Friday, December 08, 2006

கூகுள் ஆண்டவரும், குமரனின் தமிழ்மண விலகலும்

கம்ப்யூட்டருக்கு உயிர் கொடுத்து எல்லா தரப்பு மக்களையும் உபயோகிக்க வகை செய்த பெருமை மைக்ரோசாப்ட் நிறுவனத்திற்கு உண்டென்றால், அதற்கு நிகராக அந்தப் பெருமையில் பங்கு கொள்ளும் இன்னொரு நிறுவனம் 'கூகுள்' என்றால் மிகையில்லை.

'பையன் பெரிய அறிவு ஜீவி. என்ன கேட்டாலும் 'டாண்..டாண்னு பதில் சொல்லுவான், கம்யூட்டர் ப்ரெய்ன்' னு சில ப்ரைட் ஸ்டூடண்ட்ஸப் பத்திச் சொல்வோம். அந்த மாதிரி, கணிணிப் பயன்பாட்டில் 'கூகுள் தேடல்' ஒரு ப்ரைட் வாத்தியார். நிறைய கணிணித்துறை வல்லுநர்களுக்கு, கூகுள்தான் தெய்வமே. அதுனாலதான் கூகுளாண்டவர்ங்கிறாங்க சிலபேர்.

'கேளுங்கள் கொடுக்கப்படும்..தட்டுங்கள் திறக்கப்படும்'னு சொல்றதுக்கு ஏற்ப,
அடிக்கிற புரோகிராம்ல பிழையிருக்கிறதா? இல்லை முழு ப்ரோக்ராமுமே வேணுமா...key words-ஐ கூகுள்ல தட்டிக் கேளுங்க...வேணுங்கறது கூகுளில் கிடைக்கும்.

கணிணிப் பயன்பாடு குறித்த கேள்வி மட்டுமல்ல, சாதரணமா 'இப்ப சிங்கப்பூர்ல டைம் என்ன இருக்கும்?'(current local time in singapore) னு ஒரு கேள்வி கேட்டீங்கன்னா, உடனே உங்க கண் முன்னாடி விடை சொல்லிடும்.

யாஹூ, எம்.எஸ்.என் - தேடுதல்கள் கூட, அவ்வளவு துல்லியமா தேடுதல் வேட்டை முடிவுகளைத் தருவதில்லை.

என்னய்யா, சும்மா கூகுள் புராணம் பாடிகிட்டு இருக்கீறு? போட்ட தலைப்புக்கும் இதுக்கும் என்னய்யா சம்பந்தம்-ன்னு யாரோ முணுமுணுக்கிறீங்க. வந்துட்டேங்க பாயிண்டுக்கு.

நேத்து நம்ம குமரன் "தமிழ்மணத்துல இருந்து விடை பெறுகிறேன்"னு ஒரு பதிவ பதிப்பிச்சிருந்தார். ஆனாலும் தொடர்ந்து பதிவுகளை, தன் வலையில் அவ்வப்போது பதிவிடுவதாகச் சொல்லியிருந்தார்.

அவர் அப்படி பதிவிட்டால், நமக்கு எப்படித் தெரியும், ஓவ்வொரு முறையும் அவர் வலைப்பதிவு பக்கம் போய்ப் பார்ப்பது சிரமமாச்சேன்னு, யோசிச்சிகிட்டு இருக்கிறப்ப 'Google Labs'ன், கூகிள் ரீடர்ங்கிற இலவச சேவை கண்ணில் பட்டது.

இதுவும் ஈ-மெயில் மாதிரிதாங்க. இந்த சேவையை உபயோகப்படுத்தி, எப்பப்ப நீங்க சந்தா பண்ணியிருக்கிற வலைப்பதிவர் புதுப் பதிவுகள் பதிகிறாரோ, அப்ப எல்லாம், அந்தப் பதிவுகள் உங்க ரீடர்-ல சேர்ந்துக்கும்.

உபயோகிப்பதும் ரொம்ப சுலபம். நாம எல்லோருக்கும் கண்டிப்பா கூகுள் ஈ-மெயில் அக்கவுண்ட் இருக்கும். கூகிள் ரீடர் (http://www.google.com/reader/view) தளத்திற்குச் சென்று, உங்க கூகுள் அக்கவுண்ட்-க்கு 'லாக்-இன்' பண்ணினீர்கள் என்றால், உங்கள் ப்ரொளசரின் இடதுபுறம், கீழே காண்பது போல உள்ள திரை தோன்றும்.

Image and video hosting by TinyPic

அதில் 'Add Subscription' என்பதன் மேல் 'க்ளிக்' செய்யவும். உங்கள் ப்ரொளசரின் இடதுபுறம், கீழே காண்பது போல உள்ள திரை தோன்றும்.

Image and video hosting by TinyPic

தெரிகின்ற கட்டத்தினுள், எந்த ப்ளாக்கரின் பதிவுகளுக்கு 'சந்தா' செய்ய வேண்டுமென்று நினைக்கிறீர்களோ, அவரது ப்ளாக் முகவரியினை இட்டு, "Add" பட்டனைத் தட்டவும்.

Image and video hosting by TinyPic

அவ்வளவுதான், இனி அவர் எப்போதெல்லாம் புதுப் பதிவு பதிகிறாரோ, அப்போதெல்லாம், இந்த ரீடரின் - In-box-ல் தகவல் வந்துவிடும், இங்கிருந்தே நீங்கள் படிக்கலாம்.

நீங்கள் படித்தது பிடித்திருந்தால், அந்த இடுகையின் கீழேயுள்ள 'Share'-ஐ க்ளிக் செய்து, அவற்றை நீங்கள் உங்கள் நண்பர்களுடன் பகிர்ந்து கொள்ளலாம்.



Image and video hosting by TinyPic

உங்கள் ப்ளாக்கில் கூட பதிவு செய்து கொள்ளலாம். தகவல் உபயோகமா இருக்கும்னு நினைக்கிறேன். சரிதானே?

ப்ளாக்கில பதிவு பண்ணினா, எப்படி இருக்கும்னு பார்க்கணுமா, கீழே பாருங்க என்னோட கூகிள் ரீடரை..

Saturday, December 02, 2006

தேன்கூடு போட்டி - சர்வே முடிவுகள்

தேன்கூடு போட்டி குறித்த சர்வே-க்கு அப்புறம் நிறைய சர்வேக்கள் வந்து, முடிவுகளையும் அறிவிச்சுட்டாங்க. நம்ம சர்வே-க்கும் முடிவு அறிவிக்க வேண்டாமா? அதான், முடிவுகளைக் கீழே பதிப்பிச்சாச்சு.

புதியவர்கள் ஊக்குவிக்கப் படுவதாகச் சொல்கின்ற கருத்துக்கும், பிரபல்யங்களின் படைப்புகள் மட்டுமே படிக்கப் படுகின்றன என்ற கருத்துக்கும், மிகச் சிறிதளவே வித்தியாசம்.

இது குறித்து, கடந்த மாத தேன்கூடு போட்டி முடிவுகள் அறிவிப்புகளிலும், கருத்துக்கள் பரிமாறப் பட்டிருக்கின்றன.

இது குறித்து மேலும் சொல்ல ஒன்றும் இல்லை என நினைக்கிறேன், தேன் கூடே இம்மாதத்தோடு போட்டிக்கு 'பைபை' சொல்ல இருக்கிறார்களாம்.

இது குறித்து எனக்குச் சற்று வருத்தமே, சரியோ, தவறோ போட்டின்னு ஒன்னு வச்சு, எல்லோருடைய சிந்தனைக் கதவையும் திறந்து, படைப்புகளை ஆக்க உதவிய தேன்கூடு நண்பர்களுக்கு என் மனமார்ந்த நன்றியும், வாழ்த்துக்களும்.

யாருக்கு எப்படியோ, எனக்கு இந்தப் போட்டியே, நிறைய படைப்புகளை படைப்பிக்கவும், புதுப்புது வலைநண்பர்களை அடையாளம் காட்டவும் உதவியது என்றால், மிகையில்லை.
அதுக்காகவும் தேன்கூட்டிற்கு ஒரு 'ஓ'.


Wednesday, November 22, 2006

தேன்கூடு போட்டி - இலவச சர்வே

நாளுக்கு நாள் புதிய வலைப்பூக்கள் அறிமுகம் ஆகிக் கொண்டேயிருக்கிறது. எத்தனை வலைப்பூக்கள் தொடர்ந்து பதியப் படுகிறது என்பது கேள்விக்குறியாக இருந்த போதும், சில புதியவர்கள் முதல் பதிவிலேயே தனிக்கவனம் பெற்று, 'அட' சொல்ல வைக்கிறார்கள். அந்த வகையில், சமீபமா நா 'அட' சொன்ன புதிய தளம்,

'சர்வே'சன் - ஆக்கியவன் அல்ல அளப்பவன்

சர்வே எப்படியடா பண்ணியிருக்கிறார் என்று பார்த்தால், 'வருகைப் பதிவர்' எண்ணிக்கை போல, இதுவும் ஒரு இலவச உதவிதான்.

'இலவசம்' ங்கிற தலைப்பினை ஒட்டி நடக்கின்ற தேன்கூடு போட்டி குறித்தும், ஒரு சர்வே எடுத்தால் என்ன என்று தோன்றியது. இலவசம் தான, ஒன்னு பண்ணிப் பாத்தா போச்சுன்னுட்டு, உங்கள் முன்னே சமர்பித்தாச்சு. நீங்களும் உங்க கருத்தச் சொல்லுங்க.


பி.கு: சர்வேசருக்கு நன்றி. :)



Monday, November 20, 2006

வலைப்பூ...தலைப்பூ...வாழப்பூ (4)

தொடர்ச்சி...கீழே
காட்சி : 7
(போட்டிக் கதைக்கு அதிகப் பின்னூட்டம் வர செயல்படுத்தப் பட்ட அனைத்துத் திட்டங்களும் பெரும் வெற்றியைப் பெற்றுத்தந்தது. போட்டிக்கான இறுதி நாள் முடிந்து, வாசகர்கள் ஓட்டளிக்கும் நாளும் வந்தது.)

வடி: அசத்திபுட்டோம்ல. யப்பா..ஒரு மாசமா விடாம முயற்சி பண்ணி இருக்கோம். எப்படியும் ஜெயிச்சுருவோம்ல. குறஞ்ச பட்சம் ஒரு ரெண்டாவது, மூணாவது இடத்தயாவது புடிச்சிர மாட்டோம்? என்ன நான் சொல்லுறது..

க.கருப்பு: அட என்னண்ணே இப்படி கேட்டு புட்டீக. நீங்க செயிக்காம யாரு செயிப்பாக. சோப்ராஜுக்குத்தான்ண்ணே ஓட்டு. பூலந்தேவிக்கு வேட்டுதாண்ணே.

பெரிசு: தலைவனுக்கு இல்லாத ஓட்டா? வேற எவனுக்கு உளுதுன்னு பாத்துருவேம்ல.

க.கருப்பு: உட்டா சோடா பாட்டில் வீசிடுவே போலிருக்க. பெரிசு, உனக்கும் ஓட்டு இருக்கு. மறக்காம போட்டுடு. வயசுகாலத்துல மறந்துரப் போறே.

வடி: எல்லாப் பயலுவலும் ஒழுங்கா ஓட்டப் போட்டுரணும். ஆமா சொல்லிபுட்டேன். என்ன இந்த மயிலுப்பயல காணோம்.

(மயில்சாமி உள்ளே நுழைகிறார்)

மயிலு: வணக்கம் பாஸ்.

வடி: என்னடா..இவ்வளவு நேரம்.

மயில்: இல்ல பாஸ். உங்களுக்காக மயிலாப்பூர் கபாலிசுவரர் கோயில்ல அர்ச்சனை பண்ணிட்டு வரேன். பிரசாதம் எடுத்துக்கோங்க.

வடி: அடடடா.. என்னா பாசம்..என்னா பாசம்.. நீதாண்டா என்னோட வாரிசு.

மயில்: ஹ..ஹா...தாங்க் யூ பாஸ். உங்களுக்காக, ஈமெயில்ல ஓட்டு கேன்வாஸ் பண்ணிட்டு வாரேன். இன்னிக்குத்தான ஓட்டுப் போட கடைசி நாள், யாரும் மறந்துரக் கூடாதில்லயா. அதான் பாஸ்.

வடி: ரிசல்ட் என்னக்கிடா தெரியும்? ரெண்டு நாள்ல சொல்லிடுவாங்களா?

க.கருப்பு: அதுக்கு ரெண்டு, மூணு நாள் ஆவும்னே. எழுபது எம்பது பேரு எழுதுனா அவ்வளவு நாள் ஆகும்லாண்ணே.

வடி: அதுவும் சரிதாண்டா... அப்ப நாமளும் மூணு நாளு கழிச்சு பாக்கலாம்டா. இவ்வளவு நாள் டென்சனா வேலை பாத்திருக்கீங்க. ஓட்டப் போட்டுட்டு ரெஸ்ட் எடுங்கடா.

பெரிசு: தலைவன் தலைவந்தாண்டா.. நம்ம கஷ்ட நஷ்டம் புரிஞ்சிருக்காரு. தலவரே..சம்பளத்த கட் பண்ணிட மாட்டீரே..

க.கருப்பு: பெரிசுக்கு எப்பவுமே சந்தேகப் புத்தி.. சந்தேகப் படாம போ.. வெற்றி விழால பாப்போம்..



காட்சி - 8

(தேன்கூடு போட்டி முடிவுகள் வெளியாகும் நாள். நால்வர் கூட்டணி டென்சனாக இருக்கிறது. வடிவேலு நகத்தைக் கடித்துக் கொண்டிருக்கிறார். க.கருப்பும், பெரியவரும் குசுகுசுவெனப் பேசிக் கொண்டிருக்கிறார்கள். மயில்சாமி கம்ப்யூட்டரில் 'தேன்கூடு' பக்கத்தினை அடிக்கடி ரெப்ரஷ் செய்து கொண்டிருக்கிறார்.)


வடி: ஸ்...ஸ்...யப்பா...இப்பவே கண்ணக் கட்டுதே...

பெரிசு: எலே தலைவனுக்கு மயக்கம் வருதாம்ல...போயி சோடா வாங்கிட்டு வா...

க.கருப்பு: யோவ்..பெரிசு.. அது வழக்கமா நம்ம அண்ணே சொல்றதுதானே.. உனக்கு ரிசல்ட் டென்சன்லே மண்ட குழம்பிப் போச்சா...

வடி: நிறுத்துங்கப்பா..உங்க புராணத்த.. புதுப்படம் ரிலீசாரப்பக் கூட இவ்வளவு டென்சனா இல்ல.. இந்த ரிசல்ட் வர்ரதுக்குள்ள மண்ட வெடிச்சுரும்போல இருக்கே..யப்பா.

(அந்த நேரம் மயில்சாமி....'பாஸ்....ரிசல்ட் வந்திருச்சி...' என்று அலறுகிறார். வடிவேலு,க.கருப்பு, பெரியவர் எல்லோரும் கம்யூட்டர் அருகே செல்ல ஓடுகிறார்கள்)


க.கருப்பு: மயிலு... என்னா அண்ணே முத இடத்த புடிச்சிட்டாரா?

மயில்: பாஸ்.....(இழுக்கிறார்)

வடி: என்னாடா இழுக்கிற.... அப்ப முத இடத்துல வரலயா...

மயில்: கவுத்துட்டானுங்க பாஸ்....கவுத்துட்டானுங்க...

வடி: அட என்னப்பா...அழாம சொல்லு... எனக்கு டென்சனாகுது...

க.கருப்பு: (கம்யூட்டரை எட்டிப் பார்த்து) ....அண்ணே ..உங்களுக்கு ஒன்னாவது இடந்தாண்ணே..

வடி: ஒன்னாவது இடம்னா சந்தோசப் படாம ஏண்டா அழுறான் இவன்...

க.கருப்பு: அது வந்துண்ணே...வந்துண்ணே....

வடி: என்னடா...வந்து..போயின்னு இழுத்துகிட்டு...சொல்லுடா..

க.கருப்பு: நெஞ்சப் புடிச்சுக்குங்கண்ணே....உங்களுக்கு பதினொன்னாவது இடம்ணே..

வடி: என்னாடா சொல்றீங்க...கண்ணுல விளக்கெண்ணெய விட்டுட்டு பாருங்கடா...எவ்வளவு உழைச்சிருக்கோம்..

மயில்: அவன் சொல்லுறது சரிதான் பாஸ்... நாலு ஓட்டுல நீங்க பத்தாவது இடத்த தவற விட்டுட்டீங்கண்ணே... பத்துக்குள்ள வந்திருந்தீங்கன்னா, நடுவர் குழு உங்கள முத மூணுக்குள்ள தேர்ந்தெடுத்திருக்கும்...நாலு ஓட்டு...நாலு ஓட்டு மிஸ் ஆகிடுச்சு பாஸ்..


பெரிசு:....தலைவரே....தலைவரே...ம்ம்..ம்ஹும்..ம்ஹும்..(அழுகிறார்)

க.கருப்பு: ஏம் பெருசு அழுறே...அண்ணனே வருத்தத்துல இருக்காப்பல...

பெரிசு: நா(ந்) துரோகம் பண்ணிட்டேன் தலவரே...லீவு கொடுத்து காசும் கொடுத்தியளா... சந்தோசத்தில, சரக்கு வாங்கி அடிச்சுட்டு தூங்கிட்டந்தலவரே...ஓட்டு போட மறந்துட்டன்..

க.கருப்பு: சரி பெரிசு...அதுக்குப் போயி நீ எதுக்கு அழுறே... நீ மட்டும் போட்டாலும், ரெண்டு ஓட்டுல தோத்துருப்பாரு..இதுக்குப் போயி ஏன் அழறே...

வடி: என்ன கருப்பு... சொல்லுறே... அவரு ஒருத்தரு போடலேண்ணா மூணு ஓட்டுலதான தோக்கனும்...கணக்கு தெரியாமச் சொல்லுறியா.....ஆமா...நீ ஒழுங்கா ஓட்டுப் போட்டியா...இல்ல..

க.கருப்பு: நா...நா....நா..போட்டேண்ணே....ஓட்டு போட்டேண்..

வடி: என்னடா...இழுக்கிற...ஓட்டுப் போட்டது சரி...எனக்குத்தான போட்ட...

க.கருப்பு: அண்ணே மன்னிச்சுருங்கண்னே...அங்கதாண்ணே தெரியாம தப்பு நடந்துபோச்சி... போட்டிக்கத பூலந்தேவிய நினச்சுகிட்ட இருந்தனா, ஓட்டு போடறப்ப அங்க போயி போட்டுட்டண்ணே...மன்னிச்சுருங்கண்ணே...

வடி: அடப்பாவிகளா...தண்ணி உட்டுள்ளாடா வளத்தேன்...இப்படி தெளிவா ஆப்பு வச்சிட்டீங்களடா...உங்கள...(அடிக்க எத்தனிக்கிறார்)

மயில்: அவனுங்கள அடிக்காதீங்க பாஸ்...

வடி: பின்ன இவனுங்கள கொஞ்சச் சொல்றியா..என்ன்ன வேல பண்ணியிருக்கானுக...ஏமாத்திப் புட்டான்யா...

மயில்: பாஸ்.. அவனுங்க பண்ணுனது தப்புன்னா...நா பண்ணுனதும் தப்புதான்...

வடி: என்னடா ..சொல்லுற..அதிர்ச்சி மேல அதிர்ச்சியா கொடுக்கிறீங்களடா..

