Monday, June 26, 2006

தேன்கூடு போட்டி கோப்பை!!!




தேன்கூடு போட்டிக் கோப்பையை வென்ற

இளவஞ்சி, இராமசந்திரன்உஷா, நிலா & ராசா விற்கு வாழ்த்துக்கள்!


எனது சிறுகதைக்கு வாக்களித்த(17) அன்பு நெஞ்சங்களுக்கும், படித்தவர்களுக்கும், விமர்சித்த 'பினாத்தல்' சுரேஷ் மற்றும் மூன்றாவதுகண் நண்பர்களுக்கும் நன்றி!

- நெல்லை சிவா


(போட்டி முடிவு காண)

Sunday, June 18, 2006

கரடி உடுறேன்...

அய்யாமாரே..அம்மாமாரே..

நா இன்னக்கி ஒரு மேஜிக் காட்டப்போறேன். என்னா மேஜிக்-னு கேட்பவர்களுக்கு :

ஒரு கரடியை பூனைக்கு பயப்படச் செய்யப் போறேன்.

பூனைக்கு கரடி பயப்படுமா? என்னய்யா கரடி உடுறே? அப்படின்னு கேட்பவர்களுக்கு,

அது நிசந்தான் என்பதைப் பார்க்க, கீழேயுள்ள URL -ஐ சொடுக்கவும்.

http://www.cnn.com/video/player/player.html?url=/video/offbeat/2006/06/13/cat.bear.in.tree.affl


முதலில் ஏதாவது விளம்பரம் வரும், அதற்குப்பின் இந்தத் தகவல் வரும்..கொஞ்சம் பொறுமையா வெயிட் பண்ணுங்க..

Friday, June 09, 2006

விண்டோஸ் - விஸ்டா பேடா மென்பொருள்

மைக்ரோசாஃப்ட் நிறுவனத்தின் அடுத்த வெளீயீடான, விண்டோஸ் விஸ்டா-வின் மாதிரி வடிவம், இலவசமாக தரவிறக்கம் செய்ய அனுமதிக்கிறார்கள். இதனை ஜுன் 01,2007 வரை நீங்கள் பயன் படுத்திக் கொள்ளலாம். அமெரிக்காவிலுள்ளவர்கள், இதனை DVD-யாகப் பெற்றுக் கொள்ளலாம். இதற்கு, அனுப்புதல் மற்றும் DVD கட்டணமாக $11 செலுத்தவேண்டும். இதற்கான நிரல்..


http://www.microsoft.com/windowsvista/getready/preview.mspx

Tuesday, June 06, 2006

'ஹம்மிங்பர்ட்'

கழிந்த ஞாயிற்றுக்கிழமை நல்ல சாப்பாட்டுக்கு பிறகு, வீடு ஒதுங்க வைக்கணும்னு பிளான். ஆனா, 'அல்வா' பாண்டி 'இன்னைக்கி வேணாண்டா'ன்னு கொட்டாவி விட்டுக்கிட்டே சொன்னாரு. 'அண்ணாச்சி, இதயேதான் ரெண்டு வாரமா சொல்லிட்டு இருக்கிய, இன்னக்கி எப்படியிம் பண்ணிரனும்னு சொல்லிக்கிட்டெ, சும்மா செய்ய ஆரம்பிச்சா போரடிக்க ஆரம்பிச்சிரும்னு, எதாவது பாட்டு ஒன்ன போட்டுட்டே ஆரம்பிக்கலாம்னு சொன்னேன். அப்படின்னா 'ஹரிணி' பாட்டு போட்றா-ன்னார். (பாண்டிக்கு ஹரிணி குரல் பிடிக்கறதுக்கு இன்னொரு காரணம், 'சிம்ரன்'-னுக்கு அந்த வாய்ஸ் ஃபிட் ஆறதும் ஒன்னு. ) எனக்கோ 'ஜானகி' ஹிட்ஸ் போடணும்னு நினைப்பு, ஆனா 'அல்வா' பாண்டிக்கு 'ஹரிணி' ஹிட்ஸ் வேணும்னு ஆசை. எனக்கும் ஹரிணி புடிக்கும்தான், ஆனா, ஜானகி பாட்டு கேக்க ஆசை, என்ன பண்ணுறது! சரிடா மக்கா, 'பூவா/தலையா' போட்டு பாத்து டிசைட் பண்ணலாம்னு சொல்லவே, சரிடான்னு ஒரு 'குவார்ட்டர' எடுத்தோம். (குவார்ட்டர்-னா, அந்த குவார்ட்டர் இல்லங்கண்ணா, டாலர் குவார்ட்டர்). பாண்டியே டாஸ் போட்டாரு, எனக்கு எப்போதும் 'பூ' தான் பிடிக்கும், அததான் கேப்பேன்னு தெரிஞ்சுகிட்டு, அது வராத மாதிரி இருக்க, பூவை வைத்தே டாஸ் பண்ணினாரு. ஆனா, அன்னைக்கு 'லக்' எனக்காச்சே.. விழுந்தது 'பூ'.. அண்ணாத்த டான்ஸப்போட்டுக்கிட்டே, சிடி-யை எடுக்க, 'அல்வா' பாண்டி 'வாழுடா'ன்னு வாழ்த்திக்கிட்டே பொட்டி எடுக்கப்போனார்.

