல், அத்தைகைய பதிவுகள், கண்ணில் பட்டு, எரிச்சலூட்டிக் கொண்டிருக்காது.

இது ஒரு சோதனை முயற்சி என்று தெளிவாகச் சொல்லியிருக்கிறார்கள் தமிழ்மண நிர்வாகத்தினர். மேலும், சேதுக்கரசி அவர்கள் விடுத்திருக்கும் இன்னொரு வேண்டுகோளான, '24 மணி நேரத்தில் மறுமொழியப்பட்ட இடுகைகள்' பகுதியில் எந்தவித கட்டுப்பாடும் இல்லாமல், 30+ உட்பட எல்லா மறுமொழிகளும் தெரியவைக்க முயல்கிறோம் என்றும் சொல்லி இருக்கிறார்கள்.

தவிரவும், இம்முயற்சி குழு மனப்பான்மையும், மதவாதங்களும், ஜாதீயமும், தனிநபர் தாக்குதல்களும் மட்டுமே Prime Real Estate-ஐ ஆக்ரமிக்காமல், சில புதிய பதிவர்களின் எழுத்துக்களுக்கும் இடம் கொடுத்து வெளிச்சம் கிட்டச் செய்யும் என்றும் தோன்றுகிறது.

தமிழ்மணத்தாரின் முயற்சிகள், இங்கேயே நின்றுவிடப் போவதில்லை, நல்ல பதிவர்களையும், நல்ல எழுத்துக்களையும் அடையாளம் காண, இன்னமும் முயற்சித்துக் கொண்டுதானிருக்கிறார்கள். அந்த வகையில், இந்தச் சோதனை முயற்சியை, சோதனையாகவே எதிர்கொண்டு, தமிழ்மணத்திற்கு உதவலாமே!

கண்மணியின் முதல் வருகைக்குப் பரிசு - காய்கறிக்கலை - 3

2007-02-18T21:12:00.000-05:00

இந்தக் காய்கறிக் கலை படங்களை போட்டு, படம் காட்டிட்டு இருக்கறப்பா, நம்ம கண்மணியின் கண் 'மின்மினி' பக்கம் பட்டுடுச்சு. முதல் வருகைக்கு பரிசு எங்கப்பா?-ன்னு ஒரு கேள்விய போட்டுட்டாங்க, கொடுக்காம போக முடியுமா? அதாங்க, இந்த பாகம் - 3 - ஐ, அவங்களுக்கான ஸ்பெஷலா போட்டிராலாம், திருப்திதானுங்களே கண்மணி.. :))

யாரு இந்த கண்மணி-ன்னு கேக்கறவங்க அவங்களோட 'பல்சுவை பக்கம்'
போய்ப் பாருங்க..

"அ....முதல்...ஃ வரை கவிதை...முதல்...கடிஜோக் வரை... கோலம்..முதல்..கோழிகுருமா வரை பழமொழி...முதல்...பாட்டிவைத்தியம் வரை எல்லாம்..பேசுவோம் வாங்க வந்து சிரிச்சிட்டுப் போங்க" -ன்னு கூப்பிட்டு வச்சு விருந்து போட்டிருக்காங்க, போய்ப் பாருங்க.

சூப்பரா இதுவரைக்கும் எங்க குடும்பப் படங்கள்ளாம் பாத்தீங்களா? ஜாலியா வந்துட்டுப் போனதுக்கு 'டாங்க்ஸ்-ங்கண்ணா'?

இனிமே சமைக்கிறப்போ, காய்கறி வெட்ட முன்னாடி, என்ன பாவனை காட்டுறோம்-னு பாத்துட்டு வெட்டுறீங்களா?

- முற்றும்

நீங்கள் ஆவலோடு எதிர்பார்த்த காய்கறிக் கலை - 2

2007-02-17T18:49:00.000-05:00

'கல்லிலே கலை வண்ணம் கண்டார்'னு பாடினவங்க, இந்த காய்கறில வித்தை பண்றவங்கள பாத்திருந்தா மாத்திப் பாடியிருப்பாங்களோ? ஆனா, கல்லிலே கண்ட கலைவண்ணம், காலத்துக்கும் நிலைத்து இருக்கும். காய்கறி வாடிபோகுமே?

ஆனாலும், மக்களுக்கு தோணியிருக்கிற கற்பனை ஊற்று, ஆச்சரியமாத் தானிருக்கு,

எங்க வீட்டு குட்டிப் பசங்க எல்லோருக்கும் இந்தப் படங்கள்ளாம், ரொம்பப் பிடிச்சிருக்கு, அதுலேயும் அந்த மீனும், அழுகிற (cry) ஆரஞ்சும் சூப்பரோ சூப்பர்..

ஆவலோட எதிர்பார்த்த உங்க பார்வைக்கு, விடுபட்ட படங்கள் இங்கே..

நீங்க மட்டும் பாக்காதீங்க, உங்க வீட்டுப் பாப்பாவுக்கும் காட்டுங்க. இது மாதிரி விசயங்கள், அவங்களோட கற்பனா சக்தியை கூட்டும்.

இன்னும் மூணு படம் மிச்சமிருக்கு, அதுல தான் அந்த மீனும் வருது. இதுவே, பக்கம் பெரிசானதுனால, அடுத்ததுல போடறேன்.

காய்கறிக் கலை - 1

2007-02-16T20:53:00.000-05:00

காய்கறி புகைப்பட போட்டி ஜோரா நடந்துட்டுருக்கு, அதுல ஒரு அனானி வாசகர், போட்டிருந்த கமெண்ட் இது.

"சர்வேசாதலைப்பை மாத்து !புகைப்பட வித்தகர் போட்டியா இல்லை வெஜிடபிள் கார்வார் போட்டியா !கார்வ் பண்ணத் தெரியாத ஒரு போட்டியாளன்.( சும்மா டமாஸூக்குத்தான் ):-))"

இது பத்தி யோசிச்சுகிட்டு இருக்கையில, நண்பர் சக்திவேலோட ஈ-மெயில் 'டங்'னு சத்தம் போட்டது.

சில புரபஷனல் கார்வர்ஸ், செம கலக்கு கலக்கியிருக்காங்க. அழகான படங்கள், நீங்களும் பாருங்க.

- இன்னும் வரும்.

வந்துட்டேண்ணா...வந்துட்டேன்..

2007-02-15T02:49:00.000-05:00

சில விசயங்கள் நாம செய்யணும்னு ஆசைப்படறது, ஆனா அத முயற்சிக்கையில ஆசைப்பட்ட அளவு அவ்வளவு எளிதான விசயமாகிவிடாது.

அதுமாதிரிதான், 'வலைஜாலிஞர்' சர்வேசர், பாட்டுக்குப் பாட்டு போட்டிக்குப் பெயர் கொடுக்கையில் எளிதாக இருந்தது . ஆனா, நம்ம ஷைலஜா மேடம் 'ய்'-ல முடிக்க, சர்வேசர் 'ய'கர வரிசையில ஆரம்ப்பிக்கச் சொல்லிட்டார். யகர வரிசையில, பெண்கள் பாடுறதுக்கு நிறைய பாடல் இருக்கு. ஆண்குரலில் பாட, சோகப் பாடல்தான் நினைவுக்கு வந்தது. 'யார் வீட்டு ரோஜா' பாடலாம்னா, சில peak curve அலர்ஜியாகுது. கடைசியா ரெண்டு மூணு, முயற்சி பண்ணி ஏதோ சுமாரா தேறினத அனுப்பியாச்சு.