மயில்: பதறாதீங்க பாஸ்.. உங்களுக்கு ஓட்டு போடணும்னுதான் தேன்கூட்டுக்குப் போனேன்.. வரிசையா எல்லார் கதயும் இருந்துதா. உங்க கதை எங்க இருக்குன்னு பாத்துகிட்டே வந்தேன். கடைசில 'Vote Now' ன்னு ஒரு பட்டன் இருந்துச்சு. யாருக்கும் ஓட்டு போடாம, 'Vote Now' ங்குற பட்டனத் தட்டுனா, ஏதாவது 'Error Message' சொல்லுறாங்களான்னு பாக்கலாம்னு டெஸ்ட் பண்ணுற ஐடியாவுல, உங்க கதைய செலக்ட் பண்ணாம 'Vote Now'ங்குற பட்டனத் தட்டிட்டேன். ஆனா, அது எந்த 'Error Message' ம் சொல்லாம, உங்க ஓட்டு சேக்கப்பட்டது, நன்றின்னு சொல்லி, என் ஓட்ட செல்லாத ஓட்டாக்கிடுச்சு பாஸ். அதுக்கு அப்புறம் என்ன ஓட்டு போட விடல...என்ன மன்னிச்சுடுங்க பாஸ்.

வடி: யூ..டூ ப்ரூட்டஸ்? உனக்கு டெஸ்ட் பண்ண என் ஓட்டு தானாடா கிடைச்சுது. எல்லாப் பயலுவலும் நம்ப வச்சு கழுத்தறுத்தீட்டிங்கள்..... ஏய்....(யோசித்தபடியே) ..இரு..இரு... நா ஓட்டுப் போடலயில 'Vote Now'ங்கிற பட்டன பாக்கலியேடா....

மயில் & க.க: என்னது 'வோட் நவ்' பட்டனப் பாக்கலியா... அப்ப எப்படித் தல ஓட்டப் போட்டீங்க...'

வடி: இது என்னடா புதுக்கதையா இருக்கு.... நம்ம கதைக்கு மேல... ஸ்டார்..ஸ்டாரா ..கைய மேலத் தூக்கி ஒன்னு.. கைய கீழக் காட்டி ஒன்னுன்னு இருக்குமே..அதுல ஆள்காட்டி விரல மேலத் தூக்கி வச்சிருக்குமே அதுலதான் க்ளிக் பண்ணி என் ஓட்டப் போட்டேன்.. அதுவும் 'உங்கள் ஓட்டு சேர்க்கப்பட்டது நன்றி' ன்னு அழகாச் சொல்லிச்சே...

க.கருப்பு: என்னண்ணே...உங்க தலையிலே நீங்களே மண்ண வாரிப் போட்டுட்டீக.. அது ஓட்டுலயே சேந்திருக்காதே..

மயில்: ஆமாம் பாஸ்...நீங்க தப்பு பண்ணீட்டீங்க.. அது தமிழ்மணத்தோட கருவிப்பட்டை. உங்க கத படிச்சவங்க, உடனடியா புடிச்சிருக்கு, இல்லைங்கறதச் சொல்றதுக்குதான் அத வச்சிருக்காங்க. நீங்க ஓட்டுப் போட வேண்டியது தேன்கூட்டில...

வடி: போங்கடா...புண்ணாக்குத் தலையங்களா....சொல்லிக் கொடுக்கிறத ஒழுங்காச் சொல்லிக் கொடுக்க மாட்டீங்களாடா. என்னயும் முட்டாளாக்கிட்டீங்களாடா..

க.கருப்பு: பரவாயில்லண்ண விடுங்க... உங்களுக்கு 'முட்டாள்களின் தலைவன்'னு பட்டம் குடுத்துரலாம்...

வடி: எனக்கு வேணும்...எனக்கு வேணும்...(நொந்து கொள்கிறார்)

மயில்: கவலப் படாதீங்க பாஸ். அடுத்த போட்டியில ஜெயிச்சிரலாம்.

க.கருப்பு: ஆமாண்ணே.. நம்மள மாதிரி உள்ளவங்களுக்குத்தான தேன்கூடு அறிவிப்புல சொல்லியிருக்காங்க.."வெற்றி, ஒரு உற்சாக உந்துதல். ஆனால் முடிவுகள் முழுமையானதல்ல"ன்னு.. மனசத் தேத்திக்கிட்டு அடுத்த வாட்டி மோதிப் பாக்கலாம்ணே..

வடி: போதும்டா சாமி...இதுக்கே இந்த பாடு...இன்னொரு போட்டியா...இத விட நா கூட்டாளிங்க அடி வாங்கிக்கறேன்.. நீங்க பாருங்கடா....நா எம் பொழப்ப பாக்குறேன்... (யம்மா...ஆங்...இப்படி நொங்கிப் புட்டாய்ங்களே..இனி இந்தப் பக்கம் வருவே...யம்மா..முனகிக் கொண்டே செல்கிறார்)
*--முற்றும்--*
(ஒரு வழியாய் முற்றும் போட்டுட்டனா? பொறுமையாப் படிச்ச உங்களுக்கு நன்றி.)


Saturday, November 18, 2006

வலைப்பூ... தலைப்பு...வாழப்பூ (3)

காட்சி - 5


(போட்டிக்காக வடிவேலு எழுதிய சோப்ராஜும், சொக்கத்தங்கமும் கதை பிரபல்யமாகி, பின்னூட்டங்களும் அதிகமாக வரத்தொடங்கிவிட்டது. மயில்சாமியும், வடிவேலும் பின்னூட்டங்களுக்கு பதிலளிப்பது குறித்து விவாதித்துக் கொண்டு இருக்கின்றனர். திருநெவேலிப் பெரியவர், ஏதோ தனக்குள்ளேயே பேசிக் கொண்டு இருக்கிறார். அப்போது கஞ்சா கருப்பு, உள்ளே நுழைகிறார்.)

க.கருப்பு: என்னா பெரிசு..என்ன உமக்குள்ளேயே பேசிக்கிட்டு இருக்க

பெரிசு: நம்ம தலயோட கதைக்கு இதுவரைக்கும் ஐம்பது அறுபது பின்னூட்டம் வந்துருச்சாம்.. படிச்ச எல்லாப் பயலுவலும் ஒரு பின்னூட்டமாவது போட்டுறானாம். தல ஒரே குஷியா இருக்கு. தல செஞ்சுரி அடிச்சா இன்னும் குஷியாகும்லா.

க.கருப்பு: அது ரொம்ப சிம்பிள் பெரிசு, சுஜுபி மேட்டரு..

பெரிசு: சிம்பிளா..? அதெப்படில ரொம்ப லேசா சொல்லுத..

க.கருப்பு: அட பெரிசு, ஒரு ஒரு பின்னூட்டத்துக்கும், ஒரு பதில் போட்டா, இன்னொரு அறுபது கிடைக்குமா? மொத்தம் நூத்தியிருபது..தல இப்பவே செஞ்சுரி அடிச்சாச்சில்ல.

பெரிசு: அட போப்பா.. இந்த பாலிடிக்ஸ மயிலு ஏற்கனவே சொல்லித்தான், இப்ப அறுபது வந்திருக்கு. நீ ஏதாவது புதுசா சொல்லுவேன்னு பாத்தா..

(அப்போது மயிலு 'ஆபத்து..ஆபத்து' என அலறுகிறார். க.கருப்பும், பெரியவரும் அருகே ஓடுகிறார்கள்.)

வடிவேலு: என்ன...என்ன ஆச்சு. இப்படி ஆபத்து ஆபத்துன்னு கத்துற..

மயில்: பாஸ்.. உங்க கதைக்குப் போட்டி கத வந்துருக்கு பாஸ்.

வடி: என்னாடா சொல்லுற.. எல்லாப் பயலுவலும்தான் போட்டிக்கு எழுதுறான். எங்கதைக்கு போட்டின்னா?

மயில்: பாஸ்.. நீங்க சோப்ராஜ வச்சு எழுதியிருக்கீங்க. இவன் 'பூலந்தேவிய' வச்சு கத எழுதியிருக்கான் பாஸ். கதயோட தீம் அதேதான் பாஸ்.

க.க: அட பாவிகளா, நம்ம கதயே 'ஜென்டில்மேன்' காப்பி. காப்பிக்கு காப்பியா? அதுனால நமக்கு என்ன அப்பு ஆபத்து?

மயில்: இருக்குடா புரியாதவனே. கத இப்பதான் வந்துருக்கு, அதுக்குள்ள பாரு நாப்பது பின்னூட்டம் வாங்கியிருக்கான்.

வடி: இது என்னடா எளவு? கத போட்டு ஒரு வாரம் ஆன நமக்கே முப்பதுதான் வந்துருக்கு. அவனுக்கு எப்படிடா நாப்பது?

மயில்: அவனுக்கு நிறய பேன்ஸ் பாஸ். எல்லாரும் நல்லாருக்கோ, நல்லா இல்லையோ , வந்து 'ஆஜர் சார்' சொல்லிட்டுப் போயிடுவாங்க. அதுல ஒரு கவுண்ட் ஏறிடும்.

க.க: ஹே..அப்ப நம்ப அண்ண பெட்டரு. அண்ணனுக்கு வந்துருக்கிற தெல்லாம், கதய பத்துன கமெண்டுதான.

பெரிசு: எல.. கவுன்ட்ட பத்தி பேசுனா, நீ குவாலிட்டி பத்தி பேசுதா? எதுகை மோனையோட எழுதுனவங்களுக்கு எல்லாம், மூணு நாளு பின்னூட்டம், எகத்தாளமா எழுதியிருக்கிற நம்ம தல கதைக்கு முப்பது இதுக்கு என்னா சொல்லுற.

க.க: பெரிசு..நீ என்ன சொல்ல வர்றே.. நம்ம தலயே வாரிவுடுறே..

மயில்: டேய்..நிறுத்துங்கடா ஒங்க சண்டையை. யோசிக்க வுடுங்கடா

வடி: ஏண்டா மயிலு.. இந்தப் பின்னூட்டத்துக்கு அவ்வளவு முக்கியம் கொடுக்கணுமா? கத நல்லாருந்தா செயிக்காதா என்ன?

மயில்: அவனவன் பொண்டாட்டி திட்டுனாக் கூட பரவாயில்லன்னு, திருடன் மாதிரி கொட்ட முழிச்சு ராத்திரி பகல் பாராம, பின்னூட்டம் வருதா, வரலையான்னு தவங்கிடக்கான். அதோட மகிம தெரியலையா உங்களுக்கு. நீங்களும்தான வந்துருக்கா, வரலையான்னு கேட்டுகிட்டு இருக்கீங்க.

வடி: அட ஆமாடா. அது ஒரு ஆர்வத்துல கேக்குறது. அதுக்கும் செயிக்குறதுக்கும் என்னடா சம்பந்தம்.

மயில்: அட முட்டாள் பாஸ். பாப்புலாரிட்டிக்கு பின்னூட்டம் வேண்டாமா? அப்பப்ப கமெண்டு வந்தாத்தான், உங்க பேரு முன்னால வரும். நிறய பேரு கமெண்டு பாக்க வருவாங்க. அப்படியே உங்க கதய படிப்பாங்க. வோட்டுப் போட சான்ஸ் இருக்கு

வடி: இம்புட்டு விசயம் இருக்கா? அப்ப கமெண்ட் நிறய வர ஏதாவது வழி பன்ண வேண்டியதுதான்.

மயில்: ஆமாம். அதுதான் நாம அடுத்து பண்ண வேண்டிய வேலை. முத பிளான், பெரிசுக்கும், கருப்புக்கும் ஒரு ப்ளாக் ஐடி கிரியேட் பண்ணிக் கொடுக்கவேண்டியது.

க.க: ஐய்யா.. எனக்கு ப்ளாக்.. பெரிசு ஜாலிதான்.

மயில்: மாங்கானுங்களா.. அது உங்களுக்கு எழுதுறதுக்கு இல்லை. அத வச்சுகிட்டு, பாஸ் கதைக்கு நீங்க பின்னூட்டம் போடனும்.

க.க & பெரிசு: ஆஹா...ஐடியா புரிஞ்சிடுச்சு.. ஆனா எனக்கு என்னா எழுதனும்னு தெரியாதே அப்பு.

மயில்: என்ன வேணா எழுதுங்க. நீ ஒரு கேள்வி கேளு. அதுக்கு பெருசு ஒரு பதில் சொல்லட்டும். அவரு கேப்பாரு. நீ பதில் சொல்லு.

க.கருப்பு: ஆமா பெரிசு. சரவணபவன்ல வெஜுடேரியன் சாப்பாடு சாப்பிட போலாமான்னு கேளு. நா இல்ல முனியாண்டி விலாஸ் போய் பிரியாணி சாப்பிடலாம்பேன்..இஷ்டத்துக்கு எழுதலாம்ல

பெரிசு: அப்படின்னா.. அது என்னமோ சாட்டிங்குங்கிறானுகளே.. அது மாதிரில்லா ஆயிடும். கதைக்கும், இந்த பின்னூட்டத்துக்கும் என்ன சம்பந்தம்னு எவனாவது கேப்பாம்லா?

மயில்: அதப் பத்தி நீ கவலப்படாத.. பாஸும், நானும் பாத்துக்குறோம். அப்புறம் உங்க சைட்ல, வலைப்பதிவர் மட்டும்தான் கமெண்ட் போடலாம்ங்கிறத எடுத்துட்டு, எல்லாரையும் அலோ பண்ணனும். அதுனால, அனானிஸ் எல்லாம் வந்து ஓட்டு போட முடியும்.

வடி: அனானிஸா? அப்படின்னா யாருடா?

க.க: அதுதாண்ணே... பேரு கீரு சொல்லாம வந்து திட்டிட்டு போவாய்ங்களே அவங்கதான் அது.

வடி: (அதிர்ச்சியாக) ஏய்ய்.... எவனாவது கன்னா பின்னான்னு திட்டிடப் போறான்யா..

மயில்: பாஸ். அனானிஸுக்கு எல்லாம் ஒரு சங்கம் இருக்கு. நல்ல பதிவுலாம் வந்தா அதுல இருந்து வந்து சப்போர்ட் பண்ணுவாங்களாம். நீங்க ஒன்னும் வம்பு தும்பா எழுதலையே..அப்புறம் ஏம் பாஸ் பயப்படுறீங்க. அப்படியே எந்த அனானியாவது திட்டுனா, நீங்க கமெண்ட்-அ போடாம தடுத்துறலாம். லகான் உங்க கையிலதான் பாஸ்.

வடி: பரவாயில்லடா.. உனக்கு நிறைய விசயம் தெரிஞ்சிருக்கே.

மயில்: அப்புறம் உங்களுக்கு ஒரு வேலை பாஸ். போட்டிக்கு வந்திருக்கிற மத்த கதையை நீங்களும் படிக்கணும்.

வடி: ஏய்..அது என்ன எழுபது, எம்பதுன்னு அனுமார் வால் கணக்கா நீண்டுகிட்டுல்லா போறது. எல்லாத்தையும் படிக்கணும்னா, முடியுமாப்பா?

மயில்: உங்க கதய எல்லாரும் படிக்கிறாங்கள்ள.. அது மாதிரி நீங்களும் எல்லார் கதையையும் படிக்கணும். படிச்சு கமெண்ட் போடணும். அப்பதான் போட்டி ஆரோக்யமா இருக்கும். அத உட்டுட்டு, எழுதுறதுதான் என் வேலைன்னுட்டு ஓரமா போயி கையக் கட்டிட்டு நிக்கக் கூடாது.

பெரிசு: ஆமாந்தல.. தமிழ வளக்கனும்னு சொல்றீயள, இந்த மாதிரி புதுசா எழுதுறவுகள ஊக்குவிக்கிற மாதிரி நாலு வார்த்த சொல்றது கூட நல்லதுதான.

வடி: சரிங்கப்பா...நல்ல விசயந்தான், செய்யறேன். இன்னொரு ஐடியா கூட தோணுதுடா. நம்ம கலைஞரு 'தமிழ்ப் படத்துக்கு தமிழ்ல டைட்டில் வச்சா, வரி கிடையாதுன்னு சொன்னா மாதிரி, வலையில நல்ல தமிழ்ல டைட்டில் வச்சா, நல்ல தமிழ்ல எழுதுனா' இரண்டு பின்னூட்டம் இலவசம்னு போடலாம்.

க.க: சூப்பர் ஐடியான்னே... இத ஒரு தனிப் பதிவாவே போட்ருலாம்னே.

மயில்: சூப்பர் பாஸ். எல்லாத்தையும் இப்பவே அமுல் படுத்த ஆரம்பிக்கலாம்.

வடி: ஆமாண்டா...எல்லாம் அவங்கவங்களுக்கு ஒதுக்குன வேலையப் பாக்க ஆரம்பிங்க..சோப்ராஜா, பூலந்தேவியா பாத்துரலாம்.


காட்சி: 6


(பின்னூட்டத்திற்காக வகுத்த திட்டங்கள், வடிவேலு கூட்டணிக்கு ஆரம்பத்தில் பெரும் வெற்றியைக் கொடுக்கிறது. போட்டியின் இறுதிநாள் நெருங்க நெருங்க, பின்னூட்டங்கள் குறைய ஆரம்பிக்கிறது. )

மயில்: என்ன பாஸ், சோகமா இருக்கீங்க.

வடி: இல்லடா, போட்டி இறுதிக்கான நாள் நெருங்குதே. இப்ப எல்லாம், பின்னூட்டம் குறைய ஆரம்பிக்குதே. வோட்டு வருமா?

க.கருப்பு: அண்ணே..ஒரு ஐடியாண்ணே..

வடி: என்னடா..சொல்லு...

க.கருப்பு: நாமளும் 'ஏவிஎம்' ஸ்டைல்ல, நம்ம கதையப் படிச்சு 'திருட்டுப் பய' ஒருத்தன் திருந்திட்டான்னு போடலாம்.

வடி: போடா...போடா.. எந்த திருட்டுப் பய, கதயப் படிச்சு திருந்தப் போறான். உருப்படியா ஏதாவது யோசனை சொல்லு.

மயில்: பாஸ் ..அவன் சொல்றது நல்ல ஐடியா தான் பாஸ்.

வடி: என்னப்பா சொல்றே.. அவன் என்ன சொன்னாலும், மட்டந்தட்டுவே. .என்னா புது ஐடியாவக் கண்டுட்ட?

மயில்: பாஸ், அவன் சொன்னத இன்னொரு பதிவா போட்டுறலாம், நிசமா நடந்ததோ?ன்னு படிக்கிறவன யோசிக்க வச்சுட்டு, கடைசியில 'அவன் சோப்ராஜும் சொக்கத்தங்கமும்' கத படிச்சு திருந்துறா மாதிரி கனவு கண்டதன் விளைவு-ன்னு முடிச்சிரலாம். காமெடிக்கு காமெடி. உங்க பதிவுக்கு விளம்பரம்..எப்படின்னே ஒரே கல்லுல ரெண்டு மாங்கா.

பெரிசு: எனக்கும் ஒரு ஐடியா தோணுது.

வடி: ஆளாளுக்கு ஐடியா தோணுது பாரேன். ஒரு ப்ளாக் எழுத ஆரம்பிச்ச உடனேயே நம்ம பயலுவ புத்திசாலியாயிடுறான் பாரேன். சொல்லு பெரிசு

பெரிசு: உங்க கதக்கு வந்திருக்கிற பின்னுட்டங்கள்ள சிறந்த பின்னூட்டம் எதுங்கறத, வாசகர்களாலேயே தேர்தெடுக்க வச்சு, அப்படி சிறப்பா வர்ர பின்னூட்டத்துக்கும், தேர்ந்த்தெடுத்த நபருக்கும் பரிசுன்னு போட்டி வைக்கலாம்.