சிடியை போட்டா, மொத பாட்டே, ஜானகியம்மா 'ல லி ல லி ல லோ..' ன்னு ஆரம்பிச்சாங்க.. குறைச்சிருந்த 'வால்யூம' கொஞ்சம் கூட்டினேன். பாண்டி அதுக்குள்ளே எச்சரிக்கை பண்ணினார். அமெரிக்கால அழகழகா சவுண்ட் சிஸ்டம் இருந்தென்ன புண்ணியம், ஒரு பிடிச்ச பாட்ட சத்தம் வச்சி கேக்க முடியுதான்னு முனகிக்கிட்டே, குறைக்கிற மாதிரி குறச்சேன். ஆனாலும், அந்த ஹம்மிங்-க குறைக்க மனசு வரல.. ராஜாவும் கலக்கியிருப்பாரு.. மச்சானப் பாத்தீங்களா-ன்னு அப்படியே மெல்லிய சிரிப்போட பாடுற வாய்ஸ், மழை பெய்யுறப்ப வர்ற மண்வாசம் மாதிரி..அப்படியே ஊருப்பக்கம் கூட்டிக்கிட்டு போயிடுச்சு..

அடுத்த பாட்டு... 'அ ஆங் ஹா..' ன்னு ஜானகியம்மாவோட ஹம்மிங்.. அப்படியெ மனச பிசையற மெலடி. 'அன்னக்கிளி' உன்னத்தேடுதே..'..

அடுத்த பாட்டு 'சிங்கார வேலனே தேவா'ன்னு நாதஸ்வரத்தோடு, இணைஞ்சி பாடற பாட்டு.. என்ன படம்னு தெரியல, யாருக்குப் பிண்ணனி பாடுனாங்கன்னு தெரியல..அப்படியெ ஒரு கண்ணியமான இளம் பெண்ணுக்கு பாடற மாதிரி சின்னத்துறுதுறுப்புடன் பாடியிருப்பாங்க..

ஒவ்வொரு பாட்டா அங்க நின்னு, இங்க நின்னு கேட்டுக்கிட்டு இருக்கறதப்பாத்த 'அல்வா' பாண்டி, 'எல என்னா, எல்லாத்தயும் எந் தலயில கட்டிக்கிட்டு, நீ சோக்கா பாட்டு கேக்க' ன்னு சத்தம் போடவே, கொஞ்சம் குற்ற உணர்ச்சியுடன் 'இதோ வந்துட்டம்வே-ன்னு சொல்லிக்கிட்டே கூடமாட ஒத்தாச பண்ணப்போனேன்..

அந்த 'ல லி ல லோ' மட்டும் காதுக்குள்ளேயே ஒலிச்சிக்கிட்டிருந்தது..

Friday, June 02, 2006

தமிழ் கட்டாயப்பாடம். மேலும் சில தேவைகள்

தமிழ் கட்டாயப்பாடம் மட்டுமல்ல, மேலும் சில தேவைகள் இருக்கிறது, தமிழ் வளர..அது குறித்து என் எண்ணங்களின் ஒரு பதிவு..

நம்முள் சில அடிப்படை எண்ண மாறுதல்கள் ஏற்பட வேண்டும். இன்றைய சூழலில், அனைவரும், பொருளாதார ரீதியாக பின் தங்கிய குடும்பங்கள் உட்பட, கஷ்டப்பட்டாவது தங்கள் பிள்ளைகள் ஆங்கில வழிக்கல்வி கற்க வேண்டும் என்று நினைக்கிறார்கள். மம்மி, டாடி என்று பிள்ளைகள் அழைக்க வேண்டும் என்று விரும்புகிறார்கள். தமிழ்வழிக் கல்வியை வெறுக்கிறார்கள் என்று சொல்லவில்லை, ஆங்கிலவழிக் கல்வியை மோகிக்கிறார்கள் என்று சொல்ல வருகிறேன். ஆரம்ப நிலை ஆங்கிலவழிக்கல்விக்கூடங்களில், பிள்ளைகள் மனனம் செய்யவே கற்கிறார்களே அன்றி, வேறல்ல. ஆங்கிலவழிக் கல்வியைக் குறை கூறவில்லை. ஆங்கில மொழியும் தேவையானது தான். தம்தம் தாய்மொழி வழியில் பயில்கின்ற பாடங்கள், கற்கின்ற பாடங்களின் சிந்தனையைத் தூண்ட வல்லது என்பது உண்மை. இதை பெற்றோரும் உணர வேண்டும். தமிழ்க்குழந்தைகள் தமிழை நன்கு பேச, கற்க, எழுத உதவ வேண்டும்.