சர்வேசர் வேற, அதுக்குள்ள 'எங்கிருந்தாலும் மேடைக்கு வரவும்'னு அறிவிப்பு வேற விட்டுட்டார். ஓசியில ஒரு விளம்பரம் கிடைக்குதே, இன்னொரு அறிவிப்பு வரும் வரை காத்திருக்கலாமான்னு நினச்சேன்.. அடுத்து வரிசையில இருக்கிறவங்க அடிக்க வந்துரக் கூடாதே-ன்னுட்டு அனுப்பி வச்சுட்டேன்.

அவரு ப்ளாக்ல போட்டப்புறம், இங்கேயும் 'லிங்கி'ரலாம். ஏற்கனவே, நிறைய பேர் பாடியிருக்காங்க, கேட்க இங்க 'க்ளிக்' குங்க.

இந்தக் குரலிசைக்கு முன்னோடியா இருந்தது, சிறில் அலெக்ஸ்தான். அவருடைய செய்தி வாசிப்பு பதிவுதான் முதல் குரல் பதிவு. அதைக் கேட்ட பொழுதே அவருக்கு வாழ்த்துச் சொல்லி, விரிவாக பின்னூட்டமிட வேண்டுமென்று நினைத்தேன். (இந்தப் பதிவின் ஆரம்ப வரிகளை ஒரு முறை படிச்சுடுங்க.) இதன் மூலமா சொல்லிக்கிறேன். வித்தியாசமா, முயற்சிக்கிற வலைப்பதிவர்கள்ளே அலெக்ஸும் ஒருவர், 200 பதிவு தாண்டினவரு, இரண்டாயிரமும் தாண்ட வல்லவர். மேலும் பல புதுமைகளை தமிழ் வலைப்பூவுக்கு அறிமுகப் படுத்த வாழ்த்துக்கள், அலெக்ஸ்.

பாட்டுக்குப் பாட்டுக்கு பாட தாமதமானதுக்கு, அடுத்து பாட இருக்கிற பதிவர்கள் மன்னிக்க. இதுவரைக்கும், பாட தயாராகதவங்க, இப்ப ரெடியாகுங்க.. பேர் கொடுக்க சர்வேசனைப் பாருங்க..

மெல்லிசை மன்னர் உடல் நலம் குறித்துச் சொன்ன பிறகே, இந்தப் போட்டியை ஆரம்பித்து இருந்தார், மெல்லிசையார் எனது அபிமான இசை அமைப்பாளர்களில் ஒருவர், இசையில் இளையராஜா என்றால், 'ட்யூனில்' மெல்லிசையார் என்பது மறுக்க முடியாத ஒன்று. அவர் பற்றி தனிப் பதிவு எழுத எண்ணம். மெல்லிசையாரின், உடல்நலம் நன்றாக, கடவுள் அருளட்டும்.

போட்டி ஆரம்பிச்சாச்சு, குருமா பண்ணிடலாமா?

2007-02-13T05:14:00.000-05:00

என்னா போட்டின்னு கேக்கறீங்களா?

தக்காளி, வெங்காயம், உருளைக்கிழங்க வச்சு ஆரம்பிச்ச போட்டிக்கு புகைப்படங்கள்ளாம் வந்தாச்சு, சர்வேசன் கட்டம் கட்டி காட்டியிருக்காரு. ஓட்டு போட்டு, போட்டியை 'கமகம''க்க வைங்க பார்க்கலாம்.

ஒருஒரு போட்டோக்கும், சும்மா ஜாலியா கமெண்ட் போடலாமா? போட்டோ எடுத்த அண்ணன்மார்/அக்காமார், கோவிச்சுடாதீங்க.. :))

போட்டோ - A - எங்க நிறம் வேறேன்னாலும், ஒரே கோட்டுக்குள்ள வந்துட்டோம், நீங்களும் வந்துருவீங்கதானே, தமிழர்களே..அட்லீஸ்ட் ஓட்டுபோடவாவது?

போட்டோ - B - நாளக்கி காதலர்தினமாம், நானும் கொண்டாடத்தான் வந்திருக்கேன், ஆனா, உதட்டுலே வெங்காய வாசம், ஒகே வா?

போட்டோ - C - தக்காளிப் பொண்ணு, பல்லவன் பஸ்ஸிலே, வெங்காயப் பசங்க உரசரானுங்கோ, உருளைக்கிழங்கு பொடியங்கோ எஸ்கார்ட்டாம்.

போட்டோ - D - ஒரு கோப்பைக்குள் எங்கள் குடியிருப்பு..

போட்டோ - E - காமாலை கண்ணுக்கு மஞ்சள், இந்தக் காமிராவின் கண்ணுக்குமா? மஞ்சளின் மங்கலம், இந்தப் போட்டோலேயும் தங்கட்டும்.

போட்டோ - F - வெங்காயம் உரிச்சா கண்ணுக்கு அலர்ஜி, இங்க கண்ணுக்கு குளிர்ச்சி?

போட்டோ - G - வெட்டு ஒன்னு, துண்டு ரெண்டு..அது எல்லாத்துக்கும்தான்!

போட்டோ - H - நாமிருவர் (தக்காளி,வெங்காயம்), நமக்கு ஒருவர்(உருளை)

போட்டோ - I - கூட்டமாய் ஒரு கும்மாளம்.

போட்டோ - J - அரசியல்வாதியின் கூழைக் கும்பிடு, ஓட்டு போட்டுருங்க!

போட்டோ - K - சர்வேசன் போட்டியில எங்காளுங்க கலந்துக்குறாங்களாம், அதான் குடும்பத்தோட பார்க்க வந்துருக்கோம்!

போட்டோ - L - ஒடுக்கப்பட்ட தக்காளி, ஆர்ப்பரிக்கும் வெங்காயம்!

போட்டோ - M - ஆகாயத் தாமரை அல்ல..வெங்காயத் தாமரை, அல்லித் தக்காளி உடன்

போட்டோ - N - உ.வெ தாத்தா..அதாங்க உருளைக்கிழங்கு, வெங்காய தாத்தா

போட்டோ - O - கொடுவா மீசை கிழங்கு பாரு..ஓட்டுப் போடு தூள்!

போட்டோ - P - தக தக தக தக்காளி வேட்டை!

படங்களோட பாக்கணுமா? இங்க 'க்ளிக்' பண்ணுங்க!

வலைப்பூ வித்தகன் 'சாகரன்' கல்யாண்

2007-02-13T01:22:00.000-05:00

'சாகரன்' கல்யாண்...தான் யாரென்றே அறியாதவாறு, தேன்கூட்டின் பின்பலமாய் நின்றவர், 'சட்' டென வந்த காலனால், எல்லோரும் துயருற அறியப்பட்டவர். வருத்தமாய்த்தானிருக்கிறது, 29 - வயது என்ன காலனைச் சந்திக்கும் வயதா?

நேற்று மதி அவர்களின் பதிவு மூலமாய், அவர் மறைவு பற்றிய செய்தியுடன், அவர் எழுத்துக்களின் முன்னோட்டமும் கிடைக்க, தொடர்ந்து எழுதிய வலை நண்பர்களின் மூலமாக அவரின் பல்வேறு முயற்சிகள் தெரிய வந்தன.

இத்தனை சிறிய வயதில், எத்தனை ஆற்றல்? அவரின் தமிழ் ஆர்வமும், பிற நண்பர்கள் வலைப்பூ துவக்க உதவி கோரியபோது, போட்டியாளனாய்ப் பார்க்காது, சகஜமாய் உதவியது, தொலைபேசி வழியாக உதவிய போதும், அதற்காக கட்டணமெல்லாம் வசூலிக்காமல், இலவசமாக தமிழுக்கு பணியாற்றியது, என ஒவ்வொரு முகமாய், அவரின் பல்வேறு தமிழ் முகங்கள் புலப்பட்டது.

தேன்கூட்டினை வெறும் வலைதிரட்டியாய் மட்டும் பார்க்கப்படாமல், அதையும் தாண்டி, வலைஞர்களை இணைக்கும் ஒரு கருவியாய் ஆக்கியது, தேன்கூடு சிறுகதைப்போட்டி, சுடர் என வகை வகையாய் வலைப்பதிவர்களின் பசிக்குத் தீனி போட்டுக்கொண்டிருந்த அந்தத் தமிழார்வன், செய்துகொண்டிருந்த புதுமைகளுக்கு காலன் இட்ட புள்ளி, தமிழ் வலையுலகிற்கு பேரிழப்பு.

பரபரப்பாய் விளம்பரம் தேடும் உலகில், அரிய செயல் பல செய்தும் அடக்கமாய் இருந்த அந்தச் சாதனையாளன் மறைவு, நம்முள் ஏற்படுத்துகின்ற தாக்கங்கள், ஆக்கமாய் அவரது இன்னபிற கனவுகளை நனவாக்குவதில் இணையவேண்டுமாய் வேண்டுகிறேன். அதுவே, அந்த ஆன்மாவுக்கு கடன் பட்ட நெஞ்சங்களின் காணிக்கையாய் மாறும்.

இழப்பின் துயரை வார்த்தைகள் ஈடுகட்ட முடியாது, ஆயினும் சற்றே ஆறுதலாவது தரும், அவரை இழந்து தவிக்கின்ற அவர்தம் குடும்பத்தினர்க்கும், அவர்தம் செல்லச் சிறுமகளுக்கும், தேன்கூட்டின் நண்பர்களுக்கும் ஆண்டவன் தாங்கும் திடத்தையும், ஆறுதலையும் அளிப்பானாக!

இன்று மாலை இந்திய நேரப்படி ஆறு மணிக்கு, கூட்டு வழிபாட்டிற்கு நேரம் குறித்து, கருத்துக் கேட்டிருக்கின்றார் நண்பர் முத்துக்குமரன், தொடர்ந்து வெளியாகும் அறிவிப்பினை பின்பற்றி, சாகரனின் ஆன்மா சாந்தியுற பிரார்த்திப்போமாக!

பச்சைக்கிளி முத்துச்சரம்

2007-02-11T01:37:00.000-05:00

'வேட்டையாடு விளையாடு' - வெற்றிக்குப்பிறகு, கெளதமின் இயக்கத்தில் வெளிவர இருக்கின்ற படம் 'பச்சைக்கிளி முத்துச்சரம்'. வழக்கம் போல, ஹாரிஸ் ஜெயராஜ்தான் இசை. அந்த ஆர்வத்தில், இணையத்தில் தேடி, அதன் பாடல்களை கேட்டேன்..

மொத்தம் ஐந்து பாடல்கள், ஒரு பாடல் இருமுறை வருகிறது. இரண்டு பாட்டு மிக அருமை. அதிலும் 'பாம்பே ஜெயஸ்ரீயின்' 'உனக்குள் நானே' பாடல் சூப்பரோ சூப்பர். அந்தக் குரலும், ட்யூனும், அவ்வப்போது 'வசீகரா'வை நினைவு படுத்தினாலும், குரலின் வசீகரத்திற்கு மன்னித்து விடலாம், இதே பாடலை 'மதுஸ்ரீ'-யும் பாடியிருக்கிறார், ஆயினும் வசீகரத்தின் வசீகரம் இல்லை.

இன்னொரு இனிமையான பாடல்: 'கருகரு விழிகளால் ஒரு கண்மை எனைக் கடத்துதே' எனத் தொடங்கும் கார்த்திக், கிரிஷ், நரேஷ் பாடிய பாடல். துடிப்பாய் இருக்கிறது. 'தாமரைஇலை நீர் நீதானா..' என்ற வரிகளில், இசையோடு வாய்ஸ் ப்ளெண்ட் ஆகிறமாதிரி பண்ணியிருப்பது அழகாய் இருக்கிறது.

அடுத்து சுமாராய்க் கவர்வது 'உன் சிரிப்பினில்' எனத் தொடங்கும் பாடல்..கெளதமிராவும், ராபியும் பாடியிருக்கிறார்கள், இதற்கு முன்னர் ஏதும் பாடியிருக்கிறாரா தெரியவில்லை. ட்ரெய்லரில் இந்தப்பாடலைத்தான் ஓட விட்டிருக்கிறார்கள். மென்மை தெரிகிற ஆண்குரலிசை, 'சரத்குமாருக்கு' ஒத்துப் போகுமா?

'காதல் கொஞ்சம்' பாடல் அவ்வளவு எனக்குப் பிடிக்கவில்லை.

கெளதம் - ஹாரிஸ் கூட்டணியில் பாடல்கள், இதுவரை நன்றாகவே வந்திருக்கிறது, இதுவும் அப்படியே.

ரஹ்மானின் வாரிசாக வந்தாலும், தனக்கென ஒரு பாணியை கொண்டுவந்துவிட்டார் ஹாரிஸ் என்றே சொல்லவேண்டும். தவிரவும், பின்னனி இசையிலும், ஒரு தனித்துவம் தெரிகிறது.

கெளதம் ஒரு தமிழ்ப் பிரியர், தன் கதாபாத்திரத்திற்கு தமிழ்ப் பெயரே வைப்பார், பாடல்களிலும் அந்தக் கவனம் தெரிகிறது..

சரத் ஒரு 'லைப்' எதிர்பார்த்து இருக்கிறார், 'ஹாட்' ட்ரிக் அடித்த கெளதம் அதைத் தக்கவைத்து, சரத்துக்கு உதவுவாரா? பார்க்கலாம்..

பாட்டு கேக்கணுமா:..இங்கே 'க்ளிக்'குங்க

எங்காவது ஓர் புள்ளியில் என்றாவது இணைவோமா, என் தமிழா?

2007-02-10T14:03:00.000-05:00

"எங்காவது ஓர் புள்ளியில்

என்றாவது இணைவோமா, என் தமிழா?

இணைவோம் என்றால்

அப்புள்ளி எப்புள்ளி?"

இன்றைய இணையத் தமிழ் வலை நடப்புகளைப் பார்க்கும்போது, இப்படித்தான் கேட்கத் தோன்றுகிறது. சென்ற சில நாட்கள், ஓரே போர்முகமாகவே கழிந்தது குறித்து நிறைய தமிழ்வலை ஆர்வலர்கள் வருத்தம் தெரிவித்தும் பதிவிட்டிருந்தனர்.

போர்முகம் மட்டுமல்ல, சில சபைக்கு அழகில்லாத, பின்னூட்டங்களை சிலர் இடுவது, ஆண் பெண் வித்தியாசம் பாராமல், இத்தகு செயல்களை மின்னஞ்சலிலும் அனுப்புவது - இவை குறித்தும் எனக்கு வருத்தம்தான்.

இயல்பாகவே, நாம் அவ்வளவு எளிதாக நம்மை வெளிக்காட்டிக் கொள்ள மாட்டோம், அப்படி இருக்கையில், இது போன்ற செயல்கள், புதிதாக எழுத வேண்டும் என்ற ஆர்வம் உள்ளவர்களையும் தூரப் போகச் செய்யும். முக்கியமாக, இணையத் தமிழ் உலகில் பெண்கள் பங்களிப்பும், அதிகரிக்க வேண்டும் என்ற எண்ணம் மேலோங்கும் நிலையில், இது மாதிரியான செயல்கள், நம் தமிழ்கூறும் நல்லுலகிற்கு நச்சாகும்.

ஏனிந்த இழிசெயல்கள், இதைச் செய்வதும் ஒரு தமிழன் தான்! நம்மைப் பிரித்தாள, ஏகப்பட்ட வழிகள் இருக்கின்றன. அதைத்தான், ஒவ்வொரு அரசியல்கட்சிகளும், அரசியல்வாதிகளும் சாமர்த்தியமாகவோ, இல்லை சாமர்த்தியக் குறைவாகவோ செய்து கொண்டிருக்கின்றார்களே, நாமும் அதற்கு தூபவிட வேண்டுமா? என்று கேட்கத் தோன்றுகிறது.

ஆதிக்கவெறியும், அடக்குமுறையும் நடக்கின்ற இடங்களில், தட்டிக் கேட்கலாம், தப்பில்லை. ஆனால், சும்மா பொழுது போகாமல், கிள்ளிவிட்டு 'ஹிட்' பார்ப்பது கண்டிப்பாய்த் தவறுதான்.

நல்ல விசயங்களை எழுதுவோம், நமக்குள் நட்புப்பாலம் பூக்க வகை செய்வோம், முதலில். எதை எழுதவேண்டும், எதை எழுதக் கூடாது என்பது, அவரவர் சுதந்திரம். ஆனால், எழுதப்படுகின்ற எழுத்து நன்மை பயக்காவிட்டாலும், இன்னலுறுத்தாது இருக்க வேண்டும்.

இந்தப் பதிவினை எழுதத் தூண்டியது, நண்பர்கள் கொழுவி, சிபி, மா.சிவகுமாரின் பதிவுகள்.

ஒரே நேர்கோட்டுச் சிந்தனைக்கு வா தமிழா என்றழைக்க முடியாது, 'நல்லெழுத்து' என்ற சிந்தனையிலாவது இணைவோம் வா தமிழா, என்றழைக்கிறேன்..

இட்லி வடை வராததால் தகராறு??!!

2007-02-05T01:33:00.000-05:00

சமீபமா இப்பத்தான் வலைப்பதிவர் சந்திப்பு நடந்து முடிந்தது. இந்த முறை, இட்லிவடையார் அதில் கலந்து கொள்ளவில்லை என்று தெரிகிறது.

அவர் வராததுனால, அங்க சண்டை வந்ததோ, இல்லை 'போட்டோவை' முன்கூட்டியே வெளிவிட்டுவிட்டார் என்று சண்டை தவிர்க்கப்பட்டதோ என்பது பற்றி அல்ல இந்தப் பதிவு,...

இது ஒரு கல்யாண கலாட்டாங்க, கீழேயுள்ள நியூஸைப் படிங்க, செய்தியைப் பெரிதாகப் படிக்க, அதன் மேல் சொடுக்கவும்.

சூப்பர் பவ்ல் - யாரு செயிப்பாக? - குரங்கு ஜோசியம்

2007-02-04T12:43:00.000-05:00

'சூப்பர் பவ்ல்' பத்தி இன்னைக்கு வாசன் எழுதியிருக்கிற பதிவு படிச்சேன். நமக்கு 'வோர்ல்ட் கப் கிரிக்கெட்' மாதிரி, அமெரிக்க மக்களை கட்டிப் போடுகிற விளையாட்டு.

யாரு செயிப்பாங்க-ங்கிறத 'ஒரங்குட்டன்' ஜோசியம் சொல்லுது பாருங்க!

http://www.cnn.com/video/player/player.html?url=/video/sports/2007/02/03/vonat.or.super.bowl.41.prediction.koin

தீபாவளிக்கு அமெரிக்க முத்திரை வேணுமா?

2007-02-03T14:06:00.000-05:00

சின்ன வயசு குட்டிப் பசங்கள்ள இருந்து, பெரியவங்க வரைக்கும் ஒரு குதூகலம் கொடுக்கிற பண்டிகை தீபாவளிப் பண்டிகை. வெடி கொளுத்துங்க, இல்ல கொளுத்தாம இருங்க.. எப்படியாயினும், தீபாவளிங்கிறது இன்னைவரைக்கும் ஒரு மகிழ்ச்சிகரமான பண்டிகைதான்.

இந்தப் பண்டிகையைச் சிறப்பித்து, அமெரிக்கத் தபால்தலை வெளியிட இந்திய நண்பர்கள் சிலர் முயற்சிக்கிறார்கள், அதற்காக 'ஈ - கையெழுத்து' வேட்டை நடத்துறாங்க. நீங்களும் கூட ஆதரவளிக்கலாம், கீழேயுள்ள URL-ஐ உபயோகிக்கவும்.

http://www.petitiononline.com/diwali03/petition.html

மலைச்சிங்கம் வென்ற மாதரசி?

2007-02-01T04:21:00.000-05:00

"காட்டு வழி போற பொண்ணே கவலைப்படாத,
காட்டுப் புலி வழிமறிக்கும் கலங்கி நிக்காத,
மம்பட்டியான் பேரு சொன்னா புலி ஒதுங்கும் பாரு"-ன்னு இளையராசா பாடினது மாதிரி, அமெரிக்காவுலயும் ஒரு மம்பட்டியான் இருந்திருந்தா, ஜிம்-நீல் ஹாம் குடும்பத்தாருக்கு வசதியாய் இருந்திருக்கும்.

ஜிம் (70) - நீல் ஹாம் (65) தம்பதியர் 60 வயதைக் கடந்தவர்கள். அமெரிக்கர்கள்தாம் எந்த வயதிலும் துடிப்போடு உடல்நலம் பேணுவாங்களே, அது மாதிரிதான் இந்தத் தம்பதியரும், மலை ஏற சென்ற வாரம், கலிஃபோர்னியாவில் உள்ள ரெட்வுட் பார்க்குக்குச் சென்றிருக்கின்றனர். இந்த மலைப்பகுதியில், 'பூமா' வகையைச் சார்ந்த மலைச்சிங்கங்கள் உண்டென்பது, இங்கு மலையேற வருபவர்களுக்குத் தெரியும்.

பொதுவாகவே, இவ்வகை மலைச்சிங்கங்கள், துரத்தி வேட்டையாடுவதில் ஆர்வமுள்ளவையாம், மனிதனையும் வேட்டையாட வல்லவை என்றாலும், பெரும்பாலும் மனிதனைக் கண்டால் ஓடிவிடுமாம். ஆனால், இவர்கள் துரதிருஷ்டம், இவர்கள் போன வேளையில், இவர்களிருவரையும் கண்ட அது, ஜிம்-மைப் பிடித்துக் கொண்டது. அவரது தலையைக் கவ்வி இருக்கிறது. முறத்தால், புலி விரட்டிய பண்டைய தமிழ்ப்பெண் போல, நீல் ஹாம்தான், அருகிலிருந்த மரக்கிளைகளை ஒடித்து, அதனோடு சண்டையிட்டு, தன் கணவனை மீட்டிருக்கிறார். சாதாரண விசயமில்லை அது!

இருந்தபோதும், ஜிம் இன்னும் அபாய கட்டத்தை தாண்டவில்லை என்றே அவருக்குச் சிகிச்சை அளித்து வரும் மருத்துவர்கள் கூறுகின்றனர். இந்தமாதம், இவர்களுக்கு 50 - வது திருமணநாளைக் கொண்டாட இருக்கிறார்கள், நீலின் துணிச்சலான செயல், வீண்போகாமல் சீக்கிரமே உடல் தேற இறைவன் அருளட்டும்.

புது பிளாக்கருக்கு மாறீட்டேங்க!

2007-01-28T23:47:00.000-05:00

ரொம்ப நாளா ஆசை..புது பிளாக்கருக்கு மாறணும்னு. ஆனா, மாறினவங்க எல்லாம், அங்க பிரச்னை, இங்க பிரச்னைன்னு சொல்லவே, பயமா இருந்துச்சு. சரி, கொஞ்ச நாளாகட்டும்னு விட்டுட்டேன்.

அப்புறம் பாத்தா, நம்ம பாலாஜி, அவரோட பதிவுல 'புதிய பிளாக்கருக்கு மாறலாம் வாங்க!!! ன்னு அழைப்பு விடுத்திருந்ததைப் படிச்சேன். சூப்பரா சொல்லியிருந்தாரு, தேங்க்ஸ்ங்கண்ணா! புதிய பொலிவில், அவரது ப்ளாக்கும் இருக்கிறதைப் பாத்துட்டு, உடனே செயல்ல இறங்கினேன். அதன் விளைவுதான் புதுப் பொலிவில் 'மின்மினி'
http://vettipaiyal.blogspot.com/2007/01/blog-post_1921.html

டெம்ப்ளேட்-ஐ மாற்றிய பிற்பாடு, ஏற்கனவே பின்னூட்டம் இட்டவங்க பேரெல்லாம், பூச்சிபூச்சியாய்த் தெரிய, 'அடடான்னு' வாயைப் பிளக்கிறப்ப, வந்தாரு நம்ம 'ஜெகத்', சரியான கைக்கண்ணாடியாய். அவரு காட்டிய வழியைப் பின்பற்றி, பூச்சியை அடிச்சனுப்பியாச்சு.
http://kaiman-alavu.blogspot.com/2007/01/blog-post_23.html

அதுக்கப்புறம், 'தமிழ்மண்த்தின்' பதிவு அட்டையை சரிபடுத்த வேண்டியிருந்தது. அதுக்கும் அவங்க ஒரு குறிப்பேடு, எளிதாய்க் கொடுத்திருந்தாங்க. அத முடிச்சேன்.
http://blog.thamizmanam.com/archives/51

அப்புறம், தேன்கூட்டின் 'கமெண்ட்'-க்காக வேண்டியவற்றைச் சரிபடுத்தினேன். அவங்களும் குறிப்பு கொடுத்திருக்காங்க.
http://www.thenkoodu.com/wiki/doku.php?id=betablogger_pinger_code

அப்புறம், ஏற்கனவே, எழுதியிருந்த பதிவுகளுக்கெல்லாம், 'Label'-இட்டு, அதையும் முகப்பில கொண்டு வந்தாச்சு.

ஆக, அப்படி, இப்படி எல்லாத்தையும் முடிக்க கிட்டதட்ட, இரண்டு மணிநேரம் ஆனது, எல்லாத்தையும் முடிக்க. எப்படி இருக்குன்னு சொல்லுங்க!

இதற்கு காரணமாக இருந்த, பாலாஜி,ஜெகத்,தமிழ்மணம்,தேன்கூட்டிற்கு நன்றி!..

நான் மாறிட்டேன்...அப்ப நீங்க!!!!!!?

கடவுளுடன் ஒரு சந்திப்பு?

2007-01-25T20:29:00.000-05:00

வழக்கமா வெள்ளிக்கிழமை-ன்னாலேயே நிறைய 'பார்வர்டு' இ-மெயில் வரும். வெள்ளிக்கிழமைன்னாலே, நம்ம மக்கள் 'குஜால்' ஆகிடுவாங்க. சனி,ஞாயிறு விடுமுறை வருதுன்னுட்டு. அதுவும், இந்த முறை குடியரசுதினம் வேற 'வெள்ளிக்கிழமையில வந்ததுனால, கூடுதலா ஒரு நாள் லீவு. நிறைய பார்வர்டு இ-மெயில் வந்தது, அதுல இந்த மெயில் என்னைக் கவர்ந்தது,

நீங்களும் பார்க்க, இங்க 'க்ளிக்' பண்ணுங்க..

வலையன்பர்களுக்கு 'மின்மினியின்' குடியரசுதின வாழ்த்துக்கள் உரித்தாகட்டும்! வாழ்க பாரதம்!

2006 ன் சிறந்தத் தமிழ் வலைதிரட்டி எது?

2007-01-24T23:50:00.000-05:00

கடந்து போன இரண்டாயிரத்து ஆறாம் வருடம், வலையுலகிற்கு ஒரு சிறப்பான வருடமாயிருந்திருக்கும். நிறைய புதுப்புது வலைஞர்கள் உருவானார்கள். ஒரு புதிய உலகம் பிறந்தது போலிருந்தது.

கூகிளில் தமிழ் என்று தேட, தமிழ்மணம் பார்வைக்கு வந்து விழ, உள்ளே எட்டிப் பார்த்தால், 'கலகல' - என தமிழின் மணம். ஒரே சந்தோஷம் தாங்க. அப்போதைய தமிழ்மண டெம்ப்ளேட் நல்லாயிருந்த மாதிரி ஞாபகம். அப்புறம், எழுதியிருந்த மக்களின் ப்ளாக் மூலமாக, தேன்கூடு அறிமுகமானது.

இந்த இரு வலைதிரட்டிகளின் செயல்பாடுகளும், மிகவும் பாராட்டுக்குரியது. பணி நிமித்தமாய், நாடு விட்டு நாடு தாண்டி, நம் மொழி பேசுவோர் இருப்பாரா என்று தேட விடாமல், virtual-ஆய் ஒரு நண்பர் குழாமை அடிச்சிக்கவும், புடிச்சிக்கவும் தேடிக் கொடுக்கின்ற இந்தத் தளங்கள் பாராட்டுக்குரியவை. இலவசமாக எழுதப் படுகின்ற ப்ளாக்கிற்கு, மேடை அமைத்து, விளம்பரமும் தேடிக் கொடுக்கின்ற இவர்களது தமிழ்ப்பணிக்கு வாழ்த்துக்கள்!

துவக்கத்தில், இந்த இரண்டு வலைதிரட்டிகளில் தமிழ்மணம் என்னைப் பெரிதும் கவர்ந்தது. எழுதவேண்டும் என்ற ஆர்வத்தை அதிகப்படுத்துவதாய், வந்து கொண்டிருந்த பதிவுகளும், சூடாகப் போய்க் கொண்டிருந்த தேர்தல் விவகாரங்களும் ஒரு காரணமாயிருக்கலாம்.

அப்போது பார்க்கையில், தேன்கூடு ஒரு சிறு கூடு போலத்தான் தோன்றியது. தவிரவும் தமிழ்மணத்தில் பதிப்பிக்கப் படுபவைதான் அங்கும் இருக்கும் என்பதால், விசேஷமான கவர்தல் இல்லாமலிருந்தது. ஆனால், திடிரென்று ஒரு வேகம் எடுத்தாற்போல, நிறைய செயல்பாடுகள் தோன்றியது.

அவர்களது தேன்கூடு-தமிழோவியம், இணையப் போட்டி வலைஞரிடையே ஒரு எதிர்பார்ப்பைத் தோற்றுவித்து , மின்மினி போன்ற நிறைய வலைப்பூக்களுக்கு தீனி கொடுத்தது என்றால் மிகையில்லை. ஒவ்வொரு மாதப் போட்டியும் ஒருஒரு எதிர்பார்ப்பையும், கதாசிரியர்களையும், விமர்சகர்களையும் உருவாக்கிக் கொடுத்தது. அது ஒரு 'ஹைலைட்'-ஆன விசயம். ஒரு புதிய நட்புறவை, இந்தப் போட்டி உருவாக்கியது என்பதும், இதன் சிறப்பம்சம்.

டெம்ளேட்டையும் கவர்ச்சிகரமாய் ஆக்கியதோடு, வலைஞர்களின் பதிவுகளில் பதியப் படுகின்ற படங்கள், முகப்பில் தெரியச் செய்து அலங்கரித்தது. பெட்டகம், பிடித்தவர்களின் பதிவுகளை கொண்டு 'என் தேன்கூடு', திரட்டிஜி என குட்டிகுட்டி 'Tools'- பயனர்களின் உபயோகித்ததற்கு அளித்தது, என 'டெக்னிகலாக' - மேம்பட ஆரம்பித்தது.

சமீபத்தில், எத்தனை 'க்ளிக்' உங்கள் பதிவுக்கு கிடைத்தது, எத்தனை மறுமொழிகள் கிடைத்தன என்பனவற்றை எல்லாம் பதிவுக்குப் பக்கத்திலேயே தெரிய வைத்தது என சின்னச்சின்ன பரிசு எனலாம்.

தமிழ்மணம், இது போன்ற டெக்னிகலான விசயங்களில், அதிக முன்னிறுத்தலைத் தராவிடினும், 'பூங்கா' , விவாதக்களம் போன்ற இன்னொரு உலகினைப் படைப்பிக்க முயற்சி எடுத்தது. தமிழ்மண நிர்வாக மாற்றமும், 'சாதீயக் குற்றச் சாட்டுகளும்' இதன் கவனங்களை சற்று தாமதிக்கச் செய்துவிட்டனவோ, தெரியவில்லை. இருப்பினும், இன்னமும் இதுதான் அதிக வாசகர்களைக் கொண்டிருக்கின்றது.

சர்வேசன், சென்ற வருடத்திய சிறந்த பதிவர்களுக்குச் சர்வே வைத்தார், ஆனால் நம் பதிவுகளை மக்களைச் சென்றடைய வைத்த திரட்டிகளை ஏன் மறந்தார் என்று தெரியவில்லை, அதனால என்ன, நமக்கெல்லாம் ஏணியா இருக்கிற இந்தத் திரட்டிகளுக்கு, நாம ஒரு சர்வே வச்சிரலாம்? :)

என்னைப் பொறுத்தவரையில், தேன்கூட்டில் 'டெக்னிகலாகச் சிறந்தாகவும், புதிதுபுதிதாய் செய்யத் துடிக்கின்ற ஆர்வத்தையும் பார்க்க முடிகின்றது, அது தமிழ்மணத்தில் மிஸ்ஸிங்.

இது போன்ற கருத்துக்களை, விமர்சன நோக்கோடு எடுத்துக் கொள்வார்கள் என்ற நம்பிக்கையில் இதனைப் பதிகிறேன், எதிர்வினை இருக்காது என்ற நம்பிக்கையில்.

சரி, நீங்களும் உங்க கருத்தச் சொல்லுங்க..

வலைதிரட்டிகளும் சாதீயமும்

2007-01-19T22:28:00.000-05:00

'சாதி இரண்டொழிய வேறில்லை' - என்று மூத்த புலவர் ஒளவையாரும், 'சாதிகள் இல்லையடி பாப்பா' - என்று பின் வந்த பாரதியாரும் பாடிய போதும், கற்காலம் தொட்டு இக்காலம் வரை, இந்தச் சாதிப் பித்து மட்டும் மனுசனை விட்டுப் போகவே மாட்டேங்குது. அது போவதற்கான சாத்தியக் கூறுகள் கண்ணுக்கெட்டிய தூரம் வரை தெரியவே இல்லை.

பத்தாம் வகுப்பு வரை ஒரளவுக்கு இந்தச் சாதிகள் அறிந்தும் அறியாமல் இருப்பமையால், சக மாணவர்களோடு தோழமை உணர்வோடு இருக்கிறது. அதன் பிறகு மேல்படிப்பு, இட ஒதுக்கீடு என விரிசல் காண ஆரம்பித்து, அதற்கு மேல் மெல்ல நிலை கொள்ள ஆரம்பித்து கல்யாணம், காட்சி, பிள்ளை குட்டி என்று தொடர ஆரம்பித்து விடுகிறது என்றே சொல்ல வேண்டும்.

சமத்துவ புரமும், சமபந்தி போஜனங்களும், கலப்புத் திருமணங்களும் இதை எல்லாம் போக்கிவிடும் என்பதெல்லாம் உண்மையாகி விடவில்லை.

பாரதியின் பாட்டும், ஒளவையின் செய்யுளும், உயிர்ப்பற்று போய்விடக் கூடாது என்பதற்காகவோ என்னவோ, இந்தச் சமூகமும் அதைப் பிடித்துத் தொங்கிக் கொண்டிருக்கின்றது.

வலைப்பூக்களும், சமூகத்தின் ஒரு பிரதிபலிப்புதானே? இங்கும் சாதீயத்தின் ஆதிக்கம் குறைந்து போய்விடவில்லை. சென்ற வருடத்தின் பின் பாதியிலிருந்து என்ன காரணத்துக்காகவோ தெரியவில்லை, சாதீயப் பதிவுகள் அதிகமாகி விட்டன.

இது குறித்து, பல பதிவுகள் வேதனைப் பட்டு வந்துவிட்டன. இன்று கூட அற்புதன் எழுதியிருக்கிறார். ஆனாலும் இது மாதிரியான சாதீயப் பதிவுகள் நின்று போய்விடவில்லை. எப்படி நிற்கும், சிலருக்கு இதுவே உயிர் மூச்சாய் இருக்கும் பட்சத்தில்? இம்மாதிரி எழுதி, ஒருவருக்கொருவர் இரத்தக் கொதிப்பை ஏத்திக் கொள்வதைத் தவிர, என்ன பயன் தந்திருக்கும், இம்மாதிரியான பதிவுகள்.

இப்படி எழுதப்படுகின்ற வலைப்பூக்கள், திரட்டிகளால் திரட்டப்பட்டு எல்லோர் முன்னும் மேடையேற்றப் படுகின்றபோதுதான், அதன் தாக்கம் அதிகமாகிறது.

தேன்கூடும் திரட்டுகிறது, தமிழ்மணமும் திரட்டுகிறது, ஆனால், தமிழ்மணத்தின் மீதுதான் குற்றச்சாட்டு அதிகமாயிருக்கிறது. எனது சமீபத்திய இரு பதிவுகளில் இது குறித்து வலைநண்பர்கள் சாடியிருந்தனர்.

'வலைஞர்கள் எழுதுவதற்கு திரட்டிகள் என்ன செய்யமுடியும்?' என்ற கேள்வியை பதிலாய்த் தருகின்ற தமிழ்மணம், 'ஏன் தேன்கூட்டின் மீது இம்மாதிரியான குற்றச்சாட்டுகள் எழவில்லை?' என்ற கோணத்தில் யோசிக்கலாமே?

தேன்கூட்டினை விட, தமிழ்மணம் அதிகம் வாசகர்களால் படிக்கப் படுகிறது என்பது மட்டுமே இதற்குக் காரணமாயிருக்க முடியாது.

தமிழ்மணத்தில், பின்னூட்டங்களின் எண்ணிக்கை, முதல் பக்கத்தில் கொட்டை எழுத்தில் பதிப்பிக்கப் படுவது கூட ஒரு காரணமாயிருக்கலாம்.

சாதீயம் பற்றி எழுதப் படுகின்ற இடுகைகளுக்கு கிடைக்கின்ற பின்னூட்டம், கண்ணைப் பறிக்கின்ற விதத்தில் அதிக எண்ணிக்கையோடு முன்னேறுகையில், ஆதரவாளர்கள் அதிகக் களிப்போடு கைதட்டவும், இம்மாதிரி பதிவுகளுக்கு பின்னூட்டம் இடக்கூடாது என்ற எண்ணத்தோடு இருப்பவர்களுக்கு, அவர்களின் கெக்கலிப்பு BP-யைக் கிளறி விட, அவர்களும் வேறு வழியில்லாமல், சங்கைக் கையிலெடுத்து ஊத ஆரம்பித்து விடுகிறார்கள்.

தமிழ்மணத்தில் பின்னூட்டங்களை, தேன்கூடு போல, scroll-ல் சிறியதாகக் காட்டலாம்.

தமிழ்மணத்தில் 'இடுகையை தடை செய்ய' வசதியிருக்கிறது. இது எந்த அளவில் உபயோகப் படுத்தப் படுகிறது என்பது தெரியவில்லை. இதன் உபயோகம் விரிவாக விளக்கப்படுமானால், இதை உபயோகித்துக் கூட, இம்மாதிரியான பதிவுகளைத் தவிர்க்கலாம். இம்மாதிரி கிடைக்கும் எதிர்ப்புகளை, எல்லோரும் அறியத்தரலாம்.

இது போன்ற விசயங்கள் ஒரு புறமிருக்க, தெரிந்தே சில விசயங்கள் தமிழ்மணம் அனுமதிக்கின்றதோ என எண்ணும் விதமாய், இம்மாத விவாதக் களத்திற்கு 'தமிழக அரசியலில் சாதீயம் - தேவைதானா? என்று தலைப்பிட்டு துவக்கியிருக்கிறார்கள். அரசியலும் சாதீயமும் என்றோ பிரிக்க இயலாத ஒன்றாக ஆகிவிட்ட வேளையில், இந்த விவாதக்களம் என்ன புதுச் சிந்தனையைத் தோற்றுவிக்கும்? ஒருவேளை, விவாதக்களம் பிரபல்யமாக உதவலாம்.

எனக்குத் தோணியதை உங்களோடு பகிர்ந்திருக்கிறேன். இது எல்லாம் ஒரு ஆரோக்கியமான வலையுலக அனுபவம் எல்லோருக்கும் கிடைக்க வேண்டும் என்ற எண்ணத்தில் எழுதியது. 'சேவல் கூவியே விடியாத பொழுதுகள், காக்கை கூவியா' விடியப் போகிறது? இருந்தாலும், 'ஊதுகிற சங்கை ஊதி வைப்போம், கேக்குகிற காது மட்டும் கேக்கட்டும்' என்ற எண்ணம்தான்.

உங்கள் எண்ணத்தையும் பகிருங்கள், ஆரோக்கியமான வலையுலகம் படைக்க!

அயோத்தியாமண்டபமும்,தமிழ்மண மண்டபமும்

2007-01-17T09:46:00.000-05:00

தலைப்பைப் பார்த்தவுடனேயே புரியுமே..எதப் பத்தி பேச வாரேன்னு? எல்லாம் நம்ம சுஜாதாவோட கதையை வச்சு, 'சூடா' போண்டா, பஜ்ஜி போட்டு கதைச்சிகிட்டு இருக்கிறத பத்திதான்..

வலையுலகில் உங்க பேர் சீக்கிரம் பாப்புலர் ஆகணுமா? 'நான் பிராமணன்'னோ, இல்லா 'பாப்பான்னா உதைப்பேன்'னோ ஒரு தலைப்பு வச்சு ஒரு பதிவு போடுங்க. ஹிட்-டு பிச்சிகிட்டு போகும். அப்படி ஒரு 'ஹாட்' சப்ஜக்ட் அது.

சும்மாவே மென்னுகிட்டு இருக்கிறவங்களுக்கு, 'அவாள்' (அதாங்க அவல்)..கிடைச்சா மாதிரி சுஜாதாவோட கதை கிடைச்சிருக்கு சும்மா விட்டுடுவாங்களா என்ன?

என்னதான் இருக்கு அந்த கதையிலன்னு, ஆவலைத் தூண்டி படிக்க வச்ச வலை நண்பர்களுக்கு நன்றி. படிச்சதுக்கு அப்புறம் நம்ம கருத்தச் சொல்லலேன்னா எப்படி?

இது மாதிரி நிகழ்வுகளின் தாக்கத்தில் நடப்பது போன்ற நிறைய கதைகளை ஏற்கனவே சுஜாதா எழுதியிருக்கிறார். அத்தோடு இதுவும் போயிருக்கும், வலைஞர்களின் ஆதரவால், மிகைப்படுத்தப்பட்ட விளம்பரம் கிடைத்திருக்கிறது இக்கதைக்கு. என்னைப் பொறுத்தவரையில், இது ஒரு சாதாரணச் சிறுகதை, தேவையற்ற விளம்பரத்திற்கு ஆளாகியிருக்கிறது.

"இதன் நாயகி அடாவடியாகவும், கோபக்காரியாகவும் சித்தரிக்கப் பட்டு இருப்பதாகச் சொல்கிறார்கள். அவள் பிற்படுத்தப்பட்ட வகுப்பைச் சேர்ந்தவள் என்பதால், எல்லா பிற்படுத்தப் பட்டவர்களும் அப்படியே என வாசகர்கள் எண்ணிவிடுவார்கள்" - என்பது இக்கதையின் மீதான குற்றச் சாட்டு.

இந்தக் கதையை படித்தபிறகு சத்தியமாய் அப்படித் தோன்றவில்லை. சகஜமான துடுக்கான பெண்ணாகத் தெரிகிறாரே தவிர, குற்றச்சாட்டில் கூறுவது போலான தோற்றம் கண்டிப்பாக இல்லவே இல்லை.

அது அடாவடியாக, கோபமாக பேசுவதும் கூட, கட்டினவனின்
குடும்பத்தாரின் ஆசிர்வாதம் வாங்கத்தான் என்பது, புரிகிற மாதிரிதான் எழுதியிருக்கிறார். அந்த கோபம் கூட பாசிடிவாகத்தான், அந்தப் பெண்மேல் தெரிகிற மாதிரி எழுதியிருக்கிறார். இறுதியில் அந்தப் பெண், அமெரிக்கா ட்ரிப்-பைத் தள்ளி வைத்து, அடிபட்ட பெரியவருக்கு ஆதரவாக அருகிலேயே இருகிறார். இந்தச் சூழலில், எப்படி பாலபாரதிக்கு அதுமாதிரியான பார்வை பட்டது என்பது புரியவில்லை.

இன்றைக்கு திரைக்கு வருகின்ற பெரும்பாலான படங்களின் நாயகிகள், சுட்டிப் பெண்ணாகத்தான் காட்டப் படுகிறார்கள். சில படங்களில், வில்லியாகக் கூட காட்டப்படுகிறார்கள். மூன்று மணிநேரப் படங்களில், தெரிந்துவிடாத சாதீய உணர்வா இதில் வெளிப்பட்டு விடுகிறது? மிகைப் படுத்தப்பட்ட கற்பனையாகவே படுகிறது, இக்கதை குறித்த குற்றச்சாட்டு.

சுஜாதாவின் பெரும்பாலான கதைகளின் முடிவில், வாசகன் எதிர்பாராத 'ட்விஸ்ட்' இருக்கும், இந்தக் கதையிலும் அது மாதிரி 'அயோத்தியா மண்டப அடிஉதை பெட்ரோல் குண்டு வீச்சு' சம்பவத்தை நினைவுறுத்தியிருக்கிறார்.

'பெரியார் சிலையை' யாரோ உடைத்தற்கு, சென்னையில் ஒரு அயோத்தியா மண்டபம் அடிக்கப் படுமானால், அது தப்பில்லையா? அதையேதான், அந்தப் பெரியவரின் குரலில், ‘‘எதுக்கு என்னை அடிச்சா? எதுக்கு கடையை எரிச்சா? நான் யாருக்கும் துரோகம் பண்ணலையே’’ ன்னு கேட்டிருக்கிறார். மிக யதார்த்தமான கேள்வியது. உணர்வுப்பூர்வமாக பார்க்காமல், அறிவுப் பூர்வமாக பார்த்தால் புரியும். அயோத்தியா மண்டபச் சம்பவம் படித்த எல்லோர் மனதிலும், கண்டிப்பாக எழுந்திருக்கும் அந்தக் கேள்வி.

இதில் எங்கு பிழை என்பது புரியவில்லை. இந்தக் கதையை எழுதியது 'சுஜாதா' என்ற பிராமணர், வெளியிட்டது 'குமுதம்' என்ற திமுக - தி.க பிடிக்காத பத்திரிக்கை. இது மாதிரியான பார்வைகள், இந்தக் கதையை திசை திருப்பி விட்டதோ? எது எப்படியோ, வழக்கமான சுஜாதவின் சிறந்த கதைகளுக்குக் கூட கிடைக்காத விளம்பரம், மிகச் சுமாரான இந்தக் கதைக்கு கிடைத்திருக்கிறது.

'சிறுமை கண்டு பொங்குவாய் வாவா'-ன்னு பாடினதுக்கு ஏற்ப, எங்கு மனிதமும், மனித நேயமும் சிறுமைப்படுத்தப்பட்டாலும், அதற்கு எதிர் குரல் கொடுக்கலாம், அது பார்ப்பனீயத்திலிருந்து வந்தாலும் சரி, அல்லது பண முதலைகளிடமிருந்து வந்தாலும் சரி. அதை விடுத்து, இது போன்ற உப்புச் சப்பற்ற விசயங்களைப் பெரிது படுத்துவது, திரைப்படங்களிலன் தமிழ் தலைப்புக்கு வரிவிலக்கு' என்பது மாதிரி, ஒரு விளம்பரமாகவே பயன்படுமே அன்றி வேறு எந்தப் பயனுமிராது.

சதாமின் தூக்கு - சிறுவன் பலி?

2007-01-07T03:25:00.000-05:00

சதாம் தூக்கிலிடப்பட்டது குறித்து ஆங்காங்கே சில கருத்துப் பரிமாறல்கள் நடந்து கொண்டிருக்கின்றன. நமது 'சர்வேசரும்' இது குறித்து சர்வே பதிவு செய்து, வெளியிட்ட முடிவில், பெரும்பாலோர் துக்கப்பட்டிருக்கிறார்கள்.

நமது மக்கள் எப்போதுமே உயிர்பலியை ஆதரிப்பதில்லை. என்கவுண்டரில் சுடப்படுகின்ற ரவுடிகளுக்கே கூட பச்சதாபப் படுகிறவர்கள், நிதானமாய் ஆராயாமல், அவசரமாய் நிறைவேற்றப்பட்ட சதாமின் தூக்கினை எப்படி ஆதரிப்பார்கள்?

இந்தத் துக்கம் ஒரு புறமிருக்க, இன்னொரு துயரச் செய்தியை கேளுங்கள். சதாம் தூக்கிலிடப்பட்ட செய்தியை, தொலைக்காட்சியில் கண்ட ஸ்பானிஷ் 10 வயது சிறுவன், அது போல 'மிமிக்' செய்ய முயன்று, மரணப்பட்டுப் போயிருக்கிறான். ஆழ்ந்த அனுதாபங்கள். CNN-ல், இந்தச் செய்தித் துளியைப் பாருங்கள்.

தொலைக்காட்சியில் இதனைப் பார்த்தவன், தனது மாமாவிடம் இது குறித்து வினவ, 'சதாம் கெட்டவன், அதனாலேயே அந்தத் தண்டனை' என சாதாரணமாகச் சொல்லியிருக்கிறார், அந்தக் காட்சி அவனைப் பாதித்த அவலம் புரியாமல். வீட்டில் தனியாக விளையாடிக் கொண்டிருந்தவனுக்கு, தூக்கின் காட்சி நினைவில் வந்திருக்க வேண்டும், தொலைக்காட்சியில் கண்டதை, விளையாட்டாய்த் தனக்குத் தானே செய்ய முயற்சித்திருக்கவேண்டும், வினையாகி உயிர் பிரிந்திருக்கிறது.

சதாமின் தூக்கினைவிட, இந்தச் செய்தி மிக வருத்தமளித்தது. மீடியாக்கள் இது போன்ற செய்திகளை, காட்சித்தொகுப்பாய்க் திரும்பத் திரும்ப காட்டுவது, எத்தகைய பாதிப்புகளைக் கொடுத்திருக்கிறது பாருங்கள்? மீடியாக்கள், இது போன்ற செய்திகளை எச்சரிக்கை உணர்வோடு அணுக வேண்டும்.

பெற்றோரும் இது போன்று உளவியல் ரீதியாக பாதிக்கப் படும் என எண்ணுகின்ற செய்திகளை குழந்தைகள் முன்னர் பார்ப்பதனைத் தவிர்க்க வேண்டும் என்ற எச்சரிக்கை உணர்விற்காக, என்னைப் பாதித்த இந்தச் செய்தியினை உங்களோடு பகிர்கிறேன்.

புத்தாண்டு வாழ்த்துக்கள்

2007-01-01T03:26:00.000-05:00

போன வருடம்

ஓடியே போச்சு!

புதிய வருடம்

வேகமாய் வருது!

வருகின்ற 2007-ம் வருடம்
மகிழ்ச்சி தரும்
அனைத்து வலையுலக
நண்பர்களுக்கும்
மலர்க்கிரீடமாய் மலர்ந்திட

மனமார்ந்த புத்தாண்டு வாழ்த்துக்கள்!

மழலையர் மனம்போல எப்போதும் மகிழ்வோடு இருக்க இனிதான
வாழ்த்துக்களுடன்....

- உங்கள் அன்பு மறவா...
நெல்லை சிவா