வடி: யோசனை நல்லாதான் இருக்கு. பரிசா என்னா கொடுக்கலாம்.

க.க: அட எண்ணன்னே, சிட்டியில உங்க படம் எத்தன படம் ஓடுது.நீங்க நடிச்சு ஏதாவது காத்து வாங்குற படத்தோட புரடியூசர்கிட்ட பேசி மூணு நாலு ஓசி டிக்கட் வாங்கி கொடுத்துட வேண்டியதுதான. ஒரே கல்லுல மூணு மாங்கா ஆயிடும்.

பெரிசு: ஹே..ஹே.. என்னச் சொல்லிட்டு இவன் ராங் சைடுல போயிட்டான் பாருல. தல படம் உனக்கு ஓடாத படமால? (வடிவேலு முறைக்கிறார்)

க.கருப்பு: அய்யோ அண்ணே... யோசனை வந்த வேகத்துல அப்படிச் சொல்லிட்டண்ணே.. முறைக்காதீங்கண்ணே

வடி: ம்..ம்.. ஏதோ பொழச்சுப் போ.. யோசனை நல்லாதான் இருக்கு. ரெண்டையும் செயல்படுத்திடலாம்.

க.கருப்பு : மயிலண்ணே...போடுங்கப்பு பதிவ..

(மயில் யோசனையைச் செயல்படுத்த, ப்ளாக் எழுதப் போகிறார்)

(இன்னக்கி இங்க நிறுத்திக்குவோம். போட்டிக்கு இறுதி நாள் நெருங்குதே. நாளக்கி முடிச்சிடலாம்)

Thursday, November 16, 2006

வலைப்பூ... தலைப்பு...வாழப்பூ (2)


காட்சி - 2


(வலைப்பூ... தலைப்பு...வாழப்பூ ப்ளாக் தொடங்கிய வேகத்திலேயே பிரபல்யமாகத் தொடங்கிற்று. வெற்றிக் களிப்பில் நால்வர் கூட்டணி)

க.கருப்பு: அண்ணே... நம்ம மயில்சாமி சொன்னா மாதிரி, நம்ம ப்ளாக் செம பாப்புலர்ன்ணே.

வடி: பாப்புலரா.. என்னடா சொல்லுற நீயி.. எப்படி பாப்புலர்னு சொல்லுறே?

பெருசு: அட அது ஒன்னுமில்ல தலவரே. எழுதுனத படிச்சிட்டு போறவுக எல்லாம், பின்னூட்டம் போடுவாக. (பின்னூட்டமா..அப்படின்னா என்பது போல முழிக்கிறார் வடிவேலு) பின்னூட்டம்னா அதான் தலைவர கமண்டு போடுவாக. அது 60 கமெண்ட் கிட்ட வந்துருக்கு. அத வச்சுதான் சொல்றான்.


வடி: அறுபது பேரு படிச்சுருக்கானுங்களா, பரவாயில்லயே.. ரொம்ப ஆர்வமாத்தான் இருக்காய்ங்க போல..

மயில்: பாஸ்.. எல்லாத்தையும் பால்னு நினைக்காதீங்க. போட்டோவ பாத்த உடனே ஜொள்ளு வுட்டு, ஜொள்ள பின்னூட்டத்துலயும் காட்டியிருக்காங்க. உயிரக் கொடுத்து, தகவல் சேகரிச்சு எழுதுறவங்களுக்கெல்லாம், 5-10 பின்னூட்டமே கஷ்டம் பாஸ். உங்க முத ரெண்டு பதிவுக்கே, இவ்வளவு பின்னூட்டம்னா எல்லாம் போட்டோ பண்ணுற மாயம் பாஸ்.

வடி: போட்டோவுக்காடா இந்த ஜொள்ளு வுடுறாங்க, ஆஹா.. இப்படியே போட்டோ போட்டு கூட்டம் சேக்கணும்னா நமக்கு இந்தப் பொழப்பு வேணாம்டா சாமி. ஆள வுடுங்கப்பா.. நா வரலடா இந்த விளையாட்டுக்கு.. வில்லங்கத்துல மாட்டி உட்டுருவீக போல..

க.க: அட என்னண்ணே நீங்க. சினிமால நயன்தாராவ ஒரு பாட்டுக்கு கூட்டி ஆட்டம் போட கூட்டம் சேக்கிறீங்கள்ளாண்ணே.. அதுமாதிரித்தாண்ணே இதுவும். கூட்டத்த கூட்டியாச்சில்ல, இன்னக்கி மயிலண்ணே 'எல்லாம் டமாசு'ன்னு ஒரு பதிவப் போட்டு, உங்கள 'இண்ட்ரடியூசு' பண்ணி உடுவாருண்ணே.. அப்புறம் உங்க மதுரைச் சங்கத் தமிழ்லே சூப்பர் பண்ணலாம்னே.

வடி: அடப்பாவிகளா... ஏமாந்த பயலுவ எல்லாம் என்ன நொங்கு எடுக்கவாடா இண்ட்ரடியூசு பண்ணப்போறீங்க.. ஆழந்தெரியாம கால உட்டுட்டனோ?'

மயில்: என்னா பாஸ், இப்படிச்சொல்லிட்டீங்க. நீங்க ஒரு லீடிங் காமெடியன். "ஆரம்பமே தமாசு பண்ணி, 'வாழப்பூ' ஆரம்பிக்கணும்னு முடிவு பண்ணி, இப்படி பண்ணினேன்..மக்களே. மன்னிச்சுக்கோங்க.. இனி இனிய தமிழ் பேசலாம்..வளக்கலாம்..னு.. ஸ்மூத் பண்ணிடலாம். உங்க பாப்புலாரிட்டிக்கு, மன்னிச்சு தோஸ்த்-ஆயிடுவாங்க.

வடி: (ஆஹா..ஒரு செட்டப்பாதான் இருக்காய்ங்க போல என்று மனசுக்குள் முணுமுணுத்தவாறே). என்னமோடா, இதுவும் நல்லாதான் இருக்கு. இன்னும் கொஞ்சம் ஆடித்தான் பாக்கலாமே..போடு..போடு..பதிவப் போடு..

(நாட்கள் நகருகிறது. வடிவேலுவும், ப்ளாக்கால் வசீகரிக்கப் படுகிறார். சில மாதங்களுக்குப் பிறகு...)



காட்சி - 3


(வடிவேலு அலுவலகக் கம்ப்யூட்டரில் பின்னூட்டம் வந்திருக்கிறதா, என்று பாத்துக்கொண்டிருக்கிறார். உடன் கஞ்சா கருப்பு பக்கத்தில். மயில்சாமியும், பெருசும் உள்ளே நுழைகிறார்கள்.)


மயில்: வணக்கம் பாஸ், என்ன கால்ஷீட் ஷெட்யூல் பாத்துட்டு இருக்கீங்களா?
வடி: வந்துட்டான்யா.. வந்துட்டான்யா.. உன்னத்தான் எதிர் பாத்துட்டு இருந்தேன்..

மயில்: எதுக்கு பாஸ்? பாங்குக்கு போணுமா? பணம் ஏதும் வித்டிரா பண்ணனுமா?

வடி: அட ..அதெல்லாம் இல்லப்பா.. சொன்னா கிண்டல் பண்ணப்படாது..

மயில்: இல்ல பாஸ். சொல்லுங்க.

வடி: நக்கல் பண்ணப் படாது...சொல்லிருவேன்..

மயில்: என்ன்ன பாஸ்.. டென்சன் பண்ணுறீங்கள..

வடி: இல்லப்பா ...அது வந்து...

க.க: அட.. என்ன அண்ணே வந்து போயின்னு இழுத்துக்கிட்டு.. டப்புன்னு போட்டு உடைப்பீங்களா. அத உட்டுட்டு ஏம்ப்பு.. அண்ண தேன்கூடு போட்டி பத்தின அறிவிப்ப படிச்சிருச்சி. அதான், போட்டிக்கு கத எழுதலாமான்னு யோசிச்சிட்டுருக்கு.. அதச் சொல்லத்தான் இப்படி இழுக்கிறாரு..இல்லண்ணே..

பெருசு: கதயா.. நேத்து கண்ணாடி போட்டுட்டு டைரக்டர்னுட்டு கத சொல்லிட்டுருந்தான... அந்தக் கதையையா எழுதப் போறீங்க தலைவரே..

க.க: ஓ...அதான் அண்ணே கத .கத ன்னு காலயில இருந்து பொழம்புறாரோ? அண்ணே..இந்தக் களவாண்ட கதயெல்லாம் வேண்டாம்ணே..இப்பதான் இம்சை அரசன் கதப் பிரச்சினை...

மயில்: டேய்... அது வேற..இது வேற... அவனவன் அங்கே இங்கே கேட்ட/படிச்ச கதையையே சொந்தக் கத மாதிரி மாத்தி எழுதிட்டு இருக்கான்.. நம்ம பாஸ் எழுதினா தப்பா என்ன? நீங்க சொல்லுங்க பாஸ்..

வடி: ஏம்ப்பா..ஏம்ப்பா...கொஞ்சம் பொறுமையய இருக்கப்படாதா? ஒரு வார்த்த சொல்லி முடிக்கறதுக்குள்ள நீங்களா கத கட்டுனா எப்படிப்பா? அவன் சொன்னா மாதிரி, இந்த மாசத் தேன்குடு போட்டிக்கி இலவசம்னு டைட்டில் கொடுத்துருக்காங்க. ஏதாவது கத கவித எழுதலாம்னு பாக்கிறேம்ப்பா...நீ என்னா சொல்ற..ஏதாவது தீம் வச்சிருக்கயா?


க.கருப்பு: ஏதாவது ஹைகூ எழுதுங்கண்ணே..

வடி: அதென்னதுடா ஹைகூவுன்னுட்டு... சத்தமா கூவுறதா?

க.கருப்பு: அய்யோ..அய்யோ..தமிள வளக்கப் போறேன்னு சொல்றீய..இப்படி கேட்டா. ஹைகூவுங்கறது ஒரு வகைக் கவிதைன்னே..

பெருசு: ஏலே..நீ என்ன ஒம் புத்திசாலித்தனத்த தலைவர் கிட்ட காட்டுறியோ? கவிதைன்னா என்னான்னு தெரியுமால உனக்கு?

க.கருப்பு: யோவ்..பெரிசு..என்னா சவால் உடுறியா? இப்ப படிக்கிறேன் கேளு..


'கழிவறை அருகே
காமப் பெண்டிரின்
காதல் பார்வை
கவிழ்ந்தான் அவன்
கிடைத்தது
எய்ட்ஸ்
இலவசமாய்'

க.க: இது எப்படியிருக்கு?


பெருசு: எலே.. இது கவிதையால...ரயில்வே டிபார்ட்மெண்ட்ல 'எய்ட்ஸ்' விளம்பரத்துக்கு எழுதுன மாதிரில்லா இருக்கு. இலக்கிய ரேஞ்சுக்கு போணும் சொல்லிட்டு இருக்குற தலைய கிண்டல் பண்ணுறயோ?

மயில்: பாஸ்..நாம ஒரு கொள்ளக் கூட்டக் கத எழுதலாம் பாஸ்.

க.க: நினச்சேன்..ஏம்ப்பு... நீ பாஸ்..பாஸ்னு சொல்றப்பவே நினைச்சேன். இந்தக்
கததான் சொல்லுவேன்னு. ஆளுகளயும் ..மூஞ்..

வடி: யப்பா. புலவர் பெருமானே..கொஞ்சம் நிறுத்துறயா.. சல சலன்னு நமக்குள்ளேயே புலம்பிகிட்டு.. அவன் கதய கேளு. நீ சொல்லுப்பா..சுருக்கமாச் சொல்லு. இதுவே ரொம்ப நீளமா போகுது..

மயில்: ஓகே பாஸ்.. நம்ம கதைக்கு டைட்டில் 'சோப்ராஜும், சொக்கத்தங்கமும்' வச்சிரலாம். சோப்ராஜ்தான் நம்ம கதையோட கதாநாயகன். ஊர்ல உள்ள பணக்காரங்ககிட்ட எல்லாம் கொள்ளையடிச்சு காசு புடுங்குறதுதான் அவன் வேலை.


க.க.: அத அப்புறம் ஏழைங்களுக்கு கொடுப்பானாக்கும்.. ஹே..இது ஜெண்டில்மேன் கதையாச்சே..


மயில்: டேய்..எல்லாக் கதயும் எங்கயாவது படிச்ச பாத்த மாதிரிதாண்டா இருக்கும். ப்ரெசெண்டேசந்தாண்டா வித்தியாசப் படும். பாஸ்..இவன் என் மூடைக் கெடுக்கறான் பாஸ்.

வடி: அய்யய்ய்ய்ய்யோ... டேய்.. வாயப் பொத்திக்கிட்டு சும்மா இருடா..அவன் கதயச் சொல்லட்டும்.

மயில்: தேங்க்ஸ் பாஸ். அப்படி கொள்ளையடிக்கிற சோப்ராஜ், ஒரு நாள் ராத்திரி ஒரு வீட்ல போய் கொள்ளையடிக்கப் போறான். போன இடத்துல, அந்தக் குடும்பமே தற்கொலைக்கு முயற்சிக்குது. அதப் பாத்த அவன், அதத் தடுக்க நினைக்கிறான். என்ன காரணத்துக்கு தற்கொலை பண்ணிக்கப் போறாங்கன்னு ஆராயறப்ப, இருக்குற மூணு பொண்ணுங்களுக்கும் வரதட்சனை கொடுத்து கல்யாணம் பண்ணி வைக்க முடியாம, கஷ்டத்துல தற்கொலைக்கு முயற்சிக்கிறாங்கன்னு தெரியுது. உடனே அவன், அதுவரைக்கும் கொள்ளையடிச்ச பணத்த அவங்களுக்குக் கொடுத்து, அவங்களுக்கு கல்யாணம் பண்ணிவச்சு, சாவிலிருந்து காப்பாத்தி வாழ வைக்கிறான். 'திருடன்னாலும், சோப்ராஜின் மனசு என்னவோ சொக்கத்தங்கம்தான்'னு டச்சிங்கா முடிச்சிடலாம். எப்படி பாஸ்..

வடி: அடடா...அசத்திபுட்டான்யா. உடம்பெல்லாம் உனக்கு மூளைடா..(மயில் அசடு வழிகிறார்)

பெருசு: எல்லாம் சரிதாண்டே.. இலவசத்துக்கும், இந்தக் கதைக்கும் என்ன சம்பந்தம் இருக்குன்னு யாராவது கேட்டா?

வடி: அட..ஆமா இல்ல?

க.க: அட..பெருசு. சோப்ராஜு அந்தத் தங்கத்த, அந்தக் குடும்பத்துக்கு இலவசமா கொடுத்து, சாவிலிருந்து காப்பாத்திட்டான்'னு கடைசி வரில எழுதிடுவோம்ல.. அப்ப அங்க 'இலவசம்' வந்துடும்லே.. எப்படி?

வடி: என்னமோ அட்ஜஸ்ட் பண்ணுற மாதிரி இருக்கே? மத்த கதைக்கு மத்தியில இது எடுபடுமாடா?

க.க: கல்யாணம்னா என்னான்னு தெரியாமலேயே, ஒரு அர லூசுப் பையன் தாலி கட்டுவானாம், அத பொண்ணு ஏத்துகிட்டு லவ் பண்ணுற சீனை எல்லாம் பாத்து வச்சுருக்காங்கள்ள மக்கள்..அதுக்கே அட்ஜஸ்ட் பண்ணுன மக்கள் இதுக்கு அட்ஜஸ்ட் பண்ண மாட்டாங்களா?

மயில்: பாஸ்.. நீங்க ஏன் பாஸ் இதெல்லாம் பத்திக் கவலைப் படுறீங்க. பாப்புலரா இருக்கறவங்க கதையைத்தான் படிப்பாங்க ஓட்டு போடுவாங்க. நீங்க ஏற்கனவே பாப்புலராயிட்டீங்க. அப்புறம் ஏங்க இதுலாம் யோசிக்கிறீங்க. நிச்சயம் ஹிட்தான் பாஸ். எழுதிரலாம்.

பெரிசு: இது சரியா தல..முதல்ல பொண்ணு படத்தப் போட்டு, சைட்ட ஹிட் பண்ணுனீங்க..இப்ப என்னடான்னா கொள்ளக் கூட்டக் கத எழுதிறீங்க.. அப்புறம் தமிழ்ப்பணி எங்கேன்னு யாரவது கேள்வி கேட்டா?

க.க: யோவ்..பெருசு...என்னாய்யா.. ராங் சைடுல கேள்வி கேட்டு, அண்ணன குழப்புற. (வடிவேலுவைப்பாத்து) அண்ணே..நீங்க கவலைப் படாதீங்கண்ணே..நம்ம கதைதான் ஜெயிக்கும். ஜெயிச்சதுக்கு அப்புறம், தமிழோவியத்துல போயி 'தமிழ்' வளக்கலாம்ணே.. ஏம்ப்பு..நீ எழுதுப்பு...

வடி: சொல்றதும் கேக்கறதும் நல்லாத்தான் இருக்கு.. நடக்குமாப்பா?

மயில்: கவலப்படாத தல..நாங்க இருக்கோம்.
(மயில்சாமி கதை எழுதத் துவங்க, வடிவேலும் இதர சகாக்களும் துணை அமர்கிறார்கள்)

இன்னைக்கு இங்க நிறுத்தி. நாளைக்குத் தொடரலாமா? :)

Sunday, November 12, 2006

வலைப்பூ...தலைப்பு...வாழப்பூ

காட்சி - 1

Image and video hosting by TinyPic (வெளியே மழை பொழிபொழி என்று பொழிந்து கொண்டிருக்கிறது. நடிகர் வடிவேலு, அவரது அலுவலகத்தில் நடந்து கொண்டிருக்கிறார். சக நடிகர்கள் கஞ்சா கருப்பு, மயில்சாமி, திருநெல்வேலி பெரியவர் அங்கங்கே உள்ள இருக்கையில் அமர்ந்திருக்கிறார்கள்.)

'என்னாடா இந்த மழை இப்படி போடு போடுன்னு போட்டுக்கிட்டு இருக்கு..ஒரு பயல வெளிய விடாது போலிருக்க, இன்னைக்குள்ள அவுட்டோர் சூட்டிங் அவ்வளவுதானா' - என்று தன்பாணியில் சொல்லிக்கொண்டே, தன் அலுவலக இருக்கையில் வந்து உட்கார்ந்தார் 'வைகைப்புயல்' வடிவேலு.

கஞ்சா கருப்பு: 'அட போங்கண்ணே..இதுக்குப் போயி வருத்தப்பட்டுகிட்டு. மழை பெஞ்ச்சா, பள்ளிக்கூடம்லாம் லீவு உட்டுருக்காங்கண்ணே..நீங்களும் சாப்பிட்ட முனியாண்டி விலாஸ் பிரியாணி செரிக்க, கொஞ்சம் ரெஸ்ட் எடுங்கண்ணே'

வடி: அடடடா...பாசக்கார பய டா நீ... கொஞ்சம் முதுகுக்கு பின்னாடி வந்து புடிச்சு விடறியா..குறுக்கெல்லாம் வலிக்குதுடா'

(ம்க்கும்..கோழி பிரியாணி கிடைச்சா அமுக்க வேண்டியது..அப்புறம் தொந்தி எங்க குறைய- கஞ்சா கருப்பு முணுமுணுத்தபடி அருகில் வந்து முதுகு பிடித்து விடுகிறார்.)

வடி: என்னடா..முணுமுணுக்கிற...

க.க: அட போங்கண்ணே..எப்ப பாத்தாலும் நீங்க என்ன எடுபிடி வேலைக்குத்தான் கூப்புடறீங்க. மயிலையும், பெரிசையும் பாருங்க..கம்யூட்டர்ல என்னமோ படிச்சுக்கிட்டு இருக்காங்க.

வடி: என்னாது..கம்யூட்டர் படிக்கிறானுங்களா? நல்லா பாத்தியாடா.. இவனுங்க என்னத்தடா படிக்கப் போறானுங்க. அந்த ஆபரேட்டர் செவத்தப் பிள்ளய முறச்சி முறச்சி பாத்துட்டு இருக்கப் போறானுங்க..

க.க: அடப்போங்கண்ணே....அப்படின்னாதான் நானும் போயி இருப்பேனே.. என்னமோ அப்படி எழுது..இப்படி எழுதுன்னு கிறுக்கு கணக்கா பேசிக்கிட்டு என்னமோ கம்யூட்டர்ல பண்ணிட்டு இருக்கானுங்க.

வடி: நிசமாவாடாச் சொல்றே.. நம்ம பயலுவலுக்கு புத்தி வந்துருச்சா.. வா போய் பார்க்கலாம்.

(வடிவேலுவும், க.கருப்பும் பக்கத்து அறைக்குள் நுழைகின்றனர். அங்கே மயில்சாமியும், நெல்லைப் பெரியவரும் கம்யூட்டரில் ப்ளாக் படித்து கமெண்ட் எழுதிக் கொண்டிருக்கிறார்கள்.)

வடி: கம்யூட்டர்ல என்னாங்கடா பண்ணிகிட்டு இருக்கீங்க. பெரிய ஆளாயிட்டீங்க போல இருக்கு.

மயில்: ஹி..ஹி.. இல்ல பாஸ். சும்மாதான் ப்ளாக் படிச்சுட்டு கமெண்ட் போட்டுட்டு இருக்கோம்

வடி: அதென்னங்கடா கூத்து..ப்ளாக்..வொயிட்டுன்னுகிட்டு.

மயில்: என்ன பாஸ் நீங்க. ப்ளாக்னா என்னான்னு தெரியாம கம்யூட்டர் இல்லிட்டரேட்டா இருக்கீங்க.

வடி: டேய்..நிறுத்து. விசயத்த கேட்டா பதிலச் சொல்லு. இந்தக் குத்துற வேலையெல்லாம் வச்சுக்காதே ஆமா சொல்லிபுட்டேன். (திருநெவேலிப் பெரிசப் பாத்து) ..பெரிசு..உனக்குத் தெரியுமா, தெரிஞ்சா கொஞ்சம் விளக்கறது..

திரு: அட அது ஒன்னுமில்லங்க. கம்யூட்டர் படிச்ச பயலுவ எல்லலம் பொழுது போகாத சும்மா தமிள வளக்கறேன்னுட்டு, என்னத்தயோ கன்னா,பின்னான்னு எழுதுறானுங்கள்ளா. அவனவன், தனக்கோசரமா, ஒரு பத்திரிக்கை நடத்துறதா நினைச்சு ஒரு பேர வச்சிகிட்டு ப்ளாக் எழுதுறானுவ. ப்ளாக் இலவசமா இருக்கிறதால, எழுதுறது சொலபமா போச்சில்லா'

வடி: ஓ..ஒ..இப்படிலாம் கூட தமிழ வளக்கிறாய்ங்களா நம்ம மக்க. ஓசின்னா நாம கூட ஒன்ன ஆரம்பிக்கலாமா?

க.கருப்பு: அண்ணே, ஓசின்னா எனக்கு ஒன்னு ஆரம்பிச்சு கொடுங்கண்ணே..

தி.பெரிசு: எல, சாமியே சைக்கிள்ள போலயாம், அதுக்குள்ள நீ 'பைக்' கேக்கா..

மயில்: ஸ்..ஸ்....சும்மா இருங்கப்பா.. பாஸ், விவேக்குக்கு முன்னாடி, நாம முந்திக்கணும். நீங்க மட்டும் வலைப்பூ ஆரம்பிச்சீங்கன்னா, உங்களுக்கு பீல்டுல ஒரு மாடர்ன் லுக் கிடைக்கும் பாஸ். நீங்க மட்டும் 'ங்'னு ஒரு வார்த்த சொல்லுங்க, 'வைகைப் புயலின் தமிழ்ப்புயல்' ன்னு தலைப்பு வச்சு 'ங்'தமிழ்மணத்துல ரிஜுஸ்டர் பண்ணிடலாம் பாஸ்?

வடி: அது என்னாடா வலைப்பூ....புரியலியே.. இந்தக் கம்யூட்டர்ன்னாலே காசப் புடுங்குவாங்களாடா..நீயும் அது மாதிரி ஏதும் வழி பண்ணுறியா? (விவேக்குக்கே, திருப்பதி ஜாங்கிரி கொடுத்த பார்ட்டியாச்சே நீ..உங்கிட்ட உஷாராத்தான இருக்கணும்.' என்று தனக்குள் முணுமுணுக்கிறார்.)

மயில்: என்ன பாஸ் நீங்க, உங்க கிட்ட போய்..காசு பணம்லாம் கேப்பேனா.வலைப்பூவுக்கு, .'வைகைப்புயலின் தமிழ்ப்புயல்' தலைப்பு புடிச்சிருக்கா சொல்லுங்க..

வடி: அட..என்னப்பா நீ வலைப்பு தலைப்பு வாழப்பூன்னுகிட்டு..

க.கருப்பு: அண்ணே..'வைகைப்புயல' விட, 'வலைப்பூ தலைப்பு வாழப்பூ' நல்லாருக்குண்ணே..

மயில்: டேய் என்ன நீ..கொஞ்சம் டீசண்டா கொண்டு போலாம்னு பாத்தா, வாழப்பூ..மட்டைன்னுகிட்டு..

தி.பெரிசு: எலே மயிலு. வாழப்பூ தான்ல நல்லாருக்கு. உனக்கு வாழப்பூ எப்ப வரும்னு தெரியுமால? வாழை நல்லா வளர்ந்து முத்தி, குலை தள்ளுனாத்தான் வரும். அது மாதிரி, நம்ம வடிவேலுவோட சிந்தனையில முத்திய வாழ்க்கைப் பூக்கள்த்தான் கருத்தா சொல்ல வர்ரார்னு டெம்ப்ளேட்ல போடாலாம்லா' வலப்பு தலப்பு வாழப்பூ தான்பா நல்லாருக்கு.

வடி: அடா..அடா..அடா.. நீங்கச் சொல்லச் சொல்ல ஆசயா இருக்கேடா...

க.கருப்பு: அப்புறம் என்னண்ணே.. 'வலைப்பு..தலைப்பு..வாழப்பூ'ன்னு டைட்டிலப் போட்டுருவோம்ணே..என்னா மயிலு.

வடி: ஆமா..ராசா.. அப்படியே கீழே 'வடிவேலுவின் சிந்தையில் முத்திய சிந்தனைப்பூ' ன்னு ஒரு லைனப் போட்டுர்ரா..

மயில்: சூப்பர் பாஸ். ஆனா ஒரு சஜசன் பாஸ்.. 'வடிவேலுங்கறத' எடுத்துட்டு 'என் சிந்தையில் முத்திய சிந்தனைப்பூ' ன்னு போடலாம் பாஸ்...

வடி:ஏண்டா..எம் பேர இருட்டடிப்புச் செய்யற..

மயில்: அட இருங்கண்ணே..மூணுபதிவு போட்டாதான், நீங்க தமிழ்மண்த்துல ரிஜிஸ்டர் பண்ண முடியும். அதுனால, முதல் முணு பதிவ கவர்ச்சியா போடணும். அப்பதான் எல்லாரும் படிக்க வருவாங்க. அதான் முத பதிவுல ஏதாவது ஒரு பாப்புலராகாத நடிகைப் படத்த போட்டு, அவதான் இந்தப் பதிவுக்குச் சொந்தக்காரி மாதிரி எழுதலாம். அழகா இருந்தா, எல்லாரும் சைட்டடிக்க வருவாங்க..நம்ம சைட்டும் ஹிட்டாகிடும். அப்புறமா, 'அட பாவி மக்கா, ஏமாந்தீங்களாடா'ன்னு தலைப்புல நீங்கதான் இந்தப் பதிவுக்குச் சொந்தக்காரர்னு எழுதலாம்...எப்படி ஐடியா?

வடி: அடப் பாவி மக்கா? என்னடா தமிழ வளக்கலாம்னு சொல்லிட்டு, இப்படியெல்லாம் கவர்ச்சி போட்டு ஏமாத்தச் சொல்றே?

க.கருப்பு: அண்ணே..நாலு பேருக்கு நல்லதுன்னா, என்ன வேணாச் செய்யலாம். இது ஒன்னும் தப்பில்லண்ணே..'

வடி: நாலு பேரா...யாருடா...அந்த நாலு பேரு..

க.கருப்பு: நாம நாலு பேருதாண்ணே அது..நம்ம சைட்டு ஹிட்டானா, நமக்குத்தானேன்னே பாப்புலாரிட்டி.. அது நமக்குத்தானேண்ண நல்லது..

வடி: கிழிஞ்சது போ..ஏண்டா பாப்புலாரிட்டிக்காக இப்படி எல்லாமாடா செய்வாங்க.. தமிழ வளக்கலாம்னா, முதல்ல கவர்ச்சிய காட்டிட்டு அப்புறம் வளக்கலாம்ங்கிறீங்க. என்னமோ, உங்கள நம்பி இறங்கறேண்டா... சினிமாலதான் யார்கிட்டயாவது மாட்டி அடிவாங்க வுடுறீங்க..இங்க அதுமாதிரி யார்ட்டேயும் மாட்டி உட்டுராதீங்கடா.

மயில்,க.கருப்பு,தி.பெரிசு: (கோரஸாக): நாங்க பாத்துக்குறோம் தல..கவலையே படாதீங்க..

(வலைப்பு..தலைப்பு...வாழப்பூ' சைட் தொடங்கி, பதிப்பிக்கத் தொடங்குகின்றனர்)..

- இப்போதைக்கு, இங்க நிறுத்தி, 'தொடரும்' போட்டுக்கலாம். :)


Wednesday, November 08, 2006

இலவசம்..சில கனவுகள்..சில நினைவுகள்..

நம்ம ஊரில மார்கட்டுக்குப் போயி காய்கறி வாங்கியிருக்கீங்களா?

கொஞ்சம் சுமாரா காய்கறி வச்சு இருந்தாக் கூட, வாங்குற வாடிக்கையாளருக்கு, கருவேப்பிலை/கொத்தமல்லி கொசுறு கொடுக்கக் கூடியக் காய்கறி கடைக்கார்கிட்டதான் கூட்டம் கூடும். 'இவன் ரொம்ப நல்லவம்பா'ன்னு மனசுல நினைச்சுகிட்டே வாங்குவாங்க.

கொசுறா கிடைக்கிற கருவேப்பிலையே, அவ்வளவு சந்தோசப்படுத்தும்னா, இன்ன பிற இலவசங்கள் தரக்கூடிய சந்தோசத்தப்பத்திச் சொல்ல வேணுமா, என்ன?

Image and video hosting by TinyPic
இலவசம்ங்கற வார்த்தையைக் கேட்டாலேயே போதும், கண்ணும், காதும்
கூர்மையாகி விடாதா, என்ன? இலவசம்கிறது, சின்னப் பசங்கள்ள இருந்து, வயசான பெரிய மனுசங்க வரை எல்லா தரப்பு மக்களையும் லேசில வசியம் பண்ணிடும்.

சின்ன வயசுல லாலா கடைக்குப்(சுவீட் ஸ்டாலுக்குப்) போய், காசு கொடுத்து திண்பண்டம் பொட்டலம் வாங்கிட்டு, கொஞ்சம் கையில வேற இனாம் கேட்போம். இப்பவும், திருநெல்வேலி இருட்டுக்கடையில போயி அல்வா சாப்பிட்டீங்கன்னா, கொஞ்சம் காரம் இனாமாத் தருவாங்க. அந்தக் கொசுற வாங்கி, சகோதரருடன் பகிர்ந்துகிட்டதும் ஒரு சுகம்தான்.

கண்ணாடி வாங்கினா, சீப்பு இலவசம். சூடன் வாங்கினா, பொம்மை டப்பா இலவசம்னு சின்ன வயசுல, இந்த இலவசங்களை கண்கொத்திப் பாம்பா பார்த்ததுண்டு. பணம்ங்கிறது, பற்றாக் குறையாய் இருக்கின்ற காலத்தில், ஒன்னு வாங்கினா, ஒன்னு இலவசம்ங்கிற இந்த சில இலவசங்கள் வரப்பிரசாதம்தான்.

கடந்த எட்டு/ஒன்பது வருடங்களுக்கு முன் உலகக்கோப்பைக் கிரிக்கட் போட்டி நடந்தபோது, எனது நண்பர் ஒருவருக்கு இலவசமாய், பிரபல பிஸ்கட் கம்பெனி ஒன்றின் போட்டி மூலமாய், இலண்டன் சென்று கிரிக்கட் பார்க்க டிக்கட் இலவசமாய்க் கிடைச்சது. 'மச்சம்டா உனக்கு'ன்னு, நான் சொல்ல, 'அட பைத்தியக்காரா.. போட்டியெல்லாம் நம்பிகிட்டு இருக்கியா நீ. நா என்ன சின்னப்புள்ளையா பிஸ்கட்டு போட்டின்னு கூப்பன் கலெக்ட் பண்ண..எனக்கு டீலரு தெரியும். அவர் மூலமா வந்தது தாண்டா.'ன்னு சொன்னார். அது எனது சின்ன வயசு ஞாபகங்களைக் கிளறி விட்டது.

சோப்பு வாங்கி, மூன்று வண்ண அட்டைகள் சேத்தா, 'சிங்கப்பூர்' பயணம் இலவசம்னு விளம்பரம் பாத்து, உருப்படாத சோப்புகள் வாங்கி, அதன் அட்டையைச் சேகரித்து கனவிலேயே அப்பா, அம்மாவோட சிங்கப்பூர் போயிட்டு வந்தது ஒரு சுகம்.

அப்போதெல்லாம் ஒரு எதிர்பார்ப்பு. சொன்னா செய்வாங்கன்னுட்டு. சின்ன வயசுல, வெளுத்ததெல்லாம் பால்'னு நம்பிய காலம். வளர வளரத்தான புத்திக்குத் தெரியுது, எவ்வளவு தகிடுதத்தம் பண்ணுறாங்கன்னு.

பொருட்களை விற்க, வியாபாரிகளுக்கு இலவசம் ஒரு யுக்தி. ஆனா அத எத்தனை பேர் ஒழுங்காச் செய்யுறாங்கன்றது கேள்விக்குறி.


அமெரிக்காவில இந்த இலவசங்கள் எல்லாம், ஓரளவுக்கு முறைப்படி நடப்பதாகத்தான் தோணுகிறது. X-box-ங்கிற விளையாட்டுச் சாதனம், மார்கட்டுக்கு வருவதாக விளம்பரப் படுத்த பட்டுக் கொண்டு இருக்கையில், கோகோ கோலா கம்பெனியும் கலந்து கொண்டு, அவர்கள் பானத்தின் மூடியில், X-box -க்கான அடையாளம் இருந்தால், அவர்களுக்கு இலவசமாய் X-box சாதனம் கோகோ-கோலா சார்பாக அனுப்பி வைக்கப்படும் என்று அறிவித்திருந்தார்கள்.

சரியாய் அந்தப் போட்டி முடிவதற்கு முந்தைய தினம், விளையாட்டாய் என் நண்பன் இரண்டு பாட்டில்கள் வாங்க, இரண்டில் ஒன்றில் x-பாக்ஸ்க்கான அடையாளம் இருக்க, அந்த விளையாட்டுச் சாதனம் பொது விற்பனை மார்கட்டுக்கு வருமுன்பே, அவரது வீட்டிற்கு வந்துவிட்டது.

இன்னொரு நண்பரின் பெற்றோர், அமெரிக்காவிலிருந்து சிங்கப்பூர் விமானம் மூலமாக இந்தியா செல்ல இருந்தார்கள். 'எகனாமி' வகுப்பு டிக்கட் எடுத்திருந்தார்கள். விழாக் காலமாகையால், 'ப்ளைட் ஓவர் புக்-ஆகியிருந்தது. சிங்கப்பூர் விமான ஊழியர் ஒருவர், நண்பரின் பெற்றோரை அணுகி, 'உங்கள் பயணத்தை, நாளை ஒத்திப் போட சம்மதிப்பீர்களென்றால், உங்களுக்கு 'முதல் வகுப்பில்' நாளை செல்வதற்கான இலவச upgrade பண்ணித்தருகிறோம்' என்றார். இதைக்கேட்ட நண்பர், உடனே அதற்குச் சம்மதிக்க, மறுநாள் அவர் பெற்றோர் முதல் வகுப்பில் பயணித்தனர்.

இந்தமாதிரியான இலவச அப்கிரேடு, இந்திய ரயில்வேயிலும் கொண்டுவர இருப்பது வரவேற்கத்தக்க முயற்சி.

இந்த மாதிரியான இலவசங்கள், கிடைப்பதும் அவ்வளவு எளிதல்லவே.

இலவசங்கள் கிடைப்பதற்கும் 'லக்கிலுக்' வேண்டும்....அட அதிர்ஷ்டப்பார்வை வேண்டும்ங்கிறேன். அதிர்ஷ்டம் இருந்தாத்தாங்க, இந்த மாதிரி இலவசங்கள் எல்லாம் கை கூடும்.

இந்தியாவிலிருந்து, ஒரு மாத கால பணிக்காக வந்த நண்பர் ஒருவர், ஏ.ஓ.எல் வழங்கிய ஒரு மாதத்திற்கான இலவச 'இண்டர்நெட்' சேவையைப் பயன்படுத்தினார். ஒரு மாதம் முடியுமுன், அந்தச் சேவையை துண்டிக்க மறந்து போய், இந்தியா சென்றுவிட, மாதாமாதம் இருபத்தியிரண்டு அமெரிக்க டாலர்கள் வீதம் மூன்று மாதத்திற்கு, அவரது கிரெடிட் கார்டில் வசூலித்துவிட்டனர். நண்பர் முழித்துக் கொண்டு, சேவையை துண்டிக்க இரண்டு மாத காலம் ஆனது. இலவச 'எலிப்பொறி', 60+ அமெரிக்க டாலர்களை விழுங்கியது.

இலவசங்களைப் பெறுவதிலும் ஒரு கவனம் வேண்டும்.

இந்த மாதிரி இலவசங்கள் எல்லாம், மழையில் முழைக்கின்ற காளான் போல..அவ்வப்போது சில சலனங்களையும், சில சந்தோசங்களையும் கொடுத்துப் போகும்.

ஆனால் பிரதிபலன்கள் எதிர்பாராமல் கொடுக்கப்படும் சில இலவசங்கள் நிலைத்து நின்று பலன் கொடுக்கும். சில சேவை நிறுவனங்கள் மூலமாக நடத்தப்படும் மருத்துவ நிலையங்கள், கல்விக்கூடங்கள் இதற்குச் சான்று.

நடந்து முடிந்த தேர்தல் கூட ஒரு இலவச மழைத்தேர்தல்தான். ம்..இலவசத் திட்டங்கள் சோம்ப்பேறியாக்காமல், உதவியாய் இருக்கும் பட்சத்தில் வரவேற்க வேண்டிய ஒன்றுதான்...


(என்ன சிவா..இந்த முறை தேன்கூடு போட்டிக்கு கதை எழுதாம, கட்டுரை எழுதியிருக்கீங்கன்னு யாரோ முணுமுணுக்கிறாப்பல இருக்கு..இருங்க..இருங்க... இந்தக் கட்டுரையை படிச்ச உங்களுக்கு ஒரு கதையை இனாமாத் தரலாம்னு இருக்கேன்.. இன்னும் இரண்டொரு நாள் பொறுங்க.. :) )

Tuesday, October 24, 2006

ஒரு CTRL+ALT+DEL -க்கு 'ஓ' போடலாமா?


நல்லா வேலை பண்ணிக்கிட்டு இருக்கிற கம்ப்யூட்டர் திடீர்னு மக்கர் பண்ணிச்சுன்னா என்னா பண்ணுவீங்க?

'சொன்னபடி கேளு...மக்கர் பண்ணாதே'-ன்னு கமல் மாதிரி பிரம்ப எடுத்துட்டு பாட முடியுமா என்ன?

மூக்கணாங் கயிறைப் பிடிச்சி இழுக்கிற மாதிரி, உடனேயே கம்யூட்டர் தட்டச்சு பலகையின் 'CTRL+ALT+DEL' - கீயை அமுக்கிட மாட்டீங்க?

ஜம்பமா ஓடிக்கிட்டு இருக்கிற சாப்ட்வேர்களை எல்லாம் ஒரு மூலைக்கு அனுப்பிவிட்டு, 'கம்யூட்டரை நிறுத்தனுமா? என்னா செய்யனும்' னு கேக்க வைக்கிற அந்த கமெண்ட்-க்கு சொந்தக்காரர் யார் தெரியுமா?

'டேவிட் பிராட்லி' என்ற IBM இன்ஜினியர்தான் அதன் காரணகர்த்தா. 1980களில், சொன்ன பேச்சைக் கேக்காத கம்யூட்டர்களை, வழிக்குக் கொண்டுவரும் முயற்சியில் பிராட்லி உட்பட 12 இன்ஜினியர்கள் ஈடுபட, முடிவாய் பிராட்லி 1 நிமிடம் 23 செகண்ட்ஸ்-ல் அதற்கான புரோகிராமை எழுதிமுடித்தாராம்.

இதன்பின்னர் வேறு என்னவோ கண்டுபிடிப்பெல்லாம் செய்தாலும் அவரைப் பிரபலமடையச் செய்ததென்னவோ இந்தக் கண்ட்ரோல்+ஆல்ட்+டெல் தான்.

இது குறித்த பேட்டி ஒன்றில், பிராட்லி கூறியது: "கண்டு பிடிச்சது என்னவோ நானென்றாலும், இதற்குப் புகழ் சேர்த்த பெருமை பில்கேட்ஸ்க்குத்தான். ஒவ்வொருமுறை விண்டோஸ் மக்கர் பண்ணும்போதும், துணை வருவது இந்தக் கண்ட்ரோல்+ஆல்ட்+டெல் தானே, அவர் எப்ப எல்லாம் தோற்கிராறோ, அப்போதேல்லாம் நான் ஜெயிக்கிறேன்" என்றாராம். குசும்புதான் போங்க...

(முன்னரே தெரிந்த தகவலென்றால் மன்னிக்க, இது மற்றவர்கள் ரசிக்க.)

Monday, October 23, 2006

சமூகப் பொறுப்புணர்த்தும் பதிவுகள்

வலையுலகம் மிகப் பரந்தது. இந்தப் ப்ளாக்கும் அப்படித்தான். ஒவ்வொருவருக்கும் ஒவ்வொரு விதமான ஆவல், எதிர்பார்ப்பு.

சிலருக்கு சினிமா. சிலருக்கு இலக்கியம். சிலருக்கு ஆன்மீகம். சிலருக்கு விளம்பரம். சிலருக்கு அரசியல். சிலருக்கு தனிமனித தாக்குதல். சிலருக்கு அரட்டை. சிலருக்கு கொள்கை பரப்பு செயல். சிலருக்கு சமூக ஆர்வம்.

இதில் என்னைப் பொறுத்தவரை, சமூக ஆர்வம் தவிர மற்றவைகள் ஒரு குறிப்பிட்ட எல்லைக்குள் நின்று போய்விடுகின்றன. சமூக ஆர்வலர்கள், எல்லை தாண்டி வியாபிப்பவர்கள். அது போன்றவர்களின் கருத்துக்கள், இவ்வலையுலகம் ஏறுவது அரிது. சமூக ஆர்வம் இருப்பவர்களுக்கு, அதை வெளிப்படையாய்ச் சொல்வதற்கு பயம் கூட. இதையும் தாண்டி பதிப்பவர்கள் குறைவுதான்.

சமீபமாய் நான் படித்த பதிவுகளில், இரண்டு பதிவுகள் என்னைக் கவர்ந்தது. (மேலும் நிறைய பதிவுகள் இருக்கலாம், நான் படித்ததைச் சொல்கிறேன். உங்களைக் கவர்ந்தவைகள் இருந்தாலும் சொல்லுங்கள்...)

முதலாவது: துள்ளி வருகுது வேல்

"இனி, உன் விழிகள் சிவந்தால்.... உலகம் விடியும்", என்ற கம்யூனிச சிந்தனை எண்ணச் சிதறல்களோடு புதிதாய்த் துவக்கப் பட்டிருக்கிறது. சபாபதி சரவணன் இதற்குச் சொந்தக்காரர்.

சமீபத்திய பதிவு: இதோ மற்றொரு குழந்தை நமது வன்முறைக்கு பலியாகிவிட்டது
இதோ மற்றொரு குழந்தை நமது வன்முறைக்கு பலியாகிவிட்டது


இன்னொன்று: BadNewsIndia - மெத்தனமாக இருக்காதீர்கள்
'நாம் அன்றாட வாழ்க்கையில் எவ்வளவு அலட்சியமாக இருக்கிறோம் என்பதை சுட்டிக்காட்டும் பதிவுகள்!!" என்ற சராசரி உணர்வோடு துவக்கப்பட்டிருக்கின்ற விழிப்புணர்வுப் பதிவு.

அரட்டைகளுக்கும், ஆர்ப்பரிப்புகளுக்கும் இடையே இப்பதிவுகள் என்ன சாதிக்கப் போகின்றன என்பது கேள்விக்குறியாயினும், சில நற்சிந்தனைகளை வலைஞரிடையே தோற்றுவிக்குமானால், அதுவே இவர்களின் வெற்றியாயிருக்கும். அரசியல்வாதிகளைத் திருத்த முடியுமா என்பதனைக் கேள்விக்குறியாக்கி, தனி மனித வாழ்வைத் நற்சிந்தனையாக்கினாலே அது நல்லெதிர்காலத்திற்கு விதையிடும் என எண்ணுகிறேன்.

நான் முன்னரே கூறியது போல், இந்த வலையுலகம் என்பது படிப்பறிவில்லா பாமரர்களால் எழுதப்படுபவை அல்ல. படித்துத் திறனுள்ளவர்களாலேயே எழுதப்படுவன. இந்த வலையுலகம் இப்போது எல்லோரது கவனத்தையும் ஈர்க்கத் துவங்கியுள்ளது என்பது உள்ளங்கை நெல்லிக்கனி. இதையுணர்ந்து எல்லோரும் நற்சிந்தனை விதைத்தால் நலம்தான்.

நிறைய பத்திரிக்கையாளர்களும் இப்போது ப்ளாக் பக்கம் வருகிறார்கள். அவர்கள் ப்ளாக்குகள் மூலமாக கேள்விப்படுகின்ற சில நற்சிந்தனைகளை அல்லது எழுப்படுகின்ற பிரச்னைகளை மேலும் விரிவாக்குவார்களேயானால், அது இந்தச் சமூகத்திற்குச் செய்கின்ற நற்செயலாய் இருக்கும். சம்பந்தப்பட்டவர்கள் சிந்திப்பார்களாக.

'பழி சொல்லுதல் எளிது, வழி சொல்லுதல் கடினம்'. - யாரையும் குறை சொல்லுவது என் நோக்கமல்ல. நல்லன நடக்க சில முயற்சிகள் 'ப்ளாக்' மூலம் நடந்தால் நலம் என்பதே என் நோக்கம்.

உங்கள் எண்ணங்களைச் சொல்லுங்கள்...

Friday, October 20, 2006

ஆஹா..வந்திருச்சி..

'ஆஹாங்..ஹாங்..ஆஹாங் வந்திருச்சி...'

'என்னல வந்திருச்சி..ட்ரெய்னா? இல்ல சவாரி எதுனாச்சுமா? '

'அடா...இன்னா பெரிசு நீ..எப்ப பாத்தாலும் சவாரி சவாரின்னு உழைச்சுகினு...தீபாவளி வர்தேன்னு குஜால் மூட்ல ஒரு பாட்ட எட்த்து விடலாம்னான்னா.. நீ குறுக்கால புகுந்துக்கீனு ப்ரேக் போடறீய...பாட விடுமா நீ'

'ஏலே...நீ சும்மானாச்சும் கூவினாலே அத்த பாட்டும்பீய.. '

'பெர்சு..சும்மா வாராதே...வாத்யாரே ட்யூன் போட்ருக்காரு..'ஆடிப்பாடி வேல செஞ்சா அலுப்பிருக்காதுன்னு' ..ஏதோ சவாரி வார வரைக்கும் நீயும் கேப்பியேன்னுட்டு பாடுனா..ஓவராத்தான் நக்கல் பண்றீயே..'

'ச்சரில..பாண்டி..சரி....எட்த்து விடு ...கேக்கறம்ல..'..

'அப்படி வளிக்கி வா நைனா..இப்பக் கேளு...ம்க்கும்... 'ஆஹாங் வந்திருச்சு...ஆசையில் ஓடிவந்தேன்....பாலோ பலமோ தேவயில்ல..தூக்கமில்ல...'

'ஏலே....நிறுத்துல.. என்னா நீ பழைய பாட்ட படிக்கா?'

'யோவ்..பெர்சு..த்திருப்பி த்திருப்பி நீ நம்மள ராங் சைட்ல க்ராஸ் பண்ற பாரு. நா(ன்) பாட்ட பாடுறனா..இல்ல படிக்கிறனா?

'எல..நீ பாடத்தாம்லா செய்தா..எங்க ஊர்ல பாட்ட படிக்கன்னுதாம்ல சொல்லுவோம்..'

'என்னா ஆளுங்கய்யா நீங்க.. பஸ்ஸு நிக்கி..வயிறு பசிக்கி..பாட்டு படிக்கி..'ம்பீங்க...எத்தயும் முள்சா சொல்லத் தெரியாதா?'

'ஆமாலெ...நீங்க மெட்ராஸ்ல இஸ்துக்குனு..குந்திக்குனு-ன்னு பேசுவீக...நாங்க நிக்கி..பசிக்கி..படிக்கி-ன்னு சொல்றதெல்லாம் உங்களுக்கு குத்தமா தான்ல தெரியும், இங்கிலீசுல 'ப்ரெஸெண்ட் கண்ட்னியூயஸ்' ன்னு சொல்ற மாதிரி..இன்னமும் நடந்துக்கின்னு இருக்கின்னுட்டு அர்த்தம்' பஸ்ஸு நின்னுகிட்டு இருக்கு, வயிறு பசிச்சுகிட்டு இருக்கு..பாட்டு படிச்சுகிட்டு இருக்குன்னு.... நெல்லைத்தமிழ் ஒரு இலக்கணத் தமிழ்ல..'


'பெரிசு...சும்மா அந்தக்கால எட்டாங் கிளாஸ் படிச்சுட்டேன்னுட்டு....தமிழு..இங்கிலிசுன்னுட்டு கண்ட்னியூட்டின்னு' பீலா வுட்டுக்கினு இருக்காத..நானாச்சும் ஒழுங்கா ஒரு லோக்கல் பாஷை பேசிக்குனு இர்க்கேன்..உனக்கு எதுனாச்சும் ஒழுங்கா வர்தா.. மெட்ராசையும், திருநவேலியையும் போட்டு குழப்பிக்குனு இருக்கே'


'சரிலே..சரிலே.. இளவட்ட ராசா நீ...உங்கிட்ட பொல்லாப்பு எதுக்குல.. பழைய பாட்ட படிக்கிறீயேன்னு கேட்டதுக்கு இம்புட்டு பேசறீயே'

'பெரிசு.. எம்ஜியார், சிவாஜி, கமலு, ரஜினின்னுட்டு பழைய பஞ்சாங்கம் பாடிக்கிட்டு இருக்காத.. இத்து லிட்டில் சூப்பர் ஸ்டார் சிம்புவோட பாட்டு. அவரே பாடியிருக்காரு. சும்மா சூப்பர் ஹிட்டு பெர்சு..நம்ம குரல்ல பாட்னாக் கூட சூப்பராகீது'



'என்னது சிம்புவோட பாட்டா?'

'அட என்னா பெரிசு நீ..இவ்ளோ அவுட் டேட்டா இர்க்கே நீ', 'சும்மா நச்சுன்னு நயன் தாரா உதட்ட கவ்வி இழுத்துக்கின்னு ஒரு ஸ்டில் குடுத்துதே..நீ கூட வாயப் பொழந்துக்கினு பாத்தியே..'

'எலே..பெரிசு..பெரிசுன்னு சொல்றீய தவிர..மரியாத குடுக்க மாட்டக்கா பாத்தியா'

'சும்மா ஃபீலிங் உடாத பெரிசு..நீ என்ன கலாய்க்கலியா.. அத்த மாதிரிதான் இதுவும்..சரி மேட்டருக்கு வா. 'நயனுக்கு லிப்-டு-லிப் கடிச்ச போஸ்டர் பாத்தல்ல..அந்தப் படத்துலதான் பாடியிருக்காரு. படம் பேரு 'வல்லவன்'. தீபாவளிக்கு வருது.'

'எலே..அது கல்யாணராமன்ல..மலேசியா வாசுதேவன் பாடுன பாட்டுல்லா, அதே பாட்டையா இதுலயும் போட்டிருக்கானுவ'

'ஆமாம் பெரிசு...அது இளையராஜா போட்ட ட்யூனு. அத்த அவரு புள்ளையாண்டான் யுவன் சங்கர் ரீமிக்ஸ் பண்ணி 'வல்லவன்'ல போட்டிருக்காரு'

'அப்பா 'சகலகலாவல்லவன்' கமலுக்கு போட்ட ட்யூன, புள்ள 'வல்லவன்'னு சிம்புவுக்கு போட்டுருக்காக்கும்.'

'பெரிசு..பாட்ட கேட்டியா..போனியான்னுட்டு இல்லாம.. சும்மா அரசியல் பண்ணாத..பாட்ட கேக்கறியா.. டீக்கடை நாயர போடச் சொல்றேன்'

(பெரிசு தலையாட்ட, டீக்கடை நாயரை பாட்டு போடச் சொல்கிறார்,பாண்டி. பாட்டு பாடுகிறது. நீங்க கேக்கணுமா.க்ளிக் பண்ணுங்க')

'எப்பா..எப்பா...போதும்ப்பா..நிறுத்து..நிறுத்து..'

'இன்னா பெரிசு..போதும் போதுங்கற..பாட்டு புடிக்கலியா'

'புடிக்கலியாவா...பின்ன..பாண்டி....இந்தப்பாட்டு அந்தக் காலத்துல எவ்வளவு பேமஸு தெரியுமா? மலேசியா சும்மா அசத்தலா பாடியிருப்பாரு. கமலோட வெகுளித்தன கேரக்டர அப்படியே பாட்ல கொண்டு வந்திருப்பாரு. அதேயே மெச்சூர்டு கமலுக்கும் மலேசியா வித்தியாசம் காட்டி பாடியிருப்பாரு. ரீமிக்ஸ் போட்டு கெடுத்துப் புட்டானே. கோச்சுக்காதே பாண்டி. எப்படித்தான் கேக்கறியோ?'

'போ பெரிசு..உனக்கு பிடிக்கனாங்காட்டியும் ச்சும்மா குறை சொல்லாத.'

'ரீ மிக்ஸ்-ன்னு பாட்டச் சிதைக்காம போட்டா நல்லாருக்கும். முழு பாட்டயும் இப்படி கெடுத்திருந்தா பின்ன என்ன சொல்லுவம்னுல நினைக்கா. இதே யுவன், 'அறிந்தும் அறியாமலும்' படத்துல 'தீ பிடிக்க..தீ பிடிக்க' வித்யாசமா பண்ணியிருந்தாரு. நல்லா இருந்துச்சு. ரஹ்மான் கூட, வாத்யாரோட 'தொட்டால் பூ மலரும்' பாட்ட நல்லா ரீமிக்ஸ் பண்ணியிருந்தாரு. கேக்கற மாதிரி இருந்திச்சு. ஆனா இத்து எனக்குப் புடிக்கல பாண்டி. 'வல்லவன்' சிம்பு இல்ல, இந்தப் பாட்ட 'கொன்னவன்' சிம்பு'' "

'சரி..சரி.. டென்ஷனாவாத.. பழைய பாட்டு ரீமிக்ஸ் கேட்டதுக்கு இம்புட்டு பேசறீயே..கூல்டவுன் ஆகு'

'என்னவே போ பாண்டி..இந்தக் காலத்து பிள்ளலேல்லாம் ஒரு தினுசாத்தான் இருக்கு. ட்ரெய்ன் வார சத்தம் கேக்குது. வா பொழப்பப் பாப்போம்'

பாண்டியும், பெரிசும் ஸ்டேசன் நோக்கி நடக்கத் துவங்குகின்றனர். நாயர் கடையில் 'லூசுப் பெண்ணே..லூசுப் பெண்ணே... பாடல் ஒலிக்கத் துவங்குகிறது.


'அனைத்து வலையுலக நண்பர்களுக்கும் இனிய தீபாவளி வாழ்த்துக்கள்'

Sunday, October 08, 2006

ராஜகுமாரன் - தேன்கூடு போட்டிக்கு

"காத்திருந்து காத்திருந்து காலங்கள் போனதடி
பூத்திருந்து பூத்திருந்து பூவிழி நோகுதடி
நேத்து வர சேர்த்து வச்ச ஆசைகள் வேகுதடி
நீயிருந்து நான் அணச்சா நிம்மதி ஆகுமடி"

மொட்டைமாடியில் டேப் ரிகார்டர் பாடிக்கொண்டிருந்தது.

Image and video hosting by TinyPic


'ஏய்..மனோ, இந்த அஞ்சுதான் சத்தமா மொட்ட மாடில பாட்டு கேட்டுகிட்டு இருக்கான்னு நினைக்கிறேன்..கொஞ்சம் சத்தத்த குறைச்சு வச்சு கேக்கச் சொல்லு, பெரியக்கா வந்தா கத்தப் போகுது. " -அடுப்பிலிருந்த குழம்பைக் கிண்டியபடி வினோதினி சிடுசிடுத்தாள்.

"விடுக்கா.. சின்னப்புள்ள தானே.."

"ம்க்கும்.. காலேஜ் கடைசி வருசம் கடைசிப் பரீட்சை எழுதியாச்சு..இன்னும் என்னடி சின்னப்புள்ள.. நாங்கள்ளாம் இப்படியா வளர்ந்தோம்.. கிடைக்கிற சுதந்தரத்த காப்பாத்திக்க தெரியணும், பெரியக்கா வந்து கத்திச்சுன்னா, கண்ணக் கசக்கிட்டு நிக்கும், அப்பவும் நாமதான் 'அழாதேடி'ன்னு சமாதானம் பண்ணனும். போ..போய் சொல்லி கூட்டிக்கிட்டு வா"

"சரிக்கா..நீ டென்ஷனாகாத.." என்றபடியே தங்கையை அழைத்துவர மாடிக்குப் போனாள், மனோ.

------00000------

அஞ்சு அந்த வீட்டின் செல்லப் பெண். ஐந்தாவது பெண் என்பதால், அஞ்சனா என்று வைத்தப் பெயர், அஞ்சு என செல்லப் பெயராயிற்று. 'அஞ்சு பெத்தா அரசனும் ஆண்டி'-ன்னு பழமொழி. ஆண்டின்னு சொல்ற அளவிற்கு இல்லாமல், சிறுசிறு சிரமங்களோடே அவர்கள் குடும்பம் நடந்து கொண்டிருந்தது. அஞ்சு பொண்கள்ள, ஒருத்திக்குக் கூட கல்யயணம் செய்து வைக்க முடியலையே, என்ற அப்பாவின் வருத்தம், அவரின் சித்த சுகவீனத்திற்கு வித்திட்டது. அம்மாவும், மூத்த அக்கா முத்துவும்தான் கண்டிப்புடன் குடும்ப நிர்வாகிகள். அம்மாவைவிட, முத்தக்காவிடம் எல்லோருக்கும் பயம். அரசு அலுவலகமொன்றில், மூத்த கணக்கராகப் பணி. வயது முப்பத்தியெட்டாகிறது. திருமணக் கனவுகளை கலைத்துவிட்டு, தங்கையரே குழந்தைகள் என்ற எண்ணத்தில் காலத்தை ஓட்டிக்கொண்டிருப்பவர்.

------00000------

மாடிப்படியேறி வரவர சத்தம் அதிகமாகிக் கொண்டே வந்தது. நிசமாலுமே சத்தம் அதிகம்தான். 'முத்தக்கா வந்தா, இந்தப் பாட்டுக்கு மேலேயே பாட்டு வாங்க வேண்டியதுதான், இவ்வளவு சத்தமா வச்சிட்டு என்ன பண்ணிகிட்டு இருக்கா' என்று எண்ணிக் கொண்டே, மேலே வந்து அவளறியாமல் மெல்ல எட்டிப் பார்த்தாள். யாரையோ பார்த்து கையசைத்துக் கொண்டிருந்தாள், அஞ்சு. ஆச்சரியமானவளாக, 'ஏய்...அஞ்சு..யாருக்குடி கை காட்டுறே' என்று சினேகிதமாகக் கேட்டபடியே வந்தவள், அஞ்சு பார்த்துக் கொண்டிருந்த திசை நோக்க, 'வேகவேகமாக எதிர் வீட்டு பையன் உள்ளே போனது தெரிந்தது.

'ஏய்..என்னடி..அஞ்சு.. அவனுக்கா நீ கை காட்டுனே..' - மனோவின் குரலில் அதிர்ச்சி தெரிந்தது.

'கத்தாத மனோக்கா.. மெல்லப் பேசு. கீழே சின்னக்காவுக்கு கேக்கப் போகுது' - பயந்தவளாக அஞ்சு.

'சரி..சரி...நீ இப்ப என்ன பண்ணின.. அதச் சொல்லு'

'ஆமா..அவனுக்குத்தான் கையக் காட்டுனேன்..நீ யார் கிட்டேயேயும் சொல்லாதே..'

'என்ன தைரியம்டி உனக்கு. முத்தக்காவுக்கு தெரிஞ்சா, கொன்னே போட்ரும்.. நா ஏதோ பாட்டு சத்தத்த குறைச்சு கேளுன்னு சொல்லிட்டுப் போலாம்னு வந்தா, நீ இந்த வேல பண்ணிக்கிட்டு இருக்கே..'

'இது அவன் வாங்கிக் கொடுத்த கேசட்தான். அவனுக்கும் கேக்கட்டுமேன்னுதான் சத்தமா வச்சேன்'

'ஓ..ஓ..அப்ப இது ரொம்ப நாளா நடக்குது போல..' என்றபடியே கேசட் டப்பாவை எடுத்துப் பார்க்க, 'ஜெயச்சந்திரனின் காதல் கீதங்கள்' - அன்புடன் வசந்தி' என்று எழுதப்பட்டிருந்தது. கூர்ந்து பார்த்தபோது, 'வசந்த்' திருத்தி எழுதப்பட்டு வசந்தியாகியிருப்பது தெரியவந்தது.

'பேரு வசந்த்-ஆ'

'ஆமாம்..'

'எத்தன நாளாடி இந்தப் பழக்கம், கடைக்குட்டின்னு சமர்த்துன்னு' அடிக்கடி அக்கா சொல்லுமேடி..இப்படி பண்ணிகிட்டு இருக்கே'

'ஃபைனல் இயர் ஆரம்பிச்சப்போதான் பேச ஆரம்பிச்சது. 'பந்த்'னு திடீர்னு பஸ் ஓடாதப்ப, இவந்தான் பைக்ல கொண்டுவந்து விட்டான். அப்போ பழக ஆரம்பிச்சது. '

'உனக்கு ரொம்பதாண்டி தைரியம். ரெண்டாவது அக்கா சுஜாவுக்கு அந்த ரகு லெட்டர் கொடுத்தப்ப என்ன நடந்தது, உனக்கு நினனவில்லையா? அவனப் பிடிச்சு போலிஸ் கம்ப்ளெயிண்ட் கொடுத்து, அம்மாவும், அக்காவும் ஆர்ப்பாட்டம் பண்ணினது ஞாபகமில்லையா?. இன்ன வரைக்கும், அதத்தான அம்மா குத்திக்குத்திக் காட்டுது. அதுனாலதான்னு நம்ம வீட்டுக்கு ஒரு மாப்பிள்ள கூட வரமாட்டாங்கிறான்னு சொல்லிசொல்லி, அது இப்ப வாயில்லாப் பூச்சியா இருக்கு. அதல்லாம் பாத்துமாடி, இது மாதிரி பண்ணிகிட்டு இருக்கே. இது ரொம்ப அதிகம்டி'

'இல்லடி மனோ.. நாங்க ரொம்ப சீரியஸா லவ் பண்றோம். அவனுக்கும் சதர்ன் ரெயில்வேல கிளார்க் வேலை கிடைச்சிருக்கு. இன்னும் ரெண்டு மாசத்துல கல்யாணம் பண்ணிக்கலாம்னு சொல்றான்.. அவங்க வீட்ல எல்லாம் சம்மதம் வாங்கியாச்சு...'

'என்னடி..சொல்றே.. '

'போன செமஸ்டர் கடைசி பரீட்சை எழுதி முடிச்சப்போ, அவங்க வீட்டுக்குக் போனோம், அவங்க வீட்ல எல்லோரும் நல்ல மாதிரி. அவங்க அம்மாவுக்கும் பிடிச்சிப் போச்சி. நம்ம கொஞ்சம் உசந்த சாதின்னு பயப்படுறாங்க'

'அடப்பாவி...செல்லம் செல்லம்னு உன்னக் கொஞ்சினா, இப்படி ஊமைக்கோட்டானா இவ்வளவு வேலை செஞ்சு வச்சிருக்கே'

'ப்ளீஸ்..ப்ளீஸ்...இப்போதைக்கு இத வேற யார்கிட்டேயும் சொல்லாதடி..ப்ளீஸ்'

அதற்குள் கீழேயிருந்து வினோதினி குரல் கொடுக்கவே, 'சரி..சரி..அக்கா மேல வரதுக்குள்ளே, கீழே போலாம், அந்த கேசட் டப்பாவை வெளியே தெரியும்படி வைக்காதே..வா' என்றபடியே மனோ முன்னே போக, அஞ்சு தொடர்ந்தாள்.

------00000------
காதலர்க்கு, நொடிகள் கூட வருடங்களாகும் அவர்கள் அருகிலில்லாத போது, வருடங்கள் கூட நொடிகளாகும் அருகிலிருக்கும் போது. அஞ்சுவுக்கும் அப்படித்தான் இருந்தது. மாதங்கள் இரண்டு வேகமாய் உருண்டு ஓடியது. அஞ்சுவுக்குத்தான் எதிலும் பிடிப்பே இல்லை. தேர்வு முடிவுகள் வெளியாகி, அவளும் தேர்ச்சி பெற்றிருந்தாள். அதை முத்தக்கா, மகிழ்ச்சியாய் கொண்டாடிய போது கூட, இவள் சுரத்தே இல்லாமலிருந்தாள். முத்தக்கா நிர்வாகத்தில் கில்லாடி என்றால், வினோ மற்றவர்கள் மனதைப் படிப்பதில் கில்லாடி. இவளின் முகவாட்டத்தைக் கவனித்தவள், மனோவிடம் 'ஏண்டி..இது எப்ப பாத்தாலும் முகத்த தொங்கப் போட்டுகிட்டே இருக்கு..மேல படிக்கணும்னு நினைக்கிறாளா? என்னான்னு கேளேண்டி..' என்க, 'அதெல்லாம் ஒன்னுமில்லக்கா..வெளியே போய் வந்துக்கிட்டு இருந்தவள, திடீர்னு வீட்டுக்குள்ளேயே இருன்னா..அதான்.. எல்லாம் பழகிடுவா..நீ கவலைப்படாதே..' என்று சொல்லிக்கொண்டே, அஞ்சுவின் இருக்குமிடம் நோக்கிச் சென்றாள்.
------00000------
'ஏண்டி அஞ்சு, எப்ப பார்த்தாலும் முகத்த தொங்கப்போட்டுகிட்டு இருக்கே..வினோக்கா கத்துது பாரு'

'என்னால முடியலடி..நாளைக்கு ரிஜிஸ்டர் ஆபிசுல கல்யாணம் பண்ணிக்க ஏற்பாடு பண்ணியிருக்கான் வசந்த், உங்களுக்கு துரோகம் பண்றனோன்னு இருக்கு' என்றாள் கையிலிருந்த வசந்தின் புகைப்படத்தைப் பார்த்தபடி.

'..சும்மாச்சும்மா அழாதே..,வினோ உள்ள வரப்போகுது..' என்று சொல்லி முடிக்குமுன் அறைவாசலில் வினோ வந்து நின்றாள். 'ஏன் அஞ்சு அழறே..' என்றபடி அருகில் வந்தவள், அவள் எதையோ மறைக்க எத்தனிப்பதை கவனித்தவளாக, 'என்னடி அது' என்று பிடுங்கினாள்.

வசந்தின் போட்டோ, வசமாய் மாட்டிக் கொண்டது அவள் கைகளில்.

'யாருடி இவன்..மூணாவ்து வீட்டுப் பையன் மாதிரி இருக்கான். இது எதுக்கு உங்கிட்ட இருக்கு' என்றபடியே, போட்டோவைத் திருப்பிப் பார்த்தவள், அதில் எழுதியிருந்த வாசகத்தைப் படித்தாள். 'என் நிழல்படத்தோடு சேர்ந்திருக்கும் என் கண்ணே.. நிஜத்தோடு எப்போது சேர்வாய்..வழிமேல் விழியாய்..வசந்த்'

'என்னடி..இது..இப்படி எழுதியிருக்கான்.. லவ்-வா?'.

இருவரும் மொளனமாக இருக்க...'என்னடி..கல்லுளி மங்கிகளா..கேக்கறதுக்கு பதில் சொல்லுங்கடி..'

'ஆமாங்க்கா..நானுந்தாக்கா..' என்றபடியே விசும்பத் தொடங்கினாள் அஞ்சு.

'நீயா...' என்று வாய் பிளந்தவள், 'உனக்கும் தெரியுமாடி..' என்றபடியாய் மனோவை முறைக்க,

'அவளத் திட்டாதக்கா..அவளுக்கு ஒன்னும் தெரியாது.."நாந்தான் எல்லாம் பண்ணினேன்"..என்றபடியாய் எல்லாவற்றையும் சொன்னாள். என்ன மன்னிச்சுருக்கா..எனக்கு வசந்தும் வேணும்..நீங்களும் வேணும்..இப்ப என்ன பண்றதுன்னு தெரியலை' - தேம்பினாள்.

'என்னால நம்ப முடியலடி..நீ எவ்வளவு சின்னப் பொண்ணுன்னு நினச்சிருந்தேன்..இவ்வளவு தேறியிருக்கே, நா இத எதிர்பார்க்கலடி..இவ்வளவு பண்ணினவ ஏண்டி இன்னும் இங்க இருக்கே..அவங் கூடவே ஓடிப்போயிருக்க வேண்டியதுதானே'

'வினோக்கா..என்னக்கா இப்படி பேசறே..'

'பின்ன எப்படிடி சொல்லனும்கிற..நான் கோபத்தில அப்படி பேசல..நிசமாத்தான் சொல்றேன்..' என்ற வினோவைப் பார்த்து,

'என்ன வினோ சொல்ற, சுஜாவோட கதை தெரிஞ்...' என்று ஆரம்பித்த மனோவைத் தொடரவிடாமல், 'தெரியும்டி...மனோ.. அதனாலதான் சொல்றேன்.. லெட்டர் கொடுத்தான்..லெட்டர் கொடுத்தான்னு சொல்லிச்சொல்லியே அவ மனசப் புண்படுத்தி, அது இப்ப நம்மகிட்டயே வாய்கொடுத்து பேசாத பூச்சியா இருக்கு. அதுமாதிரி, இதுவும் இவன லவ் பண்ணிட்டு, விட்டுட்டமேன்னு மூலையில அழுதுகிட்டு இருக்கச் சொல்றியா.. சுஜா என்ன தப்புடி பண்ணினா..மூத்தவளுக்கு வரதட்சனைக்கு கொடுக்க வசதியில்லைன்னுட்டு, கல்யாணம் தள்ளிப்போய்கிட்டு இருக்க, சுஜாவோட அழகப் பார்த்து வரதட்சனையில்லாம கல்யாணம் பண்ணிக்கிறேன்னு லெட்டர் கொடுத்தவன, பண்ணிக்கட்டுமா?ன்னு கேட்டா..அதுக்கு அவ மேலேயும் பழி..அவன் மேலேயும் பழி..கடைசியில யாரு வாழ்ந்தா? அப்புறம் அவள விட்டுட்டு உனக்கு கல்யாணம் பண்றதா..எனக்குப் பண்றதான்னு குழப்பம்.. கல்யாண வயசு காத்திருக்குமா...அது தாண்டிப்போயாச்சு.. அதச் சந்தர்ப்பமா வச்சுகிட்டு ரெண்டாந்தாரமா வர்ரையா..மூணாந்தாரமா வர்ரையான்னு கேக்கற கூட்டம் வேற, இந்தக் கூட்டத்தில நீ சிக்க வேண்டாம் அஞ்சு. ' என்று மூச்சிரைக்கப் பேசியவள், சற்று நிறுத்தினாள்.

'அந்தப் பையனப் பத்தி கேள்விப்பட்டிருக்கேன். அவங்க குடும்பமும் நல்ல குடும்பந்தான். நல்லா வச்சிருப்பாங்கன்னு நம்பிக்கையிருக்கு. நீயும் புத்திசாலிப் பெண்தான். நல்லா வாழ்வேடி. வயசும், வாலிபமும் இருக்கையிலயே வாழ்க்கையை அனுபவிக்கனும். அதத் தொலைக்கிறவங்களோட சோகம் என்னன்னு, அனுபவிக்கிற எனக்குத் தெரியும்டி. நீ எங்களப் பத்திக் கவலப்படாம கிளம்பு. யாரும் கேட்டா, நான் சொல்லிக்கறேன்..'

'இல்லக்கா..முத்தக்கா எம் மேல ரொம்ப நம்பிக்கை வச்சிருக்கு..எனக்கு....'

'அஞ்சு..அவ மனசு எனக்கும் தெரியும்..அவ அப்பவே சுஜாவுக்கு ஆதரவாத்தான் பேசினா..எல்லாப் பெரிசும் சேர்ந்து அவளயும், அம்மாவையும் குழப்பிட்டாங்க. அவ அப்ப குழம்பினது, ரெண்டாவது பொண்ணு ஓடிப் போயிட்டா, மத்தப் பொண்ணு வாழ்க்கை பாதிக்குமேன்னுதான்... உனக்கென்னடி...நீதான் கடைக்குட்டி.. நீ ஓடிப்போறது ஒண்ணும் எங்க வாழ்க்கையை பாதிக்கப் போறதில்லை.. ஏற்கனவே பாதிக்கப் பட்டு இருக்கிற எங்க வாழ்க்கையப் பாக்கறப்ப, உன் முடிவு சரிதான்னு புரிஞ்சுக்குவா..அந்தப் பக்குவம் அவகிட்ட இருக்கு.. நீ தைரியாமா போடி..'

'உன் தைரியத்துலதான்...நான் போறேங்க்கா..அம்மா,அக்காகிட்ட என்ன மன்னிச்சிரச் சொல்லுக்கா..தேங்ஸ் வினோக்கா,மனோ' என்றபடியே இருவர் காலிலும் விழுந்தாள்.

விழுந்தவளை ஆசிர்வதித்தவளாக, 'நல்லாயிருடி..என் செல்லமே..எங்க இருந்தாலும் எங்கள நினச்சுக்கோடி..மறந்துராதே. ஒரே ஓரு ரெக்வெஸ்ட்-டி.. எனக்கோ,முத்தக்கா,சுஜாக்கோ இல்லன்னா கூட மனோவுக்காக நீ ஒரு காரியம் பண்ணனும்..'

'என்னக்கா..'

'எங்களோட எண்ணங்கள் மரத்துப் போக ஆரம்பிச்சாச்சு. ஆனா, மனோ இன்னும் சின்னப் பொண்ணுதான்..உன்ன கூட்டிட்டுப் போக ஒரு ராஜகுமாரன் வந்தமாதிரி, அவளுக்கும் இந்த மனப்புழுக்கத்தில இருந்து விடுதலைகிடைக்க ஒரு ராஜகுமாரன் வரணும்னு கடவுளை ப்ரே பண்ணு அஞ்சு...ப்ளீஸ்..டி..' என்றாள் வினோ நெகிழ்ந்த கண்களுடன்.

'சரி' என்பது போல் கலங்கிய கண்களுடன் தலையசைத்த அஞ்சு 'அவளுக்கு மட்டுமில்லக்கா..உங்க எல்லோருக்கும் சேர்த்து கண்டிப்பா பண்ணுவேங்க்கா...' என்று மனதினுள் நினைத்தவளாய், கிளம்பத் துவங்கினாள்.

'மனோ..அஞ்சு எங்கேன்னு அம்மா கேட்டா இன்னைக்கி எதுவும் வாயத்திறக்காத.. மார்க் ஷீட் வாங்க காலேஜ் போயிருக்கான்னு சொல்லு'. 'சரி' - என்பதுபோல் தலையாட்டினாள் மனோ.

------00000------

Saturday, September 23, 2006

நவராத்திரி கொலு ஆரம்பம்


நவராத்திரி கொலு ஆரம்பித்து விட்டது. சின்னப்பையனா இருக்கும் போது, வீடுவீடாக போயி, கொலு பார்த்து பாட்டு பாடி சுண்டல் சாப்பிட்ட ஞாபகம். ..ம்ம்..அது ஒரு அழகிய கனாக்காலம்...இப்போது கொலு ஆரம்பித்த போது மனதினில் உலாப் போகுது.. உங்களுக்கு?...

வாழ்த்துக்கள், நவராத்திரியின் இனிய துவக்கத்துக்கு..

Thursday, September 21, 2006

வான்ட் டு டூ வாண்டூஸ் மேத்ஸ்?






வாண்டூஸ் போட்ட கணக்குகளைப் பார்க்கிறீங்களா? (ஏற்கனேவே உங்களில் சிலர் பார்த்திருக்கலாம், பார்க்காதவர்களுக்கு)


நன்றி:இ-மெயில் நண்பர்கள்




Friday, September 15, 2006

விண்டோஸ் விஸ்டா - இலவசம்

மைக்ரோசாஃப்ட் நிறுவனத்தின் அடுத்த வெளீயீடான, விண்டோஸ் விஸ்டா-வின் மாதிரி வடிவம், இலவசமாக தரவிறக்கம் செய்ய அனுமதிக்கிறார்கள். இதனை ஜுன் 01,2007 வரை நீங்கள் பயன் படுத்திக் கொள்ளலாம். அமெரிக்காவிலுள்ளவர்கள், இதனை DVD-யாகப் பெற்றுக் கொள்ளலாம்.

மேலதிக விபரங்களுக்கு: க்ளிக் செய்க

Tuesday, September 12, 2006

சூர்யா - ஜோதிகா மெஹந்தி புகைப்படங்கள்







சூர்யா-ஜோதிகா திருமணப்படங்கள் பார்த்தவர்கள், மெஹந்தி புகைப்படங்களும் பார்க்க வேண்டாமா..இதோ இங்கே...




படங்கள் உதவி: இ-மெயில் நண்பர்கள்.

Saturday, September 09, 2006

ஓவியப்பாவை

Tuesday, September 05, 2006

சில்லென்று ஒரு காதல்

தூக்கம் வராமல் புரண்டு புரண்டு படுத்தான் சூர்யா. மணி நள்ளிரவு இரண்டு மணி. இன்னமும் தூக்கம் வரவில்லை. வழக்கமாய் படுத்தால் தூங்கிவிடும் பழக்கமுள்ள அவனுக்கு, இன்று என்னவோ தூக்கமே வரவில்லை. சென்ற வாரம் செங்கல்பட்டில் இருந்து, சென்னை வந்து, அம்மா,அப்பா, அக்கா உட்பட எல்லோரும் பார்த்து திருப்திபட்டிருந்த பெண்ணை, நாளை 'பெண்' பார்க்கப் போவது குறித்த சிந்தனை மனதில் ஓடியபடி இருந்தமையால், அவனால் தூங்க முடியவில்லை.

அம்மாவிற்கு பெண்ணை மிகவும் பிடித்திருந்தது. அதுவும் அவள் கூந்தலழகை அடிக்கடி மெச்சிக்கொண்டிருந்தது மனதில் ஓடியது. 'ச்..சே, போட்டோவாவது கேட்டு வாங்கி பார்த்திருக்கலாம். ஆனால், அம்மா, 'போட்டோல பார்க்கிறத விட, நேர்ல அழகாயிருக்கா, அதனால நேர்லயே பாத்துக்கோ'-ன்னு சொல்லிட்டதால, மீற முடியலை. அக்காவும், 'ஆமாடா, பொண்ணு லட்சணமாயிருக்கா, சினேகா மாதிரி. உனக்கு கண்டிப்பாய் பிடிக்கும்' என்று ஆமோதிக்க, அப்போதே அவன் மனது ரெக்கை கட்ட ஆரம்ப்பித்திருந்தது.

சூர்யாவும் பார்க்க லட்சணமான பையன்தான். சாஃப்ட்வேர் கம்பெனியில், கை நிறைய சம்பாதிப்பவன். சொந்தம் தவிர, பிற பெண்கள் என்றால் கொஞ்சம் அலர்ஜி. அதுபாதி, அவன் தூக்கம் போனதற்கு காரணம்.

"நாளைக்குப் பார்க்கப் போற பெண், எப்படி இருப்பாள், தனியாக பேசச் சொன்னால், என்ன பேசுவது" போன்ற சிந்தனைகள் அவனது தூக்கத்தை அலைக்கழித்தன. அவளும் ஒரு சாஃப்ட்வேர் கம்பெனியில்தான் பணிபுரிகிறாள். வசந்தின்னு முழுப்பெயர் சொல்லி கூப்பிடலாமா, இல்லல 'வசு' ன்னு அழைக்கலமா? ஒருபுறம் பெண்ணின் அருகாமை என்ற சிந்தனை கிளர்ச்சியூட்டினாலும், மறுபுறம் இனமறியா பயமும்,தயக்கமும் அலைக்கழித்தன. எப்போது தூங்கினான் என்று தெரியாது, பாதி கனவிலும், பாதி நினைவிலுமாக 'பல்லாங்குழியின் வட்டம் பார்த்தேன்' என்று சினேகாவுடன் ஆடிப்பாடியபடியே தூங்கிப்போனான்.

-----00000-----

'சில்லென்று ஒரு காதல்..சில்லென்று ஒரு..'...டிவியில் பாடல் சத்தமாக ஒலித்துக் கொண்டிருந்தது. திடுக்கிட்டு விழித்தான் சூர்யா. படுக்கைக்கு எதிரே இருந்த கடிகாரத்தைப் பார்த்தான். மணி 9.40... அலறிக்கொண்டு எழுந்தான். நண்பர்கள் எல்லோரும் அலுவலகத்துக்கு கிளம்பிச் சென்று இருந்தனர். பேச்சிலர் பசங்களா வீடெடுத்துத் தங்கியிருந்தார்கள். செங்கல்பட்டிலிருந்து தினமும் வருவது கடினம் என்பதால், சூர்யாவும் அவர்களோடு தங்கியிருந்தான். பெண் பார்க்கப் போவதால், அவன் அன்று விடுப்பு எடுத்திருந்தான். செல்போனை எடுத்துப் பார்த்தான். மூன்று 'மிஸ்ஸ்டு' கால்ஸ். அக்காதான் அழைத்திருந்தது. அப்படியே டயல் செய்தான். மறுமுனையில் அக்காதான் எடுத்தது.

'எட்டுமணில இருந்து கூப்பிட்டுகிட்டே இருக்கேன், அப்புறம் லேண்ட் லைன்ல கால் பண்ணப்ப விக்ரம் சொன்னான், இன்னும் தூங்கிகிட்டு இருக்கேன்னு. என்னடா, ஒரே ட்ரீமா? இப்பதான் எழுந்தியா?'

'ஆமாங்கா, தூங்கிட்டேன். என்ன விசயம்?'

'நாலு நாலறைக்கு, மைலாப்பூர் மாமா வீட்டுக்கு வந்திரு. அங்கிருந்து மாமா,நீ, நா மூணுபேரும் போலாம், பொண்ணு பாக்க'.

'ஆர்த்தி வரலயா, அவளும் பாக்கணும்னு சொன்னாளே....'. ஆர்த்தி சூர்யாவின் +2 படிக்கும் தங்கை.

'அது எதுக்குடா, வாயாடி ஏதாவது உன்ன கிண்டல் பண்ணிகிட்டு இருக்கப்போறா...'

'இல்லக்கா அவளும் வரட்டும்..நீங்க முதல்ல போனப்பவே கூட்டிட்டுப் போகலன்னு குறைப்பட்டா....'

'அதான் அம்மா ஸ்கூலுக்குப் போன்னு சொல்லியும் லீவு போட்டுட்டு உக்காந்திருக்கு, சரி நீ ரெடியாயிட்டு சொல்லு. ஷேவ் எல்லாம் பண்ணிக்கோ. வழக்கம் போல காலை டிபனை அவாய்ட் பண்ணாத. எதாவது சாப்பிடு, இல்ல முகம் சோர்வா தெரியும். '

'சரிக்கா..'

'வர்ரப்ப பாண்டி பஜார் வழியே வா.. நாயுடு ஹால் பக்கத்துல மூணு மணிக்கெல்லாம் ஃப்ரெஷ் மல்லிப்பூ வந்திருக்கும். ஒரு 20 முழம் வாங்கிக்கோ. அது போக ஒரு 5 முழம் தனியா வாங்கிக்கோ.'இந்தா, உன் லூசு தங்கச்சி ஏதோ பேசணுமாம், சட்டுபுட்டுன்னு பேசிட்டு ரெடியாகு'

'என்னண்ணா, நேத்து நைட்லாம் தூங்கியிருக்க மாட்டியீயே, அக்கா 'சினேகா'ன்னு சொன்னதால, 'பல்லாங்குழியின்..னுட்டு டூயட் பாடியிருப்பீயே. எனக்கு கலகல-ன்னுதான் அண்ணிவேணும் ஜோதிகா மாதிரி'

'யேய்.. அதிகப்பிரசங்கி...சொல்லுடி..என்ன?'

'நானும் பொண்ணு பாக்க வருவேன்...அம்மாவும்,அக்காவும் வேண்டாம்னுட்டு இருக்காங்க..ஆனா நா வருவேன், நீதான் சொல்லணும் அம்மாகிட்ட..'

'சரி..சரி...வம்பு பண்ணாத..நா ரெடியாகணும்'

'ஓகே...ஓகே...பொண்ணு பாக்க, நா இங்க இருந்து டீ சர்ட்/ஜீன்ஸ் எடுத்து வாரேன். மாமா வீட்ல, நீ டிரஸ் மாத்திக்கிடலாம். நீ ஏதாவது வெள்ளையும்,சொள்ளையுமா வரப்போறே..'

'ஏய்..பேண்ட்..சர்ட் தான் சரியாயிருக்கும்..'

'போண்ணா, நா சொல்றத கேளு..'

'சரிம்மா..அதயே போட்டுக்கறேன். இப்ப என்னய விடுறயா...எனக்கு நேரமாவுது..நா ரெடியாரேன்..'

'சரி..பை..பை..'

-----00000-----

அப்படி,இப்படி என்று ஒரு வழியாய் கிளம்ப மணி மதியம் இரண்டரை ஆயிற்று. செல்போனைத் தேடி எடுத்துக் கொண்டவன், தன் ஸ்ப்ளெண்டரை ஸ்டார்ட் செய்தான். மதிய வெயிலுக்கு சென்னையின் சாலை காத்து வாங்கியது. பாண்டிபஜாரை நெருங்குகையில் சற்று கூட்டம். மூன்று மணிக்கும், நாயுடு ஹால் அருகே கூட்டம் இருந்தது. வண்டியை நிறுத்திவிட்டு, பூ விற்பவர்களைத் தேடினான். மதிய வெயிலுக்கு, கடையின் கதவு திறந்து மூடுகையில் வெளியே வந்த 'ஏசி' குளிரும், மல்லிகை மணமும் இதமாயிருந்தது.

'பூ வேணுமா?' என்றது அருகிலிருந்த பூக்காரியின் குரல்.

'ஆமாம்மா, 20 முழம் ஒரு பேக்-கும், 5 முழம் தனியாகவும் கொடுங்க' என்ற படியே நூறு ரூபாய்த்தாளை நீட்டினான்.

'சில்லறை கொடு அய்யரே'

'தி நகர்,பாண்டி பஜார்-னாலே, வாங்கற எல்லோரும் உங்களுக்கு அய்யருங்க தானா' என்று கேலி செய்தபடியே சில்லறையை கொடுத்து, பூவை வாங்கிக் கொண்டு வண்டியருகே வந்தவன், சற்று தயங்கியபடி நின்றான். காரணம், அங்கு நின்று கொண்டிருந்த தேவதை. நீல நிற ஜீன்ஸும், 'பிங்க்' நிற டாப்ஸும் அணிந்திருந்தாள். மெலிதான உதட்டுப் பூச்சு. ஒற்றைக் கத்தையாய் ஒரு சில முடிக் கொத்துக்கள், அவள் அசைகையில் அது முன் கன்னங்களைத் தொட்டுச் சென்றது அழகாயிருந்தது.

அவன் பார்வை அவளைத் துளைத்திருக்க வேண்டும், 'யாரோ பார்க்கிறார்கள்' என்ற எண்ணம் ஏற்பட, அருகில் வந்து கொண்டிருந்த அவனை நோக்கினாள்.

'எக்ஸ்கியூஸ் மீ..கொஞ்சம் நகர்ந்துக்கிறீங்களா, வண்டிய எடுக்கணும்' என்றான் அருகில் வந்தபடி.

'ஓ..ஸாரி..' என்றபடியே சிறு புன்முறுவலுடன் சற்று நகர்ந்து, அவன் வண்டியை எடுக்க வழிவிட்டாள்.

பூவை பாக்ஸில் வைத்து, கிளம்ப முயன்றவனை, மீண்டும் பார்க்கத் தூண்டியது, அவள் முகம்.

சற்றே திரும்பியவனைப் பார்த்து, 'எக்ஸ்கியூஸ் மீ சார்...'உங்களுக்கு ஆட்சேபனை இல்லன்னா, உங்களோட 5 நிமிடம் எடுத்துக்கலாமா?' என்று வினவ, புருவம் உயர்த்தி, 'ஏன்' என்பது போல் பார்த்தான்.

'ஐ யம் பூஜா..பைனல் இயர் எம்.ஏ சைக்காலஜி ஸ்டூடண்ட்.. பைனல் இயர் புராஜக்ட்-ஆ, 'திருமணம்/வாழ்க்கைத்துணை' பற்றி இந்தக்கால இளைஞர்களின் சிந்தனை குறித்து டேட்டா, கலெக்ட் பண்றோம். அதுக்கான கேள்விகளுக்கு, உங்களோட பதில் தேவை..கொஞ்சம் உங்க டைம் கிடைக்குமா, ப்ளீஸ்' என்றாள் கொஞ்சலாக.

சும்மாவே பொண்ணுங்ககிட்ட பேசத் தயங்குகிறவன், கேள்வி-பதிலில் எசகு பிசகாக மாட்டிக்குவோமோ என்று பயந்தான். 'இல்லீங்க..அவசரமா மைலாப்பூர் போறேன்..ஸாரி' என்றபடியே விலக முயற்சித்தான்.

''உங்களுக்கு ஆட்சேபம் இல்லைன்னா, நான் ஆழ்வார்பேட்டை ஆஞ்சநேயர் கோவில் போகனும், போற வழியில என்னை ட்ராப் பண்ணமுடியுமா? அப்படியே, நான் எனக்கு வேண்டிய டேட்டாவினை பைக்கிலேயே கலெக்ட் பண்ணிக்குவேன்..ப்ளீஸ் சார், கோ-அபரேட் பண்ணுங்க சார். ஒரு ஸ்டுடண்-டுக்கு ஹெல்ப் பண்ணின மாதிரியிருக்கும்''

அழகின் கெஞ்சலை, அசட்டை பண்ணமுடியவில்லை. வேண்டியவர்கள் யாரும் பார்த்து தவறாக எண்ணிவிடுவார்களோ என்ற அச்சம் லேசாய் எட்டிப்பார்த்தாலும், 'சரி வாங்க.. போலாம்.' என்றான். தேவதை பின் அமர, வண்டி பயணித்தது.

சத்தம் செய்யாமல் வண்டி 'ஸ்மூத்' ஆகச் செல்ல, மவுனத்தைக் கலைக்கும் விதமாய் பூஜாவின் குரல்.

'முத கேள்வி திருமணம் பற்றி சார்.. எம்மாதிரியான திருமணம் உங்களுடைய இஷ்டம். காதல் திருமணமா? பெரியவங்க பாத்து நிச்சயிக்கபடுற திருமணமா? உங்களது சாய்ஸ்க்கான காரணம்?"

'ம்..ம்..பெரியவங்க பார்த்து முடிக்கற கல்யாணம்தான். லவ் மேரேஜ்-ல, காதலிக்கும்போதே எல்லாத் திரில்லும் முடிஞ்சிரும். ஆனா, அரேஞ்ச்டு மேரேஜ்-ல கல்யாணத்துக்கப்புறம்தான் வாழ்க்கையே ஆரம்பிக்கிறதானல த்ரில் அதிகமிருக்கும்னு நினைக்கிறேன்'

'சார் ரொம்ப ஹோம்லி டைப்னு நினைக்கிறேன்..என்று சிரித்தவளாக, 'காதல் கல்யாணம்/அரேஞ்ட் மேரேஜ்..எதுவானாலும், கணவன் - மனைவியிடையே காதல் நிலைத்திருக்க என்ன தேவைன்னு நினைக்கிறீங்க?'

'யோசிக்க வைக்கிறீங்களே..ம்..ம்...பரஸ்பரம் மதிப்பும்,நட்பும் பாசமும் இருந்தா, கண்டிப்பாக நிலைத்திருக்கும்னு சொல்லலாம்..முக்கியமா ஈகோ இல்லாம இருக்கணும்"

'ம்...ஒகே..அடுத்தது..உங்க வாழ்க்கைத்துணைகிட்ட கண்டிப்பா இருக்கணும்னு நினைக்கிற குணாதிசயங்கள் மூணு சொல்லமுடியுமா?'

'யா..முதல் தேவை..அனுசரித்துப் போகிற குணம். அப்புறம் யார் பத்தியும் குறை கூறாம எதையும் பாசிட்டிவா பார்க்கிற பக்குவம்..தேவைக்கு செலவழிக்கிற எண்ணம்..'.

'ஏன் சார்..நீங்க 30+ஆ..' என்று அவள் கேட்டு சிரிக்க. 'ஏங்க..பிராக்டிகலா இல்லையா?..பட்..நீங்க எக்ஸ்பெக்டேஷன் தானே கேக்கறீங்க..' என்று சிரித்தான். 'கண்டிப்பா இருக்க கூடாதுன்னு ஏதாவது குணாதிசயம்னு ஏதாவது கேள்வியிருக்கா, அப்படின்னா 'அழுகை'-ன்னு போட்டுக்கங்க என்றான்.

'இம்பாஸிபிள்..சார்..கண்ணீர்தானே சார் பெண்களோட முக்கிய ஆயுதம்..'

'கருத்துச் சுதந்திரம்..அந்த சுதந்திரம் இந்த சுதந்திரம் வேணும்னு கேக்கற அளவுக்கு வளர்ந்து இருக்கறீங்க, ஏங்க இன்னும் பொண்ணுங்க கண்ணீர ஆயுதமா நம்பிகிட்டு இருக்கணும். அந்தக்காலத்துல படிப்பு கிடையாது..இப்பதான் படிச்சு மேலே வர்ரீங்களே..புத்தியை வச்சு, சமமா சமாளிக்கணும். பெண்களின் கண்ணீர் எனக்கு பிடிக்காத ஒன்று'. பேசிக் கொண்டே வந்தவன், ரெட் சிக்னல் விழுவதை உணர்ந்தவனாக, பிரேக் அடித்தான். மெல்லியதாய் தோள்கள் உரசின.

'தேங்க்ஸ் பார் த சிக்னல்.. எங்க நீங்க போற வேகத்துக்கு சீக்கிரம் என்னை இறங்க வேண்டிய இடத்துல ட்ராப் பண்ணிடுவீங்களோன்னு பார்த்தேன்..அப்புறம் மிச்ச கேள்விய கேக்க முடியாது' என்றாள் சிரித்தபடியே..

'அப்ப இன்னும் முடியலையா..கேள்வி கேக்கறது சுலபம்ங்க..பதில் சொல்றதுதான் கஷ்டம்'

'இது இலகுவான கேள்விதான் சார்.. மெளனராகத்தில, உங்களுக்கு 'கார்த்திக்-ரேவதி' காதல் புடிச்சுதா, இல்லை 'மோகன் - ரேவதி' காதலா? ஏன்?'

அதற்குள் சிக்னல் விழுந்துவிடவே, வண்டியை நகர்த்தியவனாக பதிலுரைக்கத் தொடங்கினான். 'மோகன் - ரேவதி காதல்தான். முன்னது படிக்கற காலத்துல துடிப்பில டக்குன்னு வர்ர காதல். ஆனா, பின்னது அனுசரனையோடு அன்பால உணரப்படுற காதல்..அதுதான் எனக்கு பிடிச்சது..இப்ப 30+ன்னு சொல்வீங்களே.. ' என்றான்.

'சத்தியமா...' என்றபடியே பெரிதாய்ச் சிரித்தவள், 'கடைசி கேள்வி சார்.. எப்பவும் உங்களுக்கு பிடிச்ச லவ் டூயட் பாட்டு எது சார்?'

'இது உங்க ஆய்வுக்கேள்வில இருக்கா..இல்ல சொந்தக் கேள்வியா?'

'ஐயோ..ஆய்வுக்கேள்விதான்..சில பேர்..'நிலா காயுது..நேரம் நல்ல நேரம்..னு' கூடச் சொல்லியிருக்காங்க..' என்றபடி கண்சிமிட்ட

'பதில் சொல்றவரோட தரம் பாக்கறீங்களாக்கும்..' என்றவன், 'எனக்குப் பிடிச்சது..எஸ்பிபி-சொர்ணலதா பாடும், 'நெஞ்சைத்தொட்டு அள்ளிக்கொண்ட மங்கை பேரும் என்னடி..ங்கற பாடல் என்றான்.

'நீங்க கண்டிப்பா 30+ஆ தான் இருப்பீங்க சார்.. ..எனிவே...ரொம்ப தேங்க்ஸ் சார். ரொம்ப பொறுமையா பதில் சொன்னதுக்கு. கரெக்டா, ட்ராப் பண்ற எடத்துல இண்டர்வ்யூவ முடிச்சிட்டேன். சார்..' என்றபடி இறங்கத் தயாரானாள். சூர்யாவும் வண்டியை ஓரமாக நிறுத்தினான்.

வண்டியிலிருந்து இறங்கியவள், 'அவசரமா போற உங்களைத் தொந்தரவு பண்ணிட்டேன். உங்க ஒத்துழைப்புக்கு நன்றி..' என்றாள்.

'ஆமாங்க..அவசரம்தான்..இன்னைக்கி எனக்கு அலையன்ஸ் பார்க்கிறாங்க. வீட்ல இன்னும் வரலையேன்னு நினைச்சுட்டு இருப்பாங்க.'

'ஒ..ஒ..தென் யூ ஆர் மை ரைட் சாய்ஸ். அதான், எல்லா கேள்விக்கும் பதில் தயாரா வச்சிருந்தீங்க போல. ஆல் த பெஸ்ட் சார். ஆனா, பொண்ணு என்ன பாட்டு பிடிக்கும்னு கேட்டா அட்லீஸ்ட் ஏதாவது ஒரு ரஹ்மான் பாட்டு சொல்லுங்க சார். இல்லன்னா, பொண்ணு நீங்க ரொம்ப பழைய காலத்து ஆளுன்னு நினைச்சுடப் போறாங்க'

'அதெப்படிங்க..நீங்க கூடத்தான் ஜுன்ஸ்,டாப்ஸ் போட்டு இருக்கீங்க. அதுக்காக உங்கள 'மாடர்ன் டிரஸ்' மங்காத்தான்னு சொல்றதா..இல்ல, கழுத்தில பிள்ளையார் டாலர் வச்ச செயின் போட்டிருக்கறதால 'மாடர்ன் மகாலட்சுமி'ன்னு சொல்லவா..'

'ஓகே..ஒகே...கூல் சார்..ஜஸ்ட் ஃபன்... ஆல் த பெஸ்ட் அண்ட் தேங்க்ஸ் ஃபார் த லிப்ட்'

'பை...' என்றபடியே பைக்கை உதைத்தான் வீடு நோக்கி. இன்று வசந்தியைப் பெண் பார்க்க போகவில்லையென்றால், இவளிடமே அட்ரஸ் வாங்கி காதலிக்கத் தொடங்கியிருப்பேனோ' என்று எண்ணியவனாக பைக்கை மைலாப்பூர் நோக்கிச் செலுத்தினான்.

-----00000-----




பெண்வீடு. அக்கா,மாமா,தங்கை உடன் வர, டாக்ஸி பிடித்து பெண்வீடு வந்தாயிற்று. நல்ல விசாலமாக இருந்தது வீடு. மாப்பிள்ளைக்கெனெ தனி சேர் போட்டிருந்தார்கள். எதிரே ஒரு தனிசேர் காலியாக இருந்தது. வசந்தியின் உறவினர்கள் இடது புறமும், இவன் உறவினர்கள் வலதுபுறமுமாக அமர்ந்து, 'கலகல' வெனெ பஜ்ஜி,சொஜ்ஜி சாப்பிட்டுக்கொண்டே பேசிக்கொண்டிருந்தார்கள். சூர்யாவுக்கு சற்று படபடப்பாக இருந்தது. ஏனோ, "என்ன பாட்டு பிடிக்கும்னு கேட்டா ஏதாவது ரஹ்மான் பாட்டு சொல்லுங்க சார்" என்ற பூஜாவின் குரல் காதில் ஒலித்தது. என்ன பாட்டு சொல்லலாம் என்று யோசித்துக் கொண்டிருந்தவனை, 'பொண்ணு வாரா..நல்லா பாத்துக்கடா' என்ற அக்காவின் குரல் நிமிரச் செய்தது. குனிந்த தலை நிமிராமல், பட்டுச்சேலையில் மகாலட்சுமியாக பெண் 'காபி' எடுத்து வந்து கொண்டிருந்தாள். முதல்ல 'மாப்பிள்ளளக்கு கொடும்மா' என யாரோ பெரிசு சொல்ல, சற்றே நிமிர்ந்து அவனைப் பார்த்தவாரே அவனருகில் வந்தாள். நிமிர்ந்து பார்த்த சூர்யா, சற்றே திடுக்கிட்டான், இந்தப் பெண்..இந்தப் பெண்..பூஜா போல இருக்கிறாளே..கனவோ..' என்று எண்ணி சற்று கண்ணைச் சிமிட்டிக் கொண்டு பார்க்க, காபி டிரேயே-யை அவன் முன்னே நீட்டியவள், அவன் காதருகே அவனுக்கு மட்டும் கேட்கும் விதமாய்.. 'என்ன பாட்டு புடிக்கும்னு கேட்டா, 'சில்லுன்னு ஒரு காதல்-னு ரஹ்மான் பாட்டச் சொல்லு' என்று சொல்லி அவளுக்கென்று இருந்த இருக்கையில் போய் அமர்ந்தாள். சூர்யாவிற்கு சற்று 'ஷாக்'காயிருந்தது.

'என்னடா..பொண்ணு பிடிச்சிருக்கா..' - அக்காதான் கேட்டாள். திகைப்பிலிருந்து விடுபடாமலிருந்த சூர்யா, என்ன சொல்வது என்று தெரியாமல், 'அவங்களுக்கு பிடிச்சிருக்கா'ன்னு கேளுங்க' என்றான்.

'பொண்ணுக்கெல்லாம் பிடிச்சிருக்குன்னு அவ முன்னமே சொல்லிட்டா, நீதாண்டா சொல்லனும்'

'எப்ப சொன்னாங்க?' என்று கேட்டவண்ணம் பெண்ணைப் பார்க்க, வசந்தி அலையஸ் பூஜா அவனைப் பார்த்து நளினமாய் புன்னகைத்தாள். அக்காவை நோக்கி, முழித்தவனிடம், 'எல்லாம் உன் தங்கை யோசனைதான். தனியா பேசச் சொன்னா, சங்கோஜப் படுவியோன்னுட்டு 'கேஷுவலா' இருக்கட்டுமேன்னு, தங்கச்சி யோசனைப் படி அனுப்பி வச்சோம். அவ பேசிட்டு ஓகேன்னுட்டா, உனக்கும் ஓகே தானே?'

ஆமோதிப்பவன் போல தலையசைத்தவன், தங்கையைப் பார்த்து முறைக்க, அவளோ, அங்கு ஓடிக்கொண்டிருந்த 'டிவி' பெட்டியை கை நீட்டினாள்.

அங்கே 'ஜோதிகா' 'சில்லுன்னு ஒரு காதல்' பாடல் பின்னணியில் ஆடிக் கொண்டிருந்தார்.

**************************

தேன்கூடு - செப்டம்பர் மாதப் போட்டிக்கு.



தேன்கூடு போட்டிக்கு இன்னுமொரு கதை: தவிப்பு

Saturday, September 02, 2006

தவிப்பு - தேன்கூடு போட்டி

மணி காலை ஒன்பது பதினைந்து. ஆழ்வார்பேட்டையில் இருந்த அந்த சாஃப்ட்வேர் அலுவலகம் சுறுசுறுப்பாக இயங்கத் தொடங்கியிருந்தது .

"டேய் ஜெய் மச்சி, இன்னக்கி எதும் 'கிளையன்ட் சைட்' போறீயாடா?"

"எதுக்குடா கேக்குறே, காரியம் இல்லாம காத கடிக்க மாட்டியடா நீ"

"இல்லடா, பாரீஸ் கார்னர்-ல இருக்கற என்னோட கிளையன்ட் சைட் வரைக்கும் போகனும், பஸ்ல போனா, போக வர லேட்டாயிடும், அதான் உன் பைக்க குடுத்தா சட்டுனு போயிட்டு, பட்டுன்னு வந்துருவேண்டா" என்றான் சூர்யா.

"ஏண்டா, நாயே, உங்கிட்டதான் லைசென்ஸ்ஸே கிடையாதே, அதுவும் இப்பதான் கியர் வண்டிய ஓட்ட கத்துகிட்டு இருக்கே, அதுக்குள்ள மவுண்ட் ரோடு சவாரி கேக்குதோ, போடா ஒழுங்கா பஸ்ஸிலேயே போ"

"அவசரம் புரிஞ்சிக்க மாட்டியேடா, போற வழியிலே என் ஆள பிக்கப் பண்ணி, ஒரு காபி சாப்பிட்டுட்டு அவ எழுதப்போற எக்ஸாம்க்கு 'ஆல் த பெஸ்ட்' சொல்லிட்டு காலேஜ்ல ட்ராப் பண்ணனும்டா, கொஞ்சம் கருணை பண்ணுடா, மச்சி"

"என்னக்கி அவ அப்பன்கிட்ட மாட்டிகிட்டு உத வாங்கப்போறியோ தெரியலை, சரிசரி..இந்தா கீ.. மாசக் கடைசி, மாமா -கிட்ட மாட்டிக்கிடாம ஜாக்கிரதையாகப் போ"

எச்சரிக்கையோடு நண்பன் கொடுத்த சாவியை வாங்கிக்கொண்டு யமாஹாவை உதைத்துக் கிளம்பினான் சூர்யா.

யமாஹா-ன்னாலேயே ஒரு கிக்-தான், அதோட சத்தமே ஒரு செக்ஸி-தான்..ம்ம் எப்ப இந்த மாதிரி ஒரு வண்டி வாங்கப்போறமோ?" என்று மனதில் எண்ணியபடி வண்டியை ஓட்டியவன், அவள் வழக்கமாய் வரும் பஸ் நிறுத்தத்திற்கு சற்று முன்னர் ஓரமாக நிறுத்தினான்.

பஸ் நிறுத்தத்தில் வசந்தி நிற்கிறாளா? என்று பார்த்தான். பத்து நிமிடம் ஒடியிருக்கும்.

"சினேகிதனே..சினேகிதனே ரகசிய சினேகிதனே..." - மொபைல் சிணுங்கியது. வசந்திதான் அழைத்திருந்தது.

"ஹாய் வசந்தி, 'ஆல் த பெஸ்ட் பார் த எக்ஸாம்' மா. கொஞ்சம் லேட்டாயிடுச்சி...எங்க இருக்க நீ இப்ப?" என்றான் கனிவாய்.

"மண்ணாங்கட்டி...உனக்காக எவ்வளவு நேரம் காத்து நிக்கறது.. எக்ஸாமுக்கு நேரமாயிடுச்சுன்னு சுசிலாவோட வந்திட்டேன். அட்லீஸ்ட் லேட்டாகும்னுவாது சொல்லியிருக்கலாமில்ல...யோசிக்கவே மாட்டியா இங்க ஒருத்தி காத்துகிட்டு இருக்காளேன்னு..."

"ஹேய்..அது வந்து ..ஃபிரண்டு கிட்ட உனக்காக கியர் வண்டி வாங்க லேட்டாயிடுச்சு..." முடிக்கும்முன்னரே மறுமுனை அலறியது..

"மண்ணாங்கட்டி...லைசன்ஸ் வாங்க முன்னாடி, எதுக்கு இது மாதிரியெல்லாம் பண்ற..உன்கிட்ட இந்த பந்தா எல்லாம் கேட்டனா....என்னக்காவது போலிஸ்ல மாட்ட போற...போ.. சரி, எனக்கு நேரமாச்சு, நான் எக்ஸாம் ஹாலுக்குப் போறேன். சாயந்திரமாவது நேரத்துக்கு வா" என்று சொல்லி துண்டித்தது மறுமுனை.

"ம்ம்..ச்சே..எல்லாம் இந்த ஜெய்யால..கொஞ்சம் அலம்பல் பண்ணாம சாவியக் குடுத்திருந்தான்னா, வசந்தியை புடிச்சிருக்கலாம். எல்லாம் நேரம்..காலையிலேயே கடி வாங்கனும்னு. ம்..ம்..அவளும் பாவம்தான், எவ்வளவு நேரம் காத்த்துகிட்டு இருப்பா என்று மனதைச் சமாதானம் செய்து கொண்டு வண்டியை உதைத்தான், பாரீஸ் கார்னரை நோக்கி.

மனதில் காதலின் கனம் குறைய, வேலையின் தாமதம் சிந்தையில் உறைக்க, கவனமாய் வண்டியை சாலையில் செலுத்தினான்.

மவுண்ட் ரோட்டில், சீரான யமஹாவின் சத்தம் நன்றாயிருந்தது. அங்கும் இங்கும் நிறைய ட்ராபிக் கான்ஸ்டபிள் தென்படவே, மெல்ல உஷாரானான். "மாசக் கடைசின்னா சரியா ஆஜராயிடுராங்களே.." என்று நினைத்தவனுக்கு லேசாய் பயம் தொத்திக் கொண்டது. வசந்தி வாயால வேற, 'மாமா கிட்ட மாட்டுவேன்னு' சபிச்சிருக்கா. கவனமாயிருக்கனும், இல்லன்னா, சாயந்திரம் போய் திட்டு வாங்கனும்.

தனியா போனா, ஈஸியா புடிச்சிருவானுக, கூட்டத்தோட நடுவில போயிரனும், என்று திட்டமிட்டு, அது மாதிரியே போனான். இரண்டு சிக்னல் ஒட்டி இருந்த போலீஸ் கும்பலிடமிருந்து தப்பியாகிவிட்டது.

மாட்டினா கொடுக்க காசு இருக்கிறதா என்று யோசித்தான், பர்ஸில் நூறு ரூபாயாய் இருப்பது நினைவுக்கு வந்தது. இருபது ரூபாயாய் சில்லறை இருந்தால், ஒரு இருபது கொடுத்து தப்பிக்கலாம், இப்ப மாட்டினா நூறும் போகுமே என்ற சிந்தனையோடு வண்டி ஓட்டியவன், ஸ்பென்சர் அருகே வந்ததை உணர்ந்தான்.

அடடா..இந்த சிக்னல்லயும் இருக்கானுவளா? என்று நினைத்தவன், ஒரு ட்ராபிக் போலீஸ் கூட்டமே இருப்பதைப் பார்த்தான், ஏற்கனவே பிடிபட்டிருந்தவர்கள் கையைப் பிசைந்து கொண்டிருந்தார்கள்.

"சரி...லாஜிக்கப் புடி.. கூட்டத்தோட போலாம்னு, சட்டுன்னு ஒரு ஆட்டோ பின்னால ஒதுங்கி, ஆட்டோவைப் பின் தொடர்ந்தவன், சிக்னலைக் கவனிக்கத் தவறிவிட்டான். ஆட்டோ 'மஞ்சள்' சிக்னலில் அடித்துச் செல்ல, நம்மால் மஞ்சளில் கடக்க முடியாது என எண்ணியவன் சற்றே 'ப்ரேக்' அடிக்க, அதற்குள் 'சிவப்பு' விளக்கு வரவே வண்டியை நிறுத்த முற்பட்டான். வண்டி இழுத்துக் கொண்டே போய், நிறுத்த வேண்டிய கோட்டைத் தாண்டி நின்றது, சரியாக அங்கு நின்று கொண்டிருந்த ட்ராபிக் கான்ஸ்டபிள் முன்னால்.

சூர்யாவிற்கு 'திக்' கென்றிருந்தது. போச்சுடா..இன்னக்கி நம்ம நேரம் இங்கேயும் வேலை செய்யத் தொடங்கிவிட்டது. வசந்தி மற்றும் ஜெய்யின் ஆசிர்வாதம் பலித்து விட்டதோ?. மெல்ல வண்டியை கோட்டிற்குள் கொண்டு வர எத்தனித்தான்.

அதற்குள், அந்தக் காவலர் அவனைப் பார்த்து, கையசைத்துக் கூப்பிட்டார். சூர்யாவிற்கு முகம் வெளிற ஆரம்பித்தது.

"என்னா தம்பி..அவ்வளவு வேகமா எங்க போறீங்க..சிக்னல்ல கூட மதிக்காம"

"இல்ல சார், வந்து.. ஆபிஸ்க்கு லேட்டாயிடுச்சு.. அதான்.. " என்று ஏதோ உளறினான். மறுபுறம் ட்ராபிக் கிளியராகி, இவன் புறம் புறப்படத் தயாரானது. கவுண்டவுன் நெருங்கிக் கொண்டிருந்தது.

"யமாஹா வச்சிருந்தாலே, அப்படி இப்படி ஸ்டைல் பண்ணச் சொல்லும். எங்க போறே? லைசன்ஸ் இருக்கா"

"இல்ல..பாரீஸ் கார்னர்-க்கு".. என்று முனகினான். நூறையும் கொடுத்து சமாளிக்க வேண்டியதுதான், என மனதுக்குள் எண்ணினான்.

"402 ..நா இந்த தம்பி கூட சென்ட்ரல்ல இறங்கி அங்க ட்யூட்டியப் பாக்கறேன், நீங்க இங்க கவனியுங்க.." என்ற அந்த காவலர், சூர்யாவிடம், 'சரி தம்பி... என்ன நீங்க சென்ட்ரல்ல இறக்கி விட்டுட்டு போயிருங்க. சிக்னல் விழப் போகுது, வண்டிய எடுங்க. மெதுவா போங்க, தலகால் புரியாம ஓட்டாதப்பா" என்ற படியே பில்லியனில் அமர்ந்தார்.

சூர்யாவிற்கு நடப்பவை புரிய சில நொடிகளாயிற்று, சட்டென புரிந்தவன் 'க்ரேட் எஸ்கேப்' என்று சாயந்திரம் வசந்தியிடம் சொல்ல வேண்டுமென எண்ணிபடி, செல்லமாய் யமஹாவை உதைக்க, சீறிக் கொண்டே வழக்கமாய் மற்ற வாகனங்களை முந்திச் சென்றது யமாஹா.


-----------------------------------------------------------------------------
தேன்கூடு - செப்டம்பர் மாத போட்டிச்சிறுகதை

தேன்கூடு போட்டிக்கு இன்னுமொரு கதை: சில்லென்று ஒரு காதல்