அடுத்து கற்பிக்கின்ற ஆசிரியர் வட்டம். பயிற்றுவிக்கின்ற ஆசிரியர்களும் ஆர்வத்தோடு, மாணவர்களின் ஆர்வத்தை தூண்டும் விதமாக தமிழ் வகுப்புகளைக் கையாள வேண்டும். (இந்த வகையில் நான் மிகவும் கொடுத்து வைத்தவன், எனக்கு கிடைத்த எல்லா தமிழ் மற்றும் கணித ஆசிரியர்கள் மிக வல்லவர்கள் ). அதுவே மாணவர்களுக்கு மேலும் கற்க, ஆர்வம் தரும். கதை, கவிதை, கட்டுரை எழுத, வாசிக்கத் தூண்ட வேண்டும். இவையெல்லாம், வெறும் கடமைக்காக மட்டுமின்றி, தமிழார்வத்தோடு செய்பவராயிருத்தல் வேண்டும். 'தமிழ் தானே' என்ற மனப்பான்மையோடு கற்போரும், கற்பிப்போரும் இருத்தல் கூடாது.

அடுத்து பல்வேறு துறை வல்லுநர்கள், தம்தம் துறையில் பயன்படுத்துகின்ற ஆங்கில வழிச்சொற்களுக்கு, இணையான தமிழ்ச்சொற்களை அடையாளம் காண வேண்டும். அவற்றை நடைமுறைப் படுத்த வேண்டும். இச் சொற்கள், தமிழகராதியில் சேர்க்கப்பட வேண்டும், அது எல்லோரும் அறியும் விதமாக இருக்க வேண்டும். தமிழ் கட்டாயப்பாடத்தோடு, இந்த மாறுதல்களும் நடைமுறைப்படுத்தப் பட்டால்தான், தமிழின் வளர்ச்சி நிலையாகும்!

உங்கள் பணிகளை திட்டமிட ஒரு மென்பொருள்.

சமீபமாய் இந்த 'TimeTo' மென்பொருளை இறக்கம் செய்து உபயோகித்து வருகிறேன். மிகப் பயனுள்ளதாக இருக்கிறது. மென்பொருள் பயன்படுத்துவோருக்கு மட்டுமல்ல, எல்லோருக்கும் பயன்படும் என்றே தோன்றுகிறது. செய்ய வேண்டிய பணிகளை, முன்னதாக திட்டமிட்டு இதில் பதிவு செய்து விட்டால், அந்தந்த நாட்களில் அதுவே நினைவு படுத்தும். நாட்குறிப்பில் திட்டமிடுவோர், அதனை இதில் பதிவு செய்தால், சுலபமாக நினைவுபடுத்திக் கொள்ளலாம். ஒவ்வொரு முறை இந்த மென்பொருளை, திறக்கும் போதும், இன்னும் நிறைவு பெறாப் பணிகளை உங்களுக்கு நினைவு படுத்தும். கடன் காரரிடம் கடன் வசூலிக்க வேண்டுமா? அல்லது மின்வரி கட்ட வேண்டுமா?, அந்த வேண்டிய நாளை முன்கூட்டியெ இதில் குறித்து விட்டால், அந்த நாளில் அதனை நினைவு படுத்தும். ஒரு நாளில் முடிக்க வேண்டிய பணிகள் அதிகமா, அதனைச் சமமாக பங்கிட வேண்டுமா?, அதனைச் செய்ய பரிந்துரை செய்யும். இப்போதுதான், கணிணியின் பயன்பாடு எல்லோர் வீடுகளுக்கும் வரத்துவங்கிவிட்டதே!, இந்த ஒரு பயன்பாட்டுக்கும் உதவட்டுமே!

இந்த மென்பொருள் இயங்க, மிகக் குறைந்த அளவே இடம் தேவை. இது ஒரு 'Flash Drive'-லிருந்தே இயங்க வல்லது. (Flash Drive பற்றிய முன்னோட்டம் கான : http://vinmathi.blogspot.com/2006/05/flash-drive.html) மின்னல் தட்டில் (Flash Drive) பதிவு செய்து, அதில் இருந்தே இம்மென்பொருளை உபயோகிக்கலாம். எனவே, உபயோகிக்கின்ற எல்லாக் கணிணிகளிலும் இந்த மென்பொருள் பதியப்பட வேண்டிய அவசியம் இல்லை.

மிகக் குறைந்த அளவே இதன் பண்புகளைச் சொல்லியிருக்கிறேன், மீதியை இம்மென்பொருளுடன் வரும் 'வழிகாட்டி'யின் உதவியை நாடுங்கள். இது விண்டோஸில்தான் இயங்கும். இது இலவச மென்பொருளாய் இருப்பது, இன்னும் சிறப்பு.

இம்மென்பொருளை இறக்கம் செய்ய, கீழுள்ள நிரலை உபயோகியுங்கள்.

http://davidberman.com/software/timeto